Sira 46
46
Yoshuwa ne Kalebe
1Yoshuwa, muana wa Nume, uvua tshilobu tshia mvita.
Uvua mupingane pa muaba wa Moshe mu mudimu wa buambi.
Bilondeshile mudi dina diende, kuvuaye mupandishi munene,
kupandishaye bantu bavua Maweja-Nangila musungule.
Kutshimunaye baluishi bavua bamukanyine,
bua amone mua kupa bena Izrayele buloba buabu.
2Ndumupu kaayi luvuaye nalu pavuaye wela bianza mulu,
utula muele bua kuluisha baluishi!
3Kakuvua muntu mua kutua nkanana kumpala kuende.
Bualu uvua uluila Maweja-Nangila mvita!
4Uvua mumanyike diba ki nyeye anyi?
Diba adi, dituku dimue kadivua dinenga dienza matuku abidi anyi?
5Pavua baluishi bamutshinta nseke yonsu, kubikilaye Muena Kulu, muena bukole buonsu.
Ke Maweja-Nangila mulu kumumvua,
kulokeshila baluishi bende mabue a mvula a bukole bupite.
6Yoshuwa kuluangana mvita muende muonsu ne baluishi bende.
Kubundaye baluishi bavua bapueka pa kapulumuku ka mukuna wa Betorone.
Nanku ke bena matunga a benyi kumanyabu bukole bua bia lufu bivua Yoshuwa nabi,
bualu bavua baluisha Maweja-Nangila.
Yoshuwa uvua ulonda mikenji ya Mfumu.
7Yoshuwa uvua mumane kulamata Mvidi Mukulu mu tshikondu tshia Moshe.
Nansha Kalebe muana wa Yefune, uvua kabidi nanku.
Bavua babenga bivua bantu bamba mu tshisangilu,
babakandika bua bantu kabatombokedi Mvidi Mukulu,
bapuwisha bavua banungana bamba bibi.
8Ke bobu babidi kupanda nkayabu,
munkatshi mua bena Izrayele binunu nkama isambombu.
Amu bobu nkayabu kubuelabu mu buloba bulaya,
budi buwule mabele ne buitshi tente.
9Ke Maweja-Nangila kupa Kalebe bukole bua mubidi.
Kushalaye nabu ne ku bukunda buende.
Nansha yeye mukulakaje uvua mukuate matunga a ku mukuna,
avua ndelanganyi yende mipiana.
10Ke muvua bena Izrayele bonsu bamona ne:
bidi bimpe bua kulonda mikenji ya Maweja-Nangila.
Balombodi
(Bal 2.11-19)
11Bidi bimpe kuyukila kabidi bua balombodi,
kutua onsu wa ku Balombodi ende makumbu.
Bualu kabavua babenga Maweja-Nangila bua kutendelela nwidie to.
Tubavulukayi. Kabidi tuelayi Maweja-Nangila tuasakidila.
12Nansha mifuba yabu mikale mu nkita, yele ntonga isase,
isanguke mu bana babu ba balume.
Samuwele
13Maweja-Nangila uvua munange muambi wende Samuwele.
Uvua ubanjija bukalenga mu dina dia Maweja-Nangila,
ulaba bamfumu manyi bua baludike bantu ba Maweja-Nangila.
14Uvua ukosa nsambu ya bantu amu muvua diyi dia Maweja-Nangila.
Nanku Maweja-Nangila uvua ulama bena Izrayele bimpe.
15Samuwele uvua umueneka muambi mulelela
bualu uvua mulamate Mvidi Mukulu.
Bantu bavua bamuitaba bu muntu udi umona
malu a Mvidi Mukulu pa wowu bua meyi avuaye wamba.
16Pavua baluishi bende bamutshinta nseke yonsu,
uvua ubila Maweja-Nangila muena bukole buonsu, umulambula muana wa mukoku.
17Pavua Maweja-Nangila wakula mu diulu, utonoka, diyi diende divua diumvuika,
bu dikubakuba dikole.
18Uvua umubutuila bamfumu bavua bamuluisha,
kabidi ne bana bonsu ba bakalenga ba bena Peleshete.
19Pakavua Samuwele upunga ne lufu,
uvua wela lusanzu kumpala kua Maweja-Nangila,
ne kua mukalenga wa ditunga, wamba ne:
“Meme tshiena muangate tshintu tshia muntu,
nansha tshisabata tshiende mene.”
Muntu nansha umue kena muanji kumufunda ku tubadi.
20Diba divuaye mumane kufua, uvua amu wenza mudimu wa buambi.
Uvua mumanyishe mukalenga mushindu uvuaye ne bua kufua.
Yeye mu lukita uvua amu wakula bu muambi
bua kukobolola bantu ku mibi yabu.
Currently Selected:
Sira 46: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996