Luka 12
12
Yesu alotsa bakimi bakande bokakatano
(Mt 10.26-27)
1Aki nkoto la nkoto yʼanto bʼetukuluku otakanakʼelʼende, wete baomatelana la nkaka, aangaki otefela lʼakimiʼakae nda joso, Inyo mongo loalaka nyango ea mampa ea Bafalusi, ele wete bakakatano. 2Nko joi likuki lifaokukwʼolo, ko nko joi lindisi lifaeanʼolo. 3Ele baoyiʼaso batefelʼinyo nda wilima, bifokana nda fole mongo; ko bakiʼnyʼotefelaka lʼimpwempe nda litoi nda ntena ikombi, bifongozama lima nsamba ya tolombe.
Oko ondeji lʼoangi
(Mt 10.28-31)
4Lolo nsangelʼinyo balongo bakami, taloangake iyʼaoma jonge, ko wijʼako bafa la joi likusʼiyʼokela. 5Lolo njifoleneya oko oʼinyʼoanga; loangakʼoko ole la mpifo, nga aosilʼooma, wae ayuse nda Ngena. Onde njolosangela, loangakʼende boangi. 6Ndeke ife ifotekyama la falanga ife nde? Ko nko lomoko lokiyo loungama nda joso ja Nzakomba. 7Lolo babwo bʼotsʼoke bauma baoandema boanji. Taloangake. Inyo lolekola ndeke iuke la wiko.
Ndimeza la njangana ea Masiya
(Mt 10.32-33; 12.32; 10.19-20)
8Ko nsangelʼinyo, wengiʼonto ondimezʼemi nda joso jʼanto, Bonʼowʼonto ifoimezʼende nda joso ja bikima bia Nzakomba: 9lolonde ende onjanganʼemi nda joso jʼanto, ifanganema nda joso ja bikima bia Nzakomba. 10Ko wengiʼonto otanga Bonʼowʼonto lotango jʼobe, ifotungwa lima joi liko, lolo ende osaola Bolimo wʼoeko isaola, afaotungwa nye. 11Aʼiyʼotombʼinyo nda joso ja sunangonga la bakonji la ba mpifo, talokakaa; nake ndʼelenge ea wambo, la ndʼaoyi baʼinyʼambʼiyo, la baoyi baʼinyʼotefela. 12Ele Bolimo wʼoeko ifololaka o nda jefa liko baoyi bandeji wae lotefela.
Boaci owʼolole ko la mposa eleki ea liaci
13Bontʼomo limʼetukuluku aolokela, Bolaki, sangela botomolo okami wae akafe lisango lʼemi. 14Lolonde aoloamba wete, Bonto! Ondilakʼemi juge la bokafi elʼinyo na? 15Ko aolakela, Loalaka, ko loyafongʼinyo mongo lima mposa euma eleki ea liaci; ele loiko jʼonto lofa ndʼofula wa biatelo bikae. 16Ko aolasangela esonganya, aokela, Lisala jʼontʼomo owa boaci licweki la mpafula. 17Ko aokakaza ndʼotema, aokela, Mpanga nkele na? Elʼemi mpa la efongelo ekoka la toma tokami. 18Nkako aokela, Njifokela ngone; njifotongola bifongelo bikami, ko njifotonga binkina bilekolʼonene, mpanga mponge biofo la toma tokami touma tʼolotsi nda biko, 19nkako njifokela bolimʼokami, Bolimo, ole la toma tʼolotsi tofongama, tokoka la mbula iuke; omaka, leka, melaka, ko salanganaka. 20Lolo Nzakomba aolokela, We bolole! Botsʼone bolimʼoke bokolama limʼele we, ko toma tone toki wʼotakanyaka mpa toyale ta na? 21Bontʼondendolʼende mongo liaci, ko afa la liaci eka Nzakomba, ale nkʼelengʼeko.
Yesu alaka bakimi wae bafokakaana
(Mt 6.25-34)
22Nkako aosangela bakimi bakae wete, Njolosangelʼinyo, talokakaanake ndʼeloko ea loiko lokinyo, wae toma toʼinyʼola na, la nda baonge bakinyo wae bito biʼinyʼolota na. 23Ele loiko lolekola toma ta ndala, ko jonge jolekola bito bia ndalota. 24Lokanelaka bianganga; befone ko befomuke emukelo; beta la bifongelo la tolombe ta mbaomba ea toma, lolo Nzakomba akaya beko toma. Inyo lolekola tofulu la wiko o ndekola mongo mo! 25Bontʼokinyo okuseyʼoteeza botaleʼokae etei ea metre lʼokakaano ale nko? 26Ayaka lofokeleya ilelemo ngoe, lokakaana ndʼaoyi baciki lae? 27Lokanelaka ndobya, elenge emelʼiko; ifokambe belemo ko ifofome bito, lolo nsangelʼinyo, o la Solomo, la jilangi likae liuma ntalotsama ngole lobya lomoko. 28Lolo ayaka Nzakomba alotsa ngone bailo bʼesobe, bakʼalʼeko mbilʼene ko lobi busame ndʼetumbelo, afaolekola olotsʼinyo, banto bʼimeezo nkʼisisi? 29La ngoso, inyo talasake toma toʼinyʼola la toʼinyʼomela, ko talofukyakʼotema lʼokakaano. 30Ele banto ba bise biuma biʼokili bayase toma tone. Lolo Isʼekinyo ea wete lolela toma tone wela. 31Lolo inyo lasaka likulaka likande, mpanga toma tone tokokyama elʼinyo.
Liaci nda loola
(Mt 6.19-21)
32Taloangake boangi, itatonga: ele Isʼekinyo asimʼolotsi lokayʼinyo likulaka. 33Lotekya liaci liatʼinyo, ko lokaya nganji yʼisei. Lokeelʼinyo mongo ntombi ifoteke, wete liaci lifongama nda loola, efa wiyi otutame, ko efa iwawa ofite. 34Ele wiji bole liaci like, botemʼoke bole nkʼeko.
Yesu akamʼanto wae besanya
35Lemalaka la bonsenge ndembama ndʼonkeke, ko la totswa tofeta mpafeta. 36Loyalemaka ngolʼanto balendeza utelo ea nkolo ekiyo limʼelambo ea liala, wete ayʼende ko akundelʼende ekuke, bifokombwelʼende limpo. 37Bakwalʼako bae nkolo otana wae besanya ndʼeyelo ekae bale lʼosalangango. Nsangelʼinyo la nsosolo, ende mongo ifolembʼonkeke, ko ifakayʼelekelo nda mesa, ko ifoya bomongo oalekeza toma. 38Ko wenaka aoya lʼonkeke wʼotso, nkina la jefʼasato la nkesa, ko aolatana ngoko, bosalanganʼele bakwalʼako. 39Ko lokongʼea wete, nga bomongʼilombe eaki ekeke ee wiyi oya, siki ntatocika wae ilombe ikae ibolame. 40Lʼinyo o ngoko, lokongʼelama, ele Bonʼowʼonto ifoya ndʼekeke efʼinyo olendezʼende.
Esonganya ea bofongi owʼilombe
(Mt 24.45-51)
41Nkako Petelo aokela, Nkolo, ototefeelʼiso kika esonganyʼene, nkina ele ndʼeloko eʼantʼauma? 42Ko Nkolo aokela, Bontʼowa nsosolo lʼowa losifya ale nko oe nkolʼekande ila wesanyi owʼanto bʼilombʼikae, wae akayʼiyo liondo ja toma ndʼekeke endeji? 43Bokwalʼoko oe nkolo ekae otana, ndʼeyelo ekae, wae ayokele ngoko ifoyala lʼesaza mongo. 44Nsangelʼinyo nsosolo, ifoilʼende wesanyi owa liaci likae liuma. 45Lolo wenaka bokwala oko ayokele ndʼotemʼokae, Nkolo ekami ayoteme, ko aangʼokunda basali bʼaende la bʼamato, ko ayole ko ayomele ko ayolangwa, 46nkolo ea bokwalʼoko ifoya nda mbile efʼende olendeza ko ndʼekeke efʼende ea, ko ifosisoza la bolo, ko ifoeleza liondo likae lʼanto bʼampulu lʼokakatano. 47Bokwalʼoko ondeaki wango wa nkolo ekae, lolo ntosola belemo, ko ntakela wango wa nkolo, ifokundama la njiji iuke. 48Lolo ende oteaki, ko aokela baoyi bandeji la njiji, ifokundama la njiji nkʼouke. Ele bonto okaema bouke, bouke wifasema limʼelʼende; ko elʼoko okiʼyʼokitsaka bouke boleki, bifuola bouke wa ndekola limʼelʼende.
Yesu ieza ekafwanelo
(Mt 10.34-36)
49Njaki jusa tsa ndʼokili, ko nga toambwa aeyoko mo, liko wae joi lilangʼemi! 50Nde lʼinamelo ecwʼemi inama, ko botemʼokami wenʼelo eleki etafʼeko okelama mo! 51Siki lokanela wae njaki jieza kuci ndʼokili! Nsangelʼinyo o nye, lolonde ekafwanelo! 52Limʼaeyoko elʼantʼatano ndʼilombʼimoko, bifoyala basato nkangwana lʼafe, ko bafe nkangwana lʼasato; 53bifokafwana, ise ayokangwa bonʼowa jende, ko bonʼowa jende ayokangwʼise; nyango ayokangwa bonʼowʼomoto, ko bonʼowʼomoto ayokangwa nyango; nyango ayokangwa waji owʼona, ko waji owʼona ayokangwa bokilo owʼomoto.
Ezelo ea ekeke
(Mt 16.2-3)
54Ko aotefeela banyenga bʼanto, Andenʼinyo litute lisangwa wiji wʼilelo ea jefa, lokela limpo, Mbula ifojwa; ko joi joliela ngoko. 55Ko aleka impempe lima sud, lokela, Angala ea tsa ifiela, ko joyala ngoko. 56Bekakatano! Lea jeza ekoza eʼokili lʼea loola, lolo lofea jeza ekekʼene ngamo?
Osola likambo lʼonto okoaka joi!
(Mt 5.25-26)
57Ko lofeza limʼelʼinyo mongo lʼezelo ea ci lae? 58Acwa we lʼonto okoaka joi eka bokonji, kongʼomeka josola likambo lʼende nda mboka, nyango afokobela eka juge, ko juge afokolekya ele police, ko police afokusa ndʼilombe ya njanga. 59Nkosangela we, ofaola limʼeko elaka nko ofuta bosolo wa ncindeza mongo.
Currently Selected:
Luka 12: LOL87
Highlight
Share
Copy
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987