JOHANA 12

1MATUKŨ maatigara matandatũ Bathaka ĩkinye, Jesu agĩgĩthiĩ Bethania, kũrĩa Lazaro aatũũraga, ũrĩa Jesu aariũkirie akuĩte. 2Magĩkĩgĩa na iruga kuo nĩ ũndũ wake; nake Maritha agĩtuĩka wa gũtwara irio, nowe Lazaro-rĩ, aarĩ wa arĩa maaikarire metha-inĩ hamwe na Jesu. 3#Luk 7.37,38.Nake Mariamu agĩgĩtwara maguta ratiri ng’ima ma mũthemba mwega ma, me goro mũno, akĩhaka Jesu nyarĩrĩ, agĩcoka akĩmũgiria nyarĩrĩ na njuĩrĩ yake; nyũmba ĩgĩkĩiyũrũo nĩ mũtararĩko mwega wa maguta macio. 4Na mũrutwo wake ũmwe, wetagwo Judasi Mũisikariota, ũrĩa ũkamũkunyanĩra anyitwo, akiuga atĩrĩ, 5Nĩ kĩ kĩngĩagiria maguta macio mendio moime ciringi magana matatũ, nacio iheo arĩa athĩni? 6Na rĩrĩ, ndoigire ũguo nĩ ũndũ wa gũcaĩra arĩa athĩni; oigire nĩ ũndũ aarĩ mũici, na tondũ nĩwe wakuaga mondo ya mbia, na akaiyũkia kĩrĩa yekagĩrũo. 7Nake Jesu agĩkiuga atĩrĩ, Reka aikare namo matuĩke ma mũthenya ũrĩa ngathikwo. 8#Gũcok 15.11.Amu arĩa athĩni mwĩ nao hingo ciothe; no niĩ-rĩ, mũtirĩ na niĩ hingo ciothe.

9Nakĩo kĩrĩndĩ kĩa Ayahudi gĩgĩkĩigua atĩ e kuo; gĩgĩũka kuo, na to ũndũ wa Jesu wiki, no ningĩ nĩ getha kĩone Lazaro o nake, ũrĩa aariũkĩtie e mũkuũ. 10Nao athĩnjĩri-Ngai arĩa anene-rĩ, magĩthugundania atĩ makoragithie Lazaro o nake, 11nĩ gũkorũo Ayahudi aingĩ nĩmekoyaga, makaya kwĩhoka Jesu.

12Mũthenya ũyũ ũngĩ kĩrĩndĩ kĩingĩ gĩokĩte gĩathĩ kĩaigua atĩ Jesu nĩegũũka Jerusalemu, 13#Thab 118.25,26.gĩgĩtua makĩndũ gĩgĩthiĩ namo kũmũthagania gĩkĩanagĩrĩra, gĩkoiga, Hosana! Mũrathimwo-rĩ, nĩ ũyũ ũgũũka na rĩĩtwa rĩa Mwathani, o we Mũthamaki wa Isiraeli! 14Nake Jesu aarĩkia kuona ndigiri kĩana, akĩmĩhaica; o ta ũrĩa haandĩkĩtwo, atĩ, 15#Zek 9.9.Wee mwarĩ wa Zayuni-rĩ, tiga kũmaka; one, Mũthamaki waku nĩaroka, aikarĩire njaũ ya ndigiri. 16Arutwo ake matiaambire kũmenya gĩtũmi kĩa maũndũ macio; no rĩrĩ, rĩrĩa Jesu aakoretwo arĩkĩtie kũgoocithio, hĩndĩ ĩo magĩkĩririkana atĩ ũhoro nĩwaandĩkĩtwo ũguo nĩ ũndũ wake, na nĩguo maamwĩkĩte. 17Nakĩo kĩrĩndĩ kĩrĩa kĩarĩ nake rĩrĩa etire Lazaro oime thĩinĩ wa mbĩrĩra akĩmũriũkia akuĩte, kĩu nĩgĩakĩheanire ũhoro ũcio kĩonire. 18Na nĩkĩo kĩrĩndĩ gĩathiire kũmũthagania, nĩ tondũ nĩkĩaiguĩte atĩ nĩekĩte kĩama kĩu. 19Nao Afarisai magĩkĩĩrana gatagatĩ kao ene atĩrĩ, Mũtigũkĩona ũrĩa mũremetwo! Arũmĩrĩirũo nĩ andũ othe a thĩ!

20Na rĩrĩ, hamwe na andũ arĩa maambatire makahoe Ngai gĩathĩ-inĩ: kĩu haarĩ na Ayunani; 21nao magĩgĩkora Filipu, ũrĩa wa kũrĩa gwĩtagwo Bethisaida ya Galili, makĩmũhoya makiuga, Mũthuri ũyũ, tũkwenda tuone Jesu. 22Filipu agĩthiĩ akĩĩra Andarea; nake Andarea, o na Filipu, magĩthiĩ makĩĩra Jesu. 23Nake Jesu akĩmacokeria ũhoro, akiuga atĩrĩrĩ, Hingo nĩ nginyu Mũrũ wa Mũndũ agoocithio. 24Ndamwĩra atĩrĩ, o ma, ma, Hĩndĩ ya ngano yaaga kũgũa tĩri-inĩ ĩkue, ĩgũtũũra o iiki; no yakua, ĩgaciara maciaro maingĩ. 25#Mat 10.39; 16.25; Mar 8.35; Luk 9.24; 17.33.Mũndũ ũrĩa wendaga muoyo wake nĩ kũũrũo oragwo nĩguo; na ũrĩa ũthũũraga muoyo wake e gũkũ thĩ nĩakaũtũũria nginya muoyo wa tene na tene. 26Niĩ, mũndũ aatuĩka wa kũndungatagĩra, nĩanũmagĩrĩre; na kũu ndĩ, nĩkuo ndungata yakwa nayo ĩrĩgĩkoragwo ĩrĩ; niĩ, mũndũ aatuĩka wa kũndungatagĩra, Ithe witũ nĩarĩmũtĩaga. 27Rĩu nĩ gũtangĩka ndĩratangĩka ngoro; ngũkiuga atĩa? Njuge, Awa, honokia kũrĩ hingo ĩno? No ningĩ ũhoro ũyũ noguo watũmire nginyie hingo ĩno. 28Awa, kĩgoocithie rĩĩtwa rĩaku. Oiga ũguo, Igũrũ gũkiuma mũgambo, ũkiuga atĩrĩ, Nĩndĩrĩgoocithĩtie, o na nĩngarĩgoocithia rĩngĩ. 29Tondũ ũcio kĩrĩndĩ kĩrĩa kĩarũngiĩ ho na gĩkĩũigua, gĩkiuga nĩ kũruruma kwaruruma; angĩ makiuga atĩrĩ, Nĩ mũraika wamwarĩria. 30Nake Jesu agĩcokia akiuga atĩrĩrĩ, Mũgambo ũcio ndũnoka nĩ ũndũ wakwa; woka nĩ ũndũ wanyu. 31Rĩu nĩ hingo thĩ ĩno ĩgũcirithio ĩtuĩrũo; rĩu mũnene wa gũkũ thĩ nĩekũingatwo. 32Na niĩ, ndahaicio igũrũ kuuma thĩ, nĩngagucĩrĩria andũ othe moke kũrĩ niĩ. 33Na nĩoigire ũguo akĩorota gũkua kũrĩa agakua. 34#Thab 110.4; Isa 9.7; Ezek 37.25; Dan 7.14.Nakĩo kĩrĩndĩ gĩkĩmũcokeria atĩrĩ, Ũhoro ũrĩa ithuĩ tũiguĩte watho-inĩ nĩ atĩ Kristo nĩ wa gũtũũra tene na tene; nĩ atĩa ũguo woiga, atĩ, Mũrũ wa Mũndũ no ahaicio igũrũ? Ũcio Mũrũ wa Mũndũ nũ? 35Nake Jesu agĩkĩmera atĩrĩrĩ, Ũtheri nĩũtigairie ihinda inyinyi rĩa gũikara na inyuĩ. Gendai rĩu mũrĩ o na ũtheri, mũtikae gũkinyĩrĩrũo nĩ nduma; ũrĩa ũrathiĩ na nduma ndoĩ na kũrĩa arorete. 36Rĩu mũkĩrĩ o na ũtheri-rĩ, mũwĩhoke, nĩguo mũtuĩke ciana cia ũtheri.

Jesu agĩtiga oiga mohoro macio, agĩcoka agĩĩthiĩra, akĩmehitha. 37Nao, o na tondũ aaneka ciama nyingĩ ũũ o makĩonaga, matiigana kũmwĩhoka; 38#Isa 53.1.na nĩ getha kiugo kĩrĩa kĩa Isaia ũrĩa mũnabii gĩkinye gwĩkĩka, kĩrĩa oigire, akĩũria,

Mwathani, nũ wĩtĩkĩtie ũhoro ũrĩa aaiguire na ithuĩ?

O nakuo guoko kwa Mwathani-rĩ, kũguũrĩirio ũ?

39Nĩkĩo mataahotire gwĩtĩkia; nĩ gũkorũo Isaia nĩoigire rĩngĩ atĩrĩ,

40 # Isa 6.10. Nĩamateete maitho, na akamomia ngoro;

Matikae kuona na maitho, na mamenye na ngoro,

Macoke magarũrũke,

Na niĩ ndĩmahonie.

41Isaia nĩoigire maũndũ macio nĩ ũndũ nĩonire riri wake; na nĩ ũhoro wake aagwetaga. 42No ningĩ, o na anene nĩ aingĩ maamwĩhokire; no tondũ wa Afarisai matiigana kuumbũra, matikae kũhingwo gũthiaga thunagogi, 43nĩ gũkorũo nĩmendaga kũgoocwo nĩ andũ gũkĩra kũgoocwo nĩ Ngai.

44Nake Jesu akĩanĩrĩra akiuga atĩrĩrĩ, Ũrĩa wĩĩ’hokete, to niĩ ehokete; ehokete ũrĩa wandekirie. 45Na ũrĩa ũkũnyona niĩ ekuona ũcio wandekirie. 46Niĩ-rĩ, njũkĩte thĩ ta ũtheri, nĩ getha mũndũ wĩĩ’hokete, o wothe, atige gũtũũra nduma-inĩ. 47Na mũndũ aaigua ciugo ciakwa, na ndacimenyerere, ndikũmũcirithia niĩ; amu ndiokire gũcirithia kĩrĩndĩ, ndokire kũhonokia kĩrĩndĩ. 48Ũrĩa ũndegete na ndetĩkĩre gũthikĩrĩria ciugo ciakwa, ndaagĩte wa kũmũcirithia: ũhoro ũrĩa ndaaririe-rĩ, nĩguo ũkamũcirithia mũthenya wa ithirĩro. 49Nĩ gũtuĩka ndiaaririe ndĩĩĩrĩte niĩ mwene, no rĩrĩ, Ithe witũ ũrĩa wandekirie, nĩwe ũnjathĩte, akanjĩra ũrĩa ingiuga, na ũrĩa ingĩaria. 50Na nĩnjũĩ rĩathani rĩake nĩ muoyo wa tene na tene; tondũ wa ũguo, ndeto iria njaragia-rĩ, no ta ũrĩa Ithe witũ anjĩrĩte, noguo njaragia.

Currently Selected:

JOHANA 12: OGKBIBLE

Highlight

Copy