Amokedi 5

Anania na Safira

1Ono kumba adu yo rimoko angia Anania, na diako nangia Safira, 2ko ki bagi gu dagba agu ahe nga gako ki ka kuti gu marãha, diako ki niini pa ha a, ko ki ye na gu, ki zogo ho pati ndu amokedi. 3Petero ki ya, “Anania, tipagine Satana aduaga kpotoro yo ti ni mo gumba zire fu Ziazia Toro ki ka kuti gu marã ati? 4Wa si anye, si anye nga ni gamo te? fuo baga mo ho, si adu nga be ro te? Tipagine mo aberã gi pai ti ni re kpotoro yo? Mo agumba nga zire fu aboro te, fu kina Mbori.” 5Anania ki ta gia agi apai re niti sande ki fu mbisimoko; bakere gunde ki zi agu aboro azia dunduko nagi he. 6Aparanga ki guari ki kãi ko, i ki tindi ko ku zegi yo ki kpisidi ko.

7Si ki du wa ka saa susi biata fuo ho, diako ki rimi, ka ri aina nga gu pai namangi ya. 8Petero ki karaga pai fu ri, ya, “Mo gúmba nga ha fere, oni abagi ati tipa kina gi marã re.” Ri ki ya, “Ii, tipa kina ha.” 9Petero ki ya fu ri tie, “Wãi oni aru ka ta bura dagba roni ka asada Toro Gbia? Mo ngére, ndu agu yo nikpisidi kumbamo nduyo ngbadimo, i nikatinda ro ku zegi yo.” 10Ri ki ti ati sande ni ba sa pati nduko, ki fu mbisimori. Aparanga ki rimi, ki bi ri ri nakpi, i ki tindi ri ku zegi yo ki kpisidi ri pati kumbari. 11Bakere gunde ki zi kanisa azia dunduko, na agu yo nagi agi apai re dũ.

Dungu iiriwo apai

12Amokedi ki mangi agu apai i aina apai ti ni na iiriwo apai ni dungu he ni beyo dagba aboro. I ki du kina ku bani ti gu gbanga ngbadimo nga ga Soromo. 13Ono dagba kura aboro a nga boro sa naerẽ ka kpamia tini na yo te; ono aboro ataasi rimoyo ataasa. 14I ki dungura aidipase fu Gbia susi gu nadu mbata, rimbasa akumba na ade. 15Wa i atindi aboro kaza ku bangiri agene yo, ki nipipigi yo auru abarame na akitikpara, ya, Petero ya ye ka susa, kina kirimako dadi gu ni dagba yo 16Rimbasa aboro ki dungura tiyo a rogo abaakporo kirikiri ku Yerusarema yo, niye na aboro kaza, na agu yo gbigbita atoro amanga yo, i ki husi yo dunduko.

Rungosi amokedi

17Gbiamotumo ki guari ku ari na agu yo dunduko nadu na ko nga agu yo nangia aSadoke, i ki gberẽ agberã were be ringo, 18ki moi beyo ti amokedi, ki moi yo ku bambukisa yo. 19Ga Gbia maraika ki za ngbadimo bambukisa yuru, ki kuru na yo, ki ya, 20“Oni ndú ki ru yekaru yo ki tungusi agu apai atungusa dunduko fu aboro nga ga gi Unga re.” 21Ho i agi he ni, i ki rimi ku yekaru yo kina ngbatutu, ki yugu pai.

Ono gbiamotumo ki ye, na agu yo nadu na ko, ki yambu abororondo i dungura tiyo, na ga awiri aYisaraere abaakumba du, ki kedi sunge ku bambukisa yo i ye na yo. 22Ono agu amoyambu naye i abi nga yo bambukisa yo te; i ki kara tiyo, ki gumba ha, 23ya “Ani bi bambukisa ni kina kisikisi he nganganga, ababandaha ki ru kina pa ngbadimo; ono ho ani niza ha ni ani nabi nga boro dimo yo wa sa te.” 24Were ho baira yekaru agi agi apai ni re na abairamotumo, i ki nibaki bangiriyo abaka ti ni ya si adu wãi. 25Boro ki ye ki ya fu yo, “Oni ngére, agu akumba oni akisi yo i kina yekaru yo runiyugu pai fu aboro.” 26Baira yekaru ki ndu na amoyambu, ki ye aye na yo zezeredi; bambiko i agunde agunde be aboro ya i ka sopa yo na ambia.

27Ho i aye ni na yo, i ki mai yo barangba abororondo. Gbiamotumo ki sana yo, 28ya, “Ani arugu roni nyanyaki ya, ka oni yugu nga pai berewe ni gi rimo re ya; oni bí, oni hihisi Yerusarema ni gaoni yugopai, oni ka kuti pa ida pa kpio gi kumba re kuti rani kindi.” 29APetero ki karaga ha na amokedi, ki ya, “Ani gi nga sangba Mbori agia susi ga aboro. 30Ga abarani Mbori azingisi Yesu azingisa, ko oni aimi ko, niasa ko ti ngua. 31Ko Mbori akpara ko ni kumbabeko ko du ni Kindo, ni Batasi a, ko fu saberã fu aYisaraere ki gbandaka ingaapai. 32Ani nga adezire agi apai re, wo du Ziazia Toro a, ko Mbori afu ko fu agu yo nagia sangbako.”

33Ho i agi gi ni re, ngbaduyo ki imi aima i ki berẽ kina pa imo yo. 34Ono gu ko ki ru ku ari dagba abororondo, nangia Farusi, rimoko angia Gamariere, bangbasia rugute, aboro anairisa ko airisa dunduko, ko ki ya i kusi yo mbata toni. 35Ko ki ya fu yo, “Ako aboro aYisaraere, oni bánda tironi ti gu pai oni nikamanga ti agi aboro re. 36Bambiko mbata gi rago nikada re Teuda amo ku ari, ki niabia tiko ya boro a nga ko; ko akumba akpamia tiyo na ko ki du wa ka kama adu biama; ko i aimi ko; i ki gbandaka agu yo agbandaka dunduko naagia sangbako, ka fuo adu nga ti yo ya. 37Fuo gi kumba re Yuda ki mo ku ari nangia boro Gariraya, rago ke rimo aboro, ki gbe aboro fuo ko: ko ki kpi a; i ki gbandaka agu yo agbandaka yasika dunduko naagia sangbako. 38Were ya mi fu roni, oni zogo beroni ti agi aboro re, ki he yo; bambiko si ngia gi yugopai re ga aboro du na gi pai mangi re, fuo adu nga ti ni te; 39ono si ngia ga Mbor au, oni ba nga yo te; si ka du wa oni naso vura aso na kina Mbori!”

40I ki idi gako pai aida; ho i ayambu amokedi ni koyo du yo ni, i ata yo ata ki rugu yo ya ka i gumba nga pai ni rimo Yesu ya, ki he yo. 41I ki guari tie barangba abororondo, rago ningba angba ti yo mbiko wa ya yo i re are nahi wasiro tipa rimoko. 42Na uru ka i apiriga nga ti yugo pai na tungusa pa Yesu ya ko nga Kristo ti yekaru yo, na ku kpuyo yo ya.

Currently Selected:

Amokedi 5: ZB1978

Highlight

Copy