Amokedi 4

APetero na Yoane barangba ga aYudo abaakumba

1I ki ta gumba ha fu aboro, aboromotumo ki ye fuo yo, na baira yekaru na aSadoke, 2ngbaduyo aima aima bambiko i atungusa pa zinga dagba akangba mbiko Yesu. 3I ki moi be ti yo ki kisi yo ku wiso; bambiko nyemu nadu. 4Ono agu aboro nagi he i ki idi pa ha ni dungu yo: akumba ki du tie wa ka i du 5,000.

5Rago ki ya giri gayo abazogo ki dungura tiyo ku Yerusarema yo na ga aYudo abaakumba a abakeapai. 6Ana nangia gbiamotumo ko ki du kina ho na aKayafa, na Yoane, a Aresanduro, na agu yo dunduko nangia agume gbiamotumo. 7Ho i amoi yo ni dagba yo, i ki sana yo ki ya, “Gini tandu mangi oni gi pai na ni re, ni rimo da?” 8Petero ki ya fu yo, ko nahi be Ziazia Toro; “Abazogo aboro na ga aYudo abaakumba, 9ka oni sasana rani areme tipa gu wene pai i amangi fu ngbundangbunda kumba ya gi kumba abati be gini he re; 10ka oni ini dunduko na aboro a Yisaraere dunduko, ya, ru gi kumba re erẽ barangba roni zezeredi mbiko rimo Yesu Kristo nga boro Nazareta, gu ko oni awagi ko, Mbori ki zingisi ko dagba akangba, mbiko ko du. 11Ko nga gu mbia oni ambu, oni nga abadua ha, gu i amangi ni gu wene kikii mbia nidu pangbaha. 12I abata nga mbiko kura boro te; bambiko kura rimo zegino fu yo ku dagba aboro ani abata mbiko ho te.”

13Were ho i abi gu ngarã ni nga ga aPetero na Yoane ki ini ya i du nga ni tatamana aboro ni airainahe te, si ki niiriwo airiwo ti yo, i ki sana yo ki ini ya i anidu na Yesu. 14I ki ya bi gu kumba nahu ko ru na yo, ka si adu nga wa ka i gumba pai kuti ni wa sa ya. 15Ono ho i aya ni fu yo i kuru dagba abororondo yo, i ki nisaki he asaka dagba yo, 16niya, “Gine ani ka manga agi aboro na ni re? Bambiko agu aboro dunduko ninaima ku Yerusarema yo, i ini ya i mangi gu pai i aina pai ti ni rogo agi yo re ni rengo; ka ani ti nga kangu he te. 17Ono ka si gbandaka nga dagba aboro ya, ani serẽ yo aserã, ka i agumba nga pai fu boro ni gi rimo re fuo gere wa sa ya.” 18I ki yambu yo, ki rugu yo ya ka i gúmba nga pai niyúgu pai ni rimo Yesu wa sa ya. 19APetero ki karaga ha fu yo na Yoane ki ya. “Si ngia gia gaoni pai bakere ti ga Mbori ru bangiriko, kina roni na ni; 20bambiko gaani nga kina gumba agu apai ani abi nigi he.” 21Ho i aserẽ yo ni berewe, i ki he yo i ga, ka i aina nga gu pai ka i mbusi yo ti ni ya, bambiko aboro ataasi rimo Mbori ataasa dunduko bambiko gupainamangi. 22Bambiko garã gu kumba i amangi gi iiriwo hu ti ko re, si asusi 40.

Aidipase akpari tipa nyaka

23Ho i ahe yo ni, i ki ye koyo du akurayo ni ki peke gu pai dunduko abairamotumo agumba fu yo na ga aYudo abaakumba. 24Ho i agi he ni, i ki poi kina ku bani ku ari fu Mbori, ki ya, “Ako Gbia, mo namangi ngbangbaturũ na sende na baime na ahe dunduko rogo yo. 25Mo aya rogo Ziazia Toro yo, ku ngba barani nga Dawidi vururo,

‘Tipagine aGendiria azingi ti ni,

rika aboro a ki niberẽ pa ruka?

26Abakindo zegino atangara tiyo,

abazogo aboro ki zugadi tiyo,

kuti Gbia, kuti gako Mbedimbedi Boro a’,

27bambiko rogo gi bakporo re aErode azugadi ni na Pondio Pirato na aGendina na aboro aYisaraere, ku ti ziazia vururo Yesu ni rengo, gu ko mo ambedi ko, 28ka manga agu apai dunduko bero aya mbata na ga tatamana si ye. 29Awere, Gbia, mo bí gayo serãhe, ki idi fu gamo amoyambu i ta peka ga pai apeka zukazuka gbe, 30mo nitãi bero ka ahusa aboro; agu apai ki du ni mangimangi he i aina apai ti ni, na iiriwo apai ni rimo ziazia vururo Yesu.” 31Ho i akpari ni, gu ba i azugadi ku rogo si ki du ni zigizozigizo ho; i ki hiki ahika be Ziazia Toro dunduko, i ki nipeke ga Mbori pai apeka zukazuka.

Kparaka gayo ahe dagba yo

32Rimbasa agu yo naidi pai i ki du kpotoyo yo kina ku bani; a nga boro sa naya gu he sa dagba agu ahe nadu be ni, gani nga ha te; ono si du adu ni gayo dunduko. 33Amokedi ki gumba gayo pai ni dezire na bakere tandu tipa zinga Gbia Yesu be kpio; bakere undahe ki du adu ri yo dú. 34Bambiko a nga boro sa nadu dagba yo na zingo ahe te; bambiko agu yo dunduko aati adu be yo na abambu i ababagi he ababaga i ki ye na marã agu ahe i ababagi, 35ki zozogo ho pati ndu amokedi. I ki gagamu he fu yo ki nifu kina gu fu gu ni zingo ho anamanga ni.

36Yosefa, amokedi aya ti ko Barunaba, (si wa ka i ya, Wiri ngbanya), Revi nangia ko, ngbatungako nangia boro Kupurio, 37ati adu be ko, ko ki bagi he, ki ye na marãha ki zogo ho pati ndu amokedi.

Currently Selected:

Amokedi 4: ZB1978

Highlight

Copy