LUKA 9
9
Yezu tumba owi yambala mɛnɔ 'da a bɔa bɔa
(Mat. 10.5-15; Mar. 6.7-13)
1Nɛ Yezu sa mɔ hã owi yambala mɛnɔ 'da a 'bu ngɔ wa bɔa ni, nɛ a hã ngawi we fo o'dã hi wi kɔ Owele do we kpasa owi zɛlɛ hã wa. 2'Do nɛ, nɛ a tumba wa we be sako dɛa to nwa 'da Gale, do we kpasa owi zɛlɛnɔ. 3Nɛ a tɔ̃ hã wa na: “Nɛ tɛ bà mɔ kpo dɛ kɔ̃ nɛ we nɛ do gɛnɛ gɔ. Nɛ tɛ bà dɔndɔlɔ, tabi koe, tabi nyɔngɔmɔ, tabi mbili gɔ. Nɛ nɛ tɛ kàlà tulu ngɔ bɔa gɔ. 4Fala kɛ nɛ hɔ kɔ lé kpo, nɛ nɛ ɔ́ dɛ kɔ tɔa kɛ wa ia hã nɛ ni gbaa, nɛ nɛ la do le ni. 5Kɔ nɛ hɔ kɔ le kɛ Owi kɔ nɛ wa bɛ̃ we dɛ gɛnɛ nɛ ni, nɛ nɛ lá ma do'do. Nɛ nɛ fɛ́lɛ́ nù tambala nyanga nɛ hã wa, we be na, wa dè de gɔ.” 6Nɛ owi yambala mɛnɔ wa la tɛ be Dia Sakoe, do kpasa owi zɛlɛnɔ falanɔ vɛ̃.
Nwa Herodɛ kɔ̃a we zɔ Yezu
(Mat. 14.1-12; Mar. 6.14-29)
7Do 'da fala ni, nɛ nwa Herodɛ zila sako mɛnɔ vɛ̃ kɛ Yezu dɛ ni, nɛ ma ba we nu a. We kɛ ombe winɔ wa tɔ̃ na: “A a Yoanɛ wi batisa winɔ, kɔ a za'da nza kɔ fio.”
8Nɛ ombe wa tɔ̃ 'bɔ na: “Wi a Elia a hɔa gɛ.”
Nɛ ombe wa na: “A a mbe sanga owi gba olo nu Gale zɛ́ dati gɛ, kɔ a za'da nza kɔ fio.”
9Nɛ Herodɛ tɔ̃ na: “Mi ba zi nu mi na, wa 'bili gɛlɛ Yoanɛ ia. Kɔ wi mi zele wenɔ 'da a vɛ̃ ní ni a wio nde?” Nɛ a ma ngɔ fa wala we zɔ Yezu.
Yezu hã nyɔngɔmɔ hã owele koto mɔlɔ
(Mat. 14.13-21; Mar. 6.30-44; Yoa. 6.1-14)
10Nɛ owi nɛ tonɔ kɛ Yezu tumba zi wa ni wa kpula tɛ wa, nɛ wa tɔ̃ sako mɛnɔ wa dɛa ni vɛ̃ hã Yezu. Nɛ a kala 'dikita wa iko, nɛ a la do wa dɛ kɔ mbe le kpo wa sa li nɛ na Bɛtsaida. 11Nɛ gba gili winɔ wa ĩ we nɛ, nɛ wa la 'dɔkɔlɔ a. Nɛ Yezu kɔ̃a gɛnɛ wa, nɛ a bia gulu dɛa to nwa 'da Gale hã wa, nɛ a kpasa wanɔ wa do zɛlɛ ni.
12Kɔ wese ma ngɔ gɛ̃ nɛ, nɛ owi yambala mɛnɔ 'bu ngɔ wa bɔa ni, wa tɛa, nɛ wa tɔ̃ hã Yezu na: “Mɔ gésé gba gili winɔ gɛ, kɔ wa la dɛ kɔ lenɔ do 'da owinɔ ngɔ fɔnɔ i, kɔ wa fa nyɔngɔmɔ do fala ɔi, we kɛ fo tɔa dɛ bina.”
13Nɛ Yezu gese hã wa na: “Nɛ do tɛ nɛ, nɛ hã́ nyɔngɔmɔ hã wa!”
Nɛ wa tɔ̃ hã a na: “Lɛ do gbãlã mapa mɔlɔ do kɔyɔ bɔa iko. Ní a mɔ kɔ̃a wá na lɛ nɛ, kɔ lɛ oso nyɔngɔmɔ we gba gili winɔ gɛ vɛ̃ nde?” 14Mba gɔ, owinɔ ni vɛ̃ wa a owi wili dɔ̃ɔ do koto mɔlɔ.
Nɛ Yezu tɔ̃ hã Owi yambala mɛnɔ 'da a na: “Nɛ tɔ̃ hã wa na, wa dungu nù do ngɔ gili wa 'bu wa mɔlɔ mɔlɔ.” 15Nɛ owi yambala mɛnɔ wa dɛa ni, nɛ winɔ wa dungu nù. 16Nɛ Yezu kala mapanɔ mɔlɛ, do kɔyɔnɔ bɔa ni dɛ kɔ̃ ɛ, nɛ a ba li a ngɔ, nɛ a sambala Gale, nɛ a gbini sanga nɛ, nɛ a hã ma hã owi yambala mɛnɔ na, wa kɛ̃ hã ogba gili winɔ ni. 17Nɛ wa vɛ̃ wa nyɔnga, nɛ zã wa hɛ̃a. Nɛ owi yambala mɛnɔ wa ngɛma tala nɛ, nɛ ma dunu sanggi 'bu ngɔ nɛ bɔa.
Petro tɔ̃a na Yezu a Mɛsiya
(Mat. 16.13-19; Mar. 8.27-29)
18Mbe ngba soe kpo, nɛ Yezu zi zu a kpo, nɛ a tɛ sambala Gale, nɛ owi yambala mɛnɔ 'da a wa tɛa, nɛ a aka wa na: “Winɔ wa tɔ̃ ngboo na, mi a wio nde?”
19Nɛ wa gese hã a na: “Ombe winɔ wa tɔ̃ na, mɔ a Yoanɛ wi batisa winɔ. Nɛ ombe wa na, mɔ a Elia. Kɛ ombe 'bɔ na, mɔ a mbe sanga owi gba olo nu Gale zɛ́ dati gɛ, kɔ mɔ la'da nza kɔ fio.”
20Nɛ Yezu aka 'bɔ wa na: “Ní a nɛ ngboo ni, nɛ lengge mɛ na, mi a wio nde?”
Nɛ Petro gese na: “Mɔ a Mɛsiya, Be 'da Gale!”
Yezu tɔ̃a we fie do za'da nza kɔ fie 'da a
(Mat. 16.20-28; Mar. 8.30—9.1)
21Nɛ Yezu bɛ̃a hã wa nganda wena na, wa tɛ tɔ̃̀ we nɛ hã wele kpo gɔ. 22Nɛ a tɔ̃ 'bɔ na: “Ma wia na, mi Be 'da Wele, mi kpa sɛ zɛlɛ tɛ wena. Okumunɔ, do onwa nganganɔ, do owi be mbulanɔ, wa bɛ̃ sɛ gɛnɛ mi, nɛ wa gbɛ mi. Kɔ ma hɔ tɛ talɛ tũi, nɛ mi za'da sɛ nza kɔ fio.”
23'Do nɛ, nɛ a tɔ̃ hã winɔ vɛ̃ na: “Fala kɛ wele kɔ̃ we hɔ wi 'da mi, nɛ ma wia na, a bɛ̃ gɛnɛ kili tɛ̃ a wele nɛ, nɛ a ba tole finda te 'da a tũ kpo kpo, nɛ a tɛ 'do mi. 24Mba gɔ, wi kɛ a fa we kpasa kili tɛ̃ a, nɛ a fe sɛ. Nɛ wi kɛ a la kili tɛ̃ a na, ma fe we mi ni, nɛ a kpasa sɛ. 25Mba gɔ, mɔ olo kɛ na wele yɔ kpasi 'da a, tabi a 'danga ma, takɔ a ba nùi gɛ vɛ̃ do mɔ́ a ni a ge nde? 26Fala kɛ sape ba li wele we mi, tabi we we olo nu mi, nɛ 'da fala kɛ mi Be 'da Wele, mi tɛ sɛ do dɔ̃lɔ̃ li 'da mi, do kɛ 'da Baa mi, fala nɛ kpo do oanzɛ santonɔ ni, nɛ sape ma ba sɛ tɛ mɛ 'bɔ li mi we wi ni. 27Mi tɔ̃ hã nɛ do gbãlã we na, ombe winɔ sanga nɛ gɛ wa fé sɛ do ti gɔ, wa zɔ sɛ tɛlɛ tɛ kɛ Gale a tɛ sɛ, we dungu nwa ni do'do sɛ nɛ de.”
Tɛ Yezu kifi dɛ li owi yambala mɛnɔ
(Mat. 17.1-8; Mar. 9.2-8)
28'Do wenɔ ni la pɔsɔ kpo, nɛ Yezu kala mbe owi yambala mɛnɔ 'da a talɛ, Petro, Zake, do Yoanɛ, nɛ a kũ do wa dɛ zu mbe kala kpo, takɔ a sambala Gale. 29Kɔ a ma ngɔ sambala nɛ, nɛ bula li a kifi, nɛ tulu tɛ̃ a fɛnga nde nde nde. 30Nɛ Owi wili bɔa wa hɔa fala kpo, nɛ wa ma ngɔ wele we do Yezu. Winɔ ni a Mɔizɛ do Elia, 31wa hɔa dɛ kɔ yele ngbala 'da Gale. Nɛ wa wele we do Yezu ngɔ tɛlɛ tɛ kɛ toe 'da a ma e sɛ tɛ Yeruzalɛmɛ, nɛ a fe dɛ i mɔ ni.
32Do 'da fala ni, nɛ nde Petro do ongba a wa ɔa yala, nɛ ma nɛ ngɔ wa wena. Kɔ wa nɛa we tunu nɛ, nɛ wa zɔ yele ngbala 'da Yezu, do owinɔ kɛ wa yolo do a ni. 33Kɔ owinɔ ni wa nɛa we la Yezu, nɛ Petro tɔ̃ hã a na: “Wi be mɔ, fala gɛ de wena, kɔ lɛ 'báná dɛ dɛ iko. Lɛ dɛ́ kɔnggɔ talɛ, kɛ 'da mɔ, kɛ 'da Mɔizɛ, kɛ 'da Elia.” Nɛ nde wenɔ kɛ a tɔ̃ ni, a ĩ̀ ti gulu nɛ gɔ.
34Kɔ lɛnggɛ ni 'bana dɛ nu a iko, nɛ gba kutu tɛa, nɛ ma lɔ'bɔ wa pilii. Kɔ owi yambala mɛnɔ wa nɛa we zɔ gba kuti ma lɔ'ba wa ni, nɛ kili ba wa. 35Nɛ wala gɛlɛ wele wila dɛ kɔ kuti ni na: “Wele kɛ gɛ a Be 'da mi, kɛ mi saka a. Nɛ zélé a!” 36'Do wila we ni, kɔ owi yambala mɛnɔ wa nɛ ka mɔ, nɛ nde Yezu 'bana zu ɛ kpo iko. Nɛ ma ba we nu wa do'do. Nɛ do kɔ̃ tũnɔ ni, wa tɔ̃̀ we mɛ wa zɔa ni hã wele gɔ.
Yezu ndaka 'dã bi wi kɔ be
(Mat. 17.14-18; Mar. 9.14-27)
37Fala nɛa we sa nɛ, nɛ wa zĩlĩ kala, nɛ gba gili Owele wa tɛa, nɛ wa kpa Yezu. 38Nɛ mbe wele kpo dɛ sanga winɔ ni ma ngɔ he mɔ na: “Wi be mɔ, mi ala nu mi hã mɔ na, mɔ kɔ̃, nɛ mɔ zɔ́ be 'da mi! A a kpo bulu be iko! 39'Da fala kɛ 'dã hi wi ba a, nɛ a dɛ na a he mɔ, nɛ ma ngbala a gbaa, nɛ ma lo a nù, nɛ sã nu a ma ngɔ nɔ̃lɔ̃ ndufã ndufã. Nɛ 'dã hi wi zɛlɛ tɛ̃ a gbaa, sɛ nɛ a la de. 40Kɔ mi ala sɔ nu mi hã owi yambala mɛnɔ 'da mɔ na, wa ndaka 'dã hi wi ni kɔ a do'do, nɛ nde wa dɛa zãa, nɛ wa fò a gɔ.”
41Nɛ Yezu gese hã wa na: “O! Aa nɛ, o'dã winɔ gɛ! Gulu kɛ nɛ do kɔ̃a we dɛ 'da Gale bina we ge nde? Mi 'bana sɛ 'bɔ do nɛ gbaa soe ki nge nde? Mi kunu sɛ sila mi dɛ tɛ nɛ fai nde? Mɔ tɛ́ do be 'da mɔ hã mi.”
42Kɔ wa ma ngɔ tɛ do be hã Yezu, nɛ 'dã hi wi lo 'bɔ be nù, nɛ a ma ngɔ yaka a gbirr. Nɛ Yezu dãlã dɛ tɛ 'dã hi wi ni, nɛ be kpasa, nɛ Yezu gese a hã baa a. 43Kɔ winɔ wa nɛa we zɔ ni, nɛ wa vɛ̃ wa ɔngbɔ gã wi 'da Gale wena.
Yezu tɔ̃a 'bɔ we fie 'da a
(Mat. 17.22-23; Mar. 9.30-32)
Owinɔ wa tɛ ɔngbɔ do mɛnɔ vɛ̃ kɛ Yezu dɛa ni, nɛ a tɔ̃ hã Owi yambala mɛnɔ 'da a na: 44“Nɛ zélé we mi nɛ tɔ̃ hã nɛ gɛ do dia nɛ ngboo! Wa 'dɔlɔ sɛ mi Be 'da Wele hã o'dã wi.” 45Nɛ nde owi yambala mɛnɔ wa zèlè gulu we kɛ a tɔ̃a ni gɔ. Mba gɔ, gulu nɛ usu zi tɛ̃ ɛ do wa do'do na, dɔ wa zélé gɔ. Nɛ wa dɛa kili aka a do'do.
Yezu bia tɛlɛ tɛ wi kɛ a nɛa ngɔ ongba a ni
(Mat. 18.1-5; Mar. 9.33-37)
46Nɛ owi yambala mɛnɔ wa ma ngɔ ba kafi nu ngba wa, we ĩ ti wi kɛ a nɛa ngɔ ongba a ni. 47Kɔ nɛ́ kɛ Yezu ĩ ti kafi 'da wa ĩ ni, nɛ a ba mbe be kpo, nɛ a e a dɛ kɛ zã a. 48Nɛ a tɔ̃ hã wa na: “Wi kɛ a kɔ̃ gɛnɛ be gɛ kɔ tɔa 'da a do zu li mi, nɛ nde a kɔ̃a gɛnɛ mi kɔ tɔa 'da a. Nɛ wi kɛ a kɔ̃ gɛnɛ mi, nɛ nde a kɔ̃a 'bɔ gɛnɛ Wi tombo mi. Nɛ ĩ́ na, sanga nɛ gɛ, wi kɛ a do ngɔ go'do ongba a vɛ̃ ni, a nɛa ngɔ ongba a.”
Wi 'da Kristo a wio nde?
(Mar. 9.38-40)
49Nɛ Yoanɛ tɔ̃ hã Yezu na: “Wi be mɔ, mɔ ĩ́ na, lɛ zɔa mbe wele kpo, nɛ nde a tɛ ndaka o'dã hi wi do zu li mɔ. Nɛ lɛ ga a tɛ nɛ, we duzu kɛ a a wi 'da lɛ gɔ.”
50Nɛ Yezu gese hã a na: “Nɛ tɛ gà a gɔ, mba gɔ, wi kɛ a sɛnɛ lɛ gɔ ni, a a wi 'da lɛ.”
Owi Samaria wa hɛa gɛnɛ Yezu
51Ngba soe kɛ Gale nɛ ba Yezu dɛ li nza i ni ma zi ngɔ kɔlɔ nɛ. Nɛ Yezu kpãlã sila ɛ, nɛ a kɔ̃a we nɛ Yeruzalɛmɛ i. 52Nɛ a tumba Owi to dati a. Nɛ winɔ ni wa la, nɛ wa le kɔ mbe le 'da Owi Samaria, takɔ wa 'dafa fala hã a. 53Nɛ nde owinɔ kɔ le ni wa kɔ̃̀ we hã fala hã a gɔ, we kɛ wa ĩ na, a nɛ Yeruzalɛmɛ. 54Kɔ Owi yambala mɛnɔ, Zake do Yoanɛ wa zɔa ní, nɛ wa aka Yezu na: “Nwa, mɔ kɔ̃̀ na, lɛ hã nu lɛ hã nyɛa we yolo ngɔ i, kɔ ma zĩlĩ dɛ ngɔ winɔ gɛ, kɔ ma gbɛ wa vɛ̃ gɔ nde?” 55Nɛ Yezu siki tɛ̃ ɛ, nɛ a dãlã dɛ tɛ wa. 56Nɛ wa la dɛ kɔ gele le.
Wi yɛnggɛ do Yezu
(Mat. 8.18-22)
57Wa zi a tɛ li wala, nɛ mbe wele kpo tɔ̃ hã Yezu na: “Mi kɔ̃a we yɛnggɛ do mɔ tɛ falanɔ vɛ̃ kɛ mɔ nɛ yɛnggɛ nɛ ni.”
58Nɛ Yezu gese hã a na: “Okpãnɔ wa do kɔ̃ mɔ́ wa boe, nɛ onɔɛnɔ wa 'bɔ do tɔanɔ 'da wa boe. Nɛ nde mi Be 'da Wele, mi do fala ɔi mɔ́ mi bina.”
59Nɛ a tɔ̃ 'bɔ hã mbe wele di ni na: “Mɔ tɛ́, kɔ lɛ yɛ́nggɛ́ do mɔ!”
Nɛ wi ni tɔ̃ na: “Nwa, mɔ mbɔ́kɔ́ mi, kɔ mi nɛ we mi baa mi do'do, sɛ nɛ de.”
60Nɛ Yezu gese hã a na: “Mɔ lá fionɔ, kɔ wa mi fionɔ 'da wa! Kɛ 'da mɔ, mɔ nɛ́ we be we dɛa to nwa 'da Gale.”
61Nɛ mbe wele tɔ̃ 'bɔ na: “Nwa, mi yɛnggɛ sɛ do mɔ. Kɔ mɔ mbɔkɔ mi, kɔ mi nɛ we mbese Owi nanɔ 'da mi sɛ.”
62Nɛ Yezu tɔ̃ hã a na: “Wi kɛ a ndo wa fɔ, kɔ a ka mɔ 'do a fai, nɛ nde a wè wi dɛ to kɔ le nwa 'da Gale gɔ.”
Currently Selected:
LUKA 9: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.
