LUKA 7
7
Yezu kpasa wi dɛa toe 'da nwa ngɔ sodanɔ
(Mat. 8.5-13)
1Yezu wila wenɔ ni hã winɔ do'do, nɛ a la dɛ Kafarnaumɛ. 2Nɛ nde mbe nwa ngɔ osoda Roma zi di ni, a do mbe wi dɛa to mɔ́ a, kɛ a kɔ̃ gɛnɛ a wena ni. Nɛ wi dɛa toe ni do zɛlɛ, nɛ a kɔla do fio. 3Kɔ nwa ngɔ sodanɔ ni nɛa we zele sakoe 'da Yezu, nɛ a tombo ombe kumunɔ 'da Oyudanɔ na, wa nɛ́, kɔ wa tɔ̃ hã Yezu na, a tɛ we kpasa wi dɛa toe 'da ɛ. 4Nɛ wa nɛa, nɛ wa hɔ 'da Yezu i, nɛ wa ala nu wa hã a na: “Mɔ kɔ̃́, nɛ mɔ gálá wi ni, 5we kɛ a kɔ̃ gɛnɛ winɔ 'da lɛ wena. Nɛ wi dɛa 'bɔ tɔa mbula hã lɛ, wi a a.” 6Yezu zila ní, nɛ a nɛa do wa.
Kɔ a nɛa we kɔlɔ do tɔa 'da nwa ngɔ sodanɔ, nɛ nwa ni tombo ongba a na, wa gɔnɔ dati Yezu, kɔ wa tɔ̃ hã a na: “Nwa, mɔ tɛ yɛ̀kɛ̀ tɛ mɔ we tɛ gbaa 'da mi nga gɔ. We kɛ mi wè wi kɛ na, mɔ le kɔ tɔa 'da mi gɔ, 7ma kɛ mi zɔa na, mi hɔ̀ 'bɔ wi nɛ dati mɔ gɔ. Kɔ mɔ tɔ̃́ we kpo iko, nɛ wi toe 'da mi a kpasa sɛ. 8Mba gɔ, mi tɛ mɛ 'bɔ, mi do onwa ngɔ mi boe, nɛ mi 'bɔ do osoda kɛ wa ti mbula 'da mi ni boe. Kɔ fala kɛ mi tɔ̃ hã mbe na: ‘Mɔ lá!’ Nɛ a la. Kɔ mi tɔ̃ hã mbe na: ‘Mɔ tɛ́!’ Nɛ a tɛ. Kɔ mi tɔ̃ hã wi dɛa toe 'da mi na: ‘Mɔ dɛ́ kɛ gɛ!’ Nɛ a dɛ.”
9Kɔ Yezu nɛa we zele ni, nɛ a ɔngbɔ do lɛnggɛ 'da nwa ngɔ sodanɔ ni wena. Nɛ a siki tɛ̃ a, nɛ a tɔ̃ hã gba gili winɔ kɛ wa nɛ 'dɔkɔlɔ a zununu ni na: “Mi tɔ̃ hã nɛ na, kɛ mi ɔa ngɔ nù Israɛlɛ gbaa gɛ, mi kpà mbe wi kɛ a do kɔ̃a we dɛ 'da mi ɔ nɛ wi gɛ gɔ.” 10Nɛ winɔ kɛ nwa ngɔ sodanɔ tumba sɔ wa ni, wa kpula tɛ wa, kɔ wa nɛ hɔ nu tɔa 'da a i, nɛ nde wi toe ni dungu vɛ̃ do dia nɛ iko.
Yezu tunu be zagbãlã kɔ fio
11'Do nɛ, nɛ Yezu la dɛ kɔ mbe le kpo, li nɛ a Nainɛ. Nɛ owi yambala mɛnɔ 'da a, do ogba gili winɔ wa nɛa do a. 12A nɛa we kɔlɔ do nu ngba le ni, nɛ a kpa ombe wele, nɛ nde wa ba fio, kɔ wa nɛ we mi a. Fie ni a kpo bulu be mɔ́ mbe wi fio wili. Nɛ gba gili winɔ kɔ le ni wa kã naa fie. 13Kɔ Nwa Yezu nɛa we zɔ wuke ni, nɛ 'bako ba li a wena, nɛ a tɔ̃ hã a na: “Mɔ tɛ hè gɔ!” 14Nɛ a ngbɔ dɛ kɛ zã sanduku fie, nɛ a 'be tɛ nɛ, nɛ Owi ba tole nɛ wa yolo nù. Nɛ Yezu tɔ̃ na: “Be zagbãlã, mi tɔ̃ hã mɔ na, mɔ kúlú ngɔ!” 15Nɛ fie ni kulu ngɔ, nɛ a ma ngɔ wele we. Nɛ Yezu e a dɛ kɔ̃ naa a.
16Nɛ kili ba winɔ vɛ̃ wena, nɛ wa ma ngɔ dɔnggɔ Gale tɛ tɔ̃ na: “Gã wi gba olo nu Gale hɔa kɔ lɛ gɛ! Gale tɛa we kpasa owinɔ 'da a.”
17Nɛ sako mɛnɔ Yezu dɛa ni, ma yɛ'ba ngɔ nù Yude do kɔ lenɔ kɛ zã nɛ ni vɛ̃.
Yoanɛ wi batisa winɔ tumba owele hã Yezu
(Mat. 11.2-19)
18Nɛ Owi yambala mɛnɔ 'da Yoanɛ wa tɔ̃a lɛnggɛ mɛnɔ Yezu dɛa ni vɛ̃ hã a. Nɛ a sa mɔ hã ombe sanga wa bɔa, 19nɛ a tombo wa hã Nwa Yezu, we aka a na: “Mɔ a Mɛsiya, kɛ a hɔ sɛ ni nde? Tabi lɛ 'bɔ́ 'da mbé gele wele nde?”
20Wa nɛa we hɔ i mɔ, nɛ wa aka Yezu na: “Yoanɛ wi batisa winɔ tumba lɛ we aka mɔ na: ‘Mɔ a Mɛsiya, kɛ a hɔ sɛ ni nde? Tabi lɛ 'bɔ 'da mbé gele wele nde?’ ”
21Do 'da fala ni, nɛ nde Yezu tɛ kpasa owi zɛlɛ do Owi kunda kpi do kpi. Nɛ a tɛ fo o'dã hi wi kɔ winɔ, do hũi li gba gili owi lɔa li. 22Nɛ a gese hã owi tonɔ 'da Yoanɛ na: “Nɛ nɛ́, kɔ nɛ tɔ̃́ lɛnggɛ mɛnɔ kɛ nɛ zɔa ma, do kɛnɔ nɛ zila ni hã Yoanɛ na, owi lɔa linɔ wa tɛ zɔ mɔ, owi 'dã nyanganɔ wa tɛ nɛ nɔ, owi zɛlɛ ngbɛlɛnɔ wa kpasa, nɛ zala owi la zalanɔ ma fĩ, ofionɔ wa tunu, nɛ owi sãnɔ wa zila Dia Sakoe. 23Kɔ yangga wena do wi kɛ a do kafi mi kɔ sila a bina ni.”
24Owi yambala mɛnɔ 'da Yoanɛ wa nɛa we la do'do, nɛ Yezu ma ngɔ tɔ̃ we 'da Yoanɛ hã ogba gili winɔ na: “Mɛ nɛ nɛa we zɔ li gba zɔ̃ i ni a ge nde? Nɛ nɛa we zɔ wi kɛ a mbɔkɔ nɛ́ sala tɔ̃ɛ, kɛ bũi yaka ma ni nde? 25Mɛ ngboo nɛ nɛa we zɔ ma ni a ge nde? Nɛ nɛa we zɔ wi kɛ a hi'da dia tulu ni nde? Owinɔ kɛ wa he'de dia tulu, nɛ wa kpasa de wena ni, wa ɔ kɔ ngboe 'da onwa. 26Kɔ mɛ ngboo nɛ nɛa we zɔ ma li gba zɔ̃ i ni a ge nde? Nɛ nɛa we zɔ wi gba olo nu Gale nde? Ĩi, mɛ a gbãlã we. Nɛ nde mi tɔ̃ hã nɛ na, Yoanɛ nɛa ngɔ wi gba olo nu Gale. 27Mba gɔ, a a wi kɛ wa kɔma we 'da a kɔ 'Buki na:
‘Gale tɔ̃a na, mi tombo sɛ wi toe 'da mi dati mɔ,
takɔ a 'dafa wala hã mɔ.’ ” #7.27 Mɔ tɔ́lɔ́ Malaki 3.1.
28Nɛ Yezu tɔ̃ 'bɔ na: “Sanga winɔ ngɔ nù gɛ vɛ̃, wi kɛ a nɛa ngɔ Yoanɛ wi batisa winɔ ni bina. Gɛnɛ kɔ na mɛ ni, nɛ nde wi kɛ a a tala ngɔ go'do winɔ kɔ le nwa 'da Gale ni, a nɛ sɛ ngɔ Yoanɛ.”
29(Nɛ owi futa takonɔ, do gele winɔ vɛ̃, wa zila ní, nɛ wa ĩ na, Gale a bɔlɔ zu wele. Nɛ Yoanɛ batisa zi wa. 30Nɛ nde Ofariziɛnɔ do Owi be mbulanɔ, wa bɛ̃a mɛ Gale kɔ̃a we dɛ we wa ni, nɛ wa kɔ̃̀ zi na, Yoanɛ batisa lo gɔ.)
31Nɛ Yezu tɔ̃ 'bɔ na: “Mi nɛ we winɔ kikina gɛ do ge nde? Wa wia kɔ̃ do wio nde? 32Wa wia kɔ̃ do benɔ kɛ wa dungu nù tɛ dɛ sa do nu zando, nɛ wa ma ngɔ he mɔ hã ongba wa na: ‘Lɛ zɛa zi biã yɔla hã nɛ, nɛ nɛ yɔ̀ yɔla nɛ gɔ! Lɛ ga zuma kɔ̃a hã nɛ, nɛ nɛ hè kɔ̃a nɛ gɔ’ ni. 33Mba gɔ, Yoanɛ tɛa zi, nɛ nde a nyɔ́ngɔ́ zi gbãlã we nyɔngɔmɔ gɔ, nɛ a nɔ́ zi dɔ́ gɔ, nɛ nɛ tɔ̃a na: ‘A do 'dã hi wi kɔ a!’ 34Kɔ mi Be 'da Wele, mi hɔa, nɛ mi nyɔngɔ mɛnɔ vɛ̃ nyɔnga, nɛ mi nɔ 'bɔ dɔ̃ nɔa, nɛ nɛ tɔ̃ na: ‘Nɛ zɔ́ wi gɛ, a lengge nyɔngɔ mɔ, do nɔ dɔ̃ iko, nɛ a ba 'bia do owi futa takonɔ, do o'dã winɔ!’ 35Nɛ nde hã zã 'da Gale mɛ a gbãlã we hã zã li owinɔ kɛ wa kɔ̃a gɛnɛ nɛ ni.”
Yezu nyɔngɔ mɔ 'da mbe Fariziɛ̃ kpo li a a Simɔ
36Mbe Fariziɛ̃ kpo, li a a Simɔ, a sa zi mɔ hã Yezu na, a tɛ we nyɔngɔ mɔ. Nɛ Yezu nɛa, nɛ wa ma ngɔ nyɔngɔ mɛ. 37Nɛ nde mbe wuko vĩ zu kpo zi kɔ le ni, nɛ a zila na, Yezu tɛ nyɔngɔ mɔ 'da Fariziɛ̃ ni. Nɛ a ba nɔ yɔmbɔ kɔ daka albatrɛ, nɛ a nɛ, 38nɛ a yolo dɛ kɛ zã nyanga Yezu do 'do a, nɛ a ma ngɔ he nɛ. Nɛ mili kɔ̃a li a 'bɔa tɛ nyanga Yezu, nɛ a dili ma do mili zu a, nɛ a hɔlɔ tɛ nyanga a hɛɔɔ, tɛ a nɔ yɔmbɛ ni tɛ nɛ. 39Kɔ Fariziɛ̃ kɛ a sa mɔ hã Yezu ni nɛa we zɔ ní, nɛ a tɔ̃ do kɔ sila a na: “Wi gɛ ɔ sɔ do wi gba olo nu Gale ngboo, nɛ a ĩ sɔ ti wuke 'be tɛ̃ a gɛ, nɛ a ĩ sɔ 'bɔ na, a a wuko vĩ zu.”
40Nɛ Yezu tɔ̃ hã Fariziɛ̃ ni na: “Simɔ, mi kɔ̃a we tɔ̃ we hã mɔ.”
Nɛ Simɔ gese na: “Wi be mɔ, mɔ tɔ̃!”
41Nɛ Yezu tɔ̃ hã a na: “Ombe wele bɔa wa ba ku'da. Mbe kpo ba ku'da kama mɔlɔ, nɛ mbe nɛ ba 'bu nɛ mɔlɔ. 42Nɛ wa bɔa nɛ, wa wè zi tɛ gese olo nɛ gɔ. Nɛ wele ku'da ni gbɛa ma dɛ zu wa. Ní a sanga winɔ bɔa ni, wi kɛ a kɔ̃ sɛ gɛnɛ wele mbili wena ni a wele lá nge nde?”
43Nɛ Simɔ gese hã a na: “Mi lengge na, wi a wele kɛ ku'da gã zu a wena ni.”
Nɛ Yezu tɔ̃ hã a na: “Mɔ tɔ̃a gbãlã we.” 44Nɛ a siki tɛ̃ a dɛ 'da wuke ni, nɛ a tɔ̃ hã Simɔ na: “Mɔ zɔ́ wuke gɛ! Mi hɔa 'da mɔ, nɛ mɔ hã̀ lì hã mi na, mi fɔlɔ do nyanga mi gɔ,#7.44Wenɔ kɛ Yezu tɔ̃ de vɛ̃ ni, mɛ a mbula kɛ Oyudanɔ wa dɛ zi do 'da fala ni we gɛnɛnɔ 'da wa. nɛ nde a fɔlɔ nyanga mi do mili kɔ̃a li a, nɛ a dili ma do mili zu a. 45Mɔ 'bè mi dɛ tɛ mɔ gɔ, nɛ nde yolo do kɛ mi lia ni, a tɛ hɔlɔ tɛ nyanga mi fai. 46Mɔ à nɔ zu mi gɔ, nɛ nde a fɛla nɔ yɔmbɔ tɛ nyanga mi. 47Ma kɛ mi tɔ̃ hã mɔ na, gã kɔ̃a zã a bia hã mi ni, ma be na, Gale fua ku'da gba gili 'dã mɛnɔ 'da a ia. Fala kɛ wele mbɔkɔ ngba a ngɔ 'dã mɛ 'da a be sĩ, nɛ ngba a ni a kɔ̃ sɛ a tɛ mɛ 'bɔ gɛnɛ a 'bana sanga iko.”
48Nɛ Yezu tɔ̃ hã wuke ni na: “Mi fua ku'da 'dã mɛnɔ zu mɔ ia.”
49Kɔ winɔ kɛ a sɔ do wa tɛ nyɔngɔ mɛ ni, wa nɛa we zele ní, nɛ wa tɔ̃ do kɔ sila wa na: “Wi gɛ a wio nde? Kɛ a tɔ̃ na, ɛ wia do fo ku'da 'dã mɔ mɔ́ Owele gɛ, a a wio nde?”
50Nɛ Yezu tɔ̃ hã wuke ni na: “Gale kpasa mɔ we kɔ̃a we 'da mɔ. Kɔ mɔ sí do dia nɛ!”
Currently Selected:
LUKA 7: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.
