Luka 14
14
Eikyelo eʼonto oki la ntumbe
1Ko aolotswa ndʼilombe yʼelombe emo ea Bafalusi nda Sabata wae ale toma, ko iyo baoloteemezʼende. 2Ko bala bontʼomo oki la nkangi ea ntumbe aki eko nda joso likande. 3Ko Yesu aotefeela balaki ba Esekyelo la Bafalusi, Joi lisongi la Sabata na? wae toikyʼonto, nkina tofoikya? 4Lolo iyo baoyala o wai. Nkako aokolʼontʼoko, aoloikya, ko aoloka mboka wae akende. 5Ko aolakeelʼiyo, Ayakʼomʼokinyo ale la mpunda nkina ngombo, ko ekwa ndʼetoko ea njindo nda Sabata, ende afaosafolʼeko limpo nde? 6Ko ntabea loutola mbuto nda joi line.
Yesu asima ba bongengo
7Akiʼndʼenaka elenge eki bandetamaki osonaka mbata ya joso, aolasangela esonganya, wete aolakela, 8Wenaka oletama ndʼelambo ea liala, tokitakʼase nda mbata ea joso, nyango okolekola losimo afetama ngoko, 9ko bontʼoketaki, la we lʼende, afoye okokela, Kaya bontʼone efosa ene; nkako la nsoi, oangʼokola efosa eʼafeka mongo. 10Lolo ae wetama, kenda yokitase nda mbata eʼafeka mongo, ko ngʼende oketaki aoya, mpanga akokele, Ndoi, leka nda joso; nkako wifoata lokumo ndʼaiso bʼauma bakitase a mesa la we. 11Ele wengiʼonto ondasangyʼomongo ifosotsama, ko ende osotsa bomongo ifosangyema.
12Ko aosangelʼende ondoetaki, Andeza we elambo, nkina ea midi, nkina eʼokolo, tawetake balongo bake, nkina basangi la we ise, nkina la bioto bike, la basingitai balʼaaci, nyango iyo bafoketa we o lʼiyo, ko bakosomboza. 13Lolo ae wʼokelʼelambo, eta beola, lʼelema, la betengu, ko la baweiʼaiso, 14ko wifoyala lʼesaza; elʼiyo bafokusʼokosomboza nsombo, ko wifosombozama ndʼekunjwelo ea baliongi.
Etelo ndʼelambo ko la bisengamelo
(Mt 22.1-10)
15Aki omo owʼako bakokitase a mesa okaka baoyiʼane aolokela, Owʼosalangano bontʼosʼola mampa nda likulaka ja Nzakomba. 16Yesu aolokelʼende, Bontʼomo aolambʼelambo eʼonene, ko aoleta bantʼauke. 17Ko ndʼekeke eʼelambo aotoma bokwala okae osangela bandetami, Loyaka, ele belemo beuma beolelama. 18Lolo iyo baangaki, omo lʼomo, osengama bisengamelo. Owa joso aolosangela, Njosomba lisala, ko elaka nko njocwʼoengela liko; nkoonda ontungole. 19Ko omo aokela, Njosomba ngombo jom yʼosala, ko njocwʼomekʼiko; nkoonda, ontungole. 20Ko omo aokela, Njolenga waji, ko ndʼewelʼeko mpokusʼoya. 21Ko bokwala aoyʼosangela nkolo ekae baoyiʼako. Ko bomongʼilombe aoloka nkele, ko aokela bokwala okae, Kenda nkaola ndʼelongo la nda tombamboka tʼonanga, ko yelʼane beola, la belema la baweiʼaiso lʼetengu. 22Ko bokwala aokela, Nkolo, lotomo loki wʼontomaka lokelama, ko bifosa bimo bicikala. 23Nkako nkolo ekae aosangela bokwalʼoko, Kenda nda mboka yʼongonge la tombamboka ta jasi, ko kamamazʼanto wae botswa, kela ilombe ikami iyole lʼanto. 24Nsangelʼinyo wete nko lʼomoko owʼantʼako bandetamaki afomwa elambo ekami nye.
Wiko wa njalema bokimi owa Yesu
(Mt 10.37-38)
25Bitukuluku biʼanto baokenda lʼende bolongo; ko aokengwana aolasangelʼiyo. 26Ayaka bonto aoya elʼemi, ko afotone ise la nyango, ko la waji la bana ko la batomolo lʼakune lʼankana, o nde, ko la loiko lokae mongo, afokuseyʼoyala bokimi okami nye. 27Bonto ofotombe ekulusu ekae mongo, ko ankimʼemi, ende afokusʼoyalema bokimi okami. 28Bontʼokinyo olangʼotongʼilombe yʼeliko, afokitase joso oandola wiko wʼolemʼoko, nkina aatʼosolo bokoka losizʼilombʼiko nde? 29Nyango, aʼendʼotanda jango, nkako afokusʼosizʼilombe, bantʼauma bandena bafolengola, 30ekelʼiyo, Mo! Bontʼone aangaki lotongʼilombe, ko ntakusʼosizʼiko! 31Ko nga roi alanga ouna la roi emo, afokitase joso wae eza baoyi nde, nkina la bauni bakae nkoto jom akusʼokumanya osʼoya lʼauni nkoto ntukʼife? 32Ngʼafokuseya, nkʼacikala roi eko ndʼesi, ifotomelʼende bikima wae ouole eamanyelo ndʼoseka. 33Nkʼelengʼeko nkʼontʼokinyo okuseya oyalema bokimi okami ngʼafosundole liaci likae liuma.
Bokwa bofoonge
(Mt 5.13; Mk 9.50)
34Bokwa bolʼolotsi, lolonde nga bokwa bocweya ngenge, wifoata ngenge lenkina la na? 35Bofautʼoonga la ndʼamoci la ndʼekunde; banto babokʼoko nkʼebokaboka. Ole lʼatoi bandoka kelʼokoza.
Currently Selected:
Luka 14: LOL87
Highlight
Share
Copy
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
