Luka 5

Etelo ea bakimi ba joso

(Mt 4.18-22; Mk 1.16-20)

1Aki etukuluku okamʼelʼende wae boke Joi ja Nzakomba, ende akemi ndʼeselo ea lieke ja Ngenesaleta. 2Ko aolena biato befe ndʼeselo ea lieke, lolo baasi ba nse baosafwa, ko bayosole bejanga bekiyo. 3Aokondela nda wato bomo, boki wa Simona, ko aolouola wae atangwa isisi limʼokili. Nkako aokitase, ko aolakʼanto bʼetukuluku lima wato. 4Akiʼndʼosizaka lolakʼanto, aokela Simona, Lotangola wato ndʼasi ba njindo, ko lokiteza bejangʼekinyo, kela lokande nse. 5Simona aoloamba wete, Nkolo tokambaki botso bouma, ko ntatokanda yomba. Lolo lʼomwa boke njifokiteza bejanga. 6Akiʼyʼokelaka ngoko, baokomba linyenga mongo ja nse, ko bejanga bekiyo beanga jatsa. 7Ko baoleta lʼakata beseka bekiyo baki nda wato bomo, wae baye wae bakambya. Iyo baoya, ko baoyoza biatʼekʼefe elaka nko beangʼolinda. 8Akiʼndʼenaka ngoko, Simona Petelo aokwa ndʼaongo ba Yesu, aokela, Imanʼelʼemi, Nkolo, elʼemi nde bontʼowʼobe. 9Ele bokamwa bolakwela, lʼende ko lʼiyʼauma baki lʼende, lʼofula wa nse ikiʼyʼokandaka. 10Nkʼelengʼeko la Yakobo la Yoane, bana ba Zebedayo, baamanaki ndʼolemo la Simona. Ko Yesu aotefeela Simona, Tokakʼooma. Limʼaeyoko wifoyala wasi owʼanto. 11Ko akiʼyʼosemyaka biato baocika toma touma, ko baolokimʼende.

Yesu aikya oki la nkangi ea baeka

(Mt 8.1-4; Mk 1.40-45)

12Akiʼnde ndʼonangʼomo, bala bontʼomo aki eko okaka la nkangi eʼaeka. Akiʼndʼenaka Yesu, aokwa ndʼelongi, ko aoloonda wete, Nkolo, ngʼolanga okuseya ompetola. 13Yesu aosembya likata likae, aolofomwa, aokela, Ndanga. Fetswaka. Ko nkakoyoko baeka bakande baosila o nye. 14Ko Yesu aoloaka wae atasangelakʼontʼomo, lolo, Kendaka, eneya nkanga jonge like, ko lekya mbeka ndʼeloko eʼefetswelo eke, nkʼelengʼeki Mose osekyaka ngole lotaza elʼiyo. 15Lolo lokumo lokae lokumyama la ndekola; ko bitukuluku biʼanto bayaki wae bokoza ende. Ko la ndʼewela wae baikyama lima nkangi ikiyo. 16Lolo ende aokenda nda bitekeleke, ko ayoonde boondo.

Yesu aikya bonto owa nkataana, ko la lilako lima eikyelo eko

(Mt 9.1-8; Mk 2.1-12)

17Alakʼende nda mbilʼemo, Bafalusi lʼalaki ba Esekyelo baokitʼase eko. Iyo bayaki lima benanga beuma bia Ngalilaya la Yudea la Yelusalema. Ko mpamba ea Nkolo eki elʼende nda mbaikyʼeʼanto. 18Ko bala baoloyela bontʼoki la nkangi ea nkataana nda ntange, ko basaki jotsweya ende wae boambya nda joso ja Yesu. 19Ekiʼyo ntabatana mboka wae botsweyʼende la ncina ea nkaka ea banto ba linyenga, baounda nda nsamba eʼilombe, baotongola tokenga tomo, ko baolokiteza nda ntange ekae, o ndʼetei ea linyenga jʼanto nda joso ja Yesu. 20Akiʼndʼenaka imeezo ekiyo, aokela, We otungwa limʼaoyiʼobe bakawe. 21Ko Bafalusi la bakoci bʼenkanda baangʼokakaza, baokela, Bontʼone otefela baoyi bʼisaola ale na? Omʼokuseya otungolʼanto lima baoyiʼobe imola nko Nzakomba ale nko? 22Yesu aokotola bokakaza bokiyo, ko aolaamba, aokela, Inyo lokakaza ndʼetemʼekinyo lae? 23Nkina nkela, Otungwa limʼaoyiʼobe bakawe, nkina nkela, Emala, ko kendaka, oleki itena ndʼetefeelo na? 24Lolo ndʼewela wae lea wete Bonʼowʼonto ale la mpifo ndʼokili wae imole baoyiʼobe, aotefeela owa nkangi ea nkataana, Nkokela we emala, ambola ntange eke, ko kenda ndʼola boke. 25Nkakoyoko aolemala nda joso likiyo, aolambola eko ekiʼndʼetamaka, ko aokenda ndʼilombeikae, ayomemya Nzakomba. 26Ko iyʼauma baokamwa, ko baokumya Nzakomba, ko baokama lʼooma, baokela, Tolena baoyi ba kamo mbilʼene.

Etelo ea Matayo Lewi

(Mt 9.9-13; Mk 2.13-17)

27Ko ndʼafeka ba baoyiʼane aolola, aolena botakanyi owa mpuci otangema Lewi, aokitase ndʼefutelo ea mpuci. Ko aolokelʼende. Onkimʼemi. 28Aosundola toma touma, aolemala ko aolokima.

29Ko Lewi aololambela elambo eʼonene ndʼilombe ikae. Ko linyenga mongo jʼatakanyi ba mpuci, ko lʼantʼankina, baokitase lʼiyo. 30Ko Bafalusi la bakoci bakiyo bʼenkanda baomemesanela bakimiʼakae, baokela, Inyo lola ko lomela la batakanyi ba mpuci lʼantʼobe lae? 31Yesu aolaamba ko aolasangela, Bakema bolo ntabelaka nkanga eʼete wela, lolonde iyʼandoka nkangi. 32Emi nciyaki jeta ba liongi lolo bantʼobe ndʼeututaelo limʼaoyiʼobe.

Lilako ja nkakila ea toma

(Mt 9.14-17; Mk 2.18-22)

33Nkako baolokela. Bakimi ba Yoane bakila toma bekila lʼekila, ko bayoonde beondo, ko la bakimi ba Bafalusi o ngoko, lolo bakawe bakongʼola ko bamela lae? 34Yesu aolaamba wete, Lokusʼokiza balongo ba wengi toma ekeke ele wengi lʼiyo nde? 35Lolo bembile bifoya ekolama wengi limʼelʼiyo. Nkako bifokila toma ndʼembilʼeko. 36Ko aolasangela esonganya, aokela, Nkʼonto okola ebolo lima bonkoto wʼaeyoko wae aakʼeko ndʼonkoto wa kalakala; ngʼakela ngoko, siki afita bonkoto wʼaeyoko, ko ebolo limʼonkoto wʼaeyoko efosongane lʼonkoto wa kalakala. 37Nkʼontʼondila vina eʼaeyoko nda bikoto bia kalakala. Anyangʼokela ngoko, vina eʼaeyoko ifata bikoto bia kalakala o njaata, ko vina ifutela, ko bikoto bifofitana. 38Lolo bilaka vina eʼaeyoko nda bikoto biʼaeyoko. 39Ko lakʼonto omelaki vina ea kalakala, okombola eko eʼaeyoko; elʼende asanga, Ea kalakala eleki bolotsi.

Currently Selected:

Luka 5: LOL87

Highlight

Copy