ATŨMWO 7

1NAKE mũthĩnjĩri-Ngai ũrĩa mũnene akĩũria Stefano atĩrĩ, Mohoro macio nĩguo matariĩ? 2#Kĩam 12.1.Nake akiuga atĩrĩ,

Ariũ a baba, na maithe maitũ, ta thikĩrĩriai. Ngai Mwene-riri nĩoimĩrĩire Iburahimu, ithe witũ, rĩrĩa aarĩ Mesopotamia o mbere atanatũũra bũrũri wa Harani, 3akĩmwĩra atĩrĩ, Ũkĩra ũthame bũrũri wanyu, uume kũrĩ andũ anyu, ũcoke ũthiĩ bũrũri ũrĩa ngakuonia. 4#Kĩam 11.31; Kĩam 12.4.Hĩndĩ ĩo Iburahunu agĩgĩthama bũrũri wa Akalidei, agĩthiĩ gũtũũra kũu Harani. Na ithe aarĩkia gũkua, Ngai akĩmũthamia kuo, akĩmũrehe bũrũri ũyũ mũtũire rĩu; 5#Kĩam 12.7; 13.15; 15.18; 17.8.na ndaigana kũmũhe igai o na rĩrĩkũ kuo, o na kana handũ ha kũiganĩra kũgũrũ gwake, no rĩrĩ, o na aakorũo atakĩrĩ na mwana, Ngai akĩĩranĩra atĩ nĩakamũhe bũrũri ũcio ũtuĩke wake, o na wa gũtigĩra rũciaro rũake. 6#Kĩam 15.13,14.Agĩkĩmwĩra ũũ, atĩ andũ a rũciaro rũu rũake nĩmagatũũra marĩ o ageni bũrũri wa andũ angĩ, na atĩ andũ a kũu nĩmakamatua ngombo ciao, na mamekage ũũru ihinda rĩa mĩaka magana mana. 7#Thama 3.12.Ningĩ Ngai akiuga atĩrĩ, Rũrĩrĩ rũu magakorũo matuĩkĩte ngombo ciaruo, Niĩ nĩ Niĩ ngarũtuĩra ituĩro; na thutha wa ũguo andũ acio nĩmakoima kũu, mandungatagĩre gũkũ. 8#Kĩam 17.10-14; Kĩam 21.2-4; Kĩam 25.26; Kĩam 29.31—35.18.Agĩkĩrĩkanĩra nake kĩrĩkanĩro kĩrĩa kĩa ũhoro wa kũrua: ũguo noguo Iburahimu aaciarire Isaaka, akĩmũruithia mũthenya wa ĩnana; nake Isaaka agĩciara Jakubu, nake Jakubu agĩciara athuri arĩa ikũmi na erĩ, o-o maguuka maitũ.

9 # Kĩam 37.11; Kĩam 37.28; Kĩam 39.2,21. Nao maguuka macio maitũ, tondũ wa ũrĩa maaiguagĩra Jusufu ũiru, makĩmwendia ahirũo Misiri. No rĩrĩ, Ngai aarĩ hamwe nake, 10#Kĩam 41.39-41.akĩmũhonokia mathĩna-inĩ make mothe, agĩtũma agĩe na ngatho na onagwo arĩ mũũgĩ nĩ Firauni ũrĩa warĩ mũthamaki wa Misiri. Nake Firauni akĩmũtua wa gwathaga Misiri o na nyũmba yake yothe. 11#Kĩam 42.1,2.Na rĩrĩ, gũgĩũka ng’aragu bũrũri wothe wa Misiri na wa Kanaani, o na thĩna mũnene; nao maithe maitũ makĩaga irio cia kũmahũnia. 12No rĩrĩa Jakubu aaiguire atĩ nĩkũrĩ ngano kũu Misiri, agĩtũma maithe maitũ kuo hĩndĩ ya mbere. 13#Kĩam 45.1; Kĩam 45.16.Narĩo ihinda rĩa kerĩ rĩa kũmatũma kuo Jusufu akĩmenyeka nĩ ariũ a ithe; naguo mũhĩrĩga ũrĩa Jusufu oimĩte ũkĩmenyeka nĩ Firauni. 14#Kĩam 45.9,10,17,18; Kĩam 46.27.Nake Jusufu agĩtũmana, agĩĩta ithe, Jakubu, o na andũ othe a nyũmba yake, andũ mĩrongo mũgwanja na atano. 15#Kĩam 46.1-7; Kĩam 49.33.Nake Jakubu agĩtherera agĩthiĩ Misiri; agĩkuĩra kuo, we mwene o na maithe maitũ. 16#Kĩam 23.3-16; 33.19; 50.7-13; Josh 24.32.Nao magĩkuuwo magĩtwarũo Shekemu magĩthikwo mbĩrĩra-inĩ ĩrĩa Iburahimu aagũrĩte na mbia kũrĩ ariũ a Hamori o kũu Shekemu.

17 # Thama 1.7,8. No rĩrĩ, ihinda rĩakuhĩhĩria rĩa kũhingia kĩĩranĩro kĩrĩa Ngai erĩire Iburahimu-rĩ, andũ a rũrĩrĩ rũu makĩongerereka makĩingĩha kũu Misiri, 18o nginya hakĩgĩa mũthamaki ũngĩ wa gũthamaka Misiri ũrĩa ũtoĩ ũhoro wa Jusufu. 19#Thama 1.10,11; Thama 1.22.Mũndũ ũcio agĩĩka andũ a rũrĩrĩ ruitũ maũndũ ma wara, agĩĩka maithe maitũ ũũru, agĩtũma mate tũkenge twao tũtigatũũre muoyo. 20#Thama 2.2.Na hĩndĩ ĩo nĩyo Musa aaciarirũo, akĩonwo arĩ mũthaka mũno; akĩrererũo nyũmba ya ithe mĩeri ĩtatũ. 21#Thama 2.3-10.Nake aatuĩka wa gũteo, mwarĩ wa Firauni akĩmwĩoera, akĩmũrera ta arĩ mũriũ wake mwene. 22Nake Musa agĩkĩrutwo ũũgĩ wothe wa andũ a Misiri; agĩkorũo e na ũhoti akĩaria o na agĩĩka maũndũ. 23#Thama 2.11-15.No rĩrĩ, rĩrĩa aaninĩte ta mĩaka mĩrongo ĩna, akĩigua na ngoro yake akĩenda gũceerera andũ ao, ti ciana cia Isiraeli. 24Na rĩrĩa onire ũmwe wao akĩnyarirũo, akĩmũgitĩra, akĩmũrĩhĩria ũũru ũcio ekĩtwo, akĩũraga Mũmisiri. 25Na nĩ kwĩgereria egereirie atĩ no gũkorũo ariũ a ithe nĩmoĩ ũrĩa Ngai endaga kũmahonokia na guoko gwake, no matiigana kũmenya. 26Na mũthenya ũyũ ũngĩ agĩkora amwe ao makĩhũrana, akĩenda kũmateithũrana, akiuga, Athuri aya, githĩ mũtikĩrĩ a ithe ũmwe? nĩ kĩ gĩgũtũma mwĩkane ũũru? 27No we ũcio wekĩte ũrĩa ũngĩ ũũru akĩmũthinĩkania, akĩmwĩra atĩrĩ, Hĩ! Nũ ũgũtuĩte wee mũnene witũ o na kana mũtũtuĩri cira? 28Anga mĩũkwenda kũnjũraga, ta ũrĩa ũroragire Mũmisiri ũrĩa wa ira? 29#Thama 18.3,4.Nake Musa aaigua ũhoro ũcio akĩũra, agĩtũũra arĩ mũgeni bũrũri wa Midiani, agĩciarĩra ariũ erĩ kuo.

30 # Thama 3.1-10. Na rĩrĩ, mĩaka mĩrongo ĩna yathira, arĩ o werũ-inĩ ũrĩa wa kĩrĩma gĩa Sinai-rĩ, akiumĩrĩrũo nĩ mũraika arĩ rũrĩrĩmbĩ-inĩ rũa mwaki ũrĩa waakanaga kĩhinga-inĩ. 31Nake Musa ona ũndũ ũcio akĩgega nĩ ũndũ wa kĩoneki kĩu: na rĩrĩa aakuhagĩrĩria eonere, hakiuma mũgambo wa Mwathani, ũkiuga atĩrĩ, 32Niĩ nĩ Niĩ Ngai wa maithe maku, Ngai wa Iburahimu, na wa Isaaka, na wa Jakubu. Nake Musa agĩkĩinaina, agĩĩtigĩra gũcũthĩrĩria. 33Nake Mwathani akĩmwĩra atĩrĩ, Ruta iratũ ciaku magũrũ: nĩ gũkorũo hau ũrũngiĩ nĩ handũ hatheru. 34Atĩrĩrĩ, nĩ kuona nyonete mĩnyamaro ya andũ akwa arĩa marĩ Misiri, naguo mũcayo wao nĩndĩũiguĩte, na nĩnjikũrũkĩte nĩguo ndĩmahonokie; na rĩu-rĩ, gĩũke ngũtũme Misiri.

35 # Thama 2.14. Na rĩrĩ, Musa o ro ũcio maaregire, makiuga, Nũ ũgũtuĩte wee mũnene na mũtui-cira? nĩwe Ngai aatũmire atuĩke mũnene na wa kũmakũũra na guoko kwa mũraika ũcio wamuumĩrĩire kĩhinga-inĩ. 36#Thama 7.3; Thama 14.21; Ndar 14.33.Nake nĩwe wamatongoririe moime kuo, aarĩkia gwĩka morirũ na kũringa ciama kũu Misiri, o na Iria-inĩ rĩrĩa Itune, o na werũ-inĩ, ihinda rĩa mĩaka mĩrongo ĩna. 37#Gũcok 18.15,18.Ningĩ Musa ũcio nĩwe werire andũ a Isiraeli atĩrĩ, Ngai nĩakamũũkĩrĩria mũnabii, oime thĩinĩ wa ariũ a thoguo, o ta ũrĩa niĩ ndariĩ. 38#Thama 19.1—20.17; Gũcok 5.1-33.Ũcio nĩwe warĩ o ho kĩũngano-inĩ kĩa arĩa maarĩ werũ-inĩ, me hamwe na mũraika ũrĩa wamwarĩirie kĩrĩma-inĩ gĩa Sinai, o na hamwe na maithe maitũ. Nake nĩwe waamũkĩire Ciugo irĩ muoyo cia gũtũrehere ithuĩ. 39No rĩrĩ, maithe maitũ makĩrema gwathĩka nĩwe, makĩmũthinĩkania, na makĩĩrirĩria na ngoro ciao gũcoka Misiri, 40#Thama 32.1.makĩĩra Haruni atĩrĩ, Tũthondekere ngai iria irĩgĩtũtongoragia, nĩ gũkorũo Musa ũcio watũtongoririe agĩtũruta bũrũri wa Misiri, tũtiũĩ ũrĩa onete. 41#Thama 32.2-6.Magĩgĩthondeka kĩndũ kĩhaanaine na njaũ matukũ macio, makĩrutĩra mũhianano ũcio igongona, magĩkenera indo iria methondekeire na moko mao. 42#Amos 5.25-27.Ĩndĩ Ngai nĩaamahutatĩire, akĩmarekereria matungatagĩre mbũtũ ĩrĩa ya Igũrũ, o ta ũrĩa haandĩkĩtwo ibuku-inĩ rĩa anabii, atĩrĩ,

Anga nĩ niĩ mwagĩtũire mũrutagĩra nyamũ thĩnje na magongona

Mĩaka mĩrongo ĩna kũu werũ-inĩ, inyuĩ mbarĩ ya Isiraeli?

43Na rĩrĩ, nĩ kuoya mwoire hema ya Moloku

Na njata ya ngai ĩrĩa ĩĩtagwo Refani,

Nacio no mĩhianano ĩrĩa mwethondekeire nĩ getha mũmĩthathaiyagie.

Na nĩngamũtahithia mũtwarũo mbere ya Babuloni.

44 # Thama 25.9,40. Kũu werũ-inĩ, maithe maitũ maarĩ na hema ĩrĩa yetagwo Gĩikaro kĩa Ũira, o ta ũrĩa we ũcio waarĩirie Musa aathanĩte, atĩ amĩthondeke Ihaanaine na mũhianĩre ũrĩa onetio. 45#Josh 3.14-17.Na hema ĩo nĩyo maithe maitũ, maarĩkia gũtigĩrũo yo, maacokire makĩmĩkuua, me hamwe na Joshua, hĩndĩ ĩrĩa menyitĩire bũrũri wa ndũrĩrĩ iria Ngai aarutũrũrire, ciehere mbere ya maithe maitũ, makĩmĩtonyia kuo. Nayo ĩgĩikara kuo nginya matukũ ma Daudi. 46#2 Sam 7.1-16; 1 Maũ 17.1-14.Nake Daudi agĩĩtĩkĩrĩka nĩ Ngai, akĩhoya atĩ etĩkĩrio kuonera Ngai wa Jakubu gĩikaro. 47#1 Ath 6.1-38; 2 Maũ 3.1-17.Ĩndĩ nĩ Solomoni wamwakĩire nyũmba. 48No rĩrĩ, Ũrĩa-wĩ-Igũrũ-Mũno ndatũũraga nyũmba iria ciakĩtwo na moko ma andũ: o ta ũrĩa mũnabii oigĩte, ũũ:

49 # Isa 66.1,2. Igũrũ nĩkuo gĩtĩ gĩakwa gĩa ũthamaki,

Nayo thĩ nĩyo gĩturũa gĩakwa kĩa magũrũ:

Mũgakĩnjakĩra nyũmba ĩtariĩ atĩa? Ũguo nĩguo Mwathani oiga:

Kana nĩ ta ha hangĩtuĩka hakwa ha kũhurũka?

50Githĩ guoko gwakwa tikuo kwombire indo icio ciothe?

51 # Isa 63.10. Andũ aya aremu mũno, o inyuĩ mũikaraga ta andũ mataruĩte ũhoro-inĩ wa ũrĩa mũregaga kũigua na ngoro cianyu o na matũ manyu rĩ, mũtirĩ hingo mũtareganaga na Roho Mũtheru: na ta ũrĩa maithe manyu mekaga, no taguo na inyuĩ mwĩkaga. 52Nĩ mũnabii ũrĩkũ maithe manyu matakĩigana kũnyarira? Na makĩũraga arĩa maarathire o mbere ũhoro wa gũũka kwa Ũrĩa Mũthingu: o ũcio inyuĩ mũtuĩkĩte rĩu amũneani na amũũragithia; 53o inyuĩ mwamũkĩire watho o ta ũrĩa waathanirũo nĩ araika, mũgĩkĩaga kũũmenyerera.

54Na rĩrĩa maakĩiguire maũndũ macio magĩitwo nĩ marakara magĩkĩmũhagaranĩria magego. 55Nowe Stefano nĩaakorirũo aiyũrĩtwo nĩ Roho Mũtheru, agĩcũthĩrĩria Igũrũ akĩona riri wa Ngai, na Jesu arũgamĩte guoko-inĩ kwa ũrĩo kwa Ngai, 56agĩkiuga, Atĩrĩ, ndĩ kuona Igũrũ rĩhingũkĩte, na Mũrũ wa Mũndũ arũgamĩte guoko-inĩ kwa ũrĩo kwa Ngai. 57No andũ acio makĩgũũthũka na mũgambo mũnene, makĩhinga matũ mao, makĩmũguthũkĩra marĩ na ngoro o ro ĩmwe; 58makĩmũthinĩkania nja ya itũũra, makĩmũhũra na mahiga: nao aira makĩiga nguo ciao thĩ magũrũ-inĩ ma mwanake wetagwo Saulu. 59Magĩkĩhũra Stefano na mahiga, o agĩkayagĩra Mwathani akiugaga atĩrĩ, Mwathani Jesu, oya roho wakwa. 60Agĩturia ndu, akĩanĩrĩra na mũgambo mũnene atĩrĩ, Mwathani, ndũkamorie rĩĩhia rĩrĩ. Na aarĩkia kuuga ũguo agĩkoma toro.

Currently Selected:

ATŨMWO 7: OGKBIBLE

Highlight

Copy