Sira 47
47
Natane ne Davide
1Samuwele mumane kufua, Natane kutuadija mudimu wa buambi,
mu tshikondu tshia Davide.
2Bu mudibu basungula minyinyi ya manyi bua kulambula
Maweja-Nangila mulambu wa ditua ndondu,
ke muvuabu basungula Davide munkatshi mua bena Izrayele.
3Uvua unaya ne ntambue bu udi unaya ne mbuji
unaya ne nkashama bu udi unaya ne tuana tua mikoku.
4Patshivua Davide nsongalume uvua mushipe muntu wa mpolondu,
bua kujikija bundu buvua nabu bena tshisamba tshiende.
Uvua muambule dibue kudiela mu ndundu wa nyunyi.
Kushipaye Ngoliyate uvua uditemba.
5Diba adi, kubikilaye Maweja-Nangila Muena Kulu,
uvua mumupeshe bukole bua kushipa muntu
uvua mumanye mua kuluangana nwita bikole,
bua bena matunga makuabu banemeke tshiakabidi bukole bua tshisamba tshiende.
6Ke kumutuabu makumbu muvuaye mubutule bantu binunu dikumi.
Kumupabu lumu bela kabidi Maweja-Nangila tuasakidila,
pashishe kumuasabu nsala wa lumu.
7Bualu Davide uvua mubutule baluishi bavua babanyungulule.
Uvua mubutule butubutuu baluishi bende bena Paleshete,
mubatekeshe teketee.
8Mu bionsu bivuaye muenze, Davide uvua wela Maweja-Nangila wa tshijila tuasakidila,
utumbisha Muena Kulu.
Uvua mumusake mu misambu kabidi munange Mufuki wende ne muoyi wende onsu.
9Uvua muteke bisumbu bia bena misambu pabuipi ne tshilambuilu.
Uvua ubimbisha misambu ya meyi mimpe.
10Davide uvua mulongolole bibilu ne matuku a kutendelela bimpe.
Bantu bavua batumbisha dina dia tshijila dia Maweja-Nangila,
bimba misambu mu nzubu wa Mvidi Mukulu ne dinda dionsu.
11Maweja-Nangila kumufuila luse bua bubi buende,
kushindikaye bumfumu buende kashidi.
Maweja-Nangila kutua ndondu ne Davide, kumulaya ne: ndelanganyi yebe neisombe mu bukalenga bua Izrayele kashidi.
Shelomu
12Davide umuka mu bukalenga, ke muanende wa balume wa meji mavule kumupingana.
Maweja-Nangila uvua munange Davide,
ke muvuaye mupeteshe muanende diakalenga.
13Bukalenga bua Shelomu buvua buanji kuikala ne bupole;
Mvidi Mukulu kumupa ditalala ku bena mutumba nende.
Ke Shelomu kumona mua kuashila Maweja-Nangila nzubu wa tshijila,
muaba udi bantu mua kumutendelela kashidi.
14Shelomu muana uvua mumane kuikala muntu wa meji!
Uvua muwule ne lungenyi bu mudi musulu upasalala.
15Lungenyi luebe ndubuikile buloba bujima.
Miaba yonsu mbamanye nsumuinu yebe ne malongesha ebe.
16Bantu bonsu badi batumbisha dina diebe too ne mu bidila bia kule.
Mbakunange kabidi bua ditalala didi bantu bapeta.
17Bantu bonsu badi bakema, bua misambu yebe, nsumuinu,
mianu ne diumvuija diebe dia malu.
18Bavua bakutela pavuabu bamane kusamuna dina dia butumbi,
dia Mvidi Mukulu uvua mujidile bena Izrayele.
Uvua mukunguje mpawungi ne tshiamu tshitoke tshia mushinga mukole,
bu mudibu bakunguja tshiamu tshia kabanda ne tshia ntende.
19Kadi wewe kudienza mupika wa bakaji,
kuditua ne kasuki.
20Wewe kunyanga lumu luebe,
kupepeja ne lua ndelanganyi yebe.
Ke Mvidi Mukulu kubafikila munda,
bobu kubuela mu dikenga!
21Bukalenga kupanduluka mu bitupa bibidi,
bukalenga butomboke kufumina mu tshisamba tshia Efrayime.
22Kadi Maweja-Nangila uvua mufuile bantu bende luse,
bua malaya ende akumbane.
Kavua mujimije ndelanganyi ya musungula wende,
kavua mubutule lulelu lua uvua mumunange.
Kadi uvua mushiye bamue bantu ba ku ndelanganyi ya Yakobe,
kupatulaye muntu mupiamupia mu diku dia Davide.
Robowame ne Yerobowame
23Pashishe Shelomu kufua, bamujika,
umue wa ku ndelanganyi yende kubuela mu bukalenga, diende Robowame,
uvua muntu mutshimbakane bikole, kayi ne lungenyi.
Uvua mupangadike malu avua mafikishe bantu ku dimutombokela.
Yerobowame, muana wa Nebate
uvua mupambule bisamba bia ku mutu kua ditunga mu njila muakane,
uvua mufikishe bena mu bukalenga bua Efrayime ku bubi.
24Bantu aba kuvua kuenza malu mabi mavule,
kubuelabu mu bupika, kubumushabu mu ditunga diabu.
25Kuenzabu malu mabi mapite bungi,
too ne mudi Mvidi Mukulu ufika ku dibanyoka.
Currently Selected:
Sira 47: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996