Ndo Nyanga Dɛ Mɔ 6
6
NWA Gale sa te ɛ̃ we duzu kɛ a dɛa wele ni
1Nɛ owinɔ wa kua, nɛ wa ma ngɔ dɛlɛ ngɔ nù gɛ. Nɛ wa kua 'bɔ oboko be. 2Owinɔ kɛ wa ɔ li nza ngɔ i ni, wa zɔa na oboko benɔ ni wa de zɔnga wena, nɛ wa fa wa we kala wa do wuko. 3NWA zɔa ní, nɛ a tɔ̃ na: “Ma wè na Owele wa 'bana do bũ kpasi mi hã hã wa ni fai gɔ, we kɛ wa a fio iko. Kɔ ngangga gɛ, wa ɔ sɛ ngɔ nù gɛ, nɛ nde wa lá sɛ ngɔ sabɛlɛ kama do 'bu nɛ bɔa gɔ.” 4Zi do sabɛlɛnɔ ni, do kɛnɔ 'bɔ 'do nɛ ni, ombe wele ngɔ nù gɛ, wa dulu zi wena. Wa zi a obenɔ 'da owukonɔ kɛ owinɔ wa ɔ li ngɔ i, wa kua zi do wa ni. Nɛ wa zi do dɔlɔ li wena sanga owinɔ dati gɛ.
5NWA zɔa na, linggamɔ zu winɔ ma dè gɔ, ma tombo wa li wala dɛ 'dã mɔ, nɛ dɛa mɔ tɛ wa ma 'danga dɛ dati 'danga fai. 6Nɛ 'bako ba a, nɛ a sa tɛ a we kɛ a dɛa wa, nɛ a ia wa ngɔ nù gɛ ni. 7Nɛ a na: “Mi kumu sɛ owinɔ kɛ mi dɛa wa ngɔ nù gɛ ni do'do. Mi kumu sɛ wa fala nɛ kpo do osa'denɔ vɛ, ogã sa'denɔ do obe wanɔ, do onɔɛnɔ 'bɔ vɛ̃. Mba gɔ, mi sa tɛ mi wena we kɛ mi dɛa wa ni.” 8Nɛ nde Nowe dia zi li NWA.
Lɛnggɛ ngɔ Nowe
9-10Nɛ zélé lɛnggɛ ngɔ Nowe. Nowe zi do obulu be talɛ: Sɛmɛ, Kamɛ do Yafɛtɛ. Sanga owinɔ ngɔ nù gɛ vɛ, Nowe zu a kpo a dɛ zi 'dã mɔ gɔ. Nɛ kɔ dungu nza 'da a vɛ, a zi a wi bɔlɔ zu, nɛ a zi fai fala nɛ kpo do Gale. 11Nɛ nde gele winɔ vɛ, wa dɛ zi 'dã mɔ li Gale. Nɛ nga zu do bolo kpa zi nyanga nza gɛ vɛ. 12Nɛ Gale ka mɔ ngɔ nùi, nɛ a zɔ na, winɔ vɛ wa yɔa wala, 13nɛ a tɔ̃ hã Nowe na: “Mi kana tɛ mi na, mi gbɛ sɛ owinɔ ngɔ nù gɛ vɛ. Mba gɔ, wa a wa yulu o'dã dɛa mɔ ngɔ nù gɛ, kɔ mi kɔ̃a we kumu wa vɛ. 14Nɛ nde mɔ, mɔ dɛ masua, nɛ mɔ 'bili kɔ nɛ dɛlɛ. Mɔ dɛ sɛ ma do te siprɛ, nɛ mɔ na ndaka kɔ nɛ do 'do nɛ vɛ. 15Mɔ dɛ ma, nɛ du nɛ sɛ a mɛtrɛ kama do 'bu nɛ mɔlɔ, nɛ gã zã nɛ mɛtrɛ 'bu nɛ bɔa ngɔ nɛ mɔlɔ, nɛ ngala nɛ mɛtrɛ 'bu ngɔ nɛ mɔlɔ. 16Mɔ ba sɛ zu nɛ ba, nɛ mɔ e wula fala sanga zu nɛ do 'bolo zã nɛ we duzu mɛtrɛ kpo do dɔ nɛ. Nɛ mɔ dɛ sɛ nu nɛ tɛ mbe 'bolo zã nɛ. 17We kɛ mi dɛ sɛ na gba lì hɛ̃, nɛ ma kpa do ngɔ nù gɛ vɛ, nɛ ma gbɛ sɛ mɛnɔ vɛ̃ kɛ ma do tunu li ɛ ni do'do. Gbãlã tunu li mɔ kpo 'báná sɛ ngɔ nù gɛ gɔ. Mɛnɔ vɛ ma 'danga nɛ.
18“Nɛ nde we mɔ, mi kɔ̃a we gba tɔkɔ do mɔ. Mɔ le sɛ kɔ masua do wuke 'da mɔ, do obenɔ 'da mɔ, do okondukanɔ 'da mɔ. 19Mɔ kala sɛ mɛnɔ vɛ kɛ ma do tunu li ɛ ngɔ nù gɛ ni bɔa bɔa, wili nɛ kpo do naa nɛ kpo kɔ osa'denɔ tɛ ɛ do tɛ ɛ vɛ. Nɛ mɔ a sɛ wa kɔ masua, takɔ wa ɔ fala nɛ kpo do mɔ na, da dɛ kɔ wa fé gɔ. 20Mɔ ba sɛ wili sa'de kpo do naa nɛ kpo kɔ osa'denɔ vɛ, nɛ mɔ kala sɛ ngɔ gili wa kɔ nu kpala sa'denɔ tɛ ɛ do tɛ ɛ, ogã sa'de do obe nɛ, do onɔɛ, takɔ wa ɔ fala nɛ kpo do mɔ na, da dɛ kɔ wa fé gɔ. 21Mɔ fá onyɔngɔmɔ tɛ ɛ do tɛ ɛ vɛ, nɛ mɔ a, takɔ mɔ do osa'denɔ, nɛ nyɔngɔ sɛ ma.” 22Nowe zila we kɛ NWA tɔa ni, nɛ a dɛa ma vɛ, ɔ nɛ kɛ NWA ba do nu ɛ hã a ni.
Currently Selected:
Ndo Nyanga Dɛ Mɔ 6: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.
