Marke Diumvuija
Diumvuija
— Mukanda wa Lumu lua Disanka mufunda kudi Marke ke udi muipi ku yonsu inayi: pamue apa ke wa kumpala uvuabu bafunde.
Marke udi wandamuna ku lukonku lua ne: “Yezu nnganyi (4.41)?” Marke udi wandamuna ku mbangilu wa mukanda ne: “Yezu udi Muana wa Mvidi Mukulu (1.1).” Miaku eyi idi miaba mivule mu mukanda wende ewu (1.11; 9.7; 3.11; 5.7). Kadi Yezu mu ntuadijilu kavua musue bua bamumanye nanku, (tangila 5.43; 7.24; 8.30; 9.30), bua tshinyi? Bualu bantu badi mua kumanya mushindu udi Yezu Muana wa Mvidi Mukulu amu padibu bamutangila mufuile pa mutshi mutshiamakane.
Kadi padi muntu udi Mvidi Mukulu mutume awu umueneka mu bantu, muntu yonsu udi ne bua kumuakidila muende muonsu. Yowanane Batiste uvua mulongolole mioyi ya bantu bua bakidile Yezu nanku (1.2-8). Yeye muine ke uvua mutue Yezu mu mayi (1.9-11).
Marke udi ukosolola dimueneka dia Yezu mu bantu mu bitupa bisatu:
1. Tshitupa tshia kumpala: Bamane kuteta Yezu mu tshipela (1.12-13), udi utuadija mudimu wende mu Ngalileya. Uvua muleje bumfumu buende, diba divuaye ubikila bantu bua bamulonde, divuaye ubalongesha nansha ujikija masama abu (1.14—8.30).
2. Mu tshitupa tshibidi, Marke udi uleja mudi Yezu utangila ku bisama, lufu ne dibiika biende, bivuaye ne bua kumuena mu Yerushalayime (8.31—10.52). Uvua mumanyishe balongi bende misangu isatu malu aa. Kadi balongi kabavua bumvue bivuaye wamba to. Uvua udinyika misangu mivule dina dia Muana wa muntu. Kadi bantu kabavua bamujingulule nansha. Pashishe Yezu udi ubuela mu butumbi mu Yerushalayime, bantu bamutuile tshianga. Udi wipata bangenda mushinga mu nzubu wa Mvidi Mukulu. Malu aa adi amukebela bilumbu kudi bamfumu ba bena Yuda. Diba adi udi ulongesha bantu, balongi bende ne baluishi bende musangu wa ndekelu (bit. 11-13).
3. Mu tshitupa tshia 14 ne tshia 15, badi bafunde malu a matuku ende abidi a ndekelu: nangananga Didia dia ndekelu ne balongi bende (kubakosoluelaye diampa, kabidi kunuinaye nabu mu dikopu dimue). Udi utendelela Tatuende pa nkayende mu lupangu lua Ngetsemani. Badi bamukuata, bamufundila lufu, bamushipa pa mutshi mutshiamakane, bamujika, diabuabua udi ubiika (16.1-8). Bakaji bavua baye ku lukita bamona nanku, kunyemabu ne disanka, baye kumanyisha balongi ne: Yezu wabiiki.
Wewe mumane kubala mukanda wa Lumu lua Disanka ewu, ujadike pebe bu muvua musolayi wa bena Rome mujadike ne: Yezu wa mu Nazarete “uvua Muana wa Mvidi Mukulu bulelela” (15.39).
Currently Selected:
Marke Diumvuija: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996