ATŨMWO 9

1NO rĩrĩ, ũcio Saulu nginya hĩndĩ ĩo no aatũire agirĩkaga, akiugaga atĩ arutwo a Mwathani moragwo. Agĩgĩthiĩ kũrĩ mũthĩnjĩri-Ngai ũrĩa mũnene, 2akĩmũhoya marũa athiĩ namo kũrĩ ciama cia thunagogi cia kũrĩa Dameski, nĩ getha atĩ angĩona andũ marĩ a Njĩra ĩo, arũme kana andũ-a-nja, amatware Jerusalemu marĩ ohe. 3Na arĩ njĩra agĩthiĩ-rĩ, agĩkorũo akuhĩhĩirie Dameski; na rĩrĩ, ũtheri ũkiuma Igũrũ o rĩmwe ũkĩmwarĩra mĩena yothe. 4Nake akĩgũa thĩ, agĩcoka akĩigua mũgambo wamwarĩria, ũkĩmũũria atĩrĩ, Saulu, Saulu, ũ’nyariraga nĩkĩ? 5Nake akĩũria, Wee nĩwe ũ, Mwathani? Nake akiuga, Nĩ niĩ Jesu ũrĩa ũnyariraga: 6no rĩrĩ, ũkĩra ũtonye itũũra rĩrĩa, na nĩũrĩĩrũo ũrĩa wagĩrĩirũo nĩ gwĩka. 7Nao andũ arĩa maatwaranaga nake makĩrũgama makirĩte ki, nĩ ũrĩa maaiguire mũgambo, no matiigana kuona mũndũ. 8Nake Saulu agĩũkĩra, akĩrũgama: na aahingũra maitho, ndaigana kuona o na hanini, agĩthiĩ anyitĩtwo guoko nĩ andũ, agĩtwarũo nĩo Dameski. 9Agĩikara mĩthenya ĩtatũ atekuona, o na atekũrĩa kana akanyua kĩndũ.

10Na rĩrĩ, nĩkwarĩ mũrutwo ũmwe kũu Dameski, wetagwo Anania: nake Mwathani akĩmwarĩria na kĩoneki akĩmwĩra atĩrĩ, Anania. Nake akĩmũcokeria, Niĩ ũyũ, Mwathani. 11Nake Mwathani akĩmwĩra atĩrĩ, Ũkĩra, ũthiĩ ũkinye njĩra ĩrĩa ĩĩtagwo Njĩra Nũngarũ, ũtuĩrie kwa Judasi mũndũ wĩtagwo Saulu wa kũrĩa Tariso, tondũ rĩrĩ, nĩ kũhoya arahoya Ngai; 12na nĩonete mũndũ ũgwĩtwo Anania aatonya aamũigĩrĩra moko nĩ getha acoke kuona. 13Nowe Anania akĩmũcokeria atĩrĩ, Mwathani, nĩnjiguĩte na andũ aingĩ ngumo ya mũndũ ũcio, ũrĩa maũndũ moru maingĩhĩte marĩa aaneka andũ aku aamũre kũrĩa Jerusalemu: 14na ningĩ gũkũ nĩaheetwo wathani nĩ athĩnjĩri-Ngai arĩa anene nĩguo ohithie arĩa othe makayagĩra rĩĩtwa rĩaku makĩhoya. 15Nowe Mwathani akĩmwĩra atĩrĩ, No wĩthiĩre, nĩ gũkorũo mũndũ ũcio nĩwe kĩndũ kĩrĩa ndĩĩthurĩire gĩa gũtwara ũhoro wa rĩĩtwa rĩakwa kũrĩ andũ a Ndũrĩrĩ, o na athamaki, o na ciana cia Isiraeli: 16tondũ nĩngũmuonia ũrĩa maũndũ maingĩhĩte marĩa atarĩ hingo atakanyamarĩka namo nĩ ũndũ wa rĩĩtwa rĩakwa.

17Nake Anania agĩthiĩ, agĩtonya nyũmba ĩo, akĩmũigĩrĩra moko akĩmwĩra atĩrĩ, Saulu, mũrũ wa Awa, Mwathani, o we Jesu ũcio urakuumĩrĩire njĩra ĩrĩa ũrokĩire, nĩwe wandũma nĩ getha ũcoke kuona, na ũiyũrũo nĩ Roho Mũtheru. 18Na kahinda o kau hakĩgũa nyamũ itariĩ ta ngaracũ hũthũ ciumĩte maitho make, agĩgĩcoka kuona; agĩũkĩra akĩbatithio, 19agĩcoka akĩrĩa irio akĩgĩa na hinya.

Nake agĩikara matukũ maigana ũna hamwe na arutwo arĩa maarĩ Dameski. 20Na hĩndĩ o ĩo akĩrika kũhunjagia ũhoro wa Jesu thunagogi-inĩ, atĩ nĩwe Mũrũ wa Ngai. 21Na arĩa othe maamũiguire makĩgega mũno makiuga atĩrĩ, Githĩ ũyũ tiwe ũrĩa watũire kũu Jerusalemu aharaganagia andũ arĩa makayagĩra rĩĩtwa rĩu makĩhoya? Naguo ũndũ ũrĩa watũmire oke gũkũ kĩũmbe no atĩ amatware kũrĩ athĩnjĩri-Ngai arĩa anene marĩ ohe. 22Nowe Saulu akĩongererũo hinya o makĩria, akĩhoota Ayahudi arĩa maatũire Dameski, akĩonanagia na ma o ma atĩ Jesu nĩwe Kristo.

23 # 2 Kor 11.32,33. Na matukũ maingĩ maathira-rĩ, Ayahudi magĩthiĩ ndundu mamũũrage; 24ĩndĩ ndundu ĩo yao ĩkĩmenyeka nĩ Saulu. Na magĩikara mamuoheirie ihingo-inĩ, mũthenya na ũtukũ, nĩguo mamũũrage: 25no arutwo ake magĩthiĩ nake ũtukũ, makĩmwagararĩria rũirigo-inĩ, makĩmũharũrũkia na nja arĩ kĩondo-inĩ kĩa mbawa.

26Nake aakinya Jerusalemu-rĩ, akĩgeria kwĩgwatania na arutwo: nao othe nĩmaamwĩtigagĩra nĩ ũndũ wa kwaga gwĩtĩkia atĩ nĩatuĩkĩte mũrutwo. 27Nowe Baranaba akĩmuoya, akĩmũtwara kũrĩ atũmwo, akĩmera wega ũrĩa eoneire Mwathani njĩra-inĩ, makĩaria nake, o na ũrĩa aahunjirie Ũhoro na rĩĩtwa rĩa Jesu kũu Dameski omĩrĩirie. 28Na kũu Jerusalemu Saulu agĩikara nao, agĩthiaga na akĩinũkaga nao, 29akahunjagia ũhoro na rĩĩtwa rĩa Mwathani ategwĩtigĩra. Na ningĩ akaaragia na Ayahudi arĩa maaciarĩirũo kwa Ayunani agĩkararanagia nao; magagĩcaria ũrĩa mangĩhota kũmũũraga. 30Nao ariũ a Ithe witũ maamenya ũhoro ũcio, makĩmũthereria Kaisarea, makĩmũtũma Tariso.

31Naguo kanitha ũrĩa warĩ Judea na Galili na Samaria o guothe ũgĩgĩikara na thayũ ũkĩongagĩrĩrũo hinya; nao andũ aguo, tondũ wa ũrĩa maathiaga na mbere metigĩrĩte Mwathani na makomĩrĩrio nĩ Roho Mũtheru, magĩkĩingĩha.

32Na gũgĩkinya atĩrĩ, rĩrĩa Petero aaceerangaga kũndũ guothe, kwĩ hĩndĩ aakinyire kwa andũ arĩa aamũre maatũire Luda. 33Kũu nakuo agĩkora mũndũ wetagwo Ainea, watũire akomeire kĩbarĩ mĩaka ĩnana arũarĩte mũrimũ wa gũkua ciĩga. 34Nake Petero akĩmwĩra atĩrĩ, Ainea, Jesu Kristo nĩegũkũhonia: ũkĩra wĩkũnjĩre kĩbarĩ. Nake agĩũkĩra o rĩmwe. 35Nao andũ othe arĩa maatũire Luda o na Sharoni makĩmuona, magĩkĩgarũrũkĩra Mwathani.

36Na rĩrĩ, kũrĩa Jopa nĩkwarĩ mũrutwo wetagwo Tabitha, narĩo rĩĩtwa rĩu rĩgĩtaũrũo nĩ kuuga Dorokasi.#9.36 Dorokasi: nĩ kuuga thiya. Mũtumia ũcio nĩaatũire arutaga mawĩra mega, na akaheanaga indo cia gũtugana. 37Na matukũ-inĩ macio gũgĩkinya atĩrĩ, atĩ nĩaarũarire agĩkua: nao andũ maarĩkia kũmũthambia, makĩmũiga nyũmba yarĩ igũrũ rĩa iria ingĩ. 38Na tondũ kũu Luda kwarĩ hakuhĩ na Jopa, arutwo maaigua atĩ Petero nĩkuo aarĩ, makĩmũrekeria andũ erĩ, makĩmũthaitha atĩrĩ, Ũka narua gwitũ, na ndũgaikare. 39Nake Petero agĩgĩũkĩra magĩthiĩ hamwe. Na aakinya kuo, makĩmũtwara nyũmba ĩo ya igũrũ: nao atumia othe a ndigwa makĩrũgama hakuhĩ nake makĩrĩraga, makĩmuonia magoti na nguo iria Dorokasi aatumĩte rĩrĩa aarĩ nao. 40Nowe Petero akĩmoimia nja othe, agĩturia ndu akĩhoya Ngai; agĩcoka akĩhũgũkĩra kĩimba akiuga atĩrĩ, Tabitha, ũkĩra. Nake akĩhingũra maitho, na rĩrĩa onire Petero, agĩĩtiira. 41Nake Petero akĩmũtambũrũkĩria guoko, akĩmũnyita akĩmũũkĩria na igũrũ; agĩcoka agĩĩta andũ arĩa aamũre na atumia a ndigwa, akĩmũrehe harĩ o arĩ muoyo. 42Naguo ũhoro ũcio ũkĩmenyeka Jopa guothe; na andũ aingĩ magĩgĩĩtĩkia Mwathani. 43Na gũgĩkinya atĩrĩ, atĩ Petero nĩaaikarire Jopa matukũ maingĩ kwa mũndũ wetagwo Simoni warĩ mũtanduki wa njũa.

Currently Selected:

ATŨMWO 9: OGKBIBLE

Highlight

Copy