Luka 10
10
Lotomo ja ba-ntuku nsambo, lʼutelo ekiyo
1Ndʼafeka bʼaoyiʼane Nkolo aosona bantʼamo ntuku nsambo, ko aolatoma bafʼafe nda joso likae nda wengi bonanga lʼitenela isangyʼende lokendo. 2Ko aolasangela, Emukelo eonyenga, lolo basali bafʼauke, ndʼewelʼeko loonda Nkolo eʼemukelo wae asokole basali ndʼemukelo ekae. 3Lokendaka. Bala ntomʼinyo ngole bana ba mpate ndʼetei ea nkoi. 4Talotombake intontombi la ntombi la sandales, ko talosa-mbelake banto nda mboka. 5Ko ndʼilombe nko loswele indotswʼinyo, lotefelaka joso, Kuci elʼilombʼine! 6Ko nga bonʼowa kuci alʼeko, kuci ekinyo ifosilama elʼende; lolo ngʼafʼeko, kuci ekinyo ifutʼelʼinyo. 7Ko loyala ndʼilombe ikʼimoko, lola ko lomela toma nkʼelenge endozʼiyo, ele bosali eji lʼofutʼokae. Taletetake nda tolombe la tolombe. 8Ko ndʼonanga bondotswʼinyo, ko baolambʼinyo, loleka toma tolekyamʼelʼinyo. 9Loikya bale la nkangi, ko losangelʼiyo, Likulaka ja Nzakomba jotutama lʼinyo. 10Lolo bonanga nko loswele bondotswʼinyo, ko bafambʼinyo, lolaka ndʼelongo bekiyo, ko losangaka wete, 11Iso totitozʼinyo o la biucu biʼonangaʼokinyo befotama ndʼakaka bakiso. Lolonde lokongʼea joi line, wete likulaka ja Nzakomba jotutama. 12Njolosangela, empenda ee bonangʼoko ena ifolekola empenda eki Sodomo.
Bielo bia ba-bempokatoi
(Mt 11.20-24)
13Elo ele we Kolazina! Elo ele we Betesaida! Ele nga belemo biʼofilo bekambemaki ekʼinyo bekambemaki nda Tula la Sidona, siki baututalaki kalakala, nkitase ndʼonyuku la betoko. 14Lolo ndʼetenelo eʼakambo, empenda endenʼinyo ifolekola eko endena Tula la Sidona. 15Ko we, Kapalanauma, la osangema nda loola nde? Wifokitezama o nda Adese!
16Osʼondokozʼinyo, andokozʼemi; ko osʼotonʼinyo, aotonʼemi, ko osʼontonʼemi, aotonʼende ontomaki.
17Bantuku nsambo baoluta lʼosalangano, baokela, Nkolo, o lʼademona mongo baotofika nda lina like! 18Ende aolakela, Njenaki Satana ayokwa lima loola nga likalili! 19Bala njoka inyo mpifo wae lomatele njwa ko la cakoli, ko njoka inyo mpifo ele mpambʼeuma ea wini, ko nko yomba ikusʼokeelʼinyo bobe. 20Lolo talosalanganake ndʼewela wae bademona bafikʼinyo, lolo losalangana ekotama baina bakinyo nda loola.
Yesu ayoonde Ise ekae
(Mt 11.25-27; 13.16-17)
21Ndʼekeke eko aosalangana nda Bolimo wʼoeko, ko aokela, Nkosima we losimo, Fafa, Nkolo ea loola lʼokili, eki we wiselaka ba wanya la bakotoli baoyiʼane, ko oleneya tonkune bako. O nde, Fafa, ele elengʼeko, eosimama bolotsi nda joso likawe. 22Baoyiʼauma baolekyama elʼemi la Fafa ekami; nkʼontʼondea Bona imola nko Fafa, ko nkʼondea Fafa imola nko Bona, ko lʼontʼoso oe Bona olanga wae oeneyʼende.
23Ende aokengwanʼele bakimi, nkʼende lʼiyo, ko aolasangela, Bale lʼosalangano o baiso bandena baoyiʼako bandenʼinyo. 24Elʼemi nsangelʼinyo wete, bateli la rois bauke balangaki jena baoyi bandenʼinyo, ko ntabenʼako, ko balangaki joka baoyi bandokʼinyo, ko ntaboka.
Elenge ee bontʼoata loiko ja seko
25Ko bala, bolaki omo owa Esekyelo aolemala wae omekʼende, aolokela, Bolaki, mpanga nkele na wete nsangole loiko lotasilaka? 26Ko aoloamba, Joi likoci ndʼEsekyelo na? Oandʼeko ngamo? 27Ende aolamba, Oka Nkolo Nzakomba eke eefe lʼotemʼoke bouma, ko lʼolimʼoke bouma, ko la mpambʼeke euma, ko la lokai loke louma; ko oka osingitana la we eefe ngʼoyaoka we mongo eefe. 28Yesu aolosangela, Olamba o ci; kela ngoko ko mpangʼoike. 29Lolo ekiʼndʼolangaka oyalongyʼomongo, aokela Yesu, Ole osingitai okami na?
Esonganya ea Bo-Samalia owʼolotsi
30Yesu aolokaola nkalo wae, Bontʼomo aokitela lima Yelusalema nda Yeliko. Ko aokwa ndʼetei ea bafunji, ko iyo baolokanjola benkoto bekae, baolokota mpota, ko baolocika ntutama lʼiwa. 31O lʼefoma nkanga emo aokitela la mbokʼeko, ko akiʼndʼene bontʼoko, aolofengola wijʼa mboka. 32Nkʼelengʼeko, Bo-Lewi omo, akiʼndʼokite ndʼitenelʼiko, ko aoloena, aolofengola ngoko. 33Lolo Bo-Samalia omo, akendʼende lokendo, aokitʼelʼende, ko akiʼndʼoenaka, aolookʼisei, 34ko aocwʼelʼende, aombaki mpota ikae, aoluteza bauta la vina nda mpota; nkako aoloafya nda mpunda ekae mongo, aoloyela ndʼilombe yʼafaya, ko aolobatelʼeko. 35Nda mbile ea lobi aoloza denalio ife, aokaya bomongʼilombe iko, ko aolosangela, Wobatele, ko aʼemʼutʼane njifokofuta bosolo boke bokenza we ndʼeloko ekae. 36Limʼelʼantʼakʼasato, bontʼokanela we oki bosingitai owʼonto okweki ndʼakata ba bafunji ba loma na? 37Aokela, Nkʼende ondokambyaki lʼelemo biʼisei. Yesu aolokela, Kenda, ko we mongo kela nkʼelengʼeko.
Malata la Malia
38Ko akendʼende lokendo, aokita ndʼonangʼomo, ko bomoto oki la lina Malata aoloamba ndʼilombe ikae. 39Ko Malata aki lʼokune otangema Malia, ko ende aokitase ndʼakaka ba Nkolo, ko okozaki joi likae. 40Lolo eki Malata okakaanaka la belemo beuke, aoyʼoemala, ko aokela, Nkolo, we ofokʼotemʼobe encikʼokune lʼelemo beuma, nkʼemi kika? Wosangele nde wae ankambya. 41Lolo Yesu aolamba, aolokela, Malata, Malata! Okakaana, ko botema boke boyofuke lʼaoyiʼauke. 42Biela bendelʼiso befʼouke, nkina bomoko kika. Malia aosona liondo jʼolotsi, ko liko lifaokolama limʼelʼende.
Currently Selected:
Luka 10: LOL87
Highlight
Share
Copy
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987