ZEKARIA 7

1Na gũgĩkinya atĩrĩ, atĩ mwaka wa ĩna ĩrĩa Dario aakorirũo athamakĩte-rĩ, ndũmĩrĩri ya Jehova ĩgĩkinyĩrĩra Zekaria mũthenya wa kana wa mweri wa kenda, o ũcio wĩtagwo Kisilevu. 2Nao andũ a Beth-eli magĩkorũo nĩmaatũmĩte Sharezeru na Regemu-meleku, me na andũ ao, mathathaiye Jehova, nĩguo metĩkĩrĩke nĩwe, 3na maarĩrie athĩnjĩri-Ngai a nyũmba ya Jehova Mũnene wa Ita, o na anabii, mamorie atĩrĩ, Hihi nĩtwagĩrĩirũo nĩ gũtindaga tũkĩrĩra mweri wothe wa gatano, o twĩhingĩte kũrĩa irio, o ta ũrĩa tũratũire twĩkaga mĩaka mĩingĩ? 4Hĩndĩ ĩo ndũmĩrĩri ya Jehova Mũnene wa Ita ĩkĩnginyĩrĩra, ngĩĩrũo atĩrĩ, 5Arĩria andũ othe a bũrũri, hamwe na athĩnjĩri-Ngai, ũmorie atĩrĩ, Rĩrĩa mũratũire mwĩhingaga kũrĩa irio, na mũgacakaya mweri-inĩ wa gatano na wa mũgwanja, mwaka o mwaka, o mĩaka ĩo mĩrongo mũgwanja-rĩ, anga mũrethĩnagia nĩ ũndũ wakwa? 6Na rĩrĩa mũrĩaga na mũkanyua-rĩ, githĩ to kwĩrĩĩra mwĩrĩagĩra o ro ũguo na mũkenyuĩra? 7Nĩ kaba mũigue ndũmĩrĩri iria Jehova aanamũrehithĩrie na anabii arĩa maarĩ kuo mbere, rĩrĩa andũ aingĩ maatũũraga Jerusalemu magaacĩire, o na matũũra marĩa maarĩrigicĩirie, naguo bũrũri wa Gũthini, o na bũrũri ũrĩa mũgũu, magagĩtũũragwo nĩ andũ.

8Ningĩ ndũmĩrĩri ya Jehova ĩgĩkinyĩrĩra Zekaria, akĩĩrũo atĩrĩ, 9Jehova Mũnene wa Ita nĩaarĩtie ũhoro akoiga atĩrĩ, Tuanagĩrai cira na kĩhooto, na mũtuganage, na mũiguanagĩre tha, o mũndũ na mũndũ ũrĩa ũngĩ, 10na mũtikanahinyagĩrĩrie mũtumia wa ndigwa, kana mwana wa ngoriai, kana mũgeni, o na kana mũthĩni; na mũndũ o na ũrĩkũ wanyu ndakanathugundĩre mũrũ wa ithe maũndũ moru na ngoro yake. 11No rĩri, nĩmaaregire kũigua, magĩkĩhũgũra ciande ciao, na magĩthinga matũ mao, nĩ getha matikaigue. 12Ĩĩ, ti-itherũ momirie ngoro ciao o ta kahiga karĩa getagwo arimathi, nĩ getha matikaigue watho, o na kana ndũmĩrĩri iria Jehova Mũnene wa Ita aamatwarithĩirie na ũndũ wa Roho wake, akĩmataaraga na kanua ka anabii arĩa maarĩ kuo tene; tondũ ũcio nĩkũrehanĩirũo marakara manene moimĩte he Jehova Mũnene wa Ita. 13Na nĩgwakinyire atĩrĩ, atĩ o ta ũguo aamaanĩrĩire nao makĩrega kũigua-rĩ, ũguo noguo nao maanyanĩrĩire na ndiigue; ũguo nĩguo Jehova Mũnene wa Ita ekuuga 14no nĩ kũharagania ndamaharaganĩirie ndũrĩrĩ-inĩ ciothe iria matoĩ, o ta mahurunjĩtwo na kĩhuhũkanio kĩnene kĩa rũhuho. Ũguo noguo bũrũri wao ũgĩgĩcoka ũkĩanangĩka maarĩkia kũharaganio, o nginya gũkĩaga mũndũ ũngĩũtuĩkania, o na kana acoke kuo; tondũ bũrũri ũyũ mwega wa kwendeka mũno nĩo maawanangithirie biũ.

Currently Selected:

ZEKARIA 7: OGKBIBLE

Highlight

Copy