ATŨMWO 8

1Nake Saulu agĩkorũo etĩkĩrĩte atĩ oragwo.

Na mũthenya ũcio andũ a kanitha ũrĩa warĩ kũu Jerusalemu magĩitĩka kũnyarirũo mũno; nao othe makĩharaganĩrio mabũrũri ma Judea na Samaria, tiga o atũmwo oiki. 2Na andũ amwe aigua-Ngai magĩthika Stefano, makĩmũrĩrĩra mũno. 3#Atũm 22.4,5; 26.9-11.Nowe Saulu akĩananga kanitha mũno, nĩ ũrĩa aatonyaga nyũmba o nyũmba akanyitithia arũme o na andũ-a-nja, akamaikithia korokoro-inĩ.

4Tondũ wa ũguo, andũ acio maaharaganĩtio magĩgĩthiĩ kũndũ o kũndũ makĩhunjagia Ũhoro wa Ngai. 5Nake Filipu agĩtherera agĩthiĩ itũũra rĩa Samaria, akiumbũrĩra andũ akuo ũhoro wa Kristo. 6Na andũ aingĩ monganĩte magĩthikĩrĩria na kĩyo maũndũ marĩa maaririo nĩ Filipu, marĩ na ngoro o ro ĩmwe, maamũigua na mona ciama iria aaringire. 7Nĩ gũkorũo ngoma thũku nĩcioimire andũ aingĩ arĩa maagwatĩtwo nĩcio, ikĩanagĩrĩra na mũgambo mũnene. Na andũ aingĩ marũarĩte mũrimũ wa gũkua ciĩga, o na arĩa maathuaga makĩhonio. 8Na kũu itũũra-inĩ rĩu gũgĩkĩgĩa gĩkeno kĩnene.

9No nĩkwarĩ mũndũ wetagwo Simoni, nake mbere ĩo nĩaatũire aragũraga itũũra-inĩ rĩu, akamakagia andũ a Samaria, agĩĩtuaga mũndũ mũnene. 10Nao othe, arĩa anyinyi o na gwata arĩa anene, makamũthikagĩrĩria na kĩyo, makoigaga atĩrĩ, Mũndũ ũyũ nĩwe hinya wa Ngai, ũrĩa wĩtagwo Hinya Mũnene. 11Magakĩmũthikagĩrĩria mũno nĩ ũndũ wa ũrĩa aatũire amamakagia hĩndĩ ndaya akĩragũraga. 12No rĩrĩa metĩkirie Filipu akĩhunjia ndeto njega cia ũthamaki wa Ngai, na cia rĩĩtwa rĩa Jesu Kristo-rĩ, makĩbatithio andũ arũme o na andũ-a-nja. 13O nake Simoni we mwene agĩĩtĩkia: na aarĩkia kũbatithio, agĩikara na Filipu, na ona ciana ikĩringwo, o na ciĩko cia hinya igĩĩkwo, akĩgega mũno.

14Na rĩrĩa atũmwo arĩa maarĩ Jerusalemu maaiguire atĩ andũ a Samaria nĩmetĩkĩtie Ũhoro wa Ngai, makĩmarekeria Petero na Johana, 15nao maakinya harĩ o makĩmahoera nĩ getha maheo Roho Mũtheru. 16Nĩ gũkorũo o na nginya hĩndĩ ĩo ndaakoretwo aikũrũkĩrĩire mũndũ o na ũmwe wao: tiga o kũbatithio maabatithĩtio thĩinĩ wa rĩĩtwa rĩa Mwathani Jesu. 17Na hĩndĩ ĩo makĩmaigĩrĩra moko, na makĩheo Roho Mũtheru.

18Nake Simoni, rĩrĩa onire atĩ Roho Mũtheru nĩekũheanwo nĩ ũndũ wa ũrĩa atũmwo maigagĩrĩra andũ moko, akĩenda amahe mbia, 19akiuga atĩrĩ, O na niĩ ’hei hinya ũcio, nĩguo atĩ o mũndũ ũrĩa ndĩrĩigagĩrĩra moko makwa aheo Roho Mũtheru. 20Nowe Petero akĩmwĩra atĩrĩ, Mbia ciaku iroora wĩ hamwe nacio, tondũ nĩwĩgereirie atĩ waheo kĩheo kĩrĩa Ngai aheanaga nĩ ũndũ wa kũruta mbia. 21Ndũkĩrĩ ho ũhoro-inĩ ũcio, o na ndũrĩ na igai thĩinĩ waguo, nĩ gũkorũo ngoro yaku ndĩonagwo ĩrĩ njega nĩ Ngai. 22Tondũ ũcio-rĩ, wĩrire waganu ũcio waku, ũhoe Mwathani kana hihi wahota kuoherũo ũndũ ũcio ngoro yaku ĩĩcirĩtie. 23Nĩ gũkorũo nĩnguona atĩ ngoro yaku ĩrũrĩte ta maĩ ma nyongo, ũgatũũra wohetwo kĩoho-inĩ kĩa waganu. 24Nake Simoni akĩmũcokeria akĩmwĩra atĩrĩ, Hoyai Mwathani arĩ inyuĩ nĩ ũndũ wakwa, nĩ getha ndikae gũkorũo nĩ maũndũ macio mwagweta, o na ũmwe.

25Nao atũmwo maarĩkia kuumbũra na kwaria Ũhoro wa Mwathani magĩgĩcoka Jerusalemu makĩhunjagia Ũhoro-ũrĩa-Mwega tũtũũra-inĩ tũingĩ twa Asamaria.

26No rĩrĩ, mũraika wa Mwathani akĩarĩria Filipu akĩmwĩra atĩrĩ, Ũkĩra ũthiĩ werekeire gũthini ũkinye njĩra ĩrĩa ĩthereraga yumĩte Jerusalemu ĩgakinya Gaza; nayo nĩ njĩra ya werũ-inĩ.

27Nake agĩũkĩra agĩthiĩ. Na rĩrĩ, nĩkwarĩ mũndũ Mũhabashi, warĩ mũhakũre,#8.27 Mũhakũre: rora kohoro kaandĩkĩtwo Mat 19.12. na waheetwo hinya mũnene wa gwathana nĩ Kandake, mũtumia warĩ mũthamaki wa Ahabashi; ningĩ nĩaatuĩtwo wa kũmũramatĩra mũthithũ wake wothe wa indo. Nĩ gũũka okĩte Jerusalemu ahoe Ngai, 28na hĩndĩ ĩo nĩ gũcoka aacokaga kwao e ngari-inĩ yake, agĩthomaga ibuku rĩa Isaia ũrĩa mũnabii. 29Nake Roho akĩĩra Filipu atĩrĩ, Kuhĩhĩria ngari ĩrĩa, wĩgiritanie nayo. 30Nake Filipu agĩteng’era harĩ we, akĩmũigua agĩthoma ibuku rĩa mũnabii Isaia, akĩmũũria atĩrĩ, Ũhoro ũcio ũrathoma, nĩũkũũmenya? 31Nake akiuga atĩrĩ, Kaĩ ingĩkĩhota kũũmenya atĩa itatongoretio nĩ mũndũ? Agĩgĩthaitha Filipu ahaice maikare nake. 32#Isa 53.7,8.Na rĩrĩ, harĩa aathomaga Maandĩko-inĩ nĩ haha, atĩrĩ,

Aatwarirũo ta ng’ondu gĩthĩnjĩro-inĩ;

Na ningĩ, o ta ũrĩa gatũrũme gakiraga ki, ke mbere ya mũkamuri guoya,

Ũguo noguo atatumũraga kanua gake.

33Nĩ kwĩnyihia enyihirie, agĩgĩtunyũo cira wa kĩhooto:

Nũ ũngĩkĩheana ũhoro wa rũciaro rũake? Tondũ muoyo wake nĩweheretio uume gũkũ thĩ.

34Nake mũndũ ũcio mũhakũre agĩcoka akĩuria Filipu atĩrĩ, Ta njĩra, ndagũthaitha, mũnabii ũcio-rĩ, aaragia ũguo ũhoro-inĩ wa ũ? Ũhoro-inĩ wake mwene, kana wa mũndũ ũngĩ? 35Nake Filipu agĩitĩka kwaria, akĩmũhunjĩria ũhoro wa Jesu, aambĩrĩirie na ũhoro o ro ũcio waandĩkĩtwo. 36Na marĩ njĩra magĩthiĩ-rĩ, magĩkinya handũ haarĩ na maĩ. Nake mũndũ ũcio mũhakũre akiuga atĩrĩ, One, maĩ to wa maya! Nĩ kĩ gĩgũkĩgiria mbatithio? 37[Nake Filipu akiuga atĩrĩ, Ũngĩkorũo nĩwĩtĩkĩtie na ngoro yaku yothe, wahota. Nake agĩcokia akiuga atĩrĩ, Nĩnjĩtĩkĩtie atĩ Jesu Kristo nĩwe Mũrũ wa Ngai.] 38Agĩgĩathana atĩ ngari ĩrũgame. Nao erĩ, Filipu na mũndũ ũcio mũhakũre, magĩikũrũka magĩtoboka maĩ-inĩ. Nake Filipu akĩmũbatithia. 39Nao maarĩkia kuumĩra maĩ-inĩ, Roho wa Mwathani akĩoya Filipu akĩmweheria, nake mũndũ ũcio mũhakũre ndaacokire kũmuona rĩngĩ, agĩĩthiĩra akenete. 40No Filipu nĩonekeire Azoto. Na rĩrĩa aathiangaga kũndũ o kũndũ, akĩhunjĩria matũũra mothe Ũhoro-ũrĩa-Mwega, o nginya agĩkinya Kaisarea.

Currently Selected:

ATŨMWO 8: OGKBIBLE

Highlight

Copy