Ruka 16

Sanza: Gu buruku nangia irabiriki

1Yesu ki ya fu gako abawiriki a, “Kumukokumuko kumba nadu ho na gako buruku; i ki kiti ngbanga ni fu ko ya ni namisika gako ahe. 2Ko ki yambu ni, ki ya fu ni, ‘Si nimangi wãi mi agi gi pai re ti rimoro? Mo kúsi gamo apai dunduko; bambiko mo adú nga ni buruku berewe te.’ 3Buruku ki berẽ he tigako ya, ‘Mi amanga wãi, bambiko bairare nadia gi sunge buruku ti re? omere arengba nga na sopa bino te; zee namanga re tipa du ni irakangadu. 4Mi ini gu mi ka manga ha ti ni, ya, ho i ka dia sunge buruku ti re ni, i adia re ku gume ku kpuyo yo’. 5Ko ki yambu ga bairako aboro bape koyo du ko ni dunduko, ki ya fu bambata ni, ‘Ga bape du wãi fu bairare?’ 6Ni ki ya, ‘Pere nzeme 100’ Ko ki ya fu ni, ‘Mo dí ga waraga bape, ki sungu ni ba sa, ki ke 50.’ 7Ko ki ya fu kura ni, ‘Ga bape du wãi?’ ni ki ya, ‘Zendehe maduka ki du 100.’ Ko ki ya fu ni, ‘Mo dí ga waraga, kike 80.’ 8Bairako ki tambua gu iraira buruku re bambiko ko amangi pai ni tatamana. Bambiko gu tatamana nga ga awiri gi zegino re si susi gu tatamana nga ga awiri imarago ti gayo rago. 9Mi ki ya fu roni, oni sá aboro ni abadiaroni ni gu ũkumuko nga gbegberẽ he; ya ho si ka paya ni, i adía roni ku gume rogo gayo nyenye rago.

10“Gu ni namanga wenengãi na gu du ni toni he, ni amánga wenengãi na gu du ni bakere he. Gu ni namanga toni pai ni iraira ha, ni amánga bakere pai ni iraira ha a. 11Ka oni amanga nga wenengãi na gbegbegberẽ ũkumuko ya, da nikafu ndikidi ũkumuko fu roni oni banda ha? 12Ka oni amanga nga wenengãi na gu he nga ga kura boro ya, da nikafu gu he nga gaoni fu roni? 13A nga zogo sa ka ra fu abaira ue te: bambiko watadu ni asóga gu ni, ki nikpi nyemu gu ni; na ni aká kuti gu ni, ki payasi pa gu ni. Ka oni ra nga fu Mbori nira fu ũkumuko a te.”

Kura ga Yesu yugopai

(Mt. 11:12-13)

14AFarusi, nangia akpinyemu ũkumuko i ki gi agi apai dunduko re, i ki momu ko. 15Ko ki ya fu yo, “Oni nga agu yo naida ka mbakada rimoroni bangiri aboro; ono Mbori ini kpotoroni yo; bambiko gu pai i nataka pande he dagba aboro, gbegberẽpai nga ha bangiri Mbori.

16“Rugute na anebi adu ho da ho Yoane aye ni: fuo gu rago re i natungusa gu wene pangbanga nga ga ga Mbori ngbi, aboro ki nirimi koyo dunduko nizuba ha. 17Ono pa nyasa ngbangbaturũ na sende, si ipi ti ti gu wiri toni he ti rugute.

Yugopai tipa mbu de

(Mt. 5:31-32; Mk. 10:11-12)

18“Gu ni ka mbu diani, ki di kura de, ni namanga bari; gu ni ka dia gu ri kumbari ambu ri ni namanga bari.

Kumukokumuko kumba na Razaro

19“Were kumukokumuko kumba nadu ho, naaukadi tiko ni ngungungu remu na wene nzaranzara pusi remu, ka ko ari nga kungba he wa sa ya. 20Boro kangadu ki du ho a rimoko nangia Razaro i apigi ko pati ga gu kumukokumuko kumba ngbadimo, aoro amburu kpotoko ambura dunduko. 21Razaro ki nikpi nyemu ka ri gu mbusuru kpokuta nati tii ga kumukokumuko kumba mbisa yo; ii, kina aango ki ye ki nisisiri gako aoro. 22Were, boro kangadu ki kpi, amaraika ki tindi ko koyo du Abarayama ni. Kumukokumuko kumba ki kpi a, i ki kpisidi ko. 23Ko ki ngere ku ari Adisi yo, niimi aima, ko ki bi Abarayama tuturũ, Razaro ki du be ko yo. 24Ko ki kpari ki ya, ‘Buba Abarayama, mo íni pai fere, ki kedi Razaro kono du mi ni, ko zogo wirinzagako ku ime yo, ki zeresi mirãre; bambiko mi naima aima be gi mirã we re bakere gbe.’ 25Abarayama ki ya, ‘Wire, mo tíngidi he wa mo adu ni ungaro i afu wene ahe foro, kina wo i afu gbegberẽ ahe fu Razaro. Awere ko du erẽ zezeredi, mo tigamo naima aima gbe. 26Gbia kuti agi apai re dũ, i amoi bakere ngbungumu dagba rani, ya agu aboro du nore ka kpi nyemu ka yara auru he, ka i arengba nga na ni ya; na agu aboro du yore, ka i yari nga auru he fuo rani ya.’ 27Kumukokumuko kumba ki ya, ‘Mi nazungadi ro tie, ba, ya mo kedi Razaro ku kpurani yo; 28bambiko awirinami du ho bisue; ko ki tungusi pai fu yo, i ka da ku rogo gi gbegberẽ ba re a tigayo.’ 29Abarayama ki ya, ‘AMose du be yo na anebi; i gi payo.’ 30Ko ki ya, ‘Oó, buba Abarayama! ono ka gu boro ndu koyo du yo ni nazingi be kpio i ki sa gayo berã.’ 31Ko ki ya fu ko, ‘Ka i agia nga pa Mose na pa anebi ya, ka i aruga nga tiyo na ni ya, ka boro vura zinga be kpio vurũ.’ ”

Currently Selected:

Ruka 16: ZB1978

Highlight

Copy