Thangambere 30

1Man ka Rahel uneno nia enyolo nyithindho ngo ni Yakobo, nyeko timo Rahel kum nyamin; man ewacu ni Yakobo kumae, Mi ira nyithindho, kadi tek kumeno ngo atho. 2E ng’ecwiny pa Yakobo opo kum Rahel: man ewacu kumae, Abedo ka Mungu, m’ucero iri nyodo m’i ici? 3Man ewacu kumae, Nen, bong’ para ma Bilha, mond i bang’e; kara enyol wi conga, man an bende anwang’ nyithindho ni kume. 4Man emio ire Bilha ma bong’ pare ni dhaku: man Yakobo mondo i bang’e. 5Bilha gamu ie, man enyolo nyathin ma nico ni Yakobo. 6E Rahel uwacu kumae, Mungu poko lembe para, man ewinjo dwanda bende, e emio ira nyathin ma nico: ka kumeno elwong’o nyinge Dan. 7Man Bilha ma bong’ pa Rahel ugamu ie kendo, man enyolo nyathin ma nico mir arionde ni Yakobo. 8Man Rahel uwacu kumae, Wapiembra ku nyamira ku piem ma dit, man asagu: man elwong’o nyinge Naftali.

9Kinde ma Leya neno nia eweko nyol, egamu Zilpa ma bong’ pare, man emie ni Yakobo ni dhaku. 10E Zilpa ma bong’ pa Leya nyolo nyathin ma nico ni Yakobo. 11Man Leya wacu kumae, Miero! man elwong’o nyinge Gad. 12Man Zilpa ma bong’ pa Leya nyolo nyathin ma nico mir arionde ni Yakobo. 13Man Leya wacu kumae. An a jamutoro! kum nyir gibilwong’a jamutoro: e elwong’o nyinge Acer.

14Man Ruben ucidho i nindo mi mwoka nganu, man enwang’u nying yen i podho, e ekelogi ba Leya ma min mire. Rahel ulund uwacu ni Leya kumae, Akwei, mi ira kum nying yen pa wodi moko. 15Man ewacu ire kumae, En e lembe ma nyanok nia imayu cwara woko kud i bang’a? man ibimayu nying yen pa woda bende? E Rahel uwacu kumae, Ka kumeno ebivuto kudi i diewor maeni kum nying yen pa wodi. 16Man Yakobo ai kud i podho uthieno, e Leya cidho woko nirombo kude, man ewacu kumae, Ibik omondo i bang’a be; kum alonyi andha ku nying yen pa woda. Man evuto kude diewor maeca. 17E Mungu winjo dwand Leya, man egamu ie, man enyolo nyathin ma nico mir abije ni Yakobo. 18Man Leya wacu kumae, Mungu mio ira sukulia para, kum amio bong’ para ni cwara: e elwong’o nyinge Isakar. 19E Leya gamu ie kendo, man enyolo nyathin ma nico mir abusiende ni Yakobo. 20Man Leya wacu kumae, Mungu mio ira bete ma ber; kawono cwara bibedo kuda, kum anyolo ire nyithindho ma co abusiel: e elwong’o nyinge Zebulun. 21Man yo ku ng’eye enyolo nyathin ma nyaku, man elwong’o nyinge Dina. 22Man Mungu poi kum Rahel, e Mungu winjo dwande, e eyabu ie. 23Man egamu iet, enyolo nyathin ma nico: man ewacu kumae, Mungu kabu cac para woko: 24man elwong’o nyinge Yusuf, ewacu kumae, Yehova med ira nyathin ma nico mange.

Piem i kind Yakobo ku Laban

25Man etimbre, kinde ma Rahel unyolo Yusuf, nia Yakobo wacu ni Laban kumae, Cika, kara acidh kakara ma dhe, man ba ng’om ma thuwa. 26Mi ira mon para man nyithindho para m’atimo iri pigi, man wek acidhi: kum ing’eyo tic para m’atimo iri. 27Man Laban uwacu ire kumae, Tek kawono anwang’u bero i weng’i, koibed tundu: kum aneno nia Yehova mio mugisa ira ni kumi. 28Man ewacu kumae, Wac ira pi sukulia peri, man abimie. 29Man ewacu ire kumae, Ing’eyo maram atimo ko iri, man maram lim peri bedo ko kuda. 30Kum ibedo ko nyanok ma fodabino ngo, man enyai edoko ni udul; man Yehova mio mugisa iri ka ceke ma tek alokra i ie: ka kumeno abitimo tic mi ot para ma dhe ke awene? 31Man ewacu kumae, Abimio iri ang’o? Man Yakobo wacu kumae, Ibimio ira gin moko ngo: tek ibitimo gin maeni ira, abikwayu udul rombe kendo man abigwoke. 32Abikadhu ku kind udul lim peri ceke tin, man abikoyo ku keca lim kubang’e kubang’e ma kume cwinyo man m’utir, man ma col kubang’e kubang’e ma kind rombe, man m’utir man ma kume cwinyo i kind diegi: man wadi ma kumeno bibedo ni sukulia para. 33E kumeno bedopwe para binyutho pira ma cen, i kinde m’ibibino pi sukulia para ma ni i weng’i: ku ba lim ceke ma kume cwinyo ngo, man m’utir ungo i kind diegi, man ma col ungo i kind rombe, tek junwang’u i bang’a, jubiwacu nia jukwalu akwala. 34Man Laban uwacu kumae, Nen, ayenyo ebed calku lembe peri. 35Man i ceng’ maeca ekoyo nyogi diegi ma kumgi thumo man ma kumgi cwinyo, ku mege diegi ceke m’utir man ma kumgi cwinyo kubang’e kubang’e, ma kumgi cwinyo tar, man ma col ceke ma kind rombe, man emiogi i cing wote; 36man eketho woth mi ceng’ adek i kindgi giku Yakobo: man Yakobo kwayu dong lim pa Laban.

37Man Yakobo gamu ire dund yend upok, man akpalakpala, man mir atego; man ealu korgi moko dong’ tar, man eketho kor dund yen unen tar. 38Man eketho dund yen m’ealu i wang’ udul lim i ka ma ungoli ma gimadhu ie pi ni i ie, i ka ma udul lim gibino nimadhu ie pi; e giporo nwang’u gibino madhu pi. 39E udul lim gidhuro i wang’ dund yen, man udul lim ginyolo nyithindhgi ma kumgi thumo, m’utir, man, ma kume cwinyo. 40E Yakobo koyo nyithi rombe, man eketho wang’ udul lim yo ba ma kumgi thumo man yo ba ma col ceke ma i udul lim pa Laban: man ekoyo udul lim pare gire, man ekethogi ngo bang’ udul lim pa Laban. 41Man etimbre, nia kinde ma tek lim ma tek ma kind udul lim udhuro, nia Yakobo ketho dund yen i wang’ udul lim i ka pi, kara gipor kind dund yen; 42ento tek udul lim kumgi ng’ic, ekethogi i ie ngo: kum kumeno ma kumgi ng’ic gi pa Laban, man ma kumgi tek gi pa Yakobo. 43E ng’atuno nyai apila, man ebedo kud udul lim dupa, man bong’ ku jumiru, ku ngamia man kana.

Currently Selected:

Thangambere 30: AB1970

Highlight

Copy