YOANƐ 11

Fie 'da Lazarɛ

1Mbe wi wili zi kpo, li a a Lazarɛ, a tia do zɛlɛ. A ɔ zi kɔ le Betani, le kɛ oboko nya a Maria do Marta wa ɔ zi nɛ ni. 2(Maria ni a wele kɛ a tɛnɛ zi nɔ yɔmbɛ dɛ tɛ nyanga Nwa Yezu, nɛ a dili do mili zu a ni. Nɛ Lazarɛ kɛ a do zɛlɛ ni a nya a.) 3Nɛ oboko nya Lazarɛ bɔa ni, wa tumba wele we tɔ̃ hã Yezu na, yali ngba a do zɛlɛ. 4Kɔ Yezu nɛa we zele toe ni, nɛ a tɔ̃ na: “Zɛlɛ ni ma gbɛ́ sɛ a gɔ. Nɛ nde ma ba a, takɔ Gale kpa dɔ̃lɔ̃ li, sɛ a mi Be 'da Gale, mi kpa 'bɔ dɔ̃lɔ̃ li de.”

5Yezu kɔ̃ zi gɛnɛ Marta, do Maria, do nya wa Lazarɛ wena. 6Nɛ gɛnɛ kɔ a zila na, Lazarɛ do zɛlɛ ni, nɛ a nɛ̀ do ti gɔ, a 'bana 'bɔ dɛ fala a zi nɛ ni 'do tũ bɔa. 7Nɛ 'do nɛ, nɛ a tɔ̃ hã Owi yambala mɛnɔ 'da a na: “Lɛ gílí tɛ lɛ dɛ ngɔ nù Yude i.”

8Nɛ owi yambala mɛnɔ wa gese hã a na: “Wi be mɔ, ma tɛ là di nyɛlɛ gɔ, Oyudanɔ wa fa zi mɔ, takɔ wa lo mɔ do ta. Kɔ mɔ kɔ̃a 'bɔ we kpolo tɛ mɔ i mɔ nde?”

9Nɛ Yezu gese na: “Li wese kpo do sa 'bu ngɔ nɛ bɔa gɔ nde? Kɔ fala kɛ wele yɛnggɛ do gbo gba wese, nɛ nde a wè tɛ kɔ zu nyanga a gɔ, we kɛ a zɔ tua wese kɛ ma to dɛ ngɔ nù gɛ ni zɔa. 10Kɔ fala kɛ wele yɛnggɛ do tũ, nɛ a kɔ zu nyanga a, we kɛ mɛ a tũ, nɛ wese to gɔ.” 11Yezu tɔ̃a wenɔ ni hã wa do'do, nɛ a tɔ̃ 'bɔ na: “Yali ngba lɛ Lazarɛ ɔa yala, kɔ mi nɛ we tunu a.”

12Nɛ owi yambala mɛnɔ wa gese hã a na: “Nwa, fala kɛ a ɔ yala iko, nɛ a kpasa sɛ.”

13Yezu kɔ̃a zi we tɔ̃ hã wa na, Lazarɛ fi fia, nɛ nde Owi yambala mɛnɔ wa lengge na, a tɔ̃ we ngbongbo yala. 14Nɛ a tɔ̃ hã wa mboe na: “Lazarɛ fi fia. 15Kɔ mi dɛa yangga wena na, 'da fala ni nɛ nde mi i mɔ bina. Ma dɛa tɛ̃ ɛ na mɛ ni, takɔ nɛ kɔ̃ sɛ zu li mi. Kɔ lɛ nɛ́ 'da a i.”

16Nɛ Toma, kɛ wa sa mbe 'bɔ li a na Be Dã ni tɔ̃ hã ongba a wi yambala mɛnɔ na: “Lɛ nɛ́ do a! Kɔ fala kɛ ma ɔ do fio nde, nɛ lɛ fe do a fala nɛ kpo.”

Yezu a wi tunu wele kɔ fio

17Yezu hɔa i mɔ, nɛ nde wa mi Lazarɛ la tu nalɛ ia. 18Betani nyɛ̀lɛ̀ do Yeruzalɛmɛ gɔ, ma hɔ̀ kilomɛtrɛ talɛ gɔ. 19Nɛ mbe gba gili Oyudanɔ wa tɛa 'da Marta do Maria nga, we dungu do wa olo fio nya wa.

20Kɔ wa nɛa we tɔ̃ hã Marta na, Yezu hɔa ni, nɛ a yɛlɛ ti a, nɛ Maria 'bana dɛ kɔ tɔa i. 21Marta kpa ngba a do Yezu, nɛ a tɔ̃ hã a na: “Nwa, ɔ do kɛ mɔ zi dɛ boe, nɛ nde nya mi fé sɔ gɔ. 22Nɛ nde mi ĩ na, Gale a hã sɛ mɛnɔ vɛ̃ kɛ mɔ nɛ gɔ kɔ̃ a ni hã mɔ.”

23Nɛ Yezu tɔ̃ hã a na: “Nya mɔ a za'da sɛ nza kɔ fio.”

24Nɛ Marta gese na: “Mi ĩ na, a za'da sɛ nza do ngba soe ofionɔ wa za'da sɛ nɛ do ndɔti nùi ni.”

25Nɛ Yezu gese hã a na: “Mi a wi kɛ mi tunu winɔ kɔ fio, nɛ mi hã kpasi hã wa. Kɔ fala kɛ wele kɔ̃ zu li mi, hã gɛnɛ kɔ a fe fia, nɛ a kpasa sɛ. 26Wi kɛ a kɔ̃ zu li mi ni, a do kpasi kɛ ma é sɛ gɔ, nɛ a fé sɛ fio gɔ. Mɔ kɔ̃a na mɛ ni nde?”

27Nɛ Marta gese na: “Ĩi, mi kɔ̃a na mɛ ni, Nwa. Mi ĩ na, mɔ a Mɛsiya, Be 'da Gale, kɛ wa tɔ̃a zɛ́ na, a tɛ sɛ ngɔ nù gɛ ni.”

Yezu nɛa ngɔ zunu Lazarɛ

28Marta tɔ̃a ni do'do, nɛ a nɛ, nɛ a sa mɔ hã nya a Maria, nɛ a tɔ̃ hã a do usu nɛ na: “Mɔ zɔ́, wi be mɔ hɔa ia, kɔ a aka we mɔ.” 29Maria nɛa we zele ní, nɛ a kulu ngɔ, nɛ a la do gbɛnga tɛ dɛ 'da Yezu i. 30(Mɛ ni nɛ nde Yezu tɛ lè dɛ kɔ le i gɔ, a 'bana dɛ tɛ olo a kɛ Marta kpa sɔ do a ni.) 31Kɔ Oyudanɔ wa zi kɔ tɔa mɔ tɛ dungu do Maria ni, wa nɛa we zɔ na, a kulu ngɔ, kɔ a la do gbɛnga tɛ ni, nɛ wa kulu ngɔ 'dɔkɔlɔ a, we kɛ wa lengge zi na, a nɛ ngɔ zunu Lazarɛ i we he kɔ̃a.

32Kɔ Maria nɛa we hɔ fala Yezu nɛ ni, nɛ a gu nù ti a, nɛ a tɔ̃ hã a na: “Nwa, ɔ do kɛ mɔ ɔ zi dɛ boe, nɛ nde nya mi fé sɔ gɔ.”

33Nɛ Yezu zɔa Maria do winɔ a tɛa do wa ni tɛ he ma, nɛ ma zɛlɛ a wena, nɛ ma vĩ zu a, 34nɛ a aka wa na: “Nɛ mi Lazarɛ do nde?”

Nɛ wa gese hã a na: “Nwa, mɔ tɛ́, kɔ mɔ zɔ́!”

35Nɛ Yezu ma ngɔ he nɛ. 36Nɛ Oyudanɔ wa tɔ̃ na: “Nɛ zɔ́, a kɔ̃ gɛnɛ a wena!” 37Nɛ ombe sanga wa ni wa tɔ̃ na: “A hũi zi dɛ li wi tandui, nɛ a wè zi tɛ dɛ na, Lazarɛ tɛ fè gɔ ni gɔ nde?” 38Nɛ ma zɛlɛ 'bɔ Yezu wena, nɛ a la dɛ ngɔ zunu i.

Yezu tunu Lazarɛ kɔ fio

Zuni ni, wa 'dungga zi ma dɛ kɔ ta, nɛ wa kpe nu nɛ do ta. 39Nɛ Yezu tɔ̃ hã wa na: “Nɛ kímílí ta do'do.”

Nɛ Marta, boko nya fie tɔ̃ hã a na: “Aa Nwa, wa mi a ma la tũ nalɛ, kɔ a ndua unu nɛ ia.”

40Nɛ Yezu gese hã a na: “Mi tɔ̃a sɔ hã mɔ na, fala kɛ mɔ kɔ̃ zu li mi, nɛ mɔ zɔ sɛ dɔ̃lɔ̃ li 'da Gale gɔ nde?” 41Nɛ wa kimili ta. Nɛ Yezu kala li ɛ dɛ ngɔ, nɛ a tɔ̃ na: “Baa mi, mi hã iɔ̃nae hã mɔ, we kɛ mɔ zila mi. 42Mi ĩ na, mɔ zele mi zila 'da fala fai, nɛ nde mi tɔ̃ ní we winɔ kɛ zã mi gɛ, takɔ wa kɔ̃ na, mɔ a mɔ tumba mi.” 43A tɔ̃a ni do'do, nɛ a sa mɔ dɛ ngɔ na: “Lazarɛ, hɔ́ nza!” 44Nɛ fie hɔa nza, nɛ nde wa ɛnza zi nyanga a, do kɔ̃ a do fɛlɛ tulu, nɛ wa ɛnzɛ 'bɔ li a do tulu. Nɛ Yezu tɔ̃ hã wa na: “Nɛ yálá a, kɔ a lá!”

Onwa Yudanɔ wa fa we ba Yezu

(Mat. 26.1-5; Mar. 14.1-2; Luk. 22.1-2)

45Nɛ gba gili Oyudanɔ sanga winɔ wa tɛa zi 'da Maria nga ni, wa nɛa we zɔ mɛ Yezu dɛa ni, nɛ wa kɔ̃a zu li a. 46Nɛ nde ombe wa nɛa, nɛ wa kpa Ofariziɛnɔ, nɛ wa tɔ̃ we mɛ Yezu dɛa ni hã wa. 47Kɔ Ofariziɛnɔ wa nɛa we zele ní, nɛ wa do onwa nganganɔ, wa mba li ngba wa do owi 'bili wenɔ, nɛ wa tɔ̃ na: “Wi gɛ dɛ gba sɔ̃ mɔ wena, kɔ lɛ nɛ dɛ nɛ nɛ nde? 48Lɛ la a tɛ dɛ na mɛ ni, nɛ winɔ vɛ̃ wa kɔ̃ sɛ zu li a. Kɔ ogã wi Roma wa zɔ ní, nɛ wa gbini sɛ tɔa Tɛmpɛloe 'da lɛ, nɛ wa kumu sɛ nu kpala lɛ.”

49Nɛ mbe wele sanga wa ni kpo, li a a Kaifɛ, a zi a gã nwa nganga do sabɛlɛ ni, a tɔ̃ hã wa na: “Nɛ ĩ̀ ti gulu mɛ gɛ gɔ. 50Nɛ ĩ́ na, we duzu nɛ, ma dia fɛ̃ na, wele kpo fe we winɔ, dɔ nu kpala lɛ kúmú gɔ.” 51A tɔ̃̀ zi wenɔ ni do linggamɔ mɔ́ a gɔ. A zi a gã nwa nganga do sabɛlɛ ni, ma kɛ a gba zi olo nu Gale na, Yezu a fe sɛ we nu kpala Oyudanɔ. 52Nɛ nde Yezu fé sɛ we nu kpala Oyudanɔ iko gɔ, a fe sɛ we mba li winɔ 'da Gale kɛ wa kpa ngɔ nù gɛ vɛ̃ ni, takɔ wa hɔ wele kpo.

53Nɛ ndo do ngba soe ni, onwa Yudanɔ wa 'dafa do kɔ sila wa we gbɛ Yezu. 54Ma kɛ Yezu wè zi 'bɔ tɛ be tɛ̃ ɛ dɛ wila fala sanga Oyudanɔ gɔ. Nɛ a kulu ngɔ, nɛ a la dɛ ngɔ nù kɛ ma dɔ̃ɔ do li gba zɔ̃ɛ ni, nɛ a hɔ kɔ le kpo, li nɛ a Efraimɛ, nɛ a do owi yambala mɛnɔ 'da a, wa 'bana dɛ di ni.

55Nɛ ngba soe ɛngga Hɔ Nza kɔ Ngbá 'da Yudanɔ kɔla, nɛ gba gili winɔ wa kulu ngɔ kɔ lenɔ 'da wa dati ɛngga ni, nɛ wa nɛ Yeruzalɛmɛ, takɔ wa fɔlɔ tɛ wa we hɔ sa wi li Gale, ɔ nɛ kɛ mbula tɔ̃a ni. 56Nɛ wa ma ngɔ fa Yezu. Nɛ wa aka ngba wa kɔ Tɛmpɛlo i na: “Nɛ lengge na, a tɛ sɛ tɛ ɛngga gɛ nde?” 57Nɛ onwa nganganɔ do Ofariziɛnɔ, wa tɔ̃ hã winɔ vɛ̃ na, fala kɛ wele ĩ fala Yezu, nɛ a tɔ̃ 'da nɛ hã lo, takɔ lo ba a.

Currently Selected:

YOANƐ 11: NGB

Highlight

Copy