Thangambere 29

Yakobo Timo ni Laban pi Rahel ku Lea

1Yakobo lund ucidho i woth pare, man ebino ba ng’om mi nyithindho ma yo nyangu. 2Man eneno, man, nen, kulo m’atong’a i thim, man, nen, udul rombe adek ubevuto keca i ng’ete; kum gimio pi ni udul rombe kud i kulo m’atong’a maeca: e kidi ma ni wi dhu kulo m’atong’ane e dit. 3Man udul rombe ceke gicokri kakeca: e ging’ielo kidi woko ku dhu kulo m’atong’a, man gimio pi ni rombe, man gidwoko kidi kendo kakare wi dhu kulo m’atong’a. 4E Yakobo wacu igi kumae, Utumira, wuai kani? Man giwacu kumae, Waai ba Haran. 5Man ewacu igi kumae, Wung’eyo Laban ma wod Nahori? Man giwacu kumae, Wang’eye. 6E ewacu igi kumae, Lembang’o ma ni bang’e? Man giwacu kumae, Lem moko mbe: man, nen, Rahel ma nyare bebino ku rombe. 7Man ewacu kumae, Nen, fodi ceng’ ni malu, kadok saa ma jucoko ie dhu lim de fokutundo ngo: wumi pi ni rombe, man wucidh wukwaigi. 8Man giwacu kumae, Wacopo ngo, ma fodi udul rombe ceke kucokri karacelo ngo, man ma fodi gikung’ielo kidi ngo ku dhu kulo m’atong’a; e ka wabilund mio pi ni rombe. 9E kinde ma fodi gibeweco gikugi, Rahel ubino ku rombe pa won; kum ekwayugi. 10Man etimbre, kinde ma Yakobo neno Rahel ma nya Laban m’umin min, ku rombe pa Laban m’umin min nia Yakobo eoro ceng’ni, man, eng’ielo kidi ku dhu kulo m’atong’a, man emio pi ni udul rombe pa Laban m’umin min. 11E Yakobo cwio limb Rahel, man eting’o dwande malu, e eywak. 12Man Yakobo wacu ni Rahel nia en e umin won, man nia en e wod Rebeka: e eringo eyero ni won.

13Man etimbre, kinde ma Laban uwinjo rwong Yakobo ma wod nyamin mire, nia eringo kara giromb kude, man egwake, ecwio limbe de, man ekele ba ot pare. E eyero gin maeni ceke ni Laban. 14Man Laban uwacu ire kumae, Andha in i cogo para man ring’kuma. Man ebedo i bang’e i nindo mi dwi acel. 15Man Laban uwacu ni Yakobo kumae, Kum in i umira, maku itim ira mananu? yer ira, sukulia peri bibedo ang’o? 16Man Laban ubedo ku nyige ario: nying’ ma ditne en e Leya, man nying’ ma nokne en e Rahel. 17Man wang’ Leya ni thong’ thong’; ento Rahel wang’e leng’ man kume de leng’. 18E Yakobo maru Rahel; man ewacu kumae, Abitimo iri rundi abiro pi Rahel ma nyeri ma nok. 19Man Laban uwacu kumae, Tek amie iri, sagu ma tek amie ni ng’atu mange: bed i bang’a. 20E Yakobo timo rundi abiro pi Rahel; man gibedo ire calu ceng’ ma nyanok, ni mer m’emare ko.

21Man Yakobo wacu ni Laban kumae, Mi ira dhaku para, kum ceng’ para thum kakare, kara amond i bang’e. 22Man Laban ucoko dhanu ma keca ceke karacelo, man etimo agba. 23Man etimbre uthieno, nia egamu Leya ma nyare, man ekele i bang’e; man emondo i bang’e. 24E Laban umio Zilpa ma bong’ pare ni Leya ma nyare ni bong’ ire. 25Man etimbre kugweno nia, nen, en e Leya: man ewacu ni Laban kumae, Maeni ang’o m’itimo i bang’a? atimo iri tic pi Rahel ungo? ilund ibomba mir ang’o? 26Man Laban uwacu kumae, Jutimo kumeno ngo i thuwa, ma nia jumi ma nok ma fodi jukumio ma kayu ngo. 27Tim yenga bo pi maeni, man wabimio iri mucelo bende pi tic m’ibitimo ira rundi abiro mange. 28E Yakobo timo kumeca, man etimo yenga pare kakare: man emio ire Rahel ma nyare ni dhaku. 29Man Laban umio Bilha ma bong’ pare ni Rahel ma nyare ubed ni bong’ ire. 30Man emondo ba Rahel bende, man emaru Rahel bende ma sagu Leya, man etimo ire rundi abiro mange.

Nyithindho ma Junyolo ni Yakobo

31E Yehova neno nia judagu Leya, man eyabu ie: ento mugumba kwanyu Rahel. 32Man Leya gamu ie, e enyolo nyathin ma nico, man elwong’o nyinge Ruben: kum ewacu kumae, Kum Yehova neno wi can para; kum kawono cwara bimara. 33E egamu ie kendo, man enyolo nyathin ma nico: e ewacu kumae, Kum Yehova winjo nia judaga, ka kumeno emio ira maeni bende: man elwong’o nyinge Simeon. 34Man egamu ie kendo, e enyolo nyathin ma nico; man ewacu kumae, Kawono i nindo maeni cwara biribre kuda, kum anyolo ire nyithindho ma co adek: ka kumeno julwong’o nyinge Lawi. 35Man egamu ie kendo, enyolo de nyathin ma nico: man ewacu kumae, Wang’uni abipaku Yehova: ka kumeno elwong’o nyinge Yuda; e eweko nyol.

Currently Selected:

Thangambere 29: AB1970

Highlight

Copy