ZEKARIA 8
8
1Ningĩ ndũmĩrĩri ya Jehova Mũnene wa Ita ĩkĩnginyĩrĩra, ngĩĩrũo atĩrĩ, 2Jehova Mũnene wa Ita ekuuga ũũ: Nĩ kũigua njiguĩte kĩgoru mũno nĩ ũndũ wa Zayuni, ngakĩigua kĩgoru ’thũgũtĩte mũno nĩ ũndũ warĩo. 3Ningĩ Jehova ekuuga atĩrĩ, Nĩ’hũndũkĩte ngacoka Zayuni, na nĩngatũũra o gatagatĩ ka Jerusalemu; narĩo itũũra rĩu rĩa Jerusalemu rĩrĩtuwo Itũũra rĩa Ũhoro-wa-Ma, nakĩo kĩrĩma kĩa Jehova Mũnene wa Ita gĩtuwo Kĩrĩma Kĩrĩa Kĩamũre. 4Ningĩ Jehova Mũnene wa Ita ekuuga ũũ: Kũu njĩra-inĩ cia Jerusalemu nĩkũrĩgĩaga gĩtindanio gĩa athuri o na iheti, mũndũ o mũndũ anyitĩte mũthĩgi wake na guoko nĩ ũndũ wa ũrĩa maingĩhĩtie matukũ mao ma ũkũrũ. 5Ningĩ kũu njĩra cia itũũra rĩu kũgĩage itutu cia tũmwana na tũirĩtu tũgĩthaka njĩra-inĩ ciarĩo. 6Ningĩ Jehova Mũnene wa Ita ekuuga ũũ: Ũndũ ũcio ũngĩkonagwo ũrĩ wa kũgegania nĩ arĩa magakorũo matigarĩte a rũrĩrĩ rũrũ matukũ macio-rĩ, anga wagĩtuĩka wa kũgegania ũkĩonwo nĩ niĩ? Ũguo nĩguo Jehova Mũnene wa Ita ekũũria. 7Ningĩ Jehova Mũnene wa Ita ekuuga ũũ: Atĩrĩrĩ, ngahonokia andũ akwa moime bũrũri wa mwena wa irathĩro, o na moime bũrũri wa mwena wa ithũĩro, 8ndĩmarehe gũkũ, nao matũũre o gũkũ Jerusalemu thĩinĩ; nao matuĩke andũ akwa, na niĩ nduĩke Ngai wao, ndĩ wa kwĩhokeka na ndĩ mũthingu.
9O na ningĩ Jehova Mũnene wa Ita ekuuga ũũ: Wĩyũmĩrĩriei, inyuĩ mũiguaga ndũmĩrĩri ici matukũ maya ciumĩte tũnua twa anabii, o arĩa maarĩ kuo mũthenya ũrĩa itina cia nyũmba ya Jehova Mũnene wa Ita ciaakagwo, o itina cia hekarũ, nĩ getha ĩcoke gwakwo. 10Nĩ gũkorũo mbere ĩo gũtiarĩ ũthũmbi, kana ũkombori o na ũrĩkũ wa nyamũ cia wĩra, o na kana gũkagĩa thayũ o na atĩa he mũndũ akiumagara oime mũciĩ, o na kana akĩinũka, nĩ ũndũ wa thũ; nĩ ũndũ nĩ niĩ ndatũmĩte andũ othe mokanĩrĩre, o mũndũ okĩrĩre ũrĩa ũngĩ. 11No rĩrĩ, ndigeka andũ aya matigarĩte maũndũ ta ũrĩa ndekanire tene; ũguo nĩguo Jehova Mũnene wa Ita ekuuga. 12Nĩ ũndũ-rĩ, makahandaga mĩgũnda yao marĩ o na thayũ, naguo mũthabibu nĩũgaciara maciaro maguo, o nayo thĩ ĩrute uumithio wayo, narĩo ireera rĩitĩke riumĩte igũrũ; na nĩngarathimĩra andũ aya matigarĩte indo icio ciothe. 13Na nĩgũgakinya atĩrĩ, atĩ o ta ũrĩa mwatũire muonagwo ta arĩ inyuĩ mũgwatĩtwo nĩ kĩrumi thĩinĩ wa ndũrĩrĩ, inyuĩ andũ a nyũmba ya Juda o na ya Isiraeli-rĩ, ũguo noguo niĩ o na niĩ ngamũhonokia, mũcoke kuonwo ta mũrathimĩtwo o kũrathimwo; ta tigai guoya, mwĩũmĩrĩrie. 14Nĩ ũndũ Jehova Mũnene wa Ita ekuuga ũũ: O ta ũrĩa ndecirĩtie ndĩmwĩke ũũru hĩndĩ ĩrĩa maithe manyu maa’thirĩkirie makĩng’ũrĩkia, na ngĩaga kwĩricũkwo nĩ ũndũ wa ũhoro ũcio, ũguo nĩguo Jehova Mũnene wa Ita ekuuga, 15ningĩ no taguo matukũ maya njokete gwĩciria atĩ njĩke Jerusalemu, o na andũ a nyũmba ya Juda o nao, maũndũ mega. Tigai guoya. 16#Ef 4.25.Maũndũ marĩa mwagĩrĩirũo nĩ gwĩka nĩmo maya, atĩ mwaranagĩrie ũhoro-wa-ma o mũndũ na mũndũ ũrĩa ũngĩ, na mũhinganagĩrie matuĩro ma cira na kĩhooto, nĩguo honeke thayũ ciama-inĩ cianyu iria ciikaraga ihingo-inĩ cianyu; 17na mũndũ o na ũrĩkũ wanyu ndakanathugundĩre mũndũ ũrĩa ũngĩ maũndũ moru na ngoro yake, na mũtikanende mĩĩhĩtwa ya ũrongo; nĩ ũndũ-rĩ, maũndũ macio mothe nĩmo ’thũũrĩte; ũguo nĩguo Jehova ekuuga.
18Ningĩ ndũmĩrĩri ya Jehova Mũnene wa Ita ĩkĩnginyĩrĩra, ngĩĩrũo atĩrĩ, 19Jehova Mũnene wa Ita ekuuga ũũ: Ũhoro wa kwĩhinga kũrĩa irio mweri wa ĩna, o naguo wa kwĩhinga kũrĩa irio mweri wa ĩtano, o na ningĩ wa kwĩhinga kũrĩa irio mweri wa mũgwanja, o na wa kwĩhinga kũrĩa irio o ro ũguo mweri wa ikũmi-rĩ, mehinga macio makagarũrũka matuĩke ciathĩ cia ndũrũhĩ, na cia gĩkeno, o na cia mũcaũko wa ngoro, harĩ andũ a nyũmba ya Juda; tondũ ũcio rongoragiai ũhoro-wa-ma, o na wa thayũ. 20Ningĩ Jehova Mũnene wa Ita ekuuga ũũ: O na ningĩ nĩgũgakinya atĩrĩ, atĩ gũkũ nĩgũgoka andũ a ndũrĩrĩ ingĩ, o na andũ arĩa matũũraga matũũra maingĩ; 21nao andũ arĩa matũũraga itũũra-inĩ rĩmwe mathiĩ harĩ andũ a itũũra rĩngĩ makiugaga atĩrĩ, Nĩtũthiĩi na ihenya tũgathaithe Jehova atũtugage, na tũrongorie Jehova Mũnene wa Ita. Nao macokie atĩrĩ, Nĩguo; nĩtũgũtwarana na inyuĩ kuo. 22Ĩĩ, ti-itherũ andũ a iruka nyingĩ, o na a ndũrĩrĩ irĩ hinya, nĩmagoka kũrongoria Jehova Mũnene wa Ita o gũkũ Jerusalemu, na mathaithe Jehova nĩguo amatugage. 23Jehova Mũnene wa Ita ekuuga ũũ: Matukũ-inĩ macio nĩgũgakinya atĩrĩ, atĩ andũ ikũmi moimĩte ndũrĩrĩ-inĩ iria ingĩ, o iria irĩ mĩarĩrie yacio mwanya, nĩmakanyita gĩcora kĩa nguo ya mũndũ Mũyahudi, makiugaga atĩrĩ, Nĩtũgũtwarana nawe, nĩ ũndũ nĩtũiguĩte atĩ Ngai e hamwe na inyuĩ.
Currently Selected:
ZEKARIA 8: OGKBIBLE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
