Mark 16

Jesus no Wusoɛr

(Matthew 28.1-8; Luke 24.1-12; John 20.1-10)

1Na ahomgyeda no twaa mu no, Mary Magdalene nye James ne na Mary nye Salome, tɔɔ nduhuam dɛ wɔdze rokɔ akɛsera no. 2Na da a odzi dapɛn no kan no n’anapatutuitu na wɔkɔr nda no do, nna ewia epue. 3Na wɔsesee hɔnho dɛ, Woana bepirew ɔbo no efi nda no ano ama hɛn? 4Na wɔtoo hɔn enyi no wohun dɛ woepirew ɔbo no efi hɔ: osiandɛ ɔso kɛsenara. 5Na wɔhɛɛn nda no mu no, wohun aberantsɛ bi a ɔtse nyimfa hyɛ atar fufuw tsentsen, na wɔbɔɔ hu. 6Na ɔsee hɔn dɛ, Mma hom mmbɔ hu: hom rohwehwɛ Jesus Nazarɛtnyi a wɔbɔɔ no mbeamudua mu no; Ɔasoɛr: onnyi ha. Hwɛ mbrɛ wɔdze no toe! 7#Mat 26.32; Mar 14.28 Na hom nkɔ nkɛka nkyerɛ n’esuafo no, ɔnye Peter, dɛ, Oedzi hom enyim kɔ Galilii: hɔ na hom bohu no, dɛ mbrɛ ɔsee hom no. 8Na wofiir edzi fiir nda no ho guanee, na ahopopo nye ahobow kaa hɔn, na wɔannka hwee annkyerɛ obiara, osiandɛ wosuroi.

MARK N’EWIEI TSENTSEN NO

Jesus Yi Noho Kyerɛ Mary Magdalene

(Matthew 28.9, 10; John 20.11-18)

9 # 16.9-20 Tsetse akyerɛwfo no bi mmfa ofi nkyekyɛmu 9-20 yi nnka ho. [Na ɔsoɛɛr da a odzi dapɛn no kan no anapatutuitu no, odzii kan yii noho kyerɛɛ Mary Magdalene a otuu mbɔnsam esuon fii no mu no. 10Na ɔkɔree kɛkaa kyerɛɛ hɔn a wɔnye no tsenae a woridzi nkɔmbɔ na worusu no. 11Na hɔn dze wɔtsee dɛ ɔtse ase na oehu no no, wɔanngye enndzi.

Jesus Yi Noho Kyerɛ Esuafo Beenu Bi so

(Luke 24.13-35)

12Na n’ekyir no woyii no wɔ suban fofor mu kyerɛɛ hɔn mu beenu a wɔnam rokɔ ekuraase; 13na hɔn so kɔree kɛkaa kyerɛɛ nkaa no; na wɔanngye hɔn so enndzi.

Jesus Yi Noho Kyerɛ Dubiako no

(Matthew 28.16-20; Luke 24.36-49; John 20.19-23; Ndwuma 1.6-8)

14N’ekyir no a dubiako no tse edzidzi no, woyii no kyerɛɛ hɔn, na otwuuw hɔn enyim wɔ hɔn ekyingye nye hɔn akoma dzen ntsi, osiandɛ wɔanngye hɔn a wohun no dɛ ɔasoɛr no enndzi. 15Na ɔsee hɔn dɛ, Hom nkɔ wiadze nyinara nkɛka asɛmpa no nkyerɛ abɔdze nyina. 16Nyia ɔgye dzi na wonuma no no, obenya nkwa, na nyia ɔnngye nndzi no, wobobu no fɔ. 17Na nsɛnkyerɛdze yi bɛka hɔn a wɔgye dzi do: wɔnam me dzin do botu mbɔnsam; wɔbɛkasa kasa fofor; 18wɔbɛma nwɔ do, na sɛ wɔnom bɔr biara a, ɔrennyɛ hɔn hwee; wɔdze hɔn nsa bogu ayarfo do na hɔn ho ayɛ hɔn dzen.

Jesus no Sor Nkɔree

(Luke 24.50-53; Ndwuma 1.9-11)

19Na afei Ewuradze Jesus kasaa kyerɛɛ hɔn ekyir no, wɔfaa no kɔr sor, na ɔkɛtsenaa Nyankopɔn abanyimfa. 20Na hɔn dze, wofii hɔ kɔree kɛkaa asɛm no wɔ mbea nyina, Ewuradze nye hɔn yɛɛ edwuma, na ɔdze nsɛnkyerɛdze hyɛɛ asɛm no dzen.] Amen.#16.20 Tsetse akyerɛwfo no binom mmfa Amen no nnsɔw do.

Currently Selected:

Mark 16: MFANBRPC

Highlight

Copy