Luka 17

Lolota bikunumwelo

(Mt 18.6-7, 21-22; Mk 9.42)

1Yesu aotefeelʼakimi bakae, Bikunumwelo bifiela nsosolo, lolo elo elʼonto ondieza bikunumwelo. 2Joi lileki bolotsi elʼende wae ekenje ea mminyola ea biofo elembame nda nkingo ekae, ko abokame nda lieke, nyango afokunumweza omoko owa bane ba tosisi. 3Loalakʼinyo mongo. Ayaka lilongo likawe akokelʼobe, wolake la lofeli, ko nga aututala lima joi liko, wotungole lima liko. 4Ko ayaka akokelʼobe bekela nsambo la mbilʼemoko, ko akengwanʼele we bekengwana nsambo, ko akokela, Njoututala, kongʼotungola.

Imeezo

5Ko bikima baotefeela Nkolo, bakela, Otofuleza imeezo ekiso. 6Ko Nkolo aolakela, Nga lole lʼimeezo ngole wofo wa sinapi, siki lifokela botambʼone wa bonkena, Luwaka ko wonama nda lieke, ko boko wifimezʼinyo.

Bosala bondeji lʼokwala

7Bontʼokinyo na ole lʼokwala ofusa lofuso, nkina esanya mpate, ngʼaoya lima bosalʼokae, ifosangelʼende, Yaka limpo, kitase a mesa? 8Afaokelʼende, Onjeleza toma toʼemʼola, ko lembʼombembe ko onsaele elaka nko njola ko njomela, ko lʼafeka mpanga wole ko omele? 9La asima bokwalʼoko boya ekiʼndʼokambaka belemo bekiʼndʼotomamaka? 10Inyo nkʼelengʼeko, aʼinyʼokambʼelemo beuma bekiʼnyʼotomamaka, losanga, Tole nkʼakwala basamba nkito; tokambaki nkʼolemo bokeji.

Bʼaeka jom baikyama

11Akiʼndʼocwaka Yelusalema, aoleka nda bolelo ndatsa Samalia la Ngalilaya. 12Akiʼndʼokitaka ndʼonangʼomo, banto jom baki la nkangi eʼaeka baokumana lʼende, baolemala ndʼesi, 13ko baobeleza, Yesu Nkolo, otokʼisei! 14Akiʼndʼenakʼiyo, aolakela, Lokenda, leneya nkanga baonge bakinyo. Ko akendʼiyo baofetswa. 15Ko omo okiyo, akiʼndʼenaka wete aoika, aokengwana, ayokumya Nzakomba la lolaka ja bolo; 16ko aokwa mbosama ndʼakaka ba Yesu, aolosima boya. Ko ende aki Bo-Samalia. 17Ko Yesu aolamba, aokela, Bako jom ntabafetswa nde? Na bamʼibwa bale nko? 18Nkʼomo otanema wae ayutʼokaya Nzakomba imemya imola nkʼofayʼone? 19Ko aolokela, Emala, kenda. Imeezo eke eokoikya.

Lotelo ja Yesu ja baoyi basʼoya

(Mt 24.23-28, 37-41)

20Bafalusi baolouola ekeke ee likulaka ja Nzakomba oya, ko aolamba, aolakela, Likulaka ja Nzakomba lifaoya la bieneyelo bia kamo; 21ko bafaokela, Bala endo! Bala mpiko! Ele likulaka ja Nzakomba lile ndʼetei ekinyo.

22Ko aosangelʼakimiʼakae, Bembile bifoya beʼinyʼolanga jena mbilʼemoko ea bembile bia Bonʼowʼonto, ko lofaenʼeko. 23Ko bifokelʼinyo, Bala ale mpiko! Bala, alʼane! Talocwake, ko talakimake. 24Ele ngʼokalingana likalili la ngangi ea liko lima ntundʼene ea loola elaka nko ntundʼei ea loola, Bonʼowʼonto ifoyala nkʼelengʼeko nda mbilʼekande. 25Lolo ende ifenʼelo euke nda joso, ko ifotandolama lʼanto bʼeotswelo ene. 26Ko elengʼeki baoyi ndʼembilʼeki Noa, bifoyala nkʼelengʼeko ndʼembile bia Bonʼowʼonto. 27Baleki, bamelaki, baalanaki, ko balekyamaki nda liala elaka nko mbilʼeki Noa otswaka nda wato, ko mpela eoya ko eolaoma iyʼauma. 28Ko ifoyala ngʼelengʼeki ndʼembile beki Loto; baleki, bamelaki, basombaki, batekyaki, bonaki, batongaki tolombe: 29lolo nda mbilʼeki Loto olaka lima Sodomo, mbula ea tsa la soufre ejweki lima loola, ko eolaomʼiyʼauma. 30Ifoyalema nkʼelengʼeko nda mbile endenya Bonʼowʼonto. 31Nda mbilʼeko, bontʼole nda nsamba eʼilombe, ko toma tokae tole ndʼetei eʼilombe, atakitelakʼeko lokola toma; ko ende ole nda lisala atutake ndʼafeka. 32Lofwaka waji oki Loto. 33Bontʼondasa ofonga loiko lokae, ifocweya loko; ko osʼocweya loiko lokae, ifofonga loko. 34Nsangelʼinyo wete, lʼotsʼoko bantʼafe bifoyala nda ntange emoko; omoko ifokolama, ko onkina ifocikala. 35Bamatʼafe bifominyolʼasangu bolongo; omoko ifokolama, ko onkina ifocikala. [ 36Baende bafe bifosala bolongo nda lisala; omoko ifokolama, onkina ifocikala.] 37Banto baolouola, Nkolo, wiji bole nko? Ende aolakela, Endambi etuji, mpongo ifotakana nkʼeko.

Currently Selected:

Luka 17: LOL87

Highlight

Copy