Luka 11
11
Yesu aolakʼanto elengʼele boondo
(Mt 6.9-13)
1Ende aondaki ndʼitenelʼimo, ko akiʼndʼosizaka boondo, omo owa bakimiʼakae aolokela, Nkolo otolake eondelo ngoki Yoane olakaka bakimiʼakae, 2Ko aolakela, Aondʼinyo lokela, Fafa kela lina like limemyame, likulaka like liye, 3otokaya toma tokiso ta wengi mbile, 4ko ototungole limʼaoyiʼakiso bʼobe, elʼiso mongo totungola wengiʼonto ole lʼombale lʼiso; tototombake nda lomeko.
Boondo wa loncinji
(Mt 7.7-11)
5Ko aolakelʼiyo, Bontʼokinyo na, ngʼaata lilongo, afaocwʼelʼende ndʼonkeke wʼotso, ko okelʼende, Lilongo, onsombya mampa isato, 6ele lilongo likami aokitʼekaʼmi lima lokendo, ko emi mpa la yomba i emʼolekezʼende? 7Ko ende ifamba limʼetei eʼilombe wete, Tompukyake, ekuke eofungama, ko bana bale lʼemi nda ntange; mpokusʼoemala wae nkokaya. 8Njolosangela, mpeka la afaemala lokaya la ncina wae ale lilongo likae, lolo la lolombo ja locinji ifemala, ko ifokaya toma touma tondelʼende wela. 9Ko la ngoko nsangelʼinyo, Luola ko ifokaemʼelʼinyo; lasaka ko lifotana; kunda ko ifokombwa elʼinyo. 10Ele wengiʼonto onduola ifamba, ko ende ondasa ifotana, ko ifokombwa elʼende okunda. 11Lolo lole lʼise elʼinyo nde, nga bona ouola nse, ifokaya njwa ndʼefosa ea nse? 12Ko ngʼona uola bokele, ifokaya yakoli nde? 13Ayakʼinyo, bale bantʼobe, lolea lokaya banʼakinyo nganji yʼolotsi, o la ndekola Ise ole nda loola ifokaya Bolimo wʼoeko elʼiyʼandouolʼende!
Lilako ja Yesu ndʼeloko ea bademona
(Mt 12.22-30; Mk 3.20-27)
14Ende ozaki demona eki lokisi. Aki demona eko olaka, owa lokisi aotefela. Ko banto ba linyenga baokamwa kamo! 15Lolo bamʼakiyo baokela, Ende ozaka bademona la Balazebuba, bokonji owa bademona. 16Bankina baolasa limʼelʼende lotaza lima loola, wae bomeke. 17Lolo ekiʼndʼeaka nkai ikiyo, aolakela, Wengi likulaka likafwana liko mongo, lifomelengana, ko ilombe iyokafwana ikwa. 18Nga Satana akafwana, ayakangwʼomongo, ko mpanga likulaka likae jemale ngamo? Elʼinyo losanga wae njoza bademona la Balazebuba. 19Lolo ayakʼemi ndoza bademona la Balazebuba, banʼakinyo bozʼako la na? La ncinʼeko iyo bifoyala juges bakinyo. 20Lolo nga emi ndoza bademona lʼosai wa Nzakomba, ngoko likulaka ja Nzakomba josilʼokitʼerinyo. 21Wenaka bontʼowa mpamba akita bifeko biʼetumba, ko esanya boyalo bokae, toma tokae tofongama o la kuci. 22Lolo ae ondolekolʼende la mpamba oya ko olongʼende lʼelonga, ifofonolʼende bifeko bikiʼndʼilaka botema, ko ifokafa liaci likae. 23Endʼofa lʼemi ayase ansuke; ko ende ofotakanya lʼemi, afalanganya.
Utelo ea bolimo wa linyamo
(Mt 12.43-45)
24Bolimo wa linyamo anyangʼola limʼelʼonto, ayotuwane totenela tofa lʼasi, ayase esilamelo; lolo efʼende otanʼeko akela, Njifuta ndʼilombe ikami ikiʼmʼolaka. 25Ko akitʼende eko, atanʼiko yoombama ko yolelama. 26Nkako acwʼokoelʼende mongo belimo bemo nsambo belekolʼende lʼobe, ko iyo botswa ko bayalʼeko; ko elenge eʼontʼoko ndʼafeka elekolʼelengʼeki joso lʼobe.
Bosalangano wa nsosolo
27Nkʼatefelʼende baoyiʼane, bomotʼomo owʼetukuluku aosangya lolaka, aokela, Likunju likootaki ko baele bakolomyaki bale lʼosalangano mo! 28Lolo ende aolamba, Bosalangano boleki, bole wʼanto bandoka Joi ja Nzakomba ko bafonga liko.
Aselo ea lotaza
(Mt 12.38-42)
29Aki banto bʼetukuluku ofulaka, aangaki osanga wete, Eotswelo ene ele eotswelo eʼobe, ko asa lotaza, lolo lotaza lofaokaema elʼeko imola nko lotaza loki Yona. 30O ngoki Yona oyalemaka lotaza ele banto ba Ninewe, nkʼelengʼeko Bonʼowʼonto ifoyalema lotaza elʼeotswelo ene. 31Roi eʼomoto ea Sud ifemala ele banto bʼeotswelo ene ndʼetenelo eʼakambo, ko ifaumba; ekiʼndʼoyaka lima nsuko yʼokili wae oke wanya wa Solomo, ko bala olekola Solomo alʼane. 32Banto ba Ninewe bifemala ndʼetenelo eʼakambo lʼeotswelo ene, ko bifumbʼeko ekiʼyʼoututalaka la lilako liki Yona, ko bala, olekola Yona alʼane.
Balako limʼitswa
(Mt 5.15; 6.22-23)
33Nkʼonto oambolʼitswa, nkako ilʼiko ndʼitenela indisamʼiko, nkina ndʼase bʼifole; lolo ila ndʼafyelo eʼitswa, wae iyʼandotswa bene fole eʼeko. 34Liso like lile itswa ya jonge. Ayaka liso lilʼolotsi, jonge like liuma jofolazama; lolo ayaka lile bobe, nkako jonge like liuma lile la wilima. 35La ngoso, kongʼesanya nyango fole ele ndʼetei eke efoyalema wilima. 36Ayaka jonge like liuma jofolala, nko liondo la wilima, lifofolazama liko liuma nkʼelenge ekofolaza itswa la ngangi eʼiko.
Yesu aakela Bafalusi la balaki ba Esekyelo baoyi
(Mt 23.1-36; Mk 12.38-40)
37Nkʼatefelʼende Bofalusi omo aoloeta wae ale toma ekaʼnde. Aolotswa, ko aokitasʼa mesa ea ndala. 38Ko Bofalusi aokamwa ekiʼnde ntokʼasi nda joso jʼelelo ea toma. 39Lolo Nkolo aolotefeela, Inyo Bafalusi lofetola bafeka bʼekala la bafeka ba lokongo; lolo etei ekinyo eyola to la bokembi ko lʼobe. 40Inyʼanto basamba lokai! Ende ondemaki bafeka ntemaki etei o ngoko nde? 41Lolo lokaya limʼotema nganji yʼisei, mpanga baoyiʼauma bayale feto elʼinyo.
42Lolo elo elʼinyo Bafalusi elʼinyo lolekya nda mpoji wengi liondo ja baondo jom ja bamenga la batungulu la njunda iuma, lolo lonlʼetema ndʼetenelo eʼakambo ea ci la ndʼeefe ea Nzakomba; siki lokelaki baoyiʼane, ko ntalocika bako. 43Elo elʼinyo Bafalusi! elʼinyo lolanga mbata ya joso nda sunangonga, ko la bisambelo nda bisombe bia ndomba. 44Elo elʼinyo! elʼinyo losongi la beomba biʼawei befenya, ko banto balanda ndʼaliko bʼeko, bafea wae belʼeko.
45Bolaki omo owa Esekyelo aolokela, Bolaki, atefela we baoyiʼako otofelʼiso o ngoko. 46Ko ende aokela, Elo elʼinyo o ngoko, inyʼalaki ba Esekyelo! elʼinyo lafezʼanto belito beleki eefe nda ntatomba, ko inyo mongo lofofomwa belito beko la bosai bokinyo bomoko. 47Elo elʼinyo! elʼinyo lotonga tolombe ta bikundelo bikunji bateli, lolo baise bakinyo baolaoma. 48Ngoso lole baimeji bʼaoyi baki baise, ko loamana lʼiyo ndʼelemʼeko: elʼiyo baolaoma, ko inyo lotonga tolombe ta bikundelo bikunjʼiyo. 49Ndʼewelʼeko wanya wa Nzakomba boyosange, Njifotomʼelʼiyo bateli la bikima; ko limʼelʼako bifooma ko bifonyokolʼamo, 50kela balongo bʼateli bauma bandutezama limʼiango yʼokili bafotamele eotswelo ene, 51limʼele balongo ba Abele elaka nko balongo ba Zekalaya, oomamaki ndatsa nkinda ea mbeka lʼilombe yʼoeko. O nde nsangelʼinyo, bako bifofotamela eotswelo ene! 52Elo elʼinyo balaki ba Esekyelo! Inyo lotomba fungola ea njea, inyo mongo ntalotswakʼeko, ko losukaki iyʼandasaki wae botswa.
53Akiʼndʼimanakʼeko, bakoci bʼenkanda lʼafalusi baangaki loseyʼende lisa, ko baomeka lotungyʼende ndʼetefeelo ndʼaoyiʼauke; 54wete baoloonga la jongo kela bafotsʼende joi lifusumwa limʼomwa bokande.
Currently Selected:
Luka 11: LOL87
Highlight
Share
Copy
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987