Ndo Nyanga Dɛ Mɔ 7
7
Nowe lia kɔ masua
Nowe lia kɔ masua
1Nɛ NWA tɔ̃ hã Nowe na: “Mɔ kúlú ngɔ, hã mɔ le kɔ masua, fala nɛ kpo do nu fɛlɛ kula 'da mɔ. We kɛ mi zɔa na, sanga owinɔ ngɔ nù gɛ vɛ, ĩ ta mɔ Nowe zu mɔ kpo, mɔ a wi bɔlɔ zu. 2Mɔ zɔ sanga osa'denɔ kɛ wa a sa li mi ni, nɛ mɔ kala owili nɛ sambo, do onaa nɛ sambo sanga sa'denɔ ni kpo do kpo vɛ. Nɛ owanɔ kɛ wa a sa'de ndi ni, mɔ bá wili nɛ kpo do naa nɛ kpo, nɛ mɔ le do wa vɛ dɛ kɔ masua. 3We onɔɛnɔ, mɔ kálá owili nɛ sambo, nɛ onaa nɛ sambo sanga wa kpo do kpo vɛ, takɔ nu kpala wa 'bana, nɛ wa ko, hã wa yɛ'bɛ ngɔ nù gɛ. 4Ma 'bana di ni tũ sambo, nɛ mi tombo sɛ gba kolo, nɛ ma tɛ sɛ gbaa 'do 'bu tũ nalɛ. Nɛ mi kumu sɛ mɛnɔ kɛ mi dɛa zi ma ngɔ nù gɛ vɛ.” 5Nowe zila ni, nɛ a dɛa vɛ ɔ nɛ kɛ NWA tɔa hã a ni.
Gba hɛ̃a lì gbini
6Nowe zi do sabɛlɛ kama gazɛlɛ, 'da fala kɛ gba hɛ̃a lì gbini ngɔ nù gɛ ni. 7Nɛ a lia kɔ masua do wuke 'da a, do obenɔ 'da a, do okondukanɔ 'da a we yu gba hɛ̃a lì. 8Nɛ osa'denɔ kɛ wa a sa ni, do owanɔ kɛ wa a osa'de ndi, ogã sa'de do obe nɛ, do onɔɛnɔ 9wa hɔa, nɛ li wa we vɛ bɔa bɔa dɛ kɔ masua 'da Nowe ni, wili nɛ do naa nɛ, ɔ nɛ kɛ Gale tɔa ni. 10Ma nɛa we la olo nɛ tũ sambo, nɛ gba kole ma tɛa, nɛ lìnɔ ma gbini.
11Ma zi do zɛkɛ 'da bɔa, kɔ nɛ 'bu ngɔ nɛ sambo, do kpo kɔ sabɛlɛ kɛ Nowe zi do sabɛlɛ kama gazɛlɛ ni, nɛ zu lìnɔ ti nù gɛ ma kũ, nɛ ma gbala do lì pasii, nɛ go'do li nza ma zu'du gã wena. 12Nɛ kole ma ngɔ tɛ dɛ nù nga, nɛ ma tɛa ni gbaa 'do 'bu tũ nalɛ. 13Nɛ do ngba soe ni, nɛ Nowe le kɔ masua do wuke 'da a, do obenɔ 'da a, Sɛmɛ, Kamɛ do Yafɛtɛ, mba do okondukanɔ 'da a talɛ ni. 14Nowe lia fala nɛ kpo do osa'de zamɛnɔ do onadalamɛnɔ, ogã wanɔ do obe wanɔ, do onɔɛnɔ vɛ. 15Ngɔ gili osa'denɔ tɛ ɛ do tɛ ɛ vɛ̃, wa lia vɛ bɔa bɔa, wili nɛ do naa nɛ, 16ɔ nɛ kɛ Gale tɔ̃a hã Nowe ni. Wa lia do'do, nɛ NWA kpe nu masua dɛ ngɔ wa, nɛ a kã ma.
17Gba kole tɛa ni gbaa 'do 'bu tũ nalɛ. Nɛ lì hɛ̃, nɛ ma kũ, nɛ ma ba masua dɛ ngɔ, nɛ masua la do ngɔ nɛ ni. 18Nɛ hɛ̃a lì, ma kũ tɛ mɛ kũ fai gbaa, nɛ ma gulu ngɔ mɛnɔ vɛ, nɛ masua ma ngɔ la do ngɔ fua lì ni. 19Nɛ lì hɛ̃a tɛ mɛ hɛ̃a iko gbaa, nɛ hɛ̃a nɛ ma nɛa ngɔ gba ngala kalanɔ kɛ ma zi di ni ni vɛ lɔngbɔɔ. 20Hɛ̃a lì kũ gbaa, nɛ ma la ngɔ gba ngala kalanɔ ni dɛ ngɔ mɛtrɛ sambo. 21Nɛ mɔ vɛ kɛ ma do tunu li ɛ ngɔ nù gɛ ni, ma fia. Mɛ a: onɔɛ, onadalamɔ, osa'de zamɔ, obe sa'de hala nù, mba 'bɔ do owinɔ. 22Mɛnɔ vɛ kɛ ma ama zi ama ngɔ nù gɛ ni, ma fia.
23Na mɛ ni, nɛ NWA kumu mɛnɔ vɛ kɛ ma zi ngɔ nù gɛ ni, yolo ngɔ wele gbaa we hɔ ngɔ ogã sa'denɔ do obe wanɔ, do onɔɛnɔ. Tati a Nowe do owinɔ kɛ a zi do wa fala nɛ kpo kɔ masua ni, wa fè gɔ. 24Nɛ hɛ̃a lì ni ɔa, nɛ ma ɔ̃̀sɔ̃̀ gɔ gbaa 'do tũ kama do 'bu nɛ mɔlɔ.
Currently Selected:
Ndo Nyanga Dɛ Mɔ 7: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.
