Mark 14

Wɔfa Jesus ho Apam

(Matthew 26.1-5; Luke 22.1, 2; John 11.45-53)

1 # Eks 12.1-27 Nna aka nda ebien ma apaho nye epitsi afahyɛ no edu; na asɔfompanyin nye kyerɛwfo no hwehwɛɛ mbrɛ wɔbɛyɛ nam nyansa mu akyer Jesus na woeku no: 2na wɔsee dɛ, Nnyɛ afahyɛ mu bi a, amma wentwiwentwi aammba ɔman no mu.

Wɔsera Jesus Ngo wɔ Bɛtani

(Matthew 26.6-13; John 12.1-8)

3Na ɔwɔ Bɛtani Simon kwatanyi no fie, na ɔtse edzidzi no, ɔbaa bi baa hɔ a ɔdze alabastron toa a nard ngohuam a ɔsom bo wɔ mu; na ɔbɔɔ toa no na ohuei guu n’etsifi. 4Na binom wɔ hɔ a wonyaa ebufuw wɔ hɔn mu, na wɔsee dɛ, Ebɛnadze ntsi na wɔresɛɛ ngohuam yi? 5Nkyɛ wobotum atɔn ngohuam yi agye bɔbor sika denare ahaasa na wɔdze ama ehiafo. Na wohwinhwinii tsiaa no. 6Na Jesus see dɛ, Hom ngyaa no; ebɛnadze ntsi na hom rehaw no? Ɔayɛ edwuma pa wɔ mo ho. 7#Deut 15.11 Na hom wɔ ehiafo wɔ hom nkyɛn daa, na aber biara a hom pɛ, hom botum ayɛ hɔn yie, na emi dze, hom nnyi me daa. 8Ɔayɛ dza obotum: oedzi kan abɛsera me nyimpadua akɔ sie mu. 9Nokwar mese hom dɛ, Beebiara a wɔbɛka asɛmpa yi wɔ wiadze nyina mu no, dza ɔbaa yi ayɛ so wɔbɛka dze ayɛ ne nkaa.

Judas Pen do dɛ Obeyi Jesus Ama

(Matthew 26.14-16; Luke 22.3-6)

10Na Judas Iskariot a ɔyɛ duebien no mu baako fii hɔ kɔr asɔfompanyin no nkyɛn dɛ obeyi Jesus ama hɔn. 11Na wɔtsee no, ɔyɛɛ hɔn dɛw, na wɔbɔɔ anohoba dɛ wɔbɛma no sika. Na ɔhwehwɛɛ mbrɛ obesi eyi no ama wɔ ber a ɔsɛ mu.

Jesus nye N’esuafo no Dzi Apaho no

(Matthew 26.17-25; Luke 22.7-14, 21-23; John 13.21-30)

12Na epitsi da a odzi kan a woku apahoguan no, n’esuafo no see no dɛ, Hen na epɛ dɛ yekesiesie ma ikedzi apaho no? 13Na ɔsomaa n’esuafo no mu beenu, na ɔsee hɔn dɛ, Hom nkɔ kurow no mu, na nyimpa bi a ɔso nsuhina behyia hom: hom nka no do; 14na beebiara a ɔbɛhɛn no hom nse ofiwura no dɛ, Kyerɛkyerɛfo no se, M’ahɔhodan a menye m’esuafo bedzi mu apaho no wɔ hen? 15Na ɔnoara ɔbɛkyerɛ hom sordan kɛse bi a wɔahyehyɛ mu, na woesiesie mu; hɔ na hom nsiesie mma hɛn. 16Na esuafo no sii mu kɔree, na wɔbaa kurow no mu na wobohun dɛ mbrɛ ɔsee hɔn no, na wosiesiee apaho no.

17Na odur ewimbir no, ɔnye duebien no bae. 18#Dwom 41.9 Na wɔtwetwer hɔ ridzidzi no, Jesus see dɛ, Ampa mese hom dɛ, Hom mu baako a ɔnye me dzidzi na obeyi me ama. 19Na ɔyɛɛ hɔn awerɛhow na wɔhyɛɛ ase nkorkor bisaa no dɛ, Ana emi a? 20Na ɔsee hɔn dɛ, Duebien no mu baako a ɔnye me to nsa wɔ ɔsɛn no mu no a. 21Na nyimpa Ba no rokɔ, dɛ mbrɛ wɔakyerɛw wɔ no ho; naaso nyimpa a wɔnam no do beyi nyimpa Ba no ama no ndue! Sɛ wɔannwo dɛm nyimpa no a, nkyɛ oye ma no.

Ewuradze Edzidzi no

(Matthew 26.26-30; Luke 22.14-20; 1 Korintefo 11.23-25)

22Na woridzidzi no, ɔfaa paanoo na ohyiraa do na obubui, na ɔdze maa hɔn; na ɔsee dɛ, Hom ngye: iyi nye me nyimpadua. 23Na ɔfaa kɔɔpow na ɔdaa ase no, ɔdze maa hɔn ma hɔn nyina nomee. 24#Eks 24.8; Jer 31.31-34 Na ɔsee hɔn dɛ, Iyi nye mo bɔgyaa a ɔyɛ ahyɛmu #14.24: Akyerɛwfo binom dze fofor sɔw ahyɛmu no do. no a dodowara ntsi woruhue egu no. 25Nokwar mese hom dɛ, moronnom wenyinaba no bi bio, dze ekodu da a mobɔnom no fofor wɔ Nyankopɔn ahenman no mu.

26Na wɔtoow ndwom no, wofiir edzi kɔr Ngo Bepɔw no do.

Jesus Ka dɛ Peter Bɛpa no

(Matthew 26.31-35; Luke 22.31-34; John 13.36-38)

27 # Zek 13.7 Na Jesus see hɔn dɛ, Wɔbɔto hom nyina fintsidua: na wɔakyerɛw dɛ, Mobɔbɔ oguanhwɛfo no, na nguan no abɔ apetse. 28#Mat 28.16 Naaso mo wusoɛr ekyir no mibedzi hom enyim akɔ Galilii. 29Na Peter see no dɛ, Sɛ wɔbɔto hɔn nyina fintsidua mpo a, nnyɛ emi a. 30Na Jesus see no dɛ, Nokwar mese wo dɛ, Ndɛ anadwe yi, ansaana akokɔ bɔbɔn mprɛnu no, ebɛpa me mprɛnsa. 31Na Peter dze, mbom ɔkaa no enyiberdo dɛ, Sɛ menye wo bowu mpo a, meremmpa wo da; na dɛmara na hɔn nyina so kae.

Jesus ne Mpaabɔ wɔ Getsemane

(Matthew 26.36-46; Luke 22.39-46)

32Na wodur beebi a wɔfrɛ hɔ Getsemane; na ɔsee n’esuafo no dɛ, Hom ntsena ha ma monkɔsɔr. 33Na ɔfaa Peter nye James nye John kaa noho, na ɔhyɛɛ ase bɔɔ hu na ɔbɔmee. 34Na ɔsee hɔn dɛ, Awerɛhow ahyɛ me kra do dze kɔ owu mu: hom ntsena ha, na hom nweɔn. 35Na ɔkɔr enyim kakra, na ɔkɔhwee famu na ɔsɔɔr dɛ, sɛ ɔbɛyɛ a, dɔn no mpa no ho nkɔ. 36Na ɔsee dɛ, Aba, Egya! Adze biara nnso wo yɛ: yi kɔɔpow yi pa mo ho; naaso nnyɛ dza mepɛ bi a, na dza ɔwo epɛ a. 37Na ɔbae bohun dɛ wɔdeda, na ɔsee Peter dɛ, Simon, ana ada? Ana enntum annweɔn dɔnhwer kor mpo? 38Hom nweɔn na hom nsɔr, amma hom aannkɔ nsɔhwɛ mu: sunsum no pɛ dze, naaso honam yɛ mberɛw. 39Na osii mu kɔr bio, na ɔkɔsɔree kaa asɛm kor no ara. 40Na ɔsanee bae bohun hɔn dɛ wɔdeda bio, na hɔn enyiwa akom; na woennya mbuae bi amma no. 41Na ɔbaa ne mpɛn ebiasa, na ɔsee hɔn dɛ, Hom nda dza aka yi, na hom nhom. Ayɛ yie! Dɔn no edu; hwɛ, woriyi nyimpa Ba no ahyɛ ndzebɔnyɛfo nsa. 42Hom nsoɛr ma yɛnkɔ; hwɛ, nyia oriyi me ama no abɛn.

Wɔkyer Jesus

(Matthew 26.47-56; Luke 22.47-53; John 18.3-12)

43Na hɔnara, ɔda do rekasa no, Judas a ɔyɛ duebien no mu baako bae, na nyimpadodow a wɔdzedze nkrantsee nye mpɔtsibaa fi asɔfompanyin nye kyerɛwfo nye mpanyimfo no hɔ ka no ho. 44Na nyia oyii no mae no maa hɔn asɛnkyerɛdze dɛ, Nyia mebɛfew n’ano no, nye ɔno: hom nkyer no na hom nsuo no mu yie mfa no nkɔ. 45Na odur hɔ no, ntsɛmara na ɔbaa Jesus nkyɛn na ɔsee no dɛ, Kyerɛkyerɛfo, na ɔfeew n’ano. 46Na wɔdze hɔn nsa susuoo no mu na wɔkyekyeer no. 47Na hɔn a wogyinagyina hɔ no mu baako twee ne krantsee bɔɔ ɔsɔfopanyin n’akowaa twaa n’aso. 48Na Jesus buae see hɔn dɛ, Ana hom firii baa mo do dɛ hom reba owifo do, na hom dze nkrantsee nye mpɔtsibaa rebɛkyer me yi? 49#Luk 19.47; 21.37 Daa mowɔ hom nkyɛn wɔ asɔrfi mu kyerɛkyerɛe no, hom annkyer me; na dɛ kyerɛwsɛm no bɛba mu ntsi a. 50Na esuafo no nyinara gyaa no hɔ, na woguanee.

51Na aberantsɛ baako bi kaa no do a nna oetu ndwera akata n’adagyaw do; na wɔkyeer no; 52na ogyaa ndwera no hɔ na ɔdze adagyaw guanee.

Wɔdze Jesus Kɔ Mpanyimfo no Enyim

(Matthew 26.57-68; Luke 22.54, 55, 63-71; John 18.13, 14, 19-24)

53Na wɔdze Jesus kɔr ɔsɔfopanyin no hɔ; na asɔfompanyin nye mpanyimfo nye kyerɛwfo no nyina behyiaa ne nkyɛn. 54Na Peter dzii n’ekyir wɔ ekyirekyir dze kodur ɔsɔfopanyin n’abanguado, na ɔnye asomfo no kɛtsenaa hɔ too gya. 55Na asɔfompanyin nye baguafo no nyina hwehwɛɛ dɛ wobenya Jesus ho dase bi dze eeku no; naaso woennya bi. 56Na dodowara gyee no ho dasewia, na hɔn dasee annsaa. 57Na binom soɛree gyee no ho dasewia dɛ, 58#Joh 2.19 Yɛtsee dɛ ɔsee dɛ, Mubodwuruw asɔrdan a wɔdze nsa ayɛ yi na ndaansa mu matow bi a wɔammfa nsa annyɛ. 59Na dɛm no mpo so hɔn dasee annsaa. 60Na ɔsɔfopanyin no gyinaa finimfin na obisaa Jesus dɛ, Immbua bi? Ebɛnadze na yinom regye wo ho dase yi? 61Na omuaa n’ano, na oemmbua bi. Na ɔsɔfopanyin no bisaa no bio dɛ, Ana ɔwo nye Kraest no, nyia woehyira no no ne Ba no? 62Na Jesus see dɛ, Emi nye no: na hom bohu nyimpa Ba no dɛ ɔtse tum no abanyimfa, na ɔreba wɔ sor nsuwusiw mu. 63Na ɔsɔfopanyin no sunsuaan n’atar mu, na ɔsee dɛ, Ebɛn hia na ohia hɛn adasefo bio? 64#Lev 24.16 Hom atse ebususɛm no: hom dwen dɛn? Na hɔn nyinara buu no fɔ dɛ ɔsɛ owu. 65Na binom hyɛɛ ase hinaa ntafi guu no do, na wɔkataa n’enyi, na wɔbobɔɔ no ekutuku, na wɔsee no dɛ, Hyɛ nkɔm! Na asomfo no bobɔɔ no asotɔr.

Peter Ka dɛ Onnyim Jesus

(Matthew 26.69-75; Luke 22.56-62; John 18.15-18, 25-27)

66Na Peter wɔ ase wɔ abangua no do hɔ no, ɔsɔfopanyin ne mbaawa no mu baako bae, 67na ohun Peter dɛ ɔroto gya no, ɔhwɛɛ no dzinn na ɔsee no dɛ, Ɔwo so nye Nazarɛtnyi Jesus nam. 68Na ɔsaan dɛ, Minnyim no, eso menntse dza ereka yi ase mpo. Na ofiir edzi kɔr paado; na akokɔ bɔnee. 69Na abaawa no hun no na ɔhyɛɛ ase see hɔn a wogyina hɔ no dɛ, Oyi so fi hɔn mu. 70Na ɔsaan bio. Na ɔkyɛɛr kakra no, hɔn a wogyina hɔ no see Peter bio dɛ, Ampa dɛ ifi hɔn mu, osiandɛ eyɛ Galiliinyi. 71Na ɔhyɛɛ ase dzii nsew na ɔkekaa ntam dɛ, Minnyim nyimpa yi a hom reka no ho asɛm yi. 72Na ntsɛmara na akokɔ bɔɔn ne mpɛn ebien. Na Peter kaa asɛm no a Jesus kaa kyerɛɛ no no dɛ, Ansaana akokɔ bɔbɔn mprɛnu no, ebɛpa me mprɛnsa. Na ɔhyɛɛ ase sui.

Currently Selected:

Mark 14: MFANBRPC

Highlight

Copy