Matayi 28

Yezu udi ubika ku bafue

(Mar 16.1-10; Luk 24.1-12; Yow 20.1-10)

1Dituku dia Dikisha dimane kupita, patshiatshia dituku dia kumpala dia lumingu, Mariya wa mu Magdala, ne Mariya mukuabu,#28.1 Tangila 27.56. kufikabu bua kumona lukita. 2Diakamue buloba kuzakala bikole. Mutumibue wa Maweja-Nangila kutuluka mu diulu, kubunguluja dibue divua ku lukita ku luseke, kusombapu. 3Mutumibue awu uvua ukenka bu muele wa mvula. Bilamba biende bivua bitoke too bu ndanda. 4Basolayi bavua balama lukita, kukuatshikabu bowa, kuzakala, kufua tshipuka. 5Ke mutumibue awu kuambila bakaji ne:

— Kanutshinyi to. Ndi mumanye ne: nudi nukeba Yezu, uvuabu bapopele pa mutshi mutshiamakane. 6Kena apa to. Ukadi mubike ku bafue muvuaye muambe. Kanumonayi muaba uvua tshitalu tshiende. 7Nanku nuye lukasa. Nuambile balongi bende ne: “Ukadi mubike ku bafue. Udi unudianjidila mu Ngalileya.#28.7 Tangila 26.32. Ke muaba unuaya kumumuena.” Ke tshimvua ne bua kunuambila.

8Bakumuka lukasa lukasa ku lukita, ne disanka dinene, kabidi ne bowa munda tente. Kuyabu lubilu bua kumanyisha balongi ba Yezu bualu abu. 9Diakamue Yezu kusambakena nabu, wamba ne:

— Bupole buikale nenu.

Kusemenabu pabuipi nende, kumupukila ku makasa, kumukukuila. 10Yezu kubambila ne:

— Kanutshinyi to. Nuye, nuambile bana betu bua kuyabu mu Ngalileya. Ke muayabu kummuena.

Malu adi basolayi balonda

11Patshivua bakaji baya mu njila, basolayi bakuabu balami ba lukita, kufikabu mu tshimenga, balondela bamfumu ba batuangaji bionsu bivua bienzeka. 12Nanku bamfumu ba batuangaji ne bakulu kudisangisha. Kupungabu diyi bua kubuejila basolayi. Kubapeshabu makuta a bungi, 13babambile ne:

— Nenujadike ne: balongi bende mbafike mundankulu. Kuibabu tshitalu tshiende patu-vua balale tulu.#28.13 Fuanyikija ne 27.64. 14Kadi pikala mulombodi wa ditunga mumvue bualu abu, netuyukile nende bua kantatshishi.

15Basolayi bavua bangata makuta, kuenzabu muvuabu babambile. Bena Yuda badi balondelangana bualu ebu nanku too ne ku lelu.

Yezu udi umuenekela balongi bende

(Mar 16.14-18; Luk 24.36-49; Yow 20.19-23; MM 1.6-8)

16Balongi ba Yezu dikumi ne umue kuya mu Ngalileya, pa mukuna uvuaye mubambile.#28.16 Tangila 26.32. 17Pavuabu bamumone, bavua bamukukuila. Kadi bamue ba kudibu batshivua belakana. 18Ke Yezu kusemena pabuipi nabu, ubambila ne:

— Mvidi Mukulu mmumpeshe bumfumu buonsu mu diulu ne pa buloba. 19Nenku nuye kudi bantu ba bisamba bionsu. Nubenze balongi banyi.#28.19 Fuanyikija ne MM 1.8. Nubatue mu mayi mu dina dia Tatu, dia Muana, ne dia Mueyelu wa Tshijila. 20Nubalongesha kabidi mua kukumbaja bionsu bimvua munuambile. Manyayi ne: Meme nengikale nenu matuku onsu, too ne ku ndekelu kua bidimu.

Currently Selected:

Matayi 28: TSH96

Highlight

Copy