LUKA 8
8
Owukonɔ kɛ wa nɛ zi 'do Yezu ni
1'Do nɛ, nɛ Yezu ma ngɔ yɛnggɛ kɔ gã lenɔ, do be lenɔ tɛ be Dia Sako dɛa to nwa 'da Gale. Nɛ owi yambala mɛnɔ 'da a 'bu ngɔ wa bɔa ni, wa zi do a, 2mba do ombe wukonɔ kɛ a fua zi o'dã hi winɔ kɔ wa, do wanɔ kɛ wa zi do zɛlɛ, nɛ a kpasa wa ni. Wi zi a Maria (kɛ wa sa li a na boko Magdala), kɛ Yezu fua zi o'dã hi winɔ sambo kɔ a ni, 3do Zanɛ, wuke 'da Suza, gã wi ngɔ tɔa 'da Herodɛ, do Suzanɛ, do gba gili wukonɔ kɛ wa kala zi mɛnɔ 'da wa, nɛ wa gala do Yezu do owi yambala mɛnɔ 'da a ni.
Gba we ngɔ wi fɛ kpalɛ
(Mat. 13.1-9; Mar. 4.1-9)
4Nɛ gba gili Owele wa yula kɔ le do le, nɛ wa tɛ 'da Yezu. Nɛ a tɔ̃a gba we hã wa na: 5“Mbe wele kpo nɛa safɔ mɔ́ a we fɛ kpalɛ. A ma ngɔ fɛ kpalɛ, nɛ mbe gbãlã nɛ ala dɛ li wala, nɛ winɔ wa la do ngɔ nɛ, nɛ onɔɛ wa gɔmɔ ma. 6Nɛ mbe ala dɛ ngɔ kpangba, nɛ ma hɔa, nɛ ma kula do'do, we kɛ lì gulu nɛ bina. 7Nɛ mbe nɛ ala sanga nyaka tɛ̃. Nɛ nyaka tɛ̃ gã fala nɛ kpo do kpalɛ ni, nɛ ma kasa gɛlɛ nɛ vɛ̃. 8Nɛ nde mbe gbãlã kpalɛ ala dɛ fala dia nù, nɛ ma gã, nɛ ma kua wala nɛ kama do kama.” Nɛ Yezu tɔ̃ hã wa na: “Wi kɛ zala a boe, nɛ a zélé!”
Yezu be wenɔ do gba we we ge nde?
(Mat. 13.10-17; Mar. 4.10-12)
9Nɛ owi yambala mɛnɔ 'da Yezu wa aka a na, a tɔ̃ gulu gba we ni hã lo. 10Nɛ a gisa hã wa na: “Kɛ 'da nɛ, Gale bia gulu usu lɛnggɛnɔ kɔ dɛa to nwa 'da a hã nɛ ia. Nɛ nde ombe nɛ wa zele ma do gba we iko. Ma ɔ nɛ kɛ wa kɔma kɔ 'Buki na:
‘Gɛnɛ kɔ wa 'du li wa gbaa, nɛ nde wa zɔ́ mɔ gɔ.
Gɛnɛ kɔ wa gɛ zala wa gbaa, nɛ nde wa zélé we gɔ’#8.10Mɔ tɔ́lɔ́ Ezai 6.9-10. ni.”
Yezu tɔ̃a gulu gba we ngɔ wi fɛ kpalɛ
(Mat. 13.18-23; Mar. 4.13-20)
11Nɛ Yezu tɔ̃ 'bɔ hã wa na: “Nɛ zélé gulu gba we ni. Kpalɛ ni, mɛ a we nu Gale. 12Nɛ nde owinɔ kɛ wa ɔ nɛ li wala kɛ mbe kpalɛ ala tɛ nɛ ni, wi a wanɔ kɛ Dia Sakoe gbo zala wa nɛ́, nɛ Satana tɛ, nɛ a fo ma kɔ sila wa do'do na, dɔ wa kɔ̃́, kɔ Gale kpasa wa gɔ ni. 13Nɛ winɔ kɛ wa ɔ nɛ nù kpangba kɛ kpalɛ ala ngɔ nɛ ni, wi a wanɔ kɛ wa zele Dia Sakoe, nɛ wa kɔ̃ gɛnɛ nɛ do yangga, nɛ nde ma lé wa ngboo gɔ, nɛ wa la fala kɔ̃a we 'da wa 'da kala gɔ. Fala kɛ ngamɔ yamba sila wa, nɛ wa la fala kɔ̃a we 'da wa do'do. 14Nɛ owinɔ kɛ wa ɔ nɛ nùi kɛ kpalɛ ala tɛ nɛ dɛ sanga nyaka tɛ̃ ni, wi a wanɔ kɛ wa zele Dia Sakoe de wena, nɛ nde wɔ mɛnɔ nù gɛ, do kpamɛnɔ, do yangga wɔ kɔ kili tɛ wi ma kɔ sila wa, nɛ ma busu Dia Sakoe do'do, nɛ nde ma dɛ́ to gɔ. 15Nɛ owinɔ kɛ wa ɔ nɛ dia nùi kɛ kpalɛ ala ngɔ nɛ ni, wi a wanɔ kɛ wa zele Dia Sakoe, nɛ wa usu ma dɛ kɔ sila wa, nɛ ma ko dia wala te, we nɔa sila 'da wa ni.”
Gba we ngɔ mwinda
(Mar. 4.21-25)
16Nɛ Yezu tɔ̃ 'bɔ hã wa na: “Wele tũ mwinda, nɛ nde a gú kpana zu nɛ, tabi a é ma ti mɔ ɔi gɔ. A e ma ngɔ mɛ kɛ wa e do mwinda ni, takɔ wanɔ wa le tɔa nga ni, wa zɔ mɔ do dia nɛ. 17Mba gɔ, mɛnɔ kɛ ma bé tɛ̃ ɛ gɔ ni, ma be sɛ tɛ̃ ɛ dɛ wila fala. Nɛ usu mɛnɔ vɛ̃ ma hɔ sɛ dɛ nza, nɛ wa ĩ fala nɛ.
18“Nɛ hámá do tɛlɛ tɛ kɛ nɛ zele do wenɔ ni! Mba gɔ, wele kɛ a do mɔ kɔ̃ a boe ni, nɛ a kpa sɛ 'bɔ mbé nɛ dɛ ngɔ nɛ. Nɛ nde wele kɛ do mɔ kɔ a bina ni, nɛ wa kala sɛ 'bɔ be 'bulu kɛ a lengge we kpa ma ni kɔ̃ a do'do.”
Naa Yezu do onya a a wio nde?
(Mat. 12.46-50; Mar. 3.31-35)
19Naa Yezu do onya a, wa tɛa we kpa a. Nɛ wa wè tɛ tɛ gbaa we hɔ fala a do ma ni gɔ, we gba gili winɔ. 20Nɛ Owele wa tɔ̃a we nɛ hã Yezu na: “Mɔ zɔ́, naa mɔ do onya mɔ, wa hɔa dɛ, kɔ wa kɔ̃a we zɔ mɔ.”
21Nɛ Yezu tɔ̃a hã winɔ vɛ̃ na: “Naa mi do onya mi, wi a wanɔ kɛ wa zele we nu Gale, nɛ wa dɛ ma ni.”
Yezu ga gba bũ kamba
(Mat. 8.23-27; Mar. 4.35-41)
22Ngba soe kpo, nɛ Yezu do Owi yambala mɛnɔ 'da a, wa kũ kɔ ga, nɛ a tɔ̃ hã wa na: “Lɛ kṹ dɛ kulu gba ndɔɛ i!” Nɛ wa la. 23Kɔ wa ma ngɔ la nɛ, nɛ Yezu ɔa yala. Nɛ 'da kala bi sĩ, nɛ gba bũ kamba ma ngɔ dɛ nganda wena, nɛ ga ma ngɔ dunu do lì, nɛ ma 'bana sĩ na wa bindi. 24Nɛ owi yambala mɛnɔ wa tɛa 'da Yezu, nɛ wa tunu a na: “Wi be mɔ, wi be mɔ, lɛ fia!”
Nɛ Yezu kulu ngɔ, nɛ a ga bũi do ngele lì, nɛ ngɔ tɛ nɛ gɛ̃ kpi kpi kpi.
25Nɛ 'do nɛ, nɛ a aka owi yambala mɛnɔ na: “Kɔ̃a we 'da nɛ a do nde?”
Nɛ kili ba wa wena, nɛ wa ɔngbɔ nɛ ge nde ni, nɛ wa ma ngɔ tɔ̃ dɛ sanga ngba wa na: “A gɛ a wio nde? Gɛnɛ kɔ gba bũ do gba lì, nɛ ma zele we nu a.”
Yezu kpasa wi 'dã hi wi tɛ ngɔ nù 'da Ogeraze
(Mat. 8.28-34; Mar. 5.1-20)
26Wa nɛa, nɛ wa hɔ tɛ ngɔ nùi 'da Ogeraze, kɛ ma ka mɔ dɛ li ngbɛ ɛ do Galile ni. 27Kɔ Yezu nɛa we zĩ nù kɔ ga, nɛ mbe wele kpo yolo 'da le i, nɛ a tɛ, nɛ wa kpa ngba wa do Yezu. Nɛ nde wi ni zi do o'dã hi wi kɔ a. Nɛ 'do nɛ la nyɛlɛ wena, a hé'dé tulu gɔ, nɛ a ɔ 'bɔ kɔ tɔa gɔ, a ɔ do ngɔ mabi'donggo iko. 28Kɔ a nɛa we zɔ Yezu, nɛ a gu nù ti a, nɛ a he mɔ do nga gɛlɛ na: “Yezu Be 'da Gale kɛ a nɛa ngɔ mɔ vɛ̃, mɔ nɛ dɛ do mi nɛ nde? Mi ala nu mi hã mɔ na, mɔ tɛ ha zɛlɛ tɛ hã mi gɔ!” 29A tɔ̃a na mɛ ni, we kɛ Yezu hã zi nu e na, 'dã hi wi hɔ nza kɔ a do'do. Ĩ na 'dã hi wi ni lia zi kɔ a fala dɛlɛ wena. Kɔ fala kɛ wa ɛnzɛ a do dɔkpɔ, takɔ a dungu dɛ kpo fala, nɛ a gɔnɔ ɛnza mɛnɔ ni, nɛ 'dã hi wi kã a dɛ fala kɛ Owele wa tɛ nɛ bina ni.
30Nɛ Yezu aka a na: “Li mɔ a ge nde?”
Nɛ a gese na: “Li mi a Gbagili.” A tɔ̃a na mɛ ni, we kɛ gba gili o'dã hi wi wa lia zi kɔ a. 31Nɛ o'dã hi winɔ ni wa ala nu wa hã Yezu na, da dɛ kɔ a tómbó lo dɛ kɔ gba 'du kɔ̃ gɔ.
32Mɛ ni nɛ nde gba gili ongulu wa zi tɛ nyɔngɔ mɔ ngɔ kala ni. Nɛ o'dã hi winɔ ni wa tɔ̃ hã Yezu na, a e lo hã lo le kɔ ngulunɔ ni. Nɛ Yezu kɔ̃a. 33Nɛ o'dã hi winɔ wa hɔa nza kɔ wi ni, nɛ wa le kɔ ngulunɔ. Nɛ gba gili ngulunɔ ni, wa yolo ngɔ kala i, nɛ wa zĩlĩ hurr, nɛ wa ala 'dɔ lì, nɛ wa bindi vɛ̃.
34Kɔ owi fɔmɔ ngulunɔ wa nɛa we zɔ ni, nɛ wa a nyanga wa tɛ yu we tɔ̃ we nɛ hã owinɔ kɔ le i, do wanɔ ngɔ fɔnɔ ni. 35Nɛ owinɔ wa tɛa we zɔ mɛ kɛ ma dɛa tɛ̃ ɛ ni. Nɛ wa hɔa 'da Yezu, nɛ wa zɔ wi kɛ a zi do gba gili o'dã hi winɔ ni, nɛ nde bɔɛ ia zu a ia, nɛ a hi'da tulu dɛ tɛ̃ a, nɛ a dungu dɛ kɛ zã nyanga Yezu ni.
Nɛ kili ba winɔ ni wena. 36Nɛ wanɔ wa sɔ boe, nɛ wa zɔa mɛ ma dɛa wi ni ni, wa tɔ̃a gulu nɛ hã wanɔ wa hɔa do 'do ni. 37Nɛ owinɔ ngɔ nùi 'da Ogeraze vɛ̃ wa aka Yezu na, a la ngɔ nùi 'da lo do'do, we kɛ kili ba zi wa wena. Kɔ Yezu nɛa we kũ kɔ ga, 38nɛ wi kɛ a zi do o'dã hi winɔ ni aka Yezu na, ɛ nɛ do a. Nɛ Yezu bɛ̃a, nɛ a tɔ̃ hã a na: 39“Mɔ sí dɛ nu tɔa 'da mɔ i, nɛ mɔ tɔ̃́ we mɛ kɛ Gale dɛa do mɔ ni.” Nɛ wi ni si, nɛ a tɔ̃a gulu mɛnɔ kɛ Yezu dɛa we a ni, tɛ kɔ lenɔ vɛ̃.
Yezu kpasa wi zɛlɛ, nɛ a tunu fio
(Mat. 9.18-26; Mar. 5.21-43)
40'Da fala Yezu kũ gba ndɔɛ, kɔ a nɛa we hɔ kulu nɛ i, nɛ nde ogba gili winɔ wa 'bɔ 'da a 'bɔa. 41Nɛ mbe wele kpo, li a a Yairusi, a a nwa ngɔ tɔa mbula, a hɔa, nɛ a gu nù ti Yezu, nɛ a ala nu a hã a na, a nɛ 'da ɛ i. 42Mba gɔ, a zi do kpo boko be mɔ́ a, kɛ a do sabɛlɛ 'bu ngɔ nɛ bɔa, nɛ a nɛ fe fia.
Kɔ Yezu ma ngɔ la nɛ, nɛ gba gili winɔ wa nɔa do a 'do 'do. 43Nɛ nde mbe wuko kpo sanga winɔ ni, a zi do zɛlɛ, tɔkɔ si tɛ̃ a wena, nɛ a ɔa do ma gbaa sabɛlɛ 'bu ngɔ nɛ bɔa. Nɛ a yɛngga 'da Owi ina, nɛ mbili ia tɛ̃ a vɛ̃, nɛ nde wele kpo kpàsà a gɔ. 44Nɛ a tɛa, nɛ a kɔlɔ dɔ̃ɔ dɛ 'do Yezu, nɛ a tamba nu tulu tɛ̃ a. Nɛ tɔkɛ si tɛ̃ a ni gɔnɔ do ti. 45Nɛ Yezu aka na: “Wi tamba tulu tɛ mi ni a wio nde?”
Nɛ owinɔ vɛ̃ wa kafa na, lo 'bè tɛ̃ a gɔ. Nɛ Petro tɔ̃ hã a na: “Wi be mɔ, gba gili winɔ wa zĩ kɛ zã mɔ, nɛ wa nɔ do mɔ wena.”
46Nɛ Yezu gese hã wa na: “Wele 'bia tɛ mi, we kɛ mi ĩ na, mbe ngawi 'da mi hɔa nza tɛ mi hɔa.”
47Nɛ wuke zɔa na, Yezu ĩ fala nɛ ni, nɛ tɛ̃ a tana, nɛ a gu nù ti Yezu. Nɛ a tɔ̃a gulu nɛ hã winɔ, do tɛlɛ tɛ kɛ a 'bia tɛ Yezu, nɛ a kpasa do ti ni. 48Nɛ Yezu gese hã a na: “Boko be 'daa, mɔ kpasa we duzu kɛ mɔ do kɔ̃a we dɛ 'da mi. Kɔ mɔ sí do dia nɛ.”
49Yezu 'bana tɛ tɔ̃ ni iko, nɛ mbe wi to yolo kɔ tɔa 'da Yairusi i, nɛ a tɔ̃ hã na: “Be 'da mɔ a fia ia, kɔ mɔ tɛ yɛ̀kɛ̀ 'bɔ wi be mɔ do yala gɔ.”
50Nɛ Yezu zila we ni, nɛ a tɔ̃ hã Yairusi na: “Mɔ tɛ dɛ̀ kili gɔ. Mɔ ɔ do kɔ̃a we iko, nɛ a kpasa sɛ.”
51Kɔ a nɛa we hɔ nu tɔa i, nɛ a kɔ̃̀ na, ogele wele wa le 'do ɛ gɔ. Nɛ a saka tati a Petro, Yoanɛ do Zake, baa be do naa be na, wa le do ɛ. 52Nɛ winɔ vɛ̃ wa tɛ te nzɛlɛ do he kɔ̃a be. Nɛ Yezu tɔ̃ hã wa na: “Nɛ tɛ hè gɔ. Be gɛ fè gɔ, a ɔa yala iko.” 53Kɔ winɔ wa zila ni, nɛ wa ma ngɔ mɔmɔ a, we kɛ wa ĩ na, be fia ngboo. 54Nɛ Yezu 'be nu kɔ̃ be, nɛ a sa mɔ na: “Be, mɔ kúlú ngɔ!” 55Nɛ hi be ma kpula tɛ̃ ɛ, nɛ a kulu ngɔ do ti. Nɛ Yezu tɔ̃ hã wa na, wa fa nyɔngɔmɔ hã be, kɔ a nyɔngɔ. 56Nɛ Owele be ni wa ɔngbɔ do ma wena. Nɛ Yezu dala nu ɛ hã wa na, wa tɛ tɔ̃̀ we nɛ hã wele gɔ.
Currently Selected:
LUKA 8: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.
