Luka 16

Kapita owʼokakatano

1Aosangela bakimiʼakae, Boaci omo aki eko oki la kapita owa belemo bekae. Ko banto baolosangela wete kapita oko aokenza liaci likae nkʼekenzakenza. 2Ko aoloeta, aolokela, Joi line lindokʼemi ndʼewelʼeke lile ngamo? Ombandoza boanji wʼelemʼeke, ele ofokusʼosekwa ndʼolemo wa kapita. 3Kapita oko aokela ndʼotema bokae mongo, Mpanga nkele na? ele nkolo ekami anjimola ndʼolemo wa kapita? Mpa la bolo bokoka lofusa lofuso, ko njoka nsoi lolomba toma. 4Njea joi liʼemʼokela, mpanga banto banjambe nda tolombe tokiyo aʼemʼimolama limʼolemo wa kapita. 5Nkako aoleta banto baki lʼembale la nkolo ekae, wengiʼonto ndʼefosa ekae. Ko aoluola owa joso, Bombale’ oke la nkolo ekami na? 6Ende aolamba, Baeza bʼauta bonkama. Ko aolokela, Kolʼonkanda boke wʼombale nkaola, kitase ko kota ntuku itano. 7Nkako aokelʼonkina, La we, bomba-leʼoke na? Ende aolamba, Tofole ta loso bonkama. Aolokelʼende, Kola bonkandʼoke, ko kota ntuku mwambi. 8Ko nkolo ekae aosima kapita oko owʼokakatano ekiʼndʼosalaka la losifya. Ele bana bʼokiliʼone balekola bana ba fole la losifya ja ndalongya eʼamongo lʼeotswelo ekiyo. 9Ko njolosangela, lokongʼoatelʼinyo mongo balongo la liaci jʼokakatano, wete ae liko osilela, iyo bifambʼinyo nda beyalo bia seko.

10Bontʼole nsosolo ndʼaoyi ba tosisi, ifoyala owa nsosolo ndʼaoyi bauke; ko oko osamba nsosolo ndʼaoyi ba tosisi, ifosamba nsosolo ndʼaoyi bauke. 11La ngoko ayaka lotakelʼolotsi ndʼaoyi ba liaci lifeji, ondokitsʼinyo liaci ja nsosolo na? 12Ko nga ntaloki ba nsosolo la liaci jʼontʼonkina, osʼokayʼinyo liaci likinyo mongo na? 13Nkʼontʼokusʼoyala bokwala owa bankolo bafe; ele ifinʼomo jino ko alangʼonkina; nkina ifofotamela omo ko atengwelʼonkina. Lofokusʼosaela Nzakomba ko la liaci bolongo.

Bitefelo bimo bia Yesu

(Mt 11.12-13; 5.31-32; Mk 10.11-12)

14Bafalusi, nkʼiyʼaki balangi bʼosolo, bokaki baoyiʼane bauma, ko baololengola. 15Ko aolasangela, Inyo loyalongyʼinyo mongo nda joso jʼanto, lolo Nzakomba ea betemʼekinyo; ele joi likumyʼanto ka, lile joi ja linyamo ele Nzakomba.

16Esekyelo la bateli baki eko elaka nko Yoane; limʼako bosako wʼolotsi wa likulaka ja Nzakomba bosangema, ko wengiʼonto asa jotswa nda liko la bolo. 17Lolo loola lʼokili bifimana atafa itetei yʼEsekyelo ofonya.

18Wengiʼonto ondimola waji okae ko aalʼonkina, akela jibi; ko osʼoalʼomoto oki bome imolaka, akela jibi.

Boaci la Lazalo

19Bontʼomo owʼoaci aki eko; ende aolota bito bia pourpre la lin eʼolotsi, ko aleki toma tʼesaza wengiʼaefa. 20Ko bontʼomo owʼoola otangema Lazalo aolambyema nda joso ja wiso bokae, jonge jokaka la mpota. 21Ende aokombola o nkombola mongo wae ale o la mpumbu ikweki lima mesa ea boaci; ko la mbwa iyaki yombola mpota ikae. 22Bontʼoko owʼoola aowa, ko aotombama la bikima bia loola nda ntolo ea Abalayama. Boaci aowa ngoko, ko aokundama. 23Ko ekiʼnde nda Adese aosangyʼaiso, eyalʼende ndʼelo mongo, ko aolenʼAbalayama o ndʼesi mongo, ko la Lazalo nda ntolo ekae. 24Ko aobeleza, Fafa Abalayama, onjokʼisei oyei! ko toma Lazalo wae atufe nsonge eʼosaiʼokande ndʼasi, kela acicimya loleum lokami, elʼemi njenʼelo mongo nda tsa tone. 25Lolo Abalayama aokela, Bona, ofwaka wete we wambaki toma toke tʼolotsi nda loiko loke, ko Lazalo nko toma tʼobe, lolo aeyoko ende acicima ndʼotema ane, lolo we wenʼelo. 26Ko joi limo lindafi ndʼaoyi bane bauma, wete bofoku wʼonene bolʼeko ndatsʼiso lʼinyo, ko ndʼewelʼeko, iyʼalanga loleka limʼendoko ekʼinyo bafokuseya, ko limʼeko nkʼomo ofendeya ane ekʼiso. 27Nkako aokela, Nkoonda Fafa, wae otome Lazalo ndʼilombe yʼise ekami, 28elʼemi nde lʼakune batano, kelʼende alakʼiyo, nyango bafoya, o lʼiyo ndʼitenelʼine yʼelo. 29Lolo Abalayama aokela, Iyo bale la Mose lʼateli. Kela bokozʼiyo. 30Lolonde ende aolamba, Lako, Fafa Abalayama, lolo ngʼonto aocwʼelʼiyo limʼelʼawei, bifoututala bobe. 31Lolo aoloamba, Wenaka bafokoza Mose la bateli, bafaimeza mpeka la bontʼomo aetswa limʼele bawei.

Currently Selected:

Luka 16: LOL87

Highlight

Copy