Marke 1

Yowanane-Batiste udi ulongesha bantu

(Mal 3.1-12; Luk 3.1-18; Yow 1.19-28)

1Mukanda ewu udi mbangilu wa Lumu lua Disanka lua Yezu Kristu, Muana wa Mvidi Mukulu.#1.1 Mu mikanda mikuabu ki mbafunde ne: Muana wa Mvidi Mukulu. 2Mu mukanda wa muambi Yeshaya mbafunde mudi Mvidi Mukulu wamba ne:

“Ndi ntuma mutumibue wanyi kumpala kuebe,

bua kukunzuluila njila.

3Ke muntu udi wela lubila mu tshipela ne:

Longololayi njila wa Maweja-Nangila,

muludikilayi tujila tuende!#1.3 Mal 3.1; Yesh 40.3 ke muvuabu bafunde mu buena ngreke ku kale.”

4Ke muvua Yowanane mumueneke mu tshipela nanku, uvua utua bantu mu mayi, wela diyi ne:

— Kudimunayi nsombelu wenu, banutue mu mayi, Mvidi Mukulu neanujimijile mibi yenu.#1.4 Yowanane kumueneka mu tshipela, uvua utua bantu mu mayi wela diyi ne: mu mikanda mikuabu mbafunde ne: Yowanane-Batiste kumueneka mu tshipela, wela diyi ne: Kudimunayi nsombelu: mu mikanda mikuabu mbafunde ne: Kudimunayi ngenzelu nansha ne: nudilengeje.

5Bantu bonsu ba mu ditunga dia Yudeya ne bena mu tshimenga tshia Yerushalayime bavua baye kudiye, batonda patoke mibi yabu. Yowanane uvua ubatua mu mayi a mu musulu wa Yardene.

6Yowanane uvua muvuale tshilamba tshia miosa ya kamelu, ne mukaba wa tshiseba mu tshimonu.#1.6 Tangila 2 Bak 1.8. Uvua udia mpasu ne buitshi bua muitu. 7Uvua umanyisha bantu bavule ne:

— Kudi muntu udi undonda meme mu nyima, udi mumpite ku muanzu. Tshiena nansha mukumbane mua kuinama, bua kusulula nshinga ya bisabata biende. 8Meme ndi nnutua mu mayi. Kadi yeye neanutue mu Mueyelu wa Tshijila.

Yowanane udi utua Yezu mu mayi, badi bateta Yezu

(Mat 3.13—4.11; Luk 3.21-22; 4.1-13)

9Mu matuku awu, Yezu uvua utumina ku Nazarete, musoku wa mu Ngalileya. Ke Yowanane kumutua mu mayi mu musulu wa Yardene. 10Amu diakamue Yezu upatuka mu mayi, kumonaye diulu dibululuke. Mueyelu wa Tshijila upueka pa mutu pende bu nyunyi wa nkudimba. 11Kumvuaye diyi difuma mu diulu ne:

— Wewe udi muananyi undi munange. Ndi nsanka bikole bualu buebe.#1.11 Fuanyikija ne Mis 2.7; Yesh 42.1.

12Diakamue pashishe, Mueyelu wa Mvidi Mukulu kulombola Yezu mu tshipela. 13Kushalayemu matuku makumi anayi. Diabolu kumuteta. Yezu uvua munkatshi mua nyama ya tshisuku, batumibue ba Maweja-Nangila bavua bamuambuluishe.

Yezu udi ubikila balobi ba mishipa banayi

(Mat 4.12-22; Luk 4.14-15; 5.1-11)

14Bamane kuela Yowanane mu lukanu,#1.14 Yowanane…mu lukanu: ke Yowanane-Batiste; tangila Mar 6.17. Yezu kuya mu Ngalileya. Uvua wenda ulongesha bantu Lumu lua Disanka lua Mvidi Mukulu.

15Uvua wamba ne:

— Diba divuabu bafunde diakumbanyi, ndimane kukumbana. Bualu Bukalenga bua Mvidi Mukulu bukadi pabuipi. Kudimunayi nsombelu yenu,#1.15 Kudimunayi nsombelu: mu mikanda mikuabu mbafunde ne: Kudimunayi ngenzelu. Nudilengeje. itabayi Lumu lua Disanka.

16Yezu uvua wendakana ulonda muelelu wa dijiba dia Ngalileya. Kumonaye balobi ba mishipa babidi: ke Simone ne muanabu Andre, bela makondu abu mu dijiba.

17Yezu kubabikila ne:

— Katuyayi, nennuvuije bilembi bidi biloba bantu.

18Diakamue, kulekelabu makondu abu, kumutua mu nyima.

19Yezu utungunuka amu mutantshi, kumonaye Yakobe ne muanabu Yowanane, bana ba Zebede. Bavua mu buatu buabu, balongolola makondu abu. 20Diakamue Yezu kubabikila. Bobu kushiya tatuabu Zebede mu buatu ne bena mudimu, kutuabu Yezu mu nyima.

Yezu udi uleja bumfumu buende

(Luk 4.31-37)

21Yezu ne balongi bende kuyabu mu tshimenga tshia Kefamawume. Dituku dia Dikisha, Yezu kubuela mu nzubu wa kutendelela wa bena Yuda. Kubangaye kulongesha bantu. 22Bantu bavua bamuteleja bavua bakema bikole bua dilongesha diende, bualu kavua ubalongesha mushindu umue ne balongeshi ba mikenji, kadi uvua ulongesha ne bumfumu.

23Amu diba adi, muntu kumueneka mu nzubu wa kutendelela amu, muikale ne mukishi mubi munda, umutatshisha. Kuelaye lubila ne:

24— Wewe Yezu wa mu Nazarete, udi musue kutuenzela tshinyi? Udi mulue kutubutula anyi? Ndi mumanye bimpe ne: udi wa Tshijila, Mvidi Mukulu mmukutume!

25Yezu kukanyina mukishi mubi, kuwambila ne:

— Puwa, patuka munda mua muntu ewu!

26Mukishi mubi kupaluisha bikole muntu awu, kupatukawu munda muende wela lubila lukole. 27Bantu bonsu kukema bikole, bebejangana ne:

— Edi ndiyi dia mushindu kaayi? Ndilongesha dipiadipia didi ne diyi dia bumfumu. Muntu ewu udi utumina mikishi mibi diyi, imuitaba!

28Lumu lua Yezu kutangalaka ne lukasa luonsu mu ditunga dia Ngalileya dijima.

Yezu udi ujikija masama a bantu

(Mat 8.14-17; Luk 4.38-41)

29Bobu kupatuka mu nzubu wa kutendelela wa bena Yuda. Kuyabu diakamue kua Simone ne Andre. Kubatuabu mu nyima kudi Yakobe ne Yowanane. 30Mamuende wa Simone uvua muikale ne mubidi luya, usama. Diakamue Yezu ufika, kumuambilabu bua mamu awu. 31Kuyaye kudiye, kumukuata ku tshianza, kumuimanyikaye kulu. Disama dia mubidi luya kujikadi, kutuadijaye kubalongoluela biakudia.

32Ku dilolu, diba#1.32 diba dimane kubuela: ke dituku dia Dikisha (tangila kan. 21) didi dijika padi mitotu imueneka. dimane kubuela, bantu kutuadilabu Yezu babedi bonsu ne bavua ne mikishi mibi. 33Bantu bonsu ba mu tshimenga bavua bunguile kumpala kua tshiibi tshia nzubu. 34Yezu uvua ujikija masama a bantu ba bungi, bavua ne masama a mishindu mishilangane, uvua wipata kabidi mikishi mibi ya bungi. Kavua musue bua mikishi mibi yakule bualu buende, bualu ivua munumanye.

Yezu udi wendakana mu Ngalileya

(Luk 4.42-44)

35Dinda dionsu, butuku kabuyi buanji kutshia, Yezu kujuka, kupatuka mu nzubu. Kumukaye mu tshimenga, kuyaye muaba wa pa nkayende, kubangaye kutendelela. 36Kadi Simone ne balunda bende kuyabu kumukeba. 37Bamumona, kumuambilabu ne:

— Bantu bonsu badi bakukeba.

38Kadi Yezu kubambila ne:

— Tuyayi mu miaba mikuabu ya mu misoku itudi nayi mutumba. Ndi ne bua kumulongesha kabidi. Bualu ke bundi muvuile.

39Yezu uvua wendakana mu Ngalileya mujima, ulongesha mu nzubu ya kutendelela ya bena Yuda, uvua wipata ne mikishi mibi.

Yezu udi ujikija disama dia muena nsudi

(Mat 8.1-4; Luk 5.12-16)

40Muena nsudi kufika kudi Yezu, kumufuila binu, umusengelela wamba ne:

— Bu wewe musue, udi mua kungondapaku. 41Yezu kumumvuila luse lua bungi.#1.41 kumunguila luse: mu mikanda mikuabu mbafunde ne: kumufikila munda bikole. Kuololaye tshianza, kumulenga, umuambila ne:

— Ndi musue, disama diebe diajiki!

42Diakamue nsudi kujika pambidi pa muntu, yeye kupanda. 43Pashishe Yezu kumukandika bikole, umutuma diakamue, 44umuambila ne: — Teleja, kuambidi muntu bualu ebu to. Kadi uye kudileja kudi mutuangaji, akukenkete, pashishe ulambule mulambu udi Moshe mufunde bua kujadikila bantu bonsu ne: udi mupande.#1.44 Tangila Lev 14.2-32.

45Kadi muntu awu uya, kubangaye kulondela bantu bonsu bualu buvua bumuenzekele. Nanku Yezu katshivua mua kumueneka kabidi mu tshimenga, uvua amu mushale muaba wa nkayende. Bantu ba nseke yonsu bavua baye kudiye.

Currently Selected:

Marke 1: TSH96

Highlight

Copy