Marke 6

Bena mu Nazarete kabena bitaba Yezu

(Mat 13.53-58; Luk 4.16-30)

1Yezu kumuka muaba awu, kuyaye mu tshimenga tshivuaye mukolele.#6.1 tshimenga…ntshia Nazarete: fuanyikija ne Mat 13.54 ne diumvuija . Balongi bende kumulondabu. 2Pavua dituku dia Dikisha dikumbane, uvua ulongesha bantu mu nzubu wa kutendelela wa bena Yuda. Bantu ba bungi bavua bamuteleja, bavua bakatshila bikole, bamba ne:

— Bionsu ebi mmubimanye bishi? Udi ne meji a mushindu kaayi adiye wenza nawu malu a kukema nenku? 3Yeye ewu ki mmuntu udi utenga nzubu anyi? Kena muana wa Mariya#6.3 Fuanyikija ne Yow 6.42. anyi? Kena muanabu ne Yakobe anyi? Kena muanabu ne Yoze anyi? Kena muanabu ne Yuda ne Simone anyi? Bana babu ba bakaji kabena munkatshi muetu emu anyi?

Ke tshiyuabu babengela kumuitabila. 4Yezu kubambila ne:

— Muambi badi bamunemeka miaba yonsu, kadi badi bamupenda mu ditunga diabu ne kudi baledi bende ne kudi bana babu.#6.4 Fuanyikija ne Luk 4.24; Yow 4.44.

5Yezu kavua muenze muaba awu bualu bua kukema nansha bumue, kadi uvua mutenteke bamue babedi bianza mujikije masama abu. 6Uvua ukema bikole muvuabu bapange mua kumuitaba.

Yezu udi utuma bapostolu bende

(Mat 10.5-15; Luk 9.1-6)

Pashishe Yezu uvua ulongesha bantu mu misoku yonsu ya ku mpenga. 7Kubikilaye balongi bende dikumi ne babidi, kubatumaye ku babidi ku babidi. Uvua mubapeshe bumfumu bua kuipata mikishi mibi. 8Uvua mubelele mukenji ne:

— Kanuena mua kuya ne tshintu tshikuabu mu luendu, amu dikombu dia luendu. Kanuena mua kuangata diampa nansha tshibuta, kanuyi nansha ne makuta mu bibombi bienu to. 9Nuvuale bisabata ku makasa. Kadi kanuikadi ne mitelu ibidi nansha.

10Yezu kubambila kabidi ne:

— Panuafika mu tshimenga, nushale mu nzubu mudibu banubikila amu too ne panudi numuka muaba awu. 11Padi miaba mikuabu bantu babenga mua kunuakidila nansha kunuteleja, numuke muaba awu, nututule lupuishi lua mu makasa enu,#6.11 Kututula lupuishi lua ku makasa ende: ngenzelu wa kushipa nende bulela. — Fuanyikija ne MM 13.51; 18.6. bua lushale kubavuluija tshiyuabu benze.

12Balongi kuyabu kulongesha bantu: bua balengeje nsombelu yabu. 13Bavua bipata mikishi mibi ya bungi, balaba babedi ba bungi manyi,#6.13 Fuanyikija ne Yak 5.14. bajikija masama.

Badi bashipa Yowanane-Batiste

(Mat 14.1-12; Luk 9.7-9)

14Mukalenga Erode#6.14 Erode: Erode Antipase, mulombodi wa Ngalileya. uvua mumvue bantu batumbisha Yezu bikole. Bamue bavua bamba ne:

— Yowanane-Batiste mmubiike ku lufu! Ke padiye ne bumfumu bua kuenza malu a kukema.

15Kadi bakuabu bavua bamba ne:

— Udi Eliya.

Bakuabu kabidi bavua bamba ne: — Udi umue wa ku bambi ba kale ba Mvidi Mukulu.

16Erode umvua nanku, kuambaye ne:

— Udi Yowanane-Batiste umvua mukoseshe mutu awu, mmubiike ku lufu!

17Erode nkayende ke uvua mukuatshishe Yowanane, mumusuikishe nkanu, mumueleshe mu nzubu wa lukanu. Erode uvua muenze nanku bualu uvua musele Erodiyade mukaji wa muanabu Filipe.#6.17 Filipe: Erode Filipe, uvua musombele mu Rome, (tangila 8.27.) 18Yowanane-Batiste uvua uyukidila Erode ne: “Kabiena bikumbana bua wewe kuangata mukaji wa muanenu to!#6.18 Tangila Lev 18.16; 20.21.” 19Erodiyade uvua mulamine Yowanane lukuna. Uvua ukeba mua kumushipesha, kadi kavua ne tshia kuenza to. 20Bualu Erode uvua unemeka Yowanane, uvua mumanye ne: mmuntu muimpe, udi kabidi wa tshijila. Uvua umulama biakane. Pavuaye umuteleja, uvua ne dipampakana mu muoyi bikole. Kadi uvua munange mua kumuteleja ne disanka.

21Kadi ku ndekelu, Erodiyade kututa dikasa dimpe, musangu uvua Erode wenza tshibilu tshia diledibua diende. Erode uvua muenzele bena mu bukalenga buende didia dinene, kabidi ne bamfumu ba basalayi ne bantu baneme ba mu Ngalileya. 22Muana wa bakaji wa Erodiyade,#6.22 Muana wa bakaji wa Erodiyade: mu mikanda mikuabu mbafunde ne: muanende wa bakaji Erodiyade. kubuela mu nzubu, kujaye maja, kusankisha Erode ne benyi bende. Ke mukalenga kuambila nsongakaji awu ne:

— Undombe tshionsu tshiudi musue, nenkupetshi.

23Kuditshipaye ne:

— Tshionsu tshiwikala mundombe, nenkupetshi, nansha tshia bibidi tshimue tshia bukalenga buanyi!

24Nsongakaji kupatuka, kumanyisha mamuende ne:

— Ndi mua kulomba tshinyi?

Yeye kumuandamuna ne:

— Ulombe mutu wa Yowanane-Batiste.

25Nsongakaji kupingana kudi mukalenga ne lukasa luonsu, umulomba ne:

— Ndi musue amu mpindiewu, umpeshe mutu wa Yowanane-Batiste pa dilonga disalame!

26Mukalenga kunyingalala bikole. Kadi bu muvuaye muditshipile ku mesu kua benyi bende, kavua mua kubenga kumupa nansha.

27Diakamue Erode kutuminaye disalayi divua dimulame diyi bua dilue ne mutu wa Yowanane-Batiste. Disolayi kuya mu nzubu wa lukanu, kukosa mutu wa Yowanane-Batiste.

28Pashishe kuluaye ne mutu wa Yowanane pa dilongu disalame, kuupeshaye nsongakaji, awu pende kuupesha mamuende. 29Balongi ba Yowanane bumvua lumu alu, kuyabu kuangata tshitalu tshiende, kutshijikabu.

Yezu udi udisha bantu binunu bitanu

(Mat 14.13-21; Luk 9.10-17; Yow 6.1-14)

30Bapostolu kupingana kuvua Yezu, kumulondela bionsu bivuabu benze kabidi balongeshe. 31Bantu bavua baya bapingana, bapite bungi, Yezu ne balongi bende kabayi mua kupeta nansha diba dia kudia. Nanku Yezu kubambila ne:

— Tuyayi muaba mupengame bua nuenu kuikisha tshitupa.

32Ke kubuelabu mu buatu bobu nkayabu, kuya muaba mupengame. 33Kadi bantu bavule kubamonabu baya, kubamanyabu, bena mu bimenga bionsu kunyemabu lubilu, kudianzabu kufika ku makasa muaba awu, kumpala kua Yezu ne balongi bende.

34Padi Yezu upatuka mu buatu, kumonaye bantu bavule. Kubumvuilaye luse, bualu bavua bu mikoku idi kayiyi ne mulami.#6.34 Fuanyikija ne Dib 27.17; 1 Bak 22.17. Kubangaye kubalongesha malu a bungi mutantshi mule. 35Diba dikavua dimane kuya. Balongi bende kutantshila kudiye, kumuambila ne:

— Diba ndimane kuya. Muaba ewu mmu tshipele. 36Tuma bantu aba baye ku ntshiamba ne ku misoku idi pabuipi bua kudisumbilabu biakudia.

37Ke Yezu kubandamuna ne:

— Nuenu nubapeshe biakudia.

Kadi bobu kumukonka ne:

— Tuye kubasumbila mampa a mushinga wa nkanu nkama ibidi,#6.37 Lukanu musangu awu luvua difutu dia ku dituku dimue dia tshidime. Tangila Mat 20.2. bua kubadisha anyi?

38Ke Yezu kubakonka ne:

— Nudi ne mampa bungi munyi? Ndayi nuanji kutangila. Kuyabu kuebeja, kubambilabu ne:

— Tudi ne mampa atanu ne mishipa ibidi.

39Pashishe Yezu kutumina balongi bende diyi bua kuteka bantu mu bisumbu ne kubasombesha mu mashinde. 40Kusombabu mu mulongu wa bantu lukama, wa bantu makumi atanu. 41Pashishe Yezu kuangata mampa atanu ne mishipa ibidi, kutangilaye mulu, kuelaye Mvidi Mukulu tuasakidila. Kutshibulaye mampa, kuapeshaye balongi bua kuabanyinabu bantu. Kubabanyinaye bonsu buabu kabidi mishipa ibidi. 42Bantu bonsu kudia, kuukuta. 43Balongi kusangisha bipese bia mampa ne bisunsukila bia mishipa bivua bishale, kuwujabu bisaka dikumi ne bibidi.#6.43 Fuanyikija ne 2 Bak 4.42-44. 44Balume bavua badie mampa bavua binunu bitanu.

Yezu udi wenda pa mayi

(Mat 14.22-33; Yow 6.15-21)

45Diakamue Yezu kubueja balongi bende mu buatu bua badianjile mu tshimenga tshia Betsayida, dia muamua dia dijiba, patshi-vuaye ntangalaja bantu. 46Yeye mumane kulayangana nabu, kubandaye ku mukuna bua kutendelela. 47Dilolu, buatu buvua munkatshi mua dijiba. Yezu kavua ku mayi to. 48Ke kumonaye ne: balongi bende bavua batata bikole bua kuita buatu, bualu lupepele luvua lubatatshisha, pa diba dia isatu wa butuku. Ke kuyaye kudibu wenda pa mutu pa mayi. Uvua ukeba kubapita.#6.48 kubapita: mu mikanda mikuabu mbafunde ne: uvua ukeba kubapeta. 49Kadi bamumona, wendela pa mutu pa mayi, bobu kuela meji ne: mmukishi, kukangabu kuela mbila, 50bualu bonsu bavua bamumone bavua bakuatshike buowa. Kadi diakamue Yezu kubambila ne:

— Koleshayi muoyi. Mmeme. Kanutshinyi!

51Pashishe Yezu kubuela mu buatu buvuabu, lupepele kutuya. Balongi bavua bakema bikole menemene, 52bualu kabavua bajingulula bualu bua kukema bua mampa buvuaye muenze. Lungenyi luabu kaluvua mua kujingulula bualu abu.

Yezu udi ujikija masama mu buloba bua Ngenesarete

(Mat 14.34-36)

53Bobu bamane kusabuka dijiba, kufikabu mu buloba bua Ngenesarete.#6.53 ditunga dia Ngenesarete: mpata mufuke udi kuinshi, luseke ludi diba dibuelela lua Kefamawume. Kusuikilabu buatu buabu ku dilobu muaba awu. 54Kupatukabu mu buatu, bantu kumanyabu Yezu diakamue. 55Kuyabu mu ditunga dijima, kumutuadilabu babedi balale pa biata, ba miaba yonsu isuabu bumvua ne Yezu mmufike. 56Miaba yonsu ivua Yezu uya, mu misoku, mu bimenga nansha ku ntshiamba, bantu bavua baya ne babedi babu mu miaba ya bisalu, bamusengelela bua kulengabu nansha luzemba lua tshinkutu tshiende. Bavua bamulenga bonsu masama abu avua ajika.

Currently Selected:

Marke 6: TSH96

Highlight

Copy