Luka 18

Loncinji nda boondo, la juge ea boonzwa

1Ko aolacwela esonganya wete, aonga wae baonde bikeke biuma, ko bafolembwa nye. 2Aokela, Juge aki eko ndʼonangʼomo, ntaanga Nzakomba boangi, ko ntilakʼotema elʼanto. 3Ko bomoto owʼetuka aki ndʼonangʼoko, ko aoyʼelʼende, aolokela, Onsambele likambo ndatsʼemi la wini okami. 4Lʼejingi ntalanga lokela ngoko, lolo ndʼafeka aokela ndʼotema bokae, Mpeka la mpoange Nzakomba, ko mpilʼotema elʼonto, 5lolo nyango bomotʼone owʼetuka afontekyʼompele wa beya lʼeya njifosambelʼende likambo likae. 6Ko Nkolo aokela, Lokoza bomwa wa juge osambaki liongi. 7Ko Nzakomba mongo afaolongya basonami bakande nde? Wae nkʼiyo banduselʼende loela la mbile lʼotso; wetʼiyo baʼendʼokʼisei ya loncinji? 8Njolosangela wete ifalongya nkaola mongo. Lolonde ae Bonʼowʼonto oya, ifotanʼimeezo ndʼokili nde?

Bofalusi la botakanyi owa mpuci

9Nkako aocwelʼesonganya ene la ncina ea bantʼamo bayaezʼiyo mongo liongi, ko batengwelʼantʼankina. 10Ba-ntʼafe baolotswa nda Tempelo wae baonde; omo Bofalusi, omo botakanyi owa mpuci. 11Bofalusi aolemala, ko aonda nkʼelʼende mongo ngone, Nzakomba nkosima losimo efʼemʼosongi lʼantʼankina; bafunji, basamba liongi, ba jibi, ko la ngole botakanyi one owa mpuci. 12Nkila toma bekila befe wengi eyenga, mbuza nda nganji ea Nzakomba liondo limoko lima wengi ntuku eatʼemi. 13Lolo botakanyi owa mpuci aolemala ndʼesi, ntimeza ounza o lʼaiso nda loola, lolo aoyamama, ko aokela, Nzakomba, ondokʼisei oyei! emi bontʼowʼobe! 14Njolosangela wae, bontʼone aokitela ndʼola bokae lʼoyengo, afa Bofalusi oko. Ele wengiʼonto osangya bomongo, ifosotsama; lolo osʼosotsʼomongo, ifosangyema.

Yesu asakela tonkune bokako

(Mt 19.13-15; Mk 10.13-16)

15Baoloyela tonkune wae afomwʼiyo. Aki bakimi’ enaka, baolafela lofeli. 16Lolo Yesu aoleta tonkune elʼende, ko aokela, Lambʼocike banoju ba tosisi bayʼelʼemi, talasukake; ele likulaka ja Nzakomba lile jʼanto bʼelengʼelʼiyo. 17Nsosolo emi nsangelʼinyo, bontʼofambe likulaka ja Nzakomba ngolʼiyonoju, afaotswa nda likulaka liko nye.

Liaci la likulaka ja Nzakomba

(Mt 19.16-30; Mk 10.17-31)

18Ko bokonji omo aolouola, Bolaki owʼolotsi, mpanga nkele na wae nsangole loiko lotasilaka? 19Yesu aoloamba wete, Ontangʼemi bolotsi lae? Nkʼowʼolotsi imola nko omoko kika, wete o Nzakomba. 20Olea bisekyelo: Tokelake jibi, Toomake bonto, Tawiyake, Tofatake bonto, Fika ise eke la nyango eke. 21Ende aolamba, Mpongaki baoyiʼane bauma limʼolenge bokami. 22Aki Yesu okaka ngoko, aolokela, Okutswa fele joi limoko. Tekyaka toma toke touma, ko kafela beola, ko wifoata liaci nda loola; nkako yaka yonkime. 23Akiʼndʼokaka ngoko aoloka lokeseli mongo, ekiʼnde boaci mongo. 24Yesu aololenda ko aokela, Otswelo ea baaci nda likulaka ja Nzakomba ele bolo mongo na! 25La ngamela atuwana lilusu ja nteli, la boaci otswa nda likulaka ja Nzakomba, omeka wae ngamela atuwane lilusu ja nteli. 26Iyʼandokaki baokela, La ngoko, osʼoikyameya na? 27Lolo ende aolamba, Baoyi bafʼantʼokuseya, Nzakomba akuseya bako, 28Nkako Petelo aokela, Bala, iso tosundola liaci likiso liuma, ko tokokima we. 29Ko ende aolakela, Nsosolo nsangelʼinyo wae, nkʼontʼosundolaki ilombe la waji lʼatomolo lʼakune, lʼankana Vise la nyango lʼana ndʼeloko ea likulaka ja Nzakomba, 30ofambe nkʼofula mongo ndʼekekʼene, ko ndʼekeke eoya ifamba loiko lotasilaka.

Lotelo jʼisato jʼiwa lʼekunjwelo ea Yesu

(Mt 20.17-19; Mk 10.32-34)

31Aokola ba-jom lʼafe, ko aolasangela, Bala, tocwa Yelusalema, ko baoyiʼauma bakotama lʼateli ndʼeloko ea Bonʼowʼonto bifiela. 32Elʼende ifolekyama ele bafaya, ko iyo bifosotsʼende, bifololengola, bifotufela nsoi, 33bifolokunda la njiji, ko bifolooma ci; ko nda mbile eʼisato ifokunjwa limʼiwa. 34Ko ntabea ncina ea joi limoko jʼaoyiʼane nye, ko etefeelo ene eolisama elʼiyo, ko ntabakotola baoyi batefelamaki.

Eikyelo ea oweiʼaiso nda Yeliko

(Mt 20.29-34; Mk 10.46-52)

35Ko akiʼndʼotutamaka la Yeliko, oweiʼaiso omo aokitase ndʼompempe wa mboka, ayolombe. 36Aoloka etukuluku eʼanto bayoleke, ko uolaki ncina elekʼiyo. 37Baolosangela wete, Yesu owa Nazaleta ayoleke. 38Ko ende aobeleza, Yesu, bonʼowa Dawidi, ondokʼisei! 39Ko iyʼacwaki nda joso baolosasa wae ambya lofoso. Lolo aokongʼobeleza la bolo mongo, Bonʼowa Dawidi, ondokʼisei oyei! 40Ko Yesu aosilama, ko aotoma wae boyelʼende elʼende. Ko aotutama lʼende, aolouola, 41Joi lilanga we nkokeele na? Ende aolamba, Nkolo, kela njene. 42Yesu aolokela, Wambʼene. Imeezo eke eokoikya. 43Ko nkakoyoko aolena fole, aolokima, ayokumya Nzakomba. Ko andena bantʼauma baokaya Nzakomba imemya ya losimo.

Currently Selected:

Luka 18: LOL87

Highlight

Copy