Thangambere 31

Yakobo Ringo Laban

1Man ewinjo lembe mi wot Laban, m’uwacu kumae, Yakobo mayu piny ceke ma pa wegwa; man enwang’u dwong’ maeni ceke ni kum piny pa wegwa, 2Man Yakobo neno wang’ Laban, man, nen, eni yor i bang’e ngo calu ma naka. 3Man Yehova wacu ni Yakobo kumae, Dok ba ng’om pa kwaru, man ba wat peri; e wabibedo wakudi. 4Man Yakobo oro man elwong’o Rahel ku Leya i thim bang’ udul lim pare, 5man ewacu igi kumae, Aneno wang’ wegwu, nia ebedo yor i bang’a calu ma naka ngo; ento Mungu pa vwa, bedo kuda. 6Man wung’eyo nia ku tego para ceke atimo ni wuru. 7E wegwu bomba, man eloko sukulia para wang’ apar; ento Mungu yio ire ngo nia etima rac. 8Tek ewacu kumae, M’utir bibedo sukulia peri; e udul lim ceke ginyolo utir kwa: man tek ewacu kumae, M’uthumo bibedo sukulia peri, e udul lim ceke gilund ginyolo m’uthumo. 9E kumeno Mungu kabu lim pa wegwu woko, man emiogi ira. 10Man etimbre i kinde ma udul lim gidhuro nia ating’o wang’a malu, man aneno i lek, man, nyogi diegi m’uporo udul lim kumgi thumo, man gin utir, man ang’ec. 11Man malaika pa Mungu wacu ira ku wang’ lek kumae, Yakobo: man awacu kumae, Anuti. 12Man ewacu kumae, Ting’ weng’i malu kawono man inen: nyogi diegi ceke ma giporo udul lim kumgi cwinyo, man gin utir, man ang’ec: kum aneno gin ceke ma Laban utimo i beng’i. 13#Tha 28:18-22An a Mungu mi Beth-el, ka m’ikonjo ie mo wi mbegi mi kidi, ka m’ing’olo ie lembang’ola ira: kawono ai malu, ai woko kud i ng’om maeni, man idok i ng’om ma junyoli i ie. 14E Rahel ku Leya giloko lembe man giwacu ire kumae, Fodi makapiny mwa moko kadi aba de nuti iwa i ot pa wegwa? 15Ekwanuwa calu juwirok ungo? kum eng’iewowa, man ecamu jamb ng’ieu mwa bende. 16Kum piny ceke ma Mungu kabu woko ku ba wegwa, maeno en e mwa man mi nyithindho mwa: kum kumeno kawono, gin ma tek Mungu wacu iri, dong’ itim.

17E Yakobo lund uai malu, man eketho wote ku mon pare de wi ngamia; 18man eleko lim pare ceke, ku piny pare ceke m’ecoko, lim m’enwang’u, m’ecoko karacelo i Padan-aram, kara ecidh bang’ Isak ma won ba ng’om Kanan. 19Nwang’u Laban ucinyaru yuk rombe: man Rahel ukwalu mungu m’acwia pa won. 20Man Yakobo cidho ling’ ma Laban ma Jacami ng’eyo ngo, kum eyero ire ngo nia eringo. 21Kum kumeno eringo ku gin ceke m’ebedo ko; man eai malu, ekadhu Kulo de, man eketho wang’e yo ba got mi Gilead.

Laban Uriemo Tok Yakobo

22E juyero ni Laban i ceng’ mir adege nia Yakobo ringo. 23E egamu utumin mire gikugi, man elubo toke woth mi ceng’ abiro; man erube kum got mi Gilead. 24Man Mungu bino ba Laban ma Jacami ku wang’ lek ma diewor, man ewacu ire kumae, Bed ku weng’i giri nia kud iyer lembe moko ni Yakobo kadok ma ber kadi ma rac. 25Man Laban urubo Yakobo. Nwang’u Yakobo guro hema pare kum got: man Laban ku utumin mire gigonjo kum got mi Gilead. 26E Laban uwacu ni Yakobo kumae, Itimo ang’o, m’uketho icidho ling’ ma k’ang’eyo ngo e, man iyaku nyiga calu ng’eca ma ku palamularu? 27Iringo ling’ nedi, m’ipiei ko kud i bang’a ling’, man iyero ira ngo, kara aori kud anyong’a man ku wer, ku vul man kud adungu; 28man iyio ngo nia acwi limb wota ku nyiga? kawono itimo kasegu. 29Tego ni i cinga m’atimi ko rac: ento Mungu pa wuru weco i bang’a i diewor ma nyaworo, ewacu kumae, Ibed ku weng’i giri nia kud iwec lembe moko ni Yakobo kadok ma ber kadi ma rac. 30E kawono, kadok iyenyo icidhi, kum ava ot pa wuru benegi, ento pirang’o ikwalu mungu para m’acwia? 31E Yakobo loko lembe man ewacu ni Laban kumae, Kum lworo nega: kum awacu kumae, Imaru mayu nyigi kud i bang’a ku tego. 32Ng’atu ma tek inwang’u mungu m’acwia peri ni kude, ng’atuno bikwo ngo: i wang’ utumegwa ing’i gin ma peri ma ni i bang’a, man igame i beng’i. Kum Yakobo ng’eyo ngo nia Rahel ukwalugi.

33E Laban ucidho i hema pa Yakobo, man i hema pa Leya, man i hema mi bong’ ario; ento enwang’ugi ngo. Man ewok woko kud i hema pa Leya, emondo de i hema pa Rahel. 34Nwang’u Rahel ugamu mungu m’acwia, man ekethogi yor i jambwoth mi ngamia, e ebedo i wigi. Man Laban umulo i piny ceke mi hema, ento enwang’ugi ngo. 35Man ewacu ni won kumae, Ng’ecwiny kud umak rwoth para kum acopo ai malu ngo i weng’i; kum kura mi mon ni i kuma. Man eyenyo ento en wang’u mungu m’acwia ngo.

36E kwinyo maku Yakobo, man gidhau giku Laban: e Yakobo loko lembe man ewacu ni Laban kumae, Kier para ang’o? dubo para ang’o, m’uketho ilubo toka ker ker kumeni? 37Man iyenyo i kind jamni para ceke, e inwang’u ang’o m’i kind jamni m’i ot peri moko? Kethe keni i wang’ utumira man utumeru, kara gipok lembe i kindwa wakudi. 38Rundi pier ario maeni abedo i beng’i; mege rombe peri ku mege diegi peri givogo avoga ngo, man nyogi mir udul lim peri acamu ngo. 39Maeno ma yedi yeco akelo i beng’i ngo; aculo wang’e an; ilwong’e i cinga, tek jukwale ku dieceng’ kadi jukwale ku diewor. 40Abedo kumeno; ku dieceng’ lietho ceng’ uwang’a, man mwomo ku diewor; man nindo lal i wang’a. 41Rundi pier ario maeni abedo i ot peri; atimo iri rundi apar wi ang’wen pi nyigi ario, man rundi abusiel pir udul lim peri: man iloko sukulia para wang’ apar. 42Tek Mungu pa vwa, Mungu pa Ibrahim, man Lworo pa Isak, kubedo kuda ngo, kuno di kawono iora mananu andha. Mungu neno can para man muli mi cinga, man ejuki i diewor ma nyaworo.

Lembariba i kind Yakobo ku Laban

43Man Laban uloko lembe man ewacu ni Yakobo kumae, Nyir gi nyiga, man nyithindho gi nyithindho para, man udul lim gin udul lim para, man gin ceke m’ineno en e para: man acopo timo ang’o i ceng’ maeni kum nyiga maeni, kadi kum nyithindho migi ma ginyolo? 44Man kawono bin, wek watim lembariba, an wakudi; man wek ebed ni lembanyutha i kindwa wakudi. 45E Yakobo ting’o kidi, man epidhe ni mbegi. 46E Yakobo wacu ni utumin mire kumae, Wucok kidi; man giting’o kidi, gidhuro ni udhuru: e gi camu keca bang’ udhurune. 47E Laban ulwong’e Yegar-sahadutha: ento Yakobo lwong’o Galed. 48E Laban uwacu kumae, Udhuru maeni en e lembanyutha i kindwa wakudi i ceng’ maeni. Ka kumeno julwong’o nyinge Galed: 49man Mizpa, kum ewacu kumae, Yehova kur kindwa wakudi, kinde ma wambe wakudi. 50Tek ibinyayu can i nyiga, man tek ibigamu mon umedo nyiga, ng’atu moko mbe i bang’wa; nen, Mungu en e jamulembe i kindwa wakudi. 51E Laban uwacu ni Yakobo kumae, Nen udhuru maeni, man nen mbegi maeni, m’aketho i kindwa wakudi. 52Udhuru maeni ubed jamulembe, man mbegi maeni ubed jamulembe, nia abikadhu ku wi udhuru maeni ngo i beng’i, man nia ibikadhu ku wi udhuru maeni ku mbegi maeni i bang’a ngo, mi timo rac. 53Mungu pa Ibrahim, man Mungu pa Nahor, Mungu pa weggi, upok lembe i kindwa. Man Yakobo kwong’o ku Lworo pa won ma Isak. 54Man Yakobo thiero lam wi got, man elwong’o utumin mire ni camu kwen: e gicamu kwen, man gibedo diewor soro wi got. 55Man pir kugweno Laban uai malu, e ecwio limb wote ku nyige, man emio mugisa igi: e Laban uai, man edok kakare.

Currently Selected:

Thangambere 31: AB1970

Highlight

Copy