JOHANA 13

1NA rĩrĩ, gĩathĩ kĩa Bathaka gĩatua gũkinya, Jesu nĩoĩ hingo yake nĩ nginyu oime gũkũ thĩ athiĩ gwĩ Ithe witũ, na tondũ nĩendete andũ ake mwene arĩa maarĩ gũkũ thĩ, nĩ kũmenda aamendaga nginya o kĩrĩkĩrĩro. 2Na hingo ya kũrĩa irio cia hwaĩ-inĩ, nake mũcukani arĩkĩtie gwĩkĩra Judasi Mũisikariota, mũrũ wa Simoni, ngoro ya kũmũkunyanĩra anyitwo, 3Jesu agĩĩka atĩrĩ, akĩmenyaga atĩ Ithe witũ nĩamũnengerete maũndũ mothe agakĩmaiga moko-inĩ make, na atĩ kuuma nĩoimire kwĩ Ngai, na nĩ gũthiĩ egũthiĩ o kwĩ Ngai, 4agĩũkĩra akiuma metha-inĩ, akĩiga nguo ciake iria cia igũrũ thĩ, akĩoya gĩtambaya gĩa kwĩgiria, agĩkĩĩoha njohero. 5Agĩcoka agĩĩkĩra mbakũri maĩ, akĩambĩrĩria gũthambia arutwo nyarĩrĩ akĩmagiragia na gĩtambaya kĩu eohete. 6Agĩgĩkinya he Simoni Petero. Nake akĩmwĩra, Mwathani, ũkuuga ũ’thambie nyarĩrĩ, wee? 7Jesu agĩcokia akĩmwĩra atĩrĩ, Niĩ ũrĩa ngwĩka, wee ndũũĩ rĩu; no nĩũrĩmenya thutha. 8Petero akĩmwĩra, Ndũrĩ hingo ũgathambia nyarĩrĩ ciakwa, o rĩ, o rĩ. Nake Jesu akĩmũcokeria atĩrĩrĩ, Ndaaga gũgũthambia-rĩ, tũtirĩ ngwatanĩro nawe. 9Simoni Petero akĩmwĩra, Mwathani, no gĩ’thambie, na to nyarĩrĩ ciiki, thambia moko o namo, o na mũtwe. 10Nake Jesu akĩmwĩra atĩrĩ, Ũrĩa wĩthambĩte mwĩrĩ wothe ndarĩ na bata acoke gwĩthamba hangĩ tiga o nyarĩrĩ, nĩ mũtheru guothe biũ; na inyuĩ mũrĩ atheru, no ti inyuothe. 11Amu nĩoĩ ũrĩa ũkũmũkunyanĩra; nĩkĩo oigire, Mũtirĩ atheru inyuothe.

12 # Luk 22.27. Aakĩrĩkia kũmathambia nyarĩrĩ, na kwĩhumba nguo ciake, na gũcoka gũikara metha-inĩ, akĩmera atĩrĩ, Nĩmwamenya ũguo ndĩmwĩkĩte? 13Mũnjĩtaga Mũrutani, na mũkanjĩta Mwathani; na nĩ wega mũkiuga ũguo, amu nĩguo ndĩ. 14Na rĩrĩ, niĩ Mwathani, niĩ Mũrutani, ndagĩkorũo thambĩtie nyarĩrĩ cianyu-rĩ, nĩmwagĩrĩirũo na inyuĩ mũthambanagie nyarĩrĩ inyuene. 15Amu nĩ kũmuonereria ndamuonereria, nĩ getha na inyuĩ mwĩkage ũguo ndĩmwĩkĩte. 16#Mat 10.24; Luk 6.40; Joh 15.20.Ndamwĩra atĩrĩ, o ma, ma, Ngombo ti nene kwĩ mũmĩathi; na mũtũmwo ti mũnene kwĩ mũmũtũmi. 17Akorũo nĩmũũĩ ũguo, gũkena nĩ inyuĩ mwagĩtuĩka nĩguo mũrĩĩkaga. 18#Thab 41.9.Ti inyuothe ndĩragweta; niĩ arĩa ndathurire nĩndĩmoĩ; no rĩrĩ, gũgũtuĩka ũguo nĩ getha ũhoro ũrĩa mwandĩke ũhingio, ũrĩa uugĩte atĩrĩ, Ũrĩa tũrĩaga mũgate nake nĩanjikĩtie rũhukũ. 19Kuuma rĩu ngũmũhe ũhoro ũtanakinya gwĩkĩka, nĩ getha warĩkia gwĩkĩka mũgetĩkie atĩ nĩ niĩ ũrĩa we. 20#Mat 10.40; Mar 9.37; Luk 9.48; 10.16.Ndamwĩra atĩrĩ, o ma, ma, Ũrĩa wa gwĩtĩkĩra mũndũ o na ũrĩkũ ũreketio nĩ niĩ, nĩ niĩ etĩkĩra; nake ũrĩa wanjĩtĩkĩra niĩ, nĩetĩkĩra ũrĩa wandekirie.

21Jesu aarĩkia kuuga ũguo, agĩtangĩka roho, agĩkiumbũra, akiuga, Nda mwĩra atĩrĩ, o ma, ma, Inyuĩ ũmwe nĩekũngunyanĩra. 22Arutwo magĩkĩamba kũrorana, marigĩtwo nĩ ũcio aagweta. 23Na mũrutwo wake ũmwe, ũrĩa wendetwo nĩ Jesu, aarĩ ho metha-inĩ etiirĩte o hakuhĩ na gĩthũri kĩa Jesu. 24Nake Simoni Petero agĩkĩheneria ũcio, akĩmwĩra atĩrĩ, Twĩre ũcio aagweta. 25Nake, arĩ o hau etiirĩte gĩthũri-inĩ kĩa Jesu, agĩĩcokia na thutha akĩmũũria, Mwathani, ũcio nũ? 26Nake Jesu agĩgĩcokia atĩrĩ, Nĩ ũyũ ngũrikĩria kĩenyũ thathi-inĩ, ndĩmũhe. Na aarĩkia kũrikia kĩenyũ thathi-inĩ, agĩkĩruta, akĩhe Judasi, mũrũ wa Simoni, ũrĩa Mũisikariota. 27Nake aarĩkia kũheo kĩenyũ kĩu, ihinda o rĩu agĩtonyũo nĩ Shaitani. Jesu agĩkĩmwĩra atĩrĩ, Ũrĩa ũgwĩka, ĩka o narua. 28Na rĩrĩ, acio maarĩ metha-inĩ gũtirĩ mũndũ wamenyire kĩrĩa gĩatũmire amwĩre ũguo. 29Nĩ gũkorũo amwe megeragĩria atĩ kuona Judasi nĩwe waikaraga na mondo, atĩ hihi Jesu aamwĩrire, Gũra indo iria itũbatairie cia gĩathĩ; kana hihi aamwĩraga athiĩ akahe athĩni kĩndũ. 30Nake aarĩkia kwamũkĩra kĩenyũ kĩu, o rĩmwe akiuma; na nĩ ũtukũ.

31Ũcio aakĩrĩkia kuuma, Jesu agĩkiuga atĩrĩrĩ, Rĩu nĩ hĩndĩ Mũrũ wa Mũndũ agoocithĩtio, nake Ngai akagoocithio e thĩinĩ wake. 32Na rĩrĩ, [Ngai aakorũo agoocithĩtio e thĩinĩ wake,] Ngai o nake nĩekũmũgoocithia e thĩinĩ wake mwene, na nĩekũmũgoocithia o narua. 33#Joh 7.34.Twana tũtũ, no kahinda kanini ndigairie ga gũikarania na inyuĩ. Mũkanjaria, na rĩrĩ, ta ũrĩa nderire Ayahudi, atĩ, Kũu ngũthiĩ niĩ, inyuĩ mũtingĩhota gũkinya-rĩ, rĩu noguo ndamwĩra inyuĩ. 34#Joh 15.12,17; 1 Joh 3.23; 2 Joh 1.5.Rĩu ngũmũhe rĩathani rĩerũ, nĩ atĩ mwendane; o ta ũguo niĩ ndĩmwendete, inyuĩ mwendane o ro ũguo inyuene. 35Nĩ ũguo andũ othe marĩmenyaga mũrĩ arutwo akwa, mwatũũra mwendaine.

36Simoni Petero akĩmũũria, Mwathani, nĩ na kũ ũgũthiĩ? Nake Jesu agĩcokia atĩrĩ, Kũu ngũthiĩ, ndũngĩhota kũnũmĩrĩra rĩu; no thutha nĩũkanũmĩrĩra. 37Petero akĩmwĩra, Mwathani, ndingĩhota gũkũrũmĩrĩra rĩu nĩkĩ? Niĩ-rĩ, no ndute muoyo wakwa nĩ ũndũ waku. 38Nake Jesu agĩcokia atĩrĩ, Githĩ waruta muoyo waku nĩ ũndũ wakwa? Ndakwĩra atĩrĩ, o ma, ma, Ngũkũ ndĩgũkorũo ĩgambĩte ũtangaanĩte gatatũ.

Currently Selected:

JOHANA 13: OGKBIBLE

Highlight

Copy