Amokedi 6

Sia akumba saba i nigamu ahe dagba aboro

1Were ni gu rago re, ho abawiriki ange ni, agu aYudo i abatika yo rogo kura aringara ki nigumba pa kura aYudo bambiko i nihe gayo adekurugbo ahe wa i nagama ahe na uru. 2Agu yo nanidu bawe na ue i ki yambu rimbasa abawiriki koyo du yo ni ki ya, “Ru nga he ani tungusa ga Mbori pai kuti gama ahe te. 3Awirinarani, oni sia akumba saba dagba roni, agu yo ngba ringiyo angba, hiki De Toro na tatamana, ani asia pa gi pai re fu yo. 4Ono ani aka aka kuti kparakpe tigaani kindi na tungusapai.” 5Sangbayo ki, mbakadi rago ambakada bangiri rimbasa dunduko. I ki sia aSetefano nahi be idapase na Ziazia Toro, na Firipo na Purokoro na Nikanora na Timono, na Parumena, a Nikorao nangia boro Andiokia, naidi pa ga aYudo yugopai. 6I ki moi yo barangba amokedi. Ho i akpari ni i ki moi beyo ri yo.

7Ga Mbori pai ki ndu andu; abawiriki ki nge ange bakere gbe Yerusarema yo; bakere rimbasa aboromotumo ki ka kuti idapase.

Zia Setefano

8Setefano nahi be undahe na tandu, ki nimangi iiriwo apai na agu apai i aina pai ti ni dagba aboro. 9Agu yo ki mo ku ari dagba aboro gu bambutiria i aniya ti ni bambutiria aRibetino, na aKureno, a aAresandurio, na agu yo naye Kirikia vo na Asia yo, i ki niti kangu na Setefano. 10Ka i are nga na gu tatamana nga ga Ziazia Toro ko agumba pai sangbako yo ya. 11I ki so kpekpe fu akumba, ya, “Ani agi he wa Setefano agumba apai nigberã ngbako yo fu Mose, na fu Mbori.” 12I ki zingisi aboro na ga aYudo abaakumoa a abakeapai, ki ye kuti ko ki zi ko ki ye na ko ku barondo yo, 13ki moi airabiriki adezire, naya, “Gi kumba re ko napiriga nga ti gumba pai kuti gi Ziazia ba re, na rugute te. 14Bambiko ani agi he ko nigumba ha, ya, gi Yesu nga boro Nazareta re, ko agbárasa gi ba agbarasa re, ki sa agu apai asa Mose afu fu rani.” 15Agu yo dunduko nasungu barondo yo ki ningana Setefano angana nganganga ki bi kpakpuko wa si adu wa kina kpakpu maraika.

Currently Selected:

Amokedi 6: ZB1978

Highlight

Copy