Mark 13

Asɔrfi no Ne Nsɛe ho Nkɔnhyɛ

(Matthew 24.1, 2; Luke 21.5, 6)

1Na orifi asɔrfi mu no, n’esuafo no mu baako see no dɛ, Kyerɛkyerɛfo, hwɛ, abo akɛse bi nye aban akɛse bi so! 2Na Jesus see no dɛ, Ehu aban akɛse yi? Wonnkegya ɔbo kor a ɔda kor do a wonnkodwuruw egu famu.

Amandzehu na Atseetsee

(Matthew 24.3-14; Luke 21.7-19)

3Na ɔtse Ngo Bepɔw no do wɔ asɔrfi tsentsendo no, Peter, James, John nye Andrew bisaa no nsumaa mu dɛ, 4Kyerɛ hɛn aber a iyinom bɛyɛ hɔ: na sɛ iyinom nyina rebɛba mu a, n’asɛnkyerɛdze nye dɛn? 5Na Jesus hyɛɛ ase see hɔn dɛ, Hom nhwɛ yie amma obi aanndaadaa hom. 6Na dodowara bɛba wɔ me dzin mu dɛ, Emi nye no, na wɔadaadaa pii. 7Na sɛ hom tse ko nye akosɛm a, mma hom akoma nntu: na otwar dɛ ɔba, na ewiei no nnyae nndurii. 8Na ɔman bɔsoɛr ɔman do, na ahenman bɔsoɛr ahenman do; na asaasewosow bɛba mbeambea, na ɔkɔm bɛba: iyinom dze, awoko no ahyɛse ara a.

9 # Mat 10.17-20; Luk 12.11, 12 Na hom nhwɛ homho yie: na wobeyi hom akɔ mpanyimfo bagua mu, na wɔahwe hom wɔ nhyiamudan mu, na hom egyina ambradofo nye ahemfo enyim wɔ me ntsi, dze edzi dase akyerɛ hɔn. 10Na asɛmpa no, otwar dɛ wɔka kyerɛ amanaman nyina ansaana. 11Na sɛ wɔdze hom rokɔ ekeyi hom ama a, mma hom nndwendwen dza hom bɛka ho ansaana: na biribi a wɔdze bɛma hom dɔn no mu no, ɔnoara na hom nka: osiandɛ nnyɛ hom na hom kasa, na Sunsum Krɔnkrɔn no a. 12Na nua beyi nua ama owu, egya beyi ɔba ama; na mba bɔsoɛr wɔ awofo do na wɔama woeku hɔn. 13#Mat 10.22 Na nyimpa nyina bɛtan hom wɔ me dzin ntsi; na nyia ɔbɛtsena mu ekodu ewiei no, ɔno na wɔbɛgye no nkwa.

Ahohiahia Kɛse no

(Matthew 24.15-28; Luke 21.20-24)

14 # Dan 9.27; 11.31; 12.11 Na sɛ hom hu amambɔe ekyiwadze no dɛ ogyina mbrɛ ɔnnsɛ a (ma nyia ɔrekenkan no ntse ase dɛ ogyina hɔ ma ohonyi no), ɔno na hɔn a wɔwɔ Judea no nguan nkɔ nkokwaa do; 15#Luk 17.31 na mma nyimpa a ɔwɔ dan etsifi nnsian mmba dan mu, na eso mma ɔnnhɛn mu nnkɛfa biribi wɔ ne dan mu; 16na mma nyia ɔwɔ haban mu no nnsan n’ekyir bio mmbɛfa ne nkatado. 17Na hɔn a wɔafa efur nye hɔn a wɔma numfo wɔ nda no mu ndue! 18Na hom nsɔr ma iyinom aammba awɔwber mu. 19#Dan 12.1; Nyi 7.14 Na nda no mu bɛba ahohiahia kɛse a ofitsi Nyankopɔn ne wiadze mbɔe ahyɛse araa bodu aber no ɔmmbaa dɛm da, eso bi remmba da. 20Na sɛ Ewuradze enntwa nda no do tsia a, nkyɛ honam biara nnkenya nkwa, na ne mpamufo a ɔpaa hɔn no ntsi oetwa nda no do tsia. 21Na aber no sɛ obiara se hom dɛ, Hwɛ, Kraest no wɔ ha, anaaso, Hwɛ, ɔwɔ hɔ no a, mma hom nngye nndzi, 22na Kraest atorfo, nye nkɔnhyɛfo atorfo bɔsoɛr na wɔakyerɛ nsɛnkyerɛdze nye anwanwadze a sɛ anhwɛ a, wɔdze bɛdaadaa mpamufo no mpo. 23Na hom dze, hom nhwɛ yie: osiandɛ medzi kan aka ne nyina akyerɛ hom.

Nyimpa Ba no ne Mbae

(Matthew 24.29-31; Luke 21.25-28)

24 # Isa 13.10; Joel 2.10, 31; 3.15; Nyi 6.12; Isa 13.10; Eze 32.7 Na dɛm ahohiahia nda no ekyir no,

ewia bɛhyɛ sum,

na bosoom nnkɛma ne kan,

25 # Isa 34.4; Nyi 6.13; Joel 2.10 na nworaba fi sor bɔtotɔ,

na sor etum bɔwosow.

26 # Dan 7.13; Nyi 1.7 Ɔno na wobohu nyimpa Ba no dɛ ɔreba wɔ nsuwusiw do, wɔ tum nye enyimnyam kɛse mu. 27Na ɔno na ɔbɔsoma n’abɔfoe ma wɔaakɔboaboa ne mpamufo no ano efi mframa anan no mu, ofi asaase ano kesi sor ano.

Adɔmbadua no ho Esuadze

(Matthew 24.32-35; Luke 21.29-33)

28Hom nsua adɔmbadua no ho bɛ no: sɛ n’abaw yɛ momon, na oriyi ahaban a, nna hom nyim dɛ ɔhyewber abɛn; 29dɛmara na hom so sɛ hom hu dɛ yinom yɛ hɔ a, hom nhu dɛ abɛn, edu abowano. 30Nokwar mese hom dɛ, Mbasantsen yi nnkotwa mu akɔ gyedɛ yinom nyina ayɛ hɔ ansaana. 31Ɔsor nye asaase botwa mu akɔ na me nsɛm dze, wonnkotwa mu akɔ da.

Obiara Nnyim Da No Anaa Dɔn no

(Matthew 24.36-44)

32 # Mat 24.36 Na da no nye dɔn no dze obiara nnyim: abɔfo a wɔwɔ sor no so nnyim, Ɔba no so nnyim, gyedɛ Egya no nko. 33Hom nhwɛ yie, hom nweɔn na hom mbɔ mpaa, na hom nnyim da pɔtsee a ber no bodu. 34#Luk 12.36-38 Ɔtse dɛ nyimpa a ɔrodɔ mu a ogyaa ne fi, na ɔmaa no nkowaa tum, na ɔmaa hɔn nyina hɔn edwuma nkorkor, na ɔhyɛɛ abowanohwɛfo no dɛ ɔnweɔn. 35Dɛm ntsi hom nweɔn, na hom nnyim dɔn kor a ofiwura bɛba: adansaber o, esuom o, akokɔbɔnee o, anapahema o; 36amma ɔaammba awerɛfir mu emmbohu hom dɛ hom deda. 37Na dza meka kyerɛ hom yi, meka kyerɛ nyimpa nyina so dɛ, Hom nweɔn.

Currently Selected:

Mark 13: MFANBRPC

Highlight

Copy