YOANƐ 12

Maria tɛnɛ nɔ yɔmbɔ dɛ tɛ nyanga Yezu

(Mat. 26.6-13; Mar. 14.3-9)

1Ma 'bana tũ gazɛlɛ we ɛngga Hɔ Nza kɔ Ngbá, nɛ Yezu la dɛ Betani, le 'da Lazarɛ, kɛ a tunu zi a kɔ fie ni. 2Nɛ a le 'da Lazarɛ, nɛ wa gi nyɔngɔmɔ, nɛ Marta a ma ti a. Lazarɛ zi fala nɛ kpo do winɔ kɛ wa nyɔngɔ mɛ do Yezu ni. 3Nɛ Maria tɛa do nɔ yɔmbɔ olo gã gole. Yɔmbɛ ni, mɛ a nga li nɛ ngboo, wa dɛa do liã te narɛ. Nɛ a tɛnɛ ma dɛ tɛ nyanga Yezu, nɛ a ma ngɔ dili do mili zu a. Nɛ fala tɛ nɛ kpia kɔ tɔa kpã kpã. 4Nɛ mbe sanga owi yambala mɛnɔ 'da Yezu kpo, li a a Yudasi Iskariɔtɛ, wele kɛ a nɛ 'dɔlɔ sɛ Yezu ni, a tɔ̃ na: 5“Wa wia sɔ we be gole yɔmbɛ gɛ we gbãlã mbili kama talɛ, nɛ wa kɛ̃ ma hã owi sãnɔ gɔ nde?” 6A tɔ̃̀ ni, we kɛ a lengge do owi sãnɔ lingga ni gɔ, nɛ nde we kɛ a zi a wi zũ, nɛ a zi a wi fɔmɔ mbili 'da ongba a, nɛ a nyɔngɔ nu nɛ do usu nɛ nyɔnga.

7Nɛ Yezu tɔ̃ na: “Nɛ lá wuke gɛ, kɔ a dɛ ní we ngba soe kɛ wa mi sɛ do mi ni. 8We kɛ wi sãnɔ wa boe fai, nɛ nde mi, mi ɔ́ sɛ do nɛ fai gɔ.”

Onwa nganganɔ wa ba zã zu gbɛ Lazarɛ

9Nɛ gba gili Oyudanɔ wa zila na, Yezu a tɛ Betani, nɛ wa nɛa 'da a. Nɛ nde wa nɛ̀ we zɔ tati a Yezu iko gɔ, wa nɛa tɛ mɛ 'bɔ we zɔ do Lazarɛ, kɛ Yezu tunu zi a kɔ fie ni. 10Nɛ onwa nganganɔ wa 'bili do kɔ sila wa na, wa gbɛ 'bɔ Lazarɛ, 11we kɛ ogba gili Yudanɔ wa la fala zele onwa nganganɔ, nɛ wa kɔ̃a zu li Yezu we duzu a.

Yezu lia kɔ le Yeruzalɛmɛ

(Mat. 21.1-11; Mar. 11.1-11; Luk. 19.28-40)

12Fala nɛa we sa nɛ, nɛ gba gili winɔ kɛ wa tɛa zi ɛngga Hɔ Nza kɔ Ngbá ni, wa zila na, Yezu tɛa Yeruzalɛmɛ gɛ. 13Nɛ wa 'bili onwá 'bete dɛ kɔ̃ wa, nɛ wa hɔ, nɛ wa gɔnɔ dati a, nɛ wa ma ngɔ he mɔ na: “Hozana! Gale kpá dɔ̃lɔ̃ li! E kɔ Nwa Gale wele nu ɛ tɛ wi kɛ a tɛ do zu li a ni! A a Nwa 'da obe Israɛlɛ!”

14Nɛ Yezu kpa be punda, nɛ a kũ ngɔ a, ɔ nɛ kɛ wa kɔma zɛ́ kɔ 'Buki 'da Gale na:

15“Aa nɛ, owi Yeruzalɛmɛ, nɛ tɛ dɛ̀ kili gɔ.

Nɛ zɔ́ nwa 'da nɛ, a tɛ tɛ nɛ,

a kũ ngɔ be punda”#12.15 Mɔ tɔ́lɔ́ Zakaria 9.9. ni.

16Do 'da fala ni, nɛ nde owi yambala mɛnɔ wa ĩ́ zi ti gulu mɛnɔ ma dɛ tɛ̃ ɛ ni gɔ. Kɔ 'do kɛ Yezu kũ dɛ li nza i ni, nɛ ta zu wa gba na, wenɔ kɛ wa kɔma zi do zu li a kɔ 'Buki 'da Gale ni, ma dɛa tɛ̃ ɛ.

17'Da fala kɛ Yezu sa zi mɔ hã Lazarɛ kɔ zuni dɛ nza, nɛ a tunu a kɔ fio ni, Owele wa zi wena. Nɛ winɔ ni wa tɔ̃a we mɛnɔ kɛ wa zɔa ni hã ongba wa vɛ̃. 18Ma kɛ ogba gili winɔ wa gɔnɔ dati a, we kɛ wa zila we gba sɔ̃ mɛ kɛ a dɛa ni. 19Nɛ Fariziɛnɔ wa tɔ̃a dɛ sanga wa na: “Nɛ zɔ́, winɔ vɛ̃ wa nɛ 'dɔkɔlɔ a iko! Le wè tɛ dɛ mɔ kpɔ gɔ.”

Ombe Grɛkɛnɔ wa fa Yezu

20Ombe Grɛkɛ wa zi sanga winɔ kɛ wa tɛa ɛngga tɛ Yeruzalɛmɛ we dɔnggɔ Gale ni. 21Nɛ wa nɛa 'da Filipɛ, kɛ a a be Bɛtsaida, ngɔ nu Galile ni, nɛ wa tɔ̃ hã a na: “Mbaa, lɛ kɔ̃a we zɔ Yezu.” 22Nɛ Filipɛ nɛa, nɛ a tɔ̃ we nɛ hã Andre. Nɛ wa bɔa nɛ wa nɛa, nɛ wa tɔ̃ we nɛ hã Yezu.

23Nɛ Yezu tɔ̃ hã wa na: “Ngba soe kɛ dɔ̃lɔ̃ li 'da mi, Be 'da Wele nɛ be do tɛ̃ ɛ ni, ma wia ia. 24Mi tɔ̃ hã nɛ do gbãlã we na, fala kɛ gbãlã kpalɛ lè ti nù, kɔ ma fe gɔ, nɛ ma 'bana sɛ gbãlã kpalɛ kpo fai. Kɔ fala kɛ ma le ti nù, kɔ ma fe ia, nɛ ma ko sɛ dɛlɛ wena. 25Wi kɛ a lengge tati a kpasi 'da a iko ni, a fe sɛ. Nɛ nde wele kɛ a lénggé kpasi 'da a ngɔ nù gɛ gɔ ni, nɛ a kpa sɛ kpasi kɛ ma é sɛ gɔ ni. 26Wi kɛ a kɔ̃ we dɛ to hã mi, nɛ ma wia na, a tɛ 'dɔkɔlɔ mi. Na mɛ ni, nɛ fala mi ɔ sɛ nɛ ni, wi dɛ toe 'da mi a ɔ sɛ tɛ mɛ 'bɔ di ni. Wi kɛ a dɛ to hã mi, nɛ Baa mi a dɔnggɔ sɛ a.

Yezu tɔ̃a we fie 'da a

27“Ngangga ni, sila mi yɛkɛ wena. Kɔ mi nɛ tɔ̃ na ge nde? Mi tɔ̃ wá hã Baa mi na, a kpasa mi kɔ ngamɛ gɛ nde? Ɔ̃ ɔ̃! Mi tɛa ngɔ nù gɛ, we kpa ngamɛ gɛ. 28Baa mi, mɔ bé dɔ̃lɔ̃ li 'da mɔ hã winɔ!”

Kɔ a nɛa we tɔ̃ ní, nɛ wala gɛlɛ wele wila li nza i na: “Mi bia zi dɔ̃lɔ̃ li 'da mi hã winɔ ia, nɛ mi be sɛ 'bɔ ma mbé nɛ.”

29Nɛ gba gili winɔ kɛ wa zi di ni ni wa zila wila we ni, nɛ ombe wa tɔ̃ na: “Mɛ a ua dã kolo!” Nɛ ombe wa na: “Mbe anzɛ kpo wila we hã a!”

30Nɛ Yezu tɔ̃ hã wa na: “Wila we ni, ma wèlè we mi gɔ, nɛ nde ma wila we nɛ. 31Ngangga ni, Gale nɛ 'bili we 'da winɔ ngɔ nù gɛ, nɛ a ndaka sɛ Satana, nwa ngɔ nùi gɛ do'do. 32Kɔ 'da fala kɛ wa ba sɛ mi dɛ ngɔ ni, nɛ mi dɛ sɛ na, winɔ vɛ̃ wa tɛ dɛ 'da mi.” 33Yezu tɔ̃a ni, we be tɛlɛ tɛ kɛ a fe sɛ nɛ ni.

34Nɛ gba gili winɔ wa gisa hã a na: “Lɛ yambala kɔ 'buku mbula 'da lɛ na, Mɛsiya fé sɛ fio gɔ, a ɔ sɛ fai. Kɔ gulu kɛ mɔ tɔ̃a na, wa ba sɛ Be 'da Wele dɛ ngɔ ni we ge nde? Be 'da Wele ni a wio nde?”

35Nɛ Yezu tɔ̃ hã wa na: “Sa fala 'bana tɛ sa ngɔ nɛ we be kɔ̃ tũ sĩ iko. Kɔ nɛ́ kɛ sa fala 'bana ni, ma wia na, nɛ yɛnggɛ do kɔ sa fala, da dɛ kɔ gba tũ gbángá nɛ gɔ. Wi kɛ a yɛnggɛ kɔ gba tũ ni, a ĩ̀ ti fala a nɛ nɛ ni gɔ. 36'Da fala kɛ sa fala 'bana tɛ sa ngɔ nɛ ni, nɛ nɛ kɔ̃ sa fala ni, takɔ nɛ ɔ Owi sa fala.”

Oyudanɔ wa kɔ̃ zu li Yezu gɔ

Yezu tɔ̃a wenɔ ni do'do, nɛ a la, nɛ a usu tɛ̃ a do winɔ. 37Gɛnɛ kɔ a dɛa zi ogba sɔ̃ mɔ hã wa wena, nɛ nde wa kɔ̃̀ zu li a gɔ. 38Ma la na mɛ ni, takɔ we Ezai, wi gba olo nu Gale kɔma zɛ́ ni, ma dɛ tɛ̃ ɛ. A kɔma zɛ́ na:

“Nwa Gale, wi kɔ̃a gɛnɛ wenɔ 'da lɛ

wi a wio nde?

Nɛ wi ĩ ti ngawi 'da mɔ,

wi a wio nde?”#12.38 Mɔ tɔ́lɔ́ Ezai 53.1.

39Nɛ Ezai kɔma 'bɔ gulu kɛ wa wè zi tɛ kɔ̃ zu li a gɔ ni na:

40“Mi Gale, mi lɔa li wa do'do na,

da dɛ kɔ gbali wa zɔ́ mɔ gɔ.

Nɛ mi ɛnzɛ hã zã wa do'do na,

da dɛ kɔ zu wa bá mɔ,

kɔ wa kífí sila wa,

hã mi kpasa wa gɔ.”#12.40 Mɔ tɔ́lɔ́ Ezai 6.9-10.

41Ezai tɔ̃a zɛ́ ni, we kɛ Gale bia dɔ̃lɔ̃ li 'da Yezu hã a. Ma kɛ a tɔ̃a we 'da Yezu ni.

42Gɛnɛ kɔ na mɛ ni, nɛ nde ombe sanga onwa Yudanɔ wena, wa kɔ̃a zi zu li Yezu, nɛ wa bé ma dɛ nza gɔ. We kɛ Ofariziɛnɔ wa tɔ̃a na, fala kɛ wele kɔ̃ zu li Yezu, nɛ lo ndaka a kɔ tɔa mbula do'do. 43Owinɔ ni wa kɔ̃a zi gɛnɛ kɛ na, Owele wa dɔnggɔ lo nɛ ngɔ kɛ na, Gale dɔnggɔ wa ni.

Bia wenɔ 'da Yezu ma 'bili sɛ we 'da winɔ

44Nɛ Yezu tɔ̃a dɛ ngɔ na: “Wi kɛ a kɔ̃ zu li mi ni, a kɔ̃̀ tati a mi zu mi kpo iko gɔ, nɛ nde a kɔ̃a 'bɔ zu li Wi tombo mi. 45Nɛ wi kɛ a zɔ mi ni, a zɔa 'bɔ Wi tombo mi. 46Mi, mi tɛa ngɔ nù gɛ ɔ nɛ sa fala ni na, winɔ vɛ̃ kɛ wa kɔ̃ zu li mi ni, wa tɛ 'bànà kɔ gba tũ gɔ. 47Kɔ fala kɛ wele zele bia we 'da mi, kɔ a dɛ̃ ma gɔ, nɛ nde mi a mi 'bílí sɛ we 'da a gɔ. Mba gɔ, mi tɛ̃ we 'bili we dɛ zu winɔ ngɔ nù gɛ gɔ, nɛ nde mi tɛa we kpasa wa kpasa. 48Wele kɛ a bɛ̃ gɛnɛ mi, kɔ a kɔ̃̀ gɛnɛ bia we 'da mi gɔ, nɛ nde a tia do we ia. We kɛ do ndɔti nùi, nɛ wenɔ mi bia ni ma 'bili sɛ we dɛ zu a. 49Mba gɔ, mi bè zi we do linggamɔ zu mi iko gɔ. Nɛ nde Baa mi, kɛ a tumba mi ni, a ba nu a ngɔ we, nɛ mi be ma. 50Nɛ mi ĩ na, wenɔ kɛ Baa mi tɔ̃ ni, ma hã kpasi kɛ ma é sɛ gɔ ni. Na mɛ ni, we mi tɔ̃ ni a we Baa mi ba nu a ngɔ ma hã mi ni.”

Currently Selected:

YOANƐ 12: NGB

Highlight

Copy