Luka 4

Yesu aomekama la Satana ndʼetekeleke

(Mt 4.1-11; Mk 1.12-13)

1Lolo Yesu aoluta lima Yoladane, ayokame la Bolimo wʼoeko. Ko aotombama la Bolimo ndʼetekeleke, 2bembile ntuku inei, ko ayomekama la Satana. Ende ntala yomba ndʼembilʼeko; ko aki beko osilaka aoloka nzala. 3Nkanko Satana aolotefeela, Ayaka wole Bonʼowa Nzakomba, sangela ekenjʼene wae efaningwa mampa. 4Ko Yesu aoloamba, Joi jokotama wete, Bonto ntaikaka la mampa kika. 5Nkako Satana aolotomba ndʼaliko, ko aoloeneya bakulaka ba bise biuma nkakoyoko. 6Ko Satana aolokela, Njifokokaya we mpifo ene euma, ko la jilangi jʼeko; elʼeko eosilʼolekyama elʼemi, ko nkayʼeko elʼonto oʼemʼolanga. 7Ayaka onkusamelʼemi, mpifo eko euma ifoyalema ekawe. 8Yesu aoloamba, aolokela, Joi jokotama,

Memya Nkolo Nzakomba ekawe,

Ko saela nkʼende kika.

9Nkako aolotomba nda Yelusalema, ko aoloemya nda nsamba ea Tempelo, ko aolokela, Ayaka wole Bonʼowa Nzakomba kela oyause ndʼase, 10ele joi jokotama,

Ifotoma bikima bikae lotomo la

ncinʼeke, wae bakofonge,

11Ko bifokotomba ndʼakatʼakiyo,

Nyango likaka like lifoimanʼekenje.

12Ko Yesu aoloamba wete, Joi jokotama, Ofaomeka Yawe Nzakomba eke. 13Aki Satana osizaka mmeko iuma, aolimana limʼelʼende elingi fele.

Yesu aanga lokambʼolemo nda Nazaleta

(Mt 4.12-17; Mk 1.14-15)

14Ko Yesu aoluta nda Ngalilaya, ayokeme la mpamba ea Bolimo. Ko bonkindo bokande bolongwana ndʼokili bouma bokotutsi. 15Ko aolaka nda basunangongaʼakiyo, ko aokumyama lʼantʼauma.

Yesu aotonama nda Nazaleta

(Mt 13.53-58; Mk 6.1-6)

16Ko aoya nda Nazaleta ekiʼndʼoongwamaka. Ko nda Sabata aolotswa ngokiʼnde nda sunangonga, ko aolemala oandʼonkanda. 17Ko baolokitsa bonkanda wa boteli Yesaya. Ko aumbolʼonkanda, ko aotana itenela ikotama joi line;

18Bolimo wa Nkolo bolʼelʼemi,

Ekiʼndʼombisaka wae nsange nsango

eʼolotsi ele beola,

Aontoma wae njongoza etungwelo

ele njanga,

Ko enelo ele baweiʼaiso,

Lʼetungwelo ele banyokwa lʼenyoko;

19Wae ndongoza mbula ea Nkolo ea

boya.

20Nkako aoumbʼonkanda, aoluteya boko ele bokambyi, ko aokitase. Ko baiso bʼantʼauma baki nda sunangonga baololenda tee. 21Nkako aangaki lotefela wete. Mbilʼene ekotelo ene eoliela ndʼatoi bakinyo. 22Ko bantʼauma baolookoza njokoza, ko baokamwa lʼaoyi bʼoya bandolaki limʼomwʼokae, ko baokela, Onʼafa bonʼowa Yosefa? 23Ko ende aolakela, Njea nsosolo wete lifoncwela bokolʼone, Nkanga eʼete, bikyaka jonge like mongo. Wete baoyi bandokʼiso wae baokelama nda Kapalanauma, kela ngoko ane ndʼola boke mongo, 24Ko ende aokela, Nsosolo nsangelʼinyo, boteli afosimama ndʼolaʼokae. 25Lolo la nsosolo nsangelʼinyo wae, bituka bauke baki nda Yisalaele ndʼembile beki Eliya, eki loola okombamaka mbulʼisato la nsanza botoa, ko eki eto ea nzala mongo okwelakʼokiliʼoko bouma; 26lolo Eliya ntatomama elʼomʼokiyo nye, imola nko nda Salepata ea Sidona, ele bomoto owʼetuka. 27Ko banto bʼaeka bauke baki nda Yisalaele ndʼekekʼeki boteli Elisa, lolo nkʼomʼokiyo ofetswaki, imola nko Naamana, bosi Sulia. 28Akiʼyʼokaka baoyiʼane, iyʼauma baki nda sunangonga baokama la nkele, 29baolemala, ko baolooza lima bonanga, baolotomba ndʼompempe wa ngongo eki bonangaʼokiyo okotongi wae bouse besunangongo. 30Lolo ende aoleka ndʼetei ekiyo, ko aokenda.

Yesu aikya owa demona

(Mk 1.21-28)

31Ko aokitela nda Kapalanauma, bonanga wa Ngalilaya. Ko aolalaka nda mbile ea Sabata. 32Ko baokamwa la lilako likae, eki joi likae liki ngolʼomongo joi. 33Ko bontʼomo aki nda sunangonga oki la bolimo wa demona wa linyamo; ende aobeleza la lofoso ja bolo, 34Eloo! Joi lile ndatsʼiso la we na, Yesu owa Nazaleta? Nkea we, ole owʼoeko owa Nzakomba! 35Lolo Yesu aolosasa, aolokela, Yala o wai, ko ola limʼelʼende. Aki demona ounzaka ndʼase ndʼetei ekiyo, aolola limʼelʼende, ntokeelʼende bobe bomo. 36Ko bokamwa bokwelʼiyʼauma, ko baotefelana wete, Etefelo ene ele ngamo? Ndʼewela wae la mpifo la mpamba ende ayotome o la belimo bia linyamo, ko beko bolaka o njoola. 37Ko lokumo lokae lokumyama ndʼokili bouma bokotutsi.

Yesu aikya bokilo owa Petelo ko lʼantʼamo

(Mt 8.14-17; Mk 1.29-34)

38Aolimana lima sunangonga, ko aolotswa ndʼilombe ya Simona. Ko nyango ea waji owa Simona akeci la nkangi ea angala ea bolo; ko baoloonda ndʼeloko ekae. 39Aolemala ndongama lʼende, aofela angala, ko eko eolimanʼelʼende nye. Nkako ende aolemala, ko aolakambya.

40Ecwa jefa oila, iyʼauma baki lʼanto bandokaki nkangi ya bilenge la bilenge baolayela elʼende, ko aolafyʼakata ele wengiʼonto okiyo ko aoloikya. 41Bademona baolola limʼelʼantʼauke, bayobeleza, baokela. We ole Bonʼowa Nzakomba. Aolasasa, ko ntakayʼiyo elekelo wae batefele, ekiʼyʼeakʼende wae ale Masiya.

Yesu asanga nsango nda basunangonga

(Mk 1.35-39)

42Lʼekyelo ea jefa aolola, ko aokenda ndʼitenela yʼetekeleke. Ko banyenga bʼanto baoloasa, ko baoya nkʼelʼende, ko basaki wae bosuke wete afimane limʼelʼiyo. 43Lolo aolakela, Aonga wae nsange nsango eʼolotsi ea likulaka ja Nzakomba ele benanga benkina ngoko, ekiʼmʼotomamaka la ncinʼeko. 44Ko ayosange nsango nda basunangonga ba Yudea.

Currently Selected:

Luka 4: LOL87

Highlight

Copy