Mark 15

Wɔdze Jesus Kɔ Pilate Enyim

(Matthew 27.1, 2, 11-14; Luke 23.1-5; John 18.28-38)

1Na adze kyee ara nna asɔfompanyin nye mpanyimfo no nye kyerɛwfo nye baguafo no nyina kɔr apam, na wɔkyekyeer Jesus dze no kɔree kɛhyɛɛ Pilate nsa. 2Na Pilate bisaa no dɛ, Ana ɔwo nye Jewfo Hen no? Na Jesus buaa no see dɛ, Ɔwoara na aka. 3Na asɔfompanyin no toatoaa no pii. 4Na Pilate bisaa no bio see dɛ, Ana irummbua hwee? Hwɛ ndzɛmba pii a wɔdze toatoa wo yi. 5Naaso Jesus emmbua hwee bio, na ɔyɛɛ Pilate nwanwa.

Woyi Jesus Ma dɛ Wonkoku no

(Matthew 27.15-26; Luke 23.13-25; John 18.39—19.16)

6Nna afahyɛ du a, ɔtɔ dɛ Pilate gyaa daduanyi kor biara a wɔbɛserɛ no ma hɔn. 7Nna woegu nyimpa bi a wɔfrɛ no Barabbas nye hɔn a wɔka no ho a wɔtseew etua na wɔnam etuatsew no do dzii ewu no mpokyerɛ. 8Na nyimpadodow no kɔr Pilate hɔ hyɛɛ ase serɛɛ no dɛ ɔnyɛ mma hɔn dɛ mbrɛ ɔtɔ dɛ ɔyɛ no. 9Na Pilate buaa hɔn dɛ, Ana hom pɛ dɛ migyaa Jewfo Hen no mema hom? 10Na ohun dɛ enyitan ntsi na asɔfompanyin no yii no mae. 11Na asɔfompanyin no hyɛɛ nyimpadodow no tsipia dɛ mbom ongyaa Barabbas mma hɔn. 12Na Pilate buae see hɔn bio dɛ, Ebɛnadze na hom pɛ dɛ meyɛ nyia hom frɛ no Jewfo Hen no? 13Na wɔtseaa mu bio dɛ, Bɔ no mbeamudua mu! 14Na Pilate see hɔn dɛ, Ebɛn bɔn na ɔayɛ? Na wɔtseatseaa mu mbordo dɛ, Bɔ no mbeamudua mu! 15Na Pilate pɛɛ dɛ ɔma nyimpadodow no abodwee no, ogyaa Barabbas maa hɔn, na Jesus dze, ɔkaa no mpire no, oyii no mae dɛ wɔnkɔbɔ no mbeamudua mu.

Nsordaafo no Si Jesus Atwetwe

(Matthew 27.27-31; John 19.2, 3)

16Na nsordaafo no dze no kɔr abangua no a ɔyɛ Ambrado Aban no do; na wɔfrɛfrɛɛ nsordaafokuw no nyina boaa ano. 17Na wɔdze tam memen furaa no, na wɔbɔɔ nsoɛ katraka soaa no; 18na wɔhyɛɛ ase kyiakyiaa no dɛ, Jewfo Hen nye yi o! 19Na wɔdze ndzɛmbir bɔɔ n’etsifi, na wohinahinaa ntafi guu no do, na wobuu ntwɛr sɔɔr no. 20Na wosii no atwetwe wiei no woyii tam memen no wɔ no ho, na wɔdze nankasa n’atar hyɛɛ no, na wɔdze no kɔr dɛ wɔrokɔbɔ no mbeamudua mu.

Wɔbɔ Jesus Mbeamudua mu

(Matthew 27.32-44; Luke 23.26-43; John 19.17-27)

21 # Rom 16.13 Na wɔhyɛɛ Simon Sirenenyi bi a ofi kwaa mu rutwa mu, Alɛksandar nye Rufus hɔn egya no, dɛ ɔnsoa ne mbeamudua no. 22Na wɔdze no kɔr beebi a wɔfrɛ hɔ Golgota a ne nkyerɛase nye Tsikwankora Bea. 23Na wɔmaa no wenyin a wɔdze eduhuam mɛɛr afora mu, naaso ɔannom. 24#Dwom 22.18 Na wɔbɔɔ no mbeamudua mu, na wɔkyɛɛ n’atar mu, twee tonto hwehwɛɛ dza obiara bɛfa. 25Na anapa ndɔnkron no mu na wɔbɔɔ no mbeamudua mu. 26Na wɔkyerɛɛw dza wogyinaa do buu no fɔ no wɔ n’etsifi dɛ JEWFO HEN. 27Na wɔbɔɔ edwotwafo beenu mbeamudua mu kaa no ho, ɔbaako wɔ n’enyimfa, na ɔbaako wɔ n’abankum. 28[Na kyerɛw no a ɔka dɛ, Wɔkaan no foraa emumuyɛfo no, baa mu.]#15.28 Tsetse akyerɛwfo no bi mmfa nkyekyɛmu 28 yi nnka ho. 29#Dwom 22.7; 109.25; Mar 14.58; Joh 2.19 Na hɔn a worutwa mu no, kaa ebususɛm tsiaa no na wɔwosowosoow hɔn tsir dɛ, Ɛhɛɛ! Ɔwo a idwuruw asɔrdan no na etow no ndaansa mu, 30gye woho fi mbeamudua yi ho si famu ɛ! 31Dɛmara so na asɔfompanyin no nye akyerɛwfo no sii no atwetwe dɛ, Ɔgyee binom: naaso onntum nngye nankasa noho. 32Afei wɔmma Kraest no, Israel Hen no, mfi mbeamudua no ho nsi famu, ma yenhu na yɛngye ndzi ɛ. Na hɔn a wɔbɔɔ hɔn mbeamudua mu kaa no ho no so yaaw no bi.

Jesus no Wu

(Matthew 27.45-56; Luke 23.44-49; John 19.28-30)

33Na ewiaber duebien durii no, sum hyɛɛ asaase no nyina do kodur ndɔnebiasa no. 34#Dwom 22.1 Na ndɔnebiasa no mu no, Jesus dze ndze kɛse kaa mu dɛ, Eloi, Eloi, lama sabaktani? Ne nkyerɛase nye dɛ, Me Nyankopɔn, me Nyankopɔn, ɔyɛ dɛn na apa me yi? 35Na hɔn a wogyinaa hɔ binom tsee no, wɔsee dɛ, Hwɛ, ɔrefrɛ Elija. 36#Dwom 69.21 Na baako tuu mbirika dze sapɔw kɔbɔɔ wenyin yerɛyerɛw mu, dze tuaa ndzɛmbir ano maa no dɛ ɔnnom, na ɔsee dɛ, Hom ngyaa ma yɛnhwɛ dɛ Elija bɛba ebeyi no anaa. 37Na Jesus dze ndze kɛse kaa mu no, ogyaa no sunsum mu. 38#Eks 26.31-33 Na asɔrdan no mu ntwamutam no tseew ebien fii sor besii ase. 39Na ɔhamupanyin a ogyinaa hɔ wɔ ne tsentsendo no, ohun dɛ oegyaa no sunsum mu dɛm no, ɔsee dɛ, Ampaara, nyimpa yi Nyankopɔn Ba a. 40#Luk 8.2, 3 Na mbaa bi so wɔ hɔ a wofi ekyir hwɛe: hɔn mu binom nye Mary Magdalene, Mary, James kuma nye Josef hɔn na, nye Salome; 41na hɔn so na ɔwɔ Galilii no, wɔkaa no do na wɔsoom no, wɔnye mbaa pii a wɔnye no baa Jerusalɛm.

Jesus ne Nsiei

(Matthew 27.57-61; Luke 23.50-56; John 19.38-42)

42Na odur ewimbir no, nna ɔyɛ Ahosiesieda, ɔnye da a odzi ahomgyeda no enyim ntsi no, 43Josef a ofi Arimatea, baguanyi nyimnyamfo a ɔno so rohwɛ Nyankopɔn ahenman kwan no bae, na osii no bo kɔr Pilate hɔ kɛserɛɛ Jesus no fun no. 44Na ɔyɛɛ Pilate nwanwa dɛ oewu dada; na ɔfrɛɛ ɔhamupanyin no bisaa no dɛ owui akyɛr anaa. 45Na ɔtsee no wɔ ɔhamupanyin no hɔ no, ɔdze fun no kyɛɛ Josef. 46Na ɔtɔɔ ndwera bi, na oyii no dze no kyekyeer ndwera no mu, na ɔdze no too nda a woetwa no ɔbotan bi mu no mu, na opireew ɔbo hiin nda no ano. 47Na Mary Magdalene nye Mary, Joses ne na, hwɛɛ mbrɛ wɔdze no toe.

Currently Selected:

Mark 15: MFANBRPC

Highlight

Copy