Sira 48
48
Eliya
1Muambi kujuka panshi, ukenka bu kapia.
Miaku yende ivua yosha bu tshimunyi tshia kapia.
2Kutuminaye bantu tshiyole.
Muvuaye munange Maweja-Nangila bikole ne disuminyina,
bantu ba bungi kufua.
3Bu muvua Maweja-Nangila mumuambile, Eliya kukandika bua mvula kaloki.
Kulokeshaye kapia misangu isatu.
4Wewe Eliya, udi ne lumu bua bishima biuvua muenze!
Udi mua kuditemba kufuanangana nebe nnganyi?
5Wewe ke uvua mubishe muntu mufue ku bafue,
amu ku diyi dia Muena Kulu.
6Wewe uvua mufikishe bakalenga ku kabutu, bantu bavua ne mianzu,
uvua mubapeteshe masama, bafika ne ku lufu.
7Wewe uvua mumvue tshivua Mvidi Mukulu mukuambile pa mukuna wa Sinayi bua kukubela,
pa mukuna wa Orebe, pavuaye musue kunyoka baluishi bende.
8Wewe uvua mujidile bakalenga mu dina dia Maweja-Nangila,
bua kupinganabu bakuabu mu mudimu,
kabidi ne bambi bua kukupingana.
9Wewe ke uvuabu bambula mu mvunde wa kapia
pa ditempu divuabu bakoka kudi tubalu tua kapia.
10Mukanda wa Tshijila udi wamba ne: Wewe ke uvua Maweja-Nangila musungule,
bua kutuyisha tshiji tshia Maweja-Nangila, padiye kayi muanji kufika munda.
Wewe ke udi ne bua kufuisha tatu ne muana ndondu,
ne kulongolola bisamba bia bena Izrayele.
11Bantu badi bakumona, kabidi bafua ne dinanga dia Mvidi Mukulu, mbena diakalenga!
Tuetu kabidi netuikale ne muoyi bulelela!
Elisha
12Pavua Eliya mumane kujimina mu mvunde,
Elisha kuwula ne Mueyelu wende.
Patshivua Elisha panu, mfumu nansha umue kavua umukuatshisha bowa to.
Muntu nansha umue kavua mua kumuenzeja bualu ku bukole.
13Tshintu nansha tshimue katshivua mua kumukolela.
Yeye mumane kufua,
tshitalu tshiende tshivua tshiamba malu bu muambi.
14Patshivuaye ne muoyi uvua wenza malu a dikema,
nansha pavuaye mumane kufua, bivuaye wenza bivua bikemesha bantu.
15Nansha biobi nanku, bena Izrayele kabavua bitaba Mvidi Mukulu to.
Kabavua balekela njila wa mibi to,
too ne muvuabu baye nabu mu bupika, bashiye ditunga diabu.
Bayua babatangalaja pa buloba bonsu.
Kushalaku bantu amu bakese ba tshisamba tshia Yuda, balombola kudi mukalenga wa mu diku dia Davide.
16Bamue ba ku bakalenga aba mu diku dia Yuda
kuenzabu bivua bilengelela Mvidi Mukulu,
kadi bakuabu bavua benza amu kuenza malu mabi.
Izkiya ne muambi Yeshaya
17Izkiya kukolesha tshimenga tshiende ne bimana,
kufikishaye kabidi ne mayi munda muatshi.
Kupandishaye mbuebue ne tshiamu,
kuibaka bidia binene bia kulamina mayi.
18Mu tshikondu tshiende ke muvua mukalenga Senakeribe,
mmufike bua kuluisha tshimenga tshia Siyone.
Mumuambuluishi wende uvua uditambisha,
usendeka tshimenga.
19Nenku bena Yerushalayime kuteketa mu maboku, kuzakala.
Kukengabu bu bakaji pa lulelu.
20Kadi kutendelelabu Mvidi Mukulu Muena luse, bamuoluela bianza.
Mvidi Mukulu wa tshijila, wa diulu ne buloba kubateleja diakamue.
Kubasungidilaye ne diambuluisha dia Yeshaya.
21Mvidi Mukulu kuluisha bena Ashure.
Mutumibue wende kubabutula.
22Bualu Izkiya uvua wenza bivua bilengelela Maweja-Nangila.
Uvua ulonda amu mu dikasa dia nkambua wende Davide,
divuabu bamuleja kudi Yeshaya, muambi munene,
uvua umona, wamba amu malu pa wowu.
23Mu tshikondu atshi, Yeshaya kupingaja diba tshianyima,
kuvudija matuku avua mukalenga ne bua kulala panu.
24Ku bukole bua Mueyelu wa Mvidi Mukulu,
kumonaye bivua ne bua kuenzeka ku nshikidilu kua bionsu,
kusambaye bavua basomba babungama mu Siyone.
25Uvua umanyisha malu masokome avua ne bua kuenzeka too ne ku nshikidilu.
Uvua uleja malu masokome avua kaayi manji kuenzeka.
Currently Selected:
Sira 48: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996