Amokedi 7

Ga Setefano tungusapai

1Gbiamotumo ki ya, “Wo du agi apai re?” 2Setefano ki ya,

“Awirinami, aba, oni gí he. Mbori du na taarimo ko ayugu tiko fu barani nga Abarayama, ho ko adu ni Mesopotamia yo, mbata ko nikadu Arana yo, 3ki ya fu ko, ‘Mo gúari rogo ga ringara, dagba agumero, ki ye ku rogo gu ringara mi ka yugo foro.’ 4Ko ki guari tie rogo ngbi aKasado, ki nye Arana yo. Ho bako akpi ni, Mbori ki di ko ku rogo kina gi ngbi du oni rogo ho re. 5Ko afu nga ũkumbo fu ko narengbe na maa kina nduko auru he te; ko ki kido ko ya ko afú he afu fu ko ni gako, fu atitako a fuo ko ho ko avunga nga ni mbata ya. 6Mbori ki ya were, atitako anyé anye rogo kura ngbi, i ki sa yo ni akanga, ki nimangi yo gbegberẽ, garãha ki du 400. 7Mbori ki niya, ‘Gu rika aboro i ka du ni akanga fu yo mi asápa ngbanga yo asapa. Fuo gure i ki kuru ki nimangi pa re roeo gi rago re.’ 8Ko ki rũ ndika yeratise fu ko; were Abarayama ki vungu Yisaka rame ki du muambi Ko ki yere ko. Yisaka ki vungu Yakoba, Yakoba ki vungu awirina bawe na ue nga atitarani.

9“Atitarani ki nimo ka de ringo ti Yosefa, ki bagi ko ku Ezipeta yo; Mbori ki du adu na ko, 10ki batasi ko be agu apai naamanga ko dunduko, ki fu inapai fu ko na tatamana ku bangiri Faro, bakindo Ezipeta. Ko ki moi ko ni bazogo Ezipeta na kpuko dunduko. 11Were gberãngbi ki ye kuru akura na bakere rungo ku Ezipeta yo dunduko na Kanana yo; ka abarani abi nga úngba ya. 12Ho Yakoba agi he ni ya riahe Ezipeta yo ko ki kedi abarani ni bambata ha. 13Ti bara ue he i ki yugu Yosefa ayugo fu awiribako; i ki yugu ngbatunga Yosefa fu Faro. 14Yosefa ki kedi sunge ki yambu aYakoba koyo du ko ni nga bako, na agumeko dunduko, aboro ki du 75. 15Yakoba ki nimo ka ndu ku Ezipeta yo; ko ki kpi a tigako, na abarani. 16I ki tinai yo ku Sekeme yo ki pigi yo rogo gu murã yo Abarayama angbe ni marã be awiri Amora Sekeme yo.

17“Ho rago kiao he ambeda ni nga gu Mbori akido Abarayama tipa ha, aboro ki kii aKia ki nge Ezipeta yo, 18da kina ho kura bakindo adu ni Ezipeta yo, naina nga Yosefa ya. 19Ko namangi pai ni bawagi fu ngbatungarani, ki mangi abarani gbegberẽ, i bafu fogo awiriyo ku zegi yo ka i nye nga ni ungayo ya. 20I avungu Mose kina sa gu rago re, ko ki ngba angba ni rengo; i ki mbu ti ko ti diwi biata ku bako yo. 21Ho i aba ko ni ku zegi yo wiri Faro ki tumba ko ki mbu ti ko ni wiriri. 22I ki yugu gu tatamana nga ga aEzipeto fu Mose dunduko; ko ki du na tandu ti gako pai na sabeko.

23“Ho garãko adu ni wa ka si du 40, ko ki berẽ gu pai kpotoko yo nga ka ndu ka bi awirinako nga awiri aYisaraere. 24Ko ki ta bi gu ni sa dagba yo ni ahi gbegberẽ pai, ko ki banda ni, ki iri bape gu ni i amanga ni, nita Ezipeto. 25Ko ki ya tigako awirinako arugu tiyo na ni va Mbori nifu bata fu yo rogo ko yo; ono i aruga nga tiyo na ni te. 26Rago ki ya giri ko ki yugu tiko fu agu yo ue ho i ata kpata ni, ki ye ka ruga yo, ki ya, ‘Aba, oni nga awirina oni namanga tironi gbegberẽ tipagine?’ 27Ono gu ni namangi kura ni gbegberẽ ni ki turã ko ki ya, ‘Da nisa ro ni bazogo ni boro sapungbanga fu rani? 28Mo naberã pa imo re wa mo aimi gu boro Ezipeta gba?’ 29Mose ki oro be gi pai re, ki du ni nungunungu boro rogo ngbi Midiana yo, yo ko avungu awinko ni ue.

30“Ho garã asaki ni 40, maraika ki yugu tiko fu ko rogo gu ngbakungba du pati bagangara Sinai yo, rogo mirã we, yegbende ngua yo. 31Ho Mose abi he ni, gu pai ko abi ni bangiriko si ki iriwo airiwo ti ko; a wa ko agbisi koyo ka bi he fugo Gbia ki poi, 32ya, ‘Mi nga ga abamo Mbori nga ga Abarayama Mbori, nga ga Yisaka nga ga Yakoba.’ Mose ki nikio akio, ki nigunde agunde ti bi he. 33Gbia ki ya fu ko, ‘Mo uru rakata nduro yo; bambiko gu rago ru mo rogo kparakpara sende du. 34Miabigu gberãngbi ni rengo nga ga gimi aboro Ezipeta yo, mi gi ukoyo mi ki zorõ ka batasa yo. Mo yé awere, mi kedi ro ku Ezipeta yo;

35“Gi Mose i aka pako re, niya, ‘Da nisa ro ni bazogo ni boro sapangbanga?’ Mbori akedi kina ko ko du ni bazogo ni batasi, rogo gu maraika yo nayugu tiko fu ko rogo yegbende ngua yo. 36Gi kumba ki kusi yo re fuo manga ko iiriwo apai na agu apai i aina pai ti ni Ezipeta yo, na Zamba Baime yo na ngbakungba yo, garã ki du 40. 37Gi Mose re naya fu awiri aYisaraere, ‘Mbori afú nebi fu roni dagba awirinaroni yo wa mi.’ 38Mose adu dagba rimbasa aYisaraere ngbakungba yo na gu maraika nagumba pai fu ko ri bagangara Sinai yo na abarani; nga gu ko i afu agu apai fu ko du ni ungaha ko fu he fu rani. 39Ka abarani agia nga sangbako ya, i ki mbu ko ambu tigayo, ki sa tiyo kpotoyo yo ku Ezipeta yo, 40niya fu Arona, ‘Mo mángi ambori i ngbe mbata yo fu rani; kango gi Mose nangbe mbata yo fu rani ani guari Ezipeta yo re ani aina nga gu pai mangi ko te.’ 41I ki mbakadi kpia wiri bagara ni gu rago re ki ye na motumo fu gu kpiahe re, rago ki ningba angba ti yo mbiko sabeyo 42Ono Mbori ki sa tiko ki fu yo i irisi rimbasa ũngbangbaturũ wa du he ni keke he rogo kitabu anebi yo,

‘Ako ngbatunga aYisaraere,

oni anatumo ni imiimi anya fere na amotumo ngbakungba yo ti garã 40?

43Oni anatumba gu bamburoko nga ga Moroke,

na gu kerekuru nga ga gu mbori ru nga Rafana a,

gu kpiaahe oni amangi ka irisa ha;

mi andú na oni tuturu ku gii Babera yo’.

44“Gu bamburoko nga ga dezirehe adu be abarani ngbakungba yo, a wa ko aringbisi he nga gu ko agumba ha fu Mose ya ko ringbisi he kuti kpia gu ko abi. 45Gu abarani aye na ni a tigayo na Yosua, ho i adi kumbo arika aboro ni, gu Mbori adandi barangba abarani, dati kina rago Dawidi. 46Ko nga gu ko nangba bangiri Mbori, ki nikpi nyemu gbata banye fu ga Yakoba Mbori. 47Ono Soromo nadua bambu fu Mbori. 48Ono gu ko nga Bahe, ko nanye nga rogo agu abambu i nadua ni be te; wa gumba nebi he ya,

49‘Ngbangbaturũ nga gi mbata bakindo,

kpotosende nga gi gbada nduhe.

Gini ngbatunga bambu oni ka dua ha fere? Gbia nipoi wo,

gini nga ba gi ongoda?

50A nga bere namangi agi ahe dunduko te re?’

51“Oni nga airanyakari oni akpara nga kpotoroni yo na turoni yo te, oni naka fu Ziazia Toro dedede; wa abaroni anamanga, oni namanga kina wo a. 52Dadungadagba anebi yo abaroni ahe rungosi ni? I ki niimi agu yo aimo nanayugo pa ye Ziazia Boro mbata; ko sa oni tironi awere ni akusiko na aimiko; 53oni i afu rugute fu roni a wa amaraika arugu he, ka oni aka nga kuti ni ya.”

Pa imo Setefano na ambia

54Were ho i agi agi apai ni re, ngbaduyo ki imi aima i ki niri ngba rindiyo fu Setefano. 55Ko nani be Ziazia Toro, ki ningere ku ngbangbaturũ yo kindi, ki bi ga Mbori taarimo na Yesu, ko ru pati kumbabe Mbori. 56Setefano ki ya, “Oni ngére mi nabi ngbangbaturũ ni zaza ha, Wiri boro ru pati kumbabe Mbori.” 57Ono i ki poi ku ari ni bakere fugo, ki kisi tuyo, ki mongo oro sa ko. 58I ki ba ko ku zegi vo bakporo yo, ki sopo ko na ambia; adezire ki zozogo gayo remu pati ndu paranga rimoko angia Saura. 59I ki ta sopa Setefano na ambia, ko nikpari fu Gbia, niya, “Gbia Yesu mo dí torore.” 60Ko ki kuku sande, ki poi ku ari ya, “Gbia, ka mo gédi nga gi ingapai re fu yo ya.” Ho ko agumba gi pai ni re ko ki ti ni rame. Saura ki idi pa kpioko.

Currently Selected:

Amokedi 7: ZB1978

Highlight

Copy