Mark 12

Wenyin Turehwɛfo Bɔn no

(Matthew 21.33-46; Luke 20.9-19)

1 # Isa 5.1, 2 Na ɔhyɛɛ ase kasaa kyerɛɛ hɔn abɛbu mu dɛ, Nyimpa bi yɛɛ wenyin ture, na ɔgyee ho ban hyiae, na otuu wenyintwer, na ɔtoow abantsentsen wɔ mu, na ɔdze fɛɛm ekuafo bi, na ɔdɔɔ mu kɔr beebi. 2Na ber durii no, ɔsomaa akowaa bi wɔ ekuafo no hɔ dɛ ɔnkɛgye wenyin ture eduaba no bi wɔ ekuafo no hɔ mbra. 3Na ekuafo no kyeer no hwee no, na wɔmaa ɔdze nsapan kɔree. 4Na bio ɔsomaa akowaa fofor wɔ hɔn hɔ, na wɔbobɔɔ ne tsir pirapiraa no, na woguu n’enyim ase. 5Na ɔsanee somaa ɔfofor so; na ɔno dze, wokum no, nna afofor pii so: wɔhwee binom na wokum binom. 6Nna ɔwɔ obi so wɔ hɔ a ɔno yɛ no dɔba; na ekyir no ɔsomaa ɔno so wɔ hɔn hɔ, na ɔsee dɛ, Wɔbɛfɛr me ba. 7Na ekuafo no dze, wɔsesee hɔnho dɛ, Odziadzenyi no nye yi: hom mbra ma yenku no, na egyapadze no bɛyɛ hɛndze. 8Na wɔkyeer no kum no, na wɔtoow no fii wenyin ture mu hɔ kyenee. 9Dɛm a nna ebɛnadze na wenyin ture no wura bɛyɛ? Ɔbɛba abɛsɛɛ ekuafo no, na ɔdze wenyin ture no ama afofor. 10#Dwom 118.22, 23 Ana hom nnkenkaan kyerɛw yi pɛn dɛ,

Ɔbo a adantofo powee no,

Ɔnoara na, ɔabɛyɛ kutuwdo bo;

11 Iyi Ewuradze na Ɔayɛ,

Na ɔyɛ nwanwa wɔ hɛn enyiwa do?

12Na wɔpɛɛ dɛ nkyɛ wɔkyer no; osiandɛ wohun dɛ bɛ yi a obui no tsia hɔn; naaso wosuroo nyimpadodow no ntsi wogyaa no hɔ kɔree.

Tow a Wɔdze ma Kaesar

(Matthew 22.15-22; Luke 20.20-26)

13Na wɔsomaa Farisiifo nye Herod akadofo no mu bi dɛ wonkodua ne kasaa do mfa nsun no efir nkyer no. 14Na wɔbae no wɔsee no dɛ, Kyerɛkyerɛfo, yenyim dɛ eyɛ nokwafo, na ennyɛ nyimpa enyim nhwehwɛmu; eso innsuro nyimpa enyim asɛnka, na ekyerɛkyerɛ Nyankopɔn no kwan no wɔ nokwar mu. Ana ɔfa mbra mu dɛ yɛyi ntoboa ma Kaesar anaa oho? 15Yɛmma anaa mma yɛmma? Na ohun hɔn ndabraba no ɔsee hɔn dɛ, Ebɛnadze ntsi na hom rosɔ me ahwɛ yi? Hom mfa sika denare mbrɛ me ma monhwɛ. 16Na wɔdze bae. Na obisaa hɔn dɛ, Woana no mfonyi nye akyerɛw nye yi? Na wɔsee no dɛ, Kaesar dze a. 17Na Jesus see hɔn dɛ, Hom mfa dza ɔyɛ Kaesar dze mma Kaesar, na dza ɔyɛ Nyankopɔn dze mma Nyankopɔn. Na no ho yɛɛ hɔn nwanwa dodow.

Wusoɛr ho Asɛm

(Matthew 22.23-33; Luke 20.27-40)

18 # Ndwu 23.8 Na Sadusiifo so bi a wɔka dɛ wunyan nnyi hɔ no baa ne nkyɛn; na wobisaa no dɛ, 19#Deut 25.5 Kyerɛkyerɛfo, Moses kyerɛwee maa hɛn dɛ, Sɛ obi no nua wu na ogya ne yer, na oenngya mba a, no nua nwar ne yer no na ɔnwo mba mma no nua. 20Na enuanom beesuon wɔ hɔ: na nyia odzi kan no waar yer, na owui no, oenngya mba; 21na nyia otsia ebien no waar no, na owui, na no so enngya mba; nyia otsia ebiasa no dɛmara; 22na beesuon no enngya mba. Ne nyina ekyir no, ɔbaa no so wui. 23Na wunyan no mu, hɔn mu woana na ɔbɛyɛ ne yer? Osiandɛ beesuon no awar no. 24Jesus see hɔn dɛ, Ana nnyɛ yi ntsi na hom fom yi, dɛ hom nnyim kyerɛwsɛm no nye Nyankopɔn no tum no so? 25Na wɔsoɛr fi ewufo mu a, wɔnnwar eso wɔmma awar, na wɔtse dɛ abɔfo a wɔwɔ sor. 26#Eks 3.6 Na ewufo ho no dze, dɛ wobenyan no, ana hom nnkenkaan no wɔ Moses nwoma no mu, mbrɛ Nyankopɔn kasaa kyerɛɛ no wɔ Haban no mu dɛ, Emi nye Abraham Nyankopɔn, Isaak Nyankopɔn, Jakob Nyankopɔn? 27Ampaara, nnyɛ ewufo Nyankopɔn, mbom enyikamfo Nyankopɔn a: dɛm ntsi hom fom pii.

Mbra Tsitsir no

(Matthew 22.34-40; Luke 10.25-28)

28 # Luk 10.25-28 Na kyerɛwfo no mu baako bae bɛtsee dɛ woribisabisa nsɛm no, na ohun dɛ Jesus ebua hɔn yie no, obisaa no dɛ, Mbransɛm no nyina dza ɔwɔ hen na odzi kan? 29#Deut 6.4, 5 Jesus buaa dɛ, Dza odzi kan no nye dɛ, Israel, tsie: Ewuradze hɛn Nyankopɔn nye Ewuradze kor: 30na dɔ Ewuradze wo Nyankopɔn wɔ w’akoma nyina mu nye wo kra nyina mu, nye w’adwen nyina mu, nye w’ahoɔdzen nyina mu. 31#Lev 19.18 Na dza otsia ebien no nye yi: Dɔ wo nyɛnko dɛ wankasa wo ho. Mbrasɛm biara nnyi hɔ a ɔso kyɛn yinom. 32#Deut 4.35 Na kyerɛwnyi no see no dɛ, Kyerɛkyerɛfo, ampa aka no yie dɛ Nyankopɔn yɛ kor; na obi nnyi hɔ dɛ ɔno nko. 33#Hos 6.6 Na dɛ ebɔdɔ no wɔ w’akoma nyina mu, nye wo ntseasee nyina mu, nye w’ahoɔdzen nyina mu, na ebɔdɔ wo nyɛnko dɛ wankasa wo ho no, kyɛn hyew afɔr, nye afɔrbɔ nyina koraa. 34Na Jesus hun dɛ oebua nyansa mu no, ɔsee no dɛ, Ɔwo na Nyankopɔn n’ahenman no ntamu nntwe. Na obiara ennsi no bo dɛ obebisa no asɛm bi bio.

Messia no ho Asɛm

(Matthew 22.41-46; Luke 20.41-44)

35Na Jesus rekyerɛkyerɛ wɔ asɔrfi no mu no, obisaa dɛ, Ɔyɛ dɛn na kyerɛwfo no ka dɛ Kraest no yɛ David ba? 36#Dwom 110.1 Na David nankasa nam Sunsum Krɔnkrɔn mu ka dɛ,

Ewuradze see m’Ewuradze dɛ,

Tsena m’abanyimfa

Kodu dɛ medze w’atamfo mebɛyɛ w’ananadzegua.

37 Dɛm ntsi David noara frɛ no Ewuradze; na ofi hen bɛyɛɛ ne ba? Nna nyimpadodow nyina dze enyigye tsiee no.

38Na ɔkae wɔ ne nkyerɛkyerɛ mu dɛ, Hom nhwɛ yie wɔ akyerɛwfo a wɔpɛ ntar atsentsen mu nantsew, nye gua do nkyiakyia; 39ɔnye mpanyin gua wɔ nhyiamudan mu, nye mpanyin tsenabea wɔ edzidzi ase ho: 40hɔn na wɔbɔ ekunafo epoo, na wopetuw bɔ mpaa atsentsen kyerɛ: mese, woyinom benya afɔbu kɛsenara.

Okunafo no no Ntoboa

(Luke 21.1-4)

41Na ɔtsenaa ase wɔ sikakorabea no ne tsentsendo na ɔhwɛɛ mbrɛ nyimpadodow no sii dze sika guu sikakorabea no mu; na dodow a wɔyɛ ahonyafo no dze pii guu mu. 42Na ɔbaa kunafo hianyi bi so bae bɔtoow mpɛsewamba ebien a wɔbɛyɛ pɛsewa kor guu mu. 43Na Jesus frɛɛ n’esuafo see hɔn dɛ, Meka no nokwar mu kyerɛ hom dɛ, okunafo hianyi yi dze pii ebogu mu akyɛn hɔn a wɔdze bi ebogu sikakorabea no mu no nyina: 44osiandɛ hɔn nyina dza wɔwɔ ma abor hɔn do no, nna wɔdze bi ebogu mu, na oyi dze, ofi ne hia mu dze dza ɔwɔ nyina, n’asetsena nyina na ɔdze ebogu mu.

Currently Selected:

Mark 12: MFANBRPC

Highlight

Copy