Luka 13
13
Wuo ndʼeloko ea baoyi bʼooma bakwelaki bantʼamo
1Ndʼekekʼeko, limʼelʼantʼaki eko, bamo baolosangela joi jʼanto ba Ngalilaya baki Pilato osanganyaka balongoʼakiyo la mbeka ikiyo. 2Ko Yesu aolaambʼiyo, La lotanga nde wae Ba-Ngalilaya bane baolekola Ba-Ngalilaya bauma lʼobe ekiʼyʼenaka bielo bine? 3Njolosangela, O nye! Lolonde ayaka lofoututala bobe inyʼauma lifofitana nkʼelengʼeko. 4Ko lʼanto jom la mwambi baki ilombe yʼeliko okwelaka nda Siola, ko yolaoma – lotanga wae iyo baolekola bantʼauma bafetsa nda Yelusalema ngʼakeli bʼobe nde? 5Njolosangela, O nye! Lolonde ayaka lofoututala bobe, inyʼauma lifofitana nkʼelengʼeko.
Esonganya ea botamba wa liteli
6Ko aolacwela esonganya. Bontʼomo aolona botamba wa liteli nda lisala likae ja bekoli bia vina; ko aoyʼoasa bamuka nda botamba wa liteli, lolo ntatanʼako. 7Ko aokela wesanyi owa bekoli bia vina, Bala, mbulʼisato njoya jasa bamuka nda liteli line, ko mpotanʼako. Kotʼotambʼoko. Bokongʼokola efosa ndʼamoci lae? 8Ko ende aoloamba, aokela, Nkolo, cikʼoko la mbulʼene ngoko, elaka nko mpusele njelengwa ndʼotamba, ko mboke bifonju eko, 9nkako nga bocwʼamuka, bolotsi o! lolo nga mpampa mpangʼokotʼoko.
Yesu aikya bomoto nda Sabata
10Ko ayolake nda sunangongʼemo nda mbile ea Sabata. 11Bomotʼomo aki eko oki la nkangi eʼolema o mbula jom la mwambi; aokumbama, ko ntakusʼemala ci nye. 12Aki Yesu enaka, aoloeta, ko aolokela, Bomoto, otungwa lima bolemʼoke. 13Ko aolafyʼakatʼakae elʼende. Ko aosembwa nkakoyoko, ko aokumya Nzakomba. 14Lolo bokonji owa sunangonga aolemwa eki Yesu oikyakʼonto nda mbile ea Sabata, ko aosangela banto bʼetukuluku, Bembile belʼeko botoa beonga wae bontʼakambʼelemo. Kela loye oikyama ndʼembilʼeko, ko afa nda Sabata. 15Lolo Yesu aoloamba, Inyo bekakatano! Wengiʼontʼokinyo afolembole ngombo nkina mpunda limʼelelo ea toma nda Sabata wae omezʼeko basi nde? 16Ko bomotʼone, ole bonʼowa Abalayama, ko oki Satana otungyaka mbulʼine jom la mwambi, ntatotungwa limʼonyolʼone nda mbile ea Sabata nde? 17Akiʼndʼotefelaka baoyiʼane basukiʼakae baoloka nsoi, lolo etukuluku euma eosalangana lʼelemo beuma bia lokumo bekelamaki lʼende.
Esonganya ea wofo wa sinapi
(Mt 13.31-32; Mk 4.30-32)
18Nkako aokela, Likulaka ja Nzakomba lisongi la na? Ko njifosonganya liko la na? 19Lile ngole wofo wa sinapi boki bontʼokolaka, ko usaki nda lisala likae; bomelaki, ko bofulaki o ndʼotamba, ko tofulu ta loola totonga baumbu nda bitafe biʼoko.
Esonganya ea mampa
(Mt 13.33)
20Ko lenkina aokela, Mpanga nsonganya Likulaka ja Nzakomba la na? 21Lisongi la nyango ea mampa eki bomoto okolaka ko aosanganya eko la baeza basato ba farine, ko eounza farine eko euma.
Ekuke ea monye
(Mt 7.13-14, 21-23)
22Ko aotuwana benanga biʼonene la bia tosisi, ayolake lilako ko ayokende lokendo acwʼende Yelusalema. 23Bontʼomo aolokela, Nkolo, bantʼaikyama bafʼauke nde? Ko ende aolakela, 24Loswelaka wae lotswa lʼekuke ea monye, ele nsangelʼinyo, bantʼauke bifasa jotswʼeko, ko bafaokuseya. 25Wenaka bomongʼilombe aolemala, ko aokombʼekuke, nkako loangʼemala ndʼanza ko lokundelʼekuke, lokela, Nkolo otokombole! Ko ende ifamba, Mpolea inyo ko la limʼekʼinyo oyaka. 26Nkako lifoangʼokela, Iso toleki ko tomelaki nda joso like, ko olakaki nda belongo bekiso. 27Lolo ende ifolokela, Nsangelʼinyo, mpea limʼekʼinyo oyaka, lotutswa lʼemi, inyʼakela bʼobe bauma. 28Nkako lifolela, ko lifokesanyʼaino bakinyo, andenʼinyo Abalayama la Yisaka la Yakoba la bateli bauma nda likulaka ja Nzakomba, ko inyo mongo lolozama ndʼanza. 29Ko banto bifoya lima ekyelo ea jefa ko lima ilelo, ko lima nord la sud; ko bifokitasʼa mesa nda likulaka ja Nzakomba. 30Ko bala bamʼale bʼafeka bifoyalʼa joso, ko balʼa joso bifoyala bʼafeka.
Jino ja Elode
31Ndʼekekʼeko mongo Bafalusi bamo baoyʼelʼende, baolokela, Imana ko kenda limʼane, ele Elode alanga akoome. 32Ko aolakela, Lokenda, losangela bomangʼoko, Bala njoza bademona ko nsala biikyelo bia nkangi mbilʼene ko la lobi, ko nda mbile eʼisato ncindeza ekendelo ekami. 33Lolo njambʼokende mboka ekami mbilʼene la lobi la jife, ele lifosongi wete boteli awe imola nko nda Yelusalema!
Yesu alela ndʼeloko ea Yelusalema
(Mt 23.37-39)
34O Yelusalema, Yelusalema! boomi owʼateli ko la wonyi owa bikenje elʼako batomamakʼele we! Bikeke biuke mo bikiʼmʼolangaka otakanya banʼake ndʼelenge etakanya nsoso baasa ndʼase bʼafafu, ko we ntolanga nye! 35Bala ilombe ikinyo iciki elʼinyo la bolalengo! Lolo nsangelʼinyo wete, lofaonjena nye elaka nko ekeke ekita eʼinyʼosanga, Osʼoya nda lina ja Nkolo asakema lʼokako wa swa!
Currently Selected:
Luka 13: LOL87
Highlight
Share
Copy
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
