JOHANA 11

1 # Luk 10.38,39. NA rĩrĩ, kwarĩ mũndũ warũarĩte wetagwo Lazaro, wa kũrĩa gwetagwo Bethania, kwa Mariamu na mwarĩ wa nyina wetagwo Maritha. 2#Joh 12.3.Na nĩ Mariamu ũrĩa wahakire Mwathani maguta, agĩcoka kũmũgiria nyarĩrĩ na njuĩrĩ yake, nĩwe warũarĩtie mũrũ wa nyina, ũcio Lazaro. 3Acio aarĩ a nyina magĩkĩmũrekeria mũndũ akoige, Mwathani, mwendwo waku nĩ mũrũaru. 4Nake Jesu aaigua ũguo, akiuga atĩrĩrĩ, Ndũari ĩo ti ya gĩkuũ; nĩ ya gũtũma Ngai agoocwo, atĩ Mũrũ wa Ngai agoocithio nĩyo. 5Na rĩrĩ, Jesu nĩ kwenda endete Maritha na mwarĩ wa nyina o na Lazaro. 6Nake aaigua atĩ nĩ mũrũaru, akĩamba gũikara mĩthenya ĩĩrĩ o kũu aarĩ. 7Na yathira akĩĩra arutwo atĩrĩ, Nĩtũcokei Judea. 8Nao arutwo makĩmwĩra, Rabii, o ro rĩu Ayahudi nĩmarendaga gũkũhũra na mahiga; nawe githĩ ũgũcoka kuo? 9Nake Jesu agĩcokia atĩrĩ, Thaa cia mũthenya-rĩ, to ikũmi na igĩrĩ? Mũndũ aathiĩ kũndũ mũthenya, ndangĩhĩngwo, nĩ ũndũ nĩekuona ũtheri wa gũkũ thĩ. 10No rĩrĩ, mũndũ aathiĩ ũtukũ, nĩahĩngagwo, nĩ ũndũ ũtheri ndarĩ naguo thĩinĩ wake. 11Akiuga ũguo, agĩcoka akĩmera atĩrĩrĩ, Mũrata witũ Lazaro nĩakomete toro, no nĩngũthiĩ ngamũũkĩrie. 12Nao arutwo magĩkĩmwĩra, Mwathani, akorũo nĩonete toro, nĩekũhona. 13Na rĩrĩ, Jesu nĩ ũhoro wa gũkua gwake aagwetire; nao moĩ aagwetaga ũhoro wa gũkoma toro. 14Hĩndĩ ĩo Jesu agĩkĩmera wega, atĩrĩ, Lazaro nĩakuĩte. 15Na nĩngenete nĩ ũndũ wanyu nĩ ũndũ itararĩ kuo, nĩ getha mũgetĩkie; no rĩrĩ, nĩtũgĩthiĩ kũrĩ we. 16Nake Toma, ũrĩa wĩtagwo Wa-mahatha, agĩkĩĩra arutwo arĩa angĩ atĩrĩ, Nĩtũthiĩi na ithuĩ, tũgakuanĩre nake.

17Jesu aakinya, agĩgĩkora arĩkĩtie kũnina matukũ ana mbĩrĩra. 18Na rĩrĩ, kũu Bethania kwarĩ gũkuhĩ na Jerusalemu, itĩĩna ta rĩa mairo igĩrĩ; 19nao Ayahudi nĩmokĩte aingĩ kwa Maritha na Mariamu, kũmacakaithia nĩ ũndũ wa mũrũ wa nyina wao. 20Maritha aaigua atĩ Jesu nĩegũũka, agĩgĩthiĩ kũmũthagania, nake Mariamu agĩtigwo aikaire thĩ nyũmba. 21Nake Maritha agĩkĩĩra Jesu atĩrĩrĩ, Mwathani, ũngĩarĩ kuo, mũrũ wa maitũ ndangĩakuire. 22O na rĩu nĩnjũĩ o ũndũ ũrĩhoya Ngai, o wothe, Ngai nĩarĩkũhe. 23Jesu akĩmwĩra atĩrĩ, Mũrũ wa nyũkwa nĩakariũka. 24Nake Maritha akĩmwĩra, Nĩnjũĩ nĩakariũka gũkĩriũkwo mũthenya wa ithirĩro. 25Nake Jesu akĩmwĩra atĩrĩrĩ, Nĩ niĩ kũriũka na nĩ niĩ muoyo; ũrĩa wĩĩ’hokete niĩ, o na aakua, no agatũũra muoyo, 26na mũndũ o wothe wĩ muoyo na akeĩ’hoka niĩ, ndarĩ hingo agakua. Ũguo nĩwĩtĩkĩtie? 27Akĩmwĩra, Ĩĩ-ni, Mwathani; niĩ nĩnjĩtĩkĩtie atĩ wee nĩwe Kristo, Mũrũ wa Ngai, ũrĩa wa gũũka gũkũ thĩ. 28Na aarĩkia kuuga ũguo, agĩthiĩ, agĩĩta Mariamu, mwarĩ wa nyina, akĩmwĩra atĩrĩ keheri-inĩ, Mũrutani e gũkũ, na nĩoiga ũthiĩ. 29Nake aaigua ũguo agĩũkĩra narua, agĩthiĩ kũrĩ we. 30(Na rĩrĩ, Jesu hĩndĩ ĩo ndaatonyete mũciĩ thĩinĩ; aarĩ o hau aatungirũo nĩ Maritha.) 31Ayahudi nao, arĩa maarĩ nake nyũmba makĩmũcakaithagia, mona ũguo Mariamu okĩra narua, oima nja, makĩmũrũmĩrĩra, moĩ aathiĩ mbĩrĩra-inĩ akarĩrĩre ho. 32Nake Mariamu aakinya harĩa Jesu arĩ, aamuona, agĩkĩmũgũĩra thĩ magũrũ-inĩ, akĩmwĩra, Mwathani, ũngĩakorirũo kuo, mũrũ wa maitũ ndangĩakuire. 33Nake Jesu aamuona akĩrĩraga, o na Ayahudi nao makĩrĩraga, acio mokire nake, agĩgĩcaya o roho-inĩ thĩinĩ, agĩtangĩka, 34akĩũria, Mũmũigĩte ha? Makĩmwĩra, Ũka, Mũthuri, ũkone. 35Nake Jesu akĩrĩra maithori. 36Nao Ayahudi magĩkiuga atĩrĩ, Onei ũrĩa aamwendete! 37No amwe makiuga atĩrĩ, Mũndũ ũyũ wahingũrire mũndũ ũrĩa maitho ũrĩa warĩ mũtumumu-rĩ, kaĩ atangĩahotire kũgiria mũndũ ũyũ nake akue?

38Nake Jesu agĩgĩthiĩ agĩcayaga rĩngĩ na ngoro, agĩkinya mbĩrĩra-inĩ. Nayo yarĩ ngurunga, na nĩyahingĩtwo mũromo na ihiga. 39Nake Jesu akiuga, Eheriai ihiga. Nake Maritha, mwarĩ wa nyina na ũcio wakuĩte, akĩmwĩra, Mwathani, rĩu nĩakinyĩte kũnunga, amu nĩaninĩte matukũ ana nginya aakua. 40Jesu akĩmwĩra atĩrĩ, Ndikwĩrire, atĩ wetĩkia, nĩũkuona ũnene wa Ngai? 41Magĩkĩeheria ihiga. Nake Jesu agĩtiira maitho, akiuga atĩrĩrĩ, Awa, nĩndakũgatha nĩ ũndũ nĩwanjigua. 42Niĩ no ngũũĩ atĩ nĩũnjiguaga hingo ciothe, no nĩndoiga ũguo nĩ ũndũ wa kĩrĩndĩ gĩkĩ kĩrũgamĩte haha, nĩguo gĩĩtĩkie atĩ nĩwe wandekirie. 43Na aarĩkia kuuga ũguo, akĩanĩrĩra na mũgambo mũnene, akiuga, Lazaro, uma. 44Nake ũcio warĩ mũkuũ akiuma, e mũthae moko na magũrũ na matama; naguo ũthiũ nĩaarigicĩirio gĩtambaya. Nake Jesu akĩmera atĩrĩ, Muohorei, mũreke athiĩ.

45Tondũ wa ũhoro ũcio, Ayahudi aingĩ makĩya kũmwĩhoka, acio mokire kwĩ Mariamu na makĩona ũndũ ũcio ekire. 46No amwe magĩĩtwara kũrĩ Afarisai, makĩmera ũrĩa Jesu ekĩte.

47Tondũ ũcio athĩnjĩri-Ngai arĩa anene na Afarisai makĩũngania kĩama, makĩũria atĩrĩ, Tũgwĩka atĩa? amu-rĩ, mũndũ ũcio nĩekaga ciama nyingĩ. 48Twakĩmũtiga o ũguo-rĩ, andũ no metĩkie ũhoro wake othe, nao Aroma moke matũtunye handũ haha haitũ, o na ũhoro witũ wa gũtuĩka rũrĩrĩ. 49No rĩrĩ, ũmwe wao wetagwo Kaiafa, warĩ mũthĩnjĩri-Ngai ũrĩa mũnene mwaka ũcio, akĩmera atĩrĩ, Inyuĩ mũtirĩ ũndũ mũũĩ; 50na mũtigũgĩtarania atĩ ũndũ ũrĩa ũngĩmwagĩrĩra no mũndũ ũmwe akuĩre kĩrĩndĩ, nĩguo rũrĩrĩ ruothe rũtigathire. 51Na rĩrĩ, akiuga ũguo ndaaririe etaarĩte we mwene, no tondũ aakĩrĩ mũthĩnjĩri-Ngai ũrĩa mũnene mwaka ũcio, nĩ kũratha aarathire atĩ Jesu nĩagakuĩra rũrĩrĩ rũu; 52na ti rũrĩrĩ rũu ruiki, no ningĩ akue nĩ getha acokererie ciana cia Ngai iria itũire ihurunjũkĩte. 53Na kuuma mũthenya ũcio maathugundanagia nĩ getha mamũũragithie.

54Tondũ ũcio Jesu ndaacokire gũceeranga kwa Ayahudi akĩonagwo; nĩ kuuma oimire kũndũ kũu agĩthiĩ rũtere-inĩ gũkuhĩ na werũ, agĩkinya itũũra rĩĩtagwo Efiraimu, agĩikara kuo na arutwo ake. 55Na rĩrĩ, Bathaka ya Ayahudi nĩyatuĩte gũkinya, na andũ aingĩ makĩambata Jerusalemu moimĩte ng’ongo iria ingĩ, makĩambata Bathaka ĩtaanakinya, magetherie. 56Nao nĩmaacaragia Jesu kuo, na makaaranagĩria marũngiĩ hekarũ-inĩ, makorania atĩrĩ, Mũkuona atĩa? Mũkuuga ndagoka gĩathĩ gĩkĩ? 57Na rĩrĩ, athĩnjĩri-Ngai arĩa anene na Afarisai nĩmaathanĩte, makoiga atĩ akorũo kwĩ mũndũ ũũĩ harĩa arĩ, nĩoige, nĩguo mamũnyite.

Currently Selected:

JOHANA 11: OGKBIBLE

Highlight

Copy