Ruka 14

Yesu ahusi kumba nakaza be bumbu

1Si ki ta du wa gere, ho Yesu arimi ni ku rogo gu bambu nga ga gu baira aFarusi rago sabiti ka ri riahe, i ki pidi ko. 2Mo ngére, kumba ki ye koyo du ko ni nakaza be bumbu. 3Yesu ki ta karaga ha fu abainiparugute na aFarusi niya, “Watadu husa boro na he ni, gini gu ru rago sabiti?” 4I ki ongo aonga. Ko ki di ko, ki husi ko, ki nihe ko ko ga. 5Yesu ki ya fu yo, “Da dagba roni ka gani dongi watadu bagara ti ku guga yo rago sabiti, ni ka he dia ru yo ni ba sa?” 6Ka i arengba nga na karaga pai kuti agi apai re ya.

Sanza: pa agino ku kporo pumbo yo

7Yesu ki gumba sanza fu agu aboro nadu ni yambuyambu yo, ho ko abi he ni ya i nasia tumbatumba basunga; ko ki ya fu yo, 8“Ho boro ka yamba ro ni ku kporo pumbo diade, ka mo súngu nga auru tumbatumba basunga ya; gu boro ka ye du ni iriiri ni ti ro, 9gu ni nayambu roni na ko ka ye ki niya foro, ‘Mo fú basunga fu gi kumba re’; mo ki tona dia tiditidi basunga ni zee. 10Ono ho i ka yamba ro ni; mo ndú ka sunga auru tiditidi basunga; ho gu ni ka ye ni nayambu ro, ko ki ya foro, ‘Badiangbare, mo ndú ku auru gu basunga du ni tumbatumba ha ti gere’; taarimo ki du foro bangiri agu aboro dunduko nasunga ka ri riahe na mo. 11Bambiko gu boro nakiisa tini i aúmbasi pa ni aumbasi; gu ni naumbasi tini, i akíisa pa ni.”

12Ko ki ya fu gu ni nayambu ko a, “Ho mo ka mbakada pumbo ni, ka mo yámbu nga abadiangbaro, na awirinamo, na agumero, na agu akuaro du ni kumukokumuko aboro ya, i ka yamba ro tigayo berewe, si ki du wa i afu mosoro foro. 13Ho mo ka mbakada pumbo ni mo yámbu rungorungo aboro, na terengeterenge aboro, na airavurari. 14Mo ki du ni boro maku; bambiko he be yo ka fu mosoro foro te. Bambiko i afú mosoro foro rago zinga ruru aboro be kpio.”

Sanza: bakere pumbo

15Ho gu ni dagba agu yo nasungu ka ri riahe na ko agi agi apai re ni, ni ki ya fu ko, “Boro maku nga gu ni ka ri riahe rogo ga Mboringbi!” 16Ono Yesu ki ya fu ko, “Gu boro ambakadi bakere pumbo; ko ki yambu dungu aboro. 17Ko ki kedi gako moyambu rago riahe ka ya fu agino, ‘Oni yé bambiko i mbakadi ahe dunduko awere.’ 18I ki karaga tiyo ni ba sa sa dunduko. Gu ni sa aya fu ko, ‘Mi angbe ati, mi nandu ka bi he; mi nakpara foro mo he he fere.’ 19Kura ni ki ya. ‘Mi angbe abagara sunge ni ba ue bara bisue, mi nandu ka asada ra; mi nakpara foro mo he he fere.’ 20Kura ni ki ya, ‘Mi di de, si du ka mi aye nga ti ni ya.’ 21Moyambu ki ga, ki gumba agi apai re fu bairako. Irakporo ki ta era niya fu gako moyambu, ‘Mo kúru ni ipo ku rogo bakere agene na umba agene bakporo yo, ki niye na rungorungo aboro kono na terengeterenge aboro na airavurari.’ 22Moyambu ki ya, ‘Gbia, i mangi he wa mo arugu he, abasunga kina ho kindi.’ 23Bairako ki ya fu moyambu, ‘Mo kúru ku zegi yo, ku rogo gu bakere agene na andugu du ringara yo, ki zungadi aboro i rimi, kpure ki hi ahi. 24Bambiko ya mi fu roni, a nga boro sa dagba agu aboro i ayambu yo nikari gi riahe te.’ ”

Peka Yesu nga gine

25Were bakere rimbasa aboro ki mongo ndu na Yesu. Yesu ki sa tiko, ki ya fu yo, 26“Gu ni ka ye fuo re, ka ni asoga nga bani na nani na diani, na awirini, na awirinani, na adewirini, ii, na ungani a tigaha ya, ka ni du nga ni gi bawiriki te. 27Gu ni ka aaka nga gani wagiwagi ngua, ki ye fuo re ya, ka ni du nga ni gi bawiriki te. 28Bambiko da dagba roni yo, ka ni kpi nyemu ka dua gbanga bambu, ni ka he sunga mbata, ka geda paha, ka ngia marã be ni rengbe kanyasa ha? 29Bambiko, ho ni ka mbakada mburuhe ni, ka ni arengba nga na nyasa ha ya, agu aboro dunduko ka bi he i ki tona moma ni, 30niya, ‘Gi kumba re atona dua ha ka ni arengba nga na nyasa ha ya.’ 31Gini bakindo nga gu ni ka ndu ka gbia kura bakindo ni vura, ka ni asunga nga ka baka bangirini mbata, si ngia ni rengbe na aboro 10,000 ka so vura na gu ni naye kuti ni na aboro 20,000 ya? 32Ka si adu nga wo ya, ko akeda sunge, ho kura ni ata du ni koyo tuturu, ka sana he tipa zereda. 33Were gu ni dagba roni yo, ka ambu nga gani ahe dunduko ya, ka ni du nga ni gi bawiriki te.

Gu tikpo ahia nga ya

(Mt. 5:13; Mk. 9:50)

34“Ngba tikpo angba; ono ka tikpo ahia nga ya, si ahia be gine? 35Si angba nga tipa sende, na tipa guguda te; i nabafa ha ku zegi yo. Gu ni du na tu gia ha ti ni, ni gí he.”

Currently Selected:

Ruka 14: ZB1978

Highlight

Copy