Ruka 15

Sanza: ingiingi kandoro

(Mt. 18:10-14)

1Were abarogo marã ngbeti ki tiria koyo du Yesu ni na aboro ingapai dunduko ka gia gako pai. 2AFarusi ki gumba rimoko na abakeapai, ki ya, “Gi kumba re nadia aboro ingapai ku gume, ki niri riahe na yo.”

3Yesu ki gumba gi sanza fu yo re, ki ya. 4“Gini boro ka du dagba roni yo na akandoro 100 be ni, ka gu ru ingi dagba ra sa, ni ambu nga agu ra 99 ngbakungba yo, ka ndu ka gbata gu ru naingi, da kina ho ni ka bi ru ni, te? 5Ho ni ka bi ru ni, ni ki wagi ru pagoni ni ngbarago. 6Ho ni ka da ni kporo yo, ni ki ta yamba abadiangbani na akurani dunduko, ki ya fu yo, ‘Ani mongo ngí angi na oni, bambiko mi bi gi kandoro naingi.’ 7Ya mi fu roni, kina wo i ka ngi angi ngbangbaturũ yo tipa gu boro ingapai sa ka sa gani berã, susi gu ka du tipa ruru aboro 99, ka akpi nga nyemu saberã ya.

Sanza: ingiingi marã

8“Berewe, gini de ka du na marã be ri bawe, ka gu ru ingi dagba ra sa, ri atiga nga baro, ki wege bambu, ki gbata ru kakaka da kina ho ri ka bi ru ni, te? 9Ho ri ka bi ru ni, ri ki ta yamba abadiangbari na akurari dunduko koyo du ri ni, niya, ‘Ani mongo ngí angi na oni, bambiko mi bi gu marã naingi.’ 10Ya mi fu roni, kina wo ngbarago adu dagba ga Mbori amaraika tipa gu boro ingapai sa ka sa gani berã.”

Sanza: ingiingi paranga

11Ko ki ya berewe, “Kumba nadu na awiriko ue; 12tame ki ya fu bako, ‘Buba, mo fú gu ũkumuko fere du ni gimi.’ Si du ko ki kparaka gako ahe fu yo. 13Fuo rame ngbutuko tame ki tangara gako ahe dunduko ki ndu ku rogo ringara tuturũ; ko ki gbandaka gako ũkumuko yo ni nzanga. 14Ko agbandaka ha dunduko kere gberãngbi ki niti ku rogo gu ringara re. Zingo ahe ki tona ka manga ko. 15Ko ki ndu koyo du gu boro ni rogo gu ringara re; ni ki kedi ko ku rogo gani ngbi ka riga amukuru. 16Ko akpi nyemu ka mbi ni sisi gu he amukuru ari he; a nga boro nafu he fu ko wa sa te. 17Ho ko amakia pa tiko ni, ko ki ya, ‘Bakere riahe du be ga buba amoyambu ni dungu yo, mi tigimi nakpi erẽ be gomoro! 18Mi agúari ki ndu koyo du buba ni, mi ki ya fu ko, “Ba, mi ingi pai kuti ngbangbaturũ na barangba ro; 19ka mo yambu nga re ni rimo wiro berewe ya; mo sá re ni kina gu ni dagba gamo amoyambu.” ’ 20Ko ki guari ki ndu koyo du bako ni. Ono wa ko adu tuturũ, bako ki bi ko, nungako ki nimangi ko, ko ki oro, ki ti ku goko yo, ki dungo ko gbe. 21Wiriko ki ya fu ko, ‘Ba, mi ingi pai kuti ngbangbaturũ na barangba ro; ka mo yámbu nga re ni rimo wiro ya.’ 22Ono bako ki ya fu gako amoyambu, ‘Oni kúsi gu remu ngba susi ki ukadi ko na ni; ki moi tongo ku beko yo, na katara ku nduko yo; 23oni ki ye na gu wiri bagara wiri wa nze u anze kono, ki imi ru, ani ta ri ru ningi angi dagba rani. 24Bambiko gi wire re akpi, ki du ni ungako berewe; ko adu ni ngbuongbuo ko, mi ki bi ko berewe.’ I ki tona ka ngi angi dagba yo.

25“Were unvurako adu ati yo; wa ko aye ka mbeda ku bambu yo, ko agi woro kundi aboro nido. 26Ko ki yambu gu moyambu sa koyo du ko ni, ki sana ni si nimangi wãi. 27Ni ki ya fu ko, ‘Tamero ye; bamo ki imi gu wiri bagara wiri wa nze u anze, bambiko ko ayega teketeke.’ 28Ko ki nierẽ aerã, ka ko aida nga ka rima koyo ya. Bako ki kuru, ki zúngadi ko. 29Ko ki karaga ha ki ya fu bako, ‘Mo bí nga, gi dungu agarã re mi amangi sangbaro, ka mi agusa nga sangbaro wa sa ya. Mo ata fu nga wiri meme fere ka mi ngi angi na abadiangbare te. 30Ono ho gi wiro re aye ni, nga gu ko nabagi ga ũkumuko fu airabari, mo ki imi wiri bagara wiri wa nze u anze tipa ko!’ 31Bako ki ya fu ko, ‘Wire, mo du na mi kindi, gimi ahe dunduko nga gamo. 32Ono si ru ka ngi angi ni ngbarago; bambiko gi tamero re akpi, ki du ni ungako berewe; ko adu ni ngbuongbuo ko, ani ki bi ko berewe.’ ”

Currently Selected:

Ruka 15: ZB1978

Highlight

Copy