YOANƐ 10

Gba we ngɔ wi fɔmɔ bata

1Nɛ Yezu na: “Mi tɔ̃ hã nɛ do gbãlã we na, wi kɛ a lè kɔ ngboe 'da batanɔ do nu nɛ gɔ, kɔ a kũ do zu ngboe ni, a a wi zũ. 2Nɛ wele kɛ a le do nu ngboe ni, a a wi fɔmɔ obatanɔ. 3Wi zɔ mɔ tɛ nu ngboe hũi nu nɛ hã a, nɛ a sa mɔ hã obatanɔ 'da a kpo kpo do li wa. Nɛ obatanɔ wa zele gɛlɛ a, nɛ wa hɔ 'do a. 4Kɔ a fo wa dɛ nza do'do, nɛ a kpe dati wa, nɛ wa nɛ 'do a, we kɛ wa ĩ ti gɛlɛ a. 5Nɛ nde wa lá sɛ 'do gele wele, kɛ wa ĩ̀ ti a gɔ ni gɔ. Wa yu sɛ a do'do, we kɛ wa ĩ̀ ti gɛlɛ a gɔ.”

6Yezu tɔ̃a zi gba we gɛ hã owinɔ, nɛ nde wa ĩ̀ ti gulu nɛ gɔ.

Yezu a dia wi fɔmɔ bata

7Nɛ Yezu tɔ̃ 'bɔ na: “Mi tɔ̃ hã nɛ do gbãlã we na, mi a nu ngboe 'da batanɔ. 8Owinɔ vɛ̃ kɛ wa hɔa zi dati mi ni, wa a owi zũ, nɛ obatanɔ wa zèlè gɛlɛ wa gɔ. 9Mi a nu ngboe. Kɔ wele kɛ a le do nu ngboe ni, nɛ a kpasa sɛ. A wia sɛ we le nɛ, nɛ a hɔ nza, nɛ a kpa nyɔngɔmɔ. 10Nɛ nde wi zũ tɛ kɛ 'dɛ ɛ we zũ mɔ, do 'danga mɔ, do gbɛ sa'de iko. Kɛ 'da mi, mi tɛa, takɔ mi hã kpasi kɛ ma dia la li ngele ni hã Owele.

11“Mi a dia wi fɔmɔ bata. Dia wi fɔmɔ bata hã tɛ̃ a we batanɔ 'da a. 12Kɔ wele kɛ a dɛ to fɔmɔ batanɔ we kpa mbili iko ni, a a ngbongbo wi fɔmɔ wa gɔ, nɛ batanɔ ni wa 'bɔ a mɔ́ a gɔ. A zɔ gɔ̃̀ tɛ tɛ ma, nɛ a la batanɔ dɛ di ni, nɛ a yu. Nɛ gɔ̃̀ɛ kala wa, nɛ tala wa wa pɛsɛ. 13A yu, we kɛ a dɛ to fɔmɔ batanɔ we kpa mbili iko, nɛ nde a lénggé do wa ngboo gɔ. 14Mi a dia wi fɔmɔ bata, nɛ mi ĩ ti batanɔ 'da mi, nɛ batanɔ 'da mi wa ĩ ti mi, kpasaa nɛ́ kɛ Baa mi ĩ do ti mi, nɛ mi ĩ tɛ mɛ 'bɔ do ti a ni. 15Nɛ mi hã sɛ tɛ mi we obatanɔ 'da mi. 16Nɛ mi 'bɔ do gele obata kɛ wa kɔ ngbo bina ni. Kɔ ma wia na, mi kpe tɛ mɛ 'bɔ ti wa, nɛ mi a wa kɔ ngboe. Wa zele sɛ gɛlɛ mi, nɛ ngɔ gili batanɔ sɛ kpo, nɛ wi fɔmɔ wa kpo.

17“Baa mi kɔ̃a gɛnɛ mi, we kɛ mi 'dɔlɔ sɛ kili tɛ mi, takɔ mi kpa 'bɔ ma. 18Wele wé sɛ we gbɛ mi gɔ, nɛ nde mi wele nɛ mi 'dɔlɔ sɛ kili tɛ mi. Mi do ngawi we 'dɔlɔ ma, nɛ mi 'bɔ do ngawi we kpa ma mbé nɛ. We duzu kɛ Baa mi ba nu a hã mi na, mi dɛ ɔ na mɛ ni.”

19Kɔ Oyudanɔ wa nɛa we zele ní, nɛ sanga wa gɔnɔ bɔa. 20Nɛ ombe wa na: “A do 'dã hi wi kɔ a, tabi bɔ tia zu a! Kɔ gulu kɛ nɛ zele a we ge nde?” 21Nɛ ombe wa na: “Wi kɛ a do 'dã hi wi kɔ a ni, a wélé we na mɛ gɛ gɔ. 'Dã hi wi wia do kpasa wi tandu, nɛ a zɔ mɔ nde?”

Oyudanɔ wa Ma gɛnɛ Yezu

22Ngba soe ni zi a 'da fala ɛngga lengge do tũi kɛ wa ia do tɔa Tɛmpɛloe tɛ Yeruzalɛmɛ i hã Gale ni. Nɛ mɛ zi a zɔlɔ gɛ̃ɛ. 23Nɛ Yezu zi kɔ Tɛmpɛlo i tɛ yɛnggɛ do ti mɔnggɔlɔ tɔa Tɛmpɛloe, kɛ li nɛ a “Mɔnggɔlɔ Tɔa 'da Salɔmɔ” ni. 24Nɛ Oyudanɔ wa tɛa, nɛ wa ngɛmɛ dɛ kɛ zã a, nɛ wa aka a na: “Gulu kɛ mɔ e sila lɛ ngɔ ni we ge nde? Mɔ tɔ̃́ hã lɛ ngboo sɛ! Mɔ a Mɛsiya nde?”

25Nɛ Yezu gese hã wa na: “Mi tɔ̃a zi hã nɛ ia, nɛ nɛ kɔ̃̀ gɔ. Nɛ nde mɛnɔ kɛ mi dɛ do ngawi 'da Baa mi ni, ma be gbãlã we 'da mi. 26Nɛ nɛ kɔ̃́ gɔ, we duzu kɛ fo nɛ sanga obatanɔ 'da mi bina. 27Obatanɔ 'da mi wa ĩ ti gɛlɛ mi, nɛ mi ĩ ti wa, nɛ wa tɛ yɛnggɛ 'dɔkɔlɔ mi. 28Mi hã kpasi kɛ ma é sɛ gɔ ni hã wa, nɛ wa fé sɛ fio gɔ, nɛ wele kpo wé sɛ tɛ dolo zu wa kɔ̃ mi gɔ. 29Baa mi kɛ a hã wa hã mi ni, a nɛa ngɔ mɛnɔ vɛ̃, nɛ wele wè tɛ dolo zu wa kɔ̃ a gɔ. 30Lɛ do Baa mi, lɛ a wele kpo iko.”

31Nɛ Oyudanɔ wa kala 'bɔ ta we lo do Yezu. 32Nɛ a tɔ̃ hã wa na: “Mi dɛa dia mɔ wena do ngawi 'da Baa mi dɛ li nɛ gɛ. Kɔ mɛ nɛ kɔ̃a we lo mi we nɛ ni a ge nde?”

33Nɛ wa gese hã a na: “Lɛ nɛ lo mɔ we odia mɛnɔ mɔ dɛa ni gɔ, nɛ nde mɛ a we kɛ mɔ dã zu li Gale. Mɔ a wele iko, nɛ mɔ ba tɛ mɔ na, ɛ a Gale.”

34Nɛ Yezu gese hã wa na: “Wa kɔma kɔ 'buku mbula 'da nɛ na, Gale tɔ̃a na: ‘Nɛ a ogalenɔ.’ 35Nɛ lɛ ĩ na, lɛnggɛ kɔ 'Buki ni ma do ngawi fai. Gale sa zi li winɔ kɛ a bia we nu a hã wa ni na ogale. 36Kɔ we mi, Gale saka zɛ́ mi, nɛ a tombo mi dɛ ngɔ nù gɛ. Na mɛ ni, kɔdɛ kɛ nɛ tɔ̃ na, mi dã zu li Gale, we kɛ mi tɔ̃a na, mi a Be 'da a ni nɛ nde? 37Fala kɛ nɛ zɔ na, mi dɛ̀ toe 'da Baa mi gɔ, nɛ nɛ tɛ kɔ̃̀ zu li mi gɔ. 38Kɔ fala kɛ mi dɛ toe 'da a, kɔ gɛnɛ kɔ nɛ kɔ̃ zu li mi gɔ, nɛ nɛ wia sɔ we kɔ̃ gɛnɛ mɛnɔ mi dɛ ni, takɔ nɛ ĩ fai na, lɛ do Baa mi, lɛ a wele kpo iko.”

39Wa nɛa we zele ni, nɛ wa fa 'bɔ we ba Yezu, nɛ a vĩ wa do'do.

40Nɛ a la dɛ kulu lì Yɔrdanɛ i, tɛ fala Yoanɛ batisa zi do winɔ ni, nɛ a 'bana dɛ di ni. 41Nɛ gba gili Owele wa nɛa 'da a, nɛ wa tɔ̃ na: “Yoanɛ dɛ̀ zi mbe gba sɔ̃ mɔ gɔ, nɛ nde wenɔ vɛ̃ kɛ a tɔ̃a ngɔ wi gɛ ni, mɛ a gbãlã we.” 42Nɛ gba gili winɔ zi di ni ni, wa kɔ̃a zu li Yezu.

Currently Selected:

YOANƐ 10: NGB

Highlight

Copy