Mark 11

Jesus Kɔ Jerusalɛm dɛ Konyimdzifo

1Na wɔbɛɛn Jerusalɛm wɔ Bɛtfage nye Bɛtani, wɔ Ngo Bepɔw ho no, ɔsomaa n’esuafo no mu beenu, 2na ɔsee hɔn dɛ, Hom nkɔ ekuroba a ɔda hom enyim no mu: na hom du hɔ ara pɛr a, hom bohu asoasopɔnkɔba bi a wɔamontan no a nyimpa biara nntsenaa do da: hom nsan no mfa no mbra. 3Na sɛ obi bisa hom dɛ, Ɔyɛ dɛn na hom reyɛ yi a, hom nse dɛ, Ewuradze wɔ no ho hia, na ntsɛmara ɔbɛma wɔdze no aba ha. 4Na wɔkɔree no wokohun asoasopɔnkɔba no dɛ wɔamontan no abow ho, wɔ abɔntsen petee mu, na wɔsaan no. 5Hɔn a nna wogyina hɔ no bi bisaa dɛ, Hom resan asoasopɔnkɔba no ayɛ dɛn? 6Na wobuaa hɔn dɛ mbrɛ Jesus see hɔn no ara; na wɔmaa hɔn kwan. 7Na wɔdze asoasopɔnkɔba no brɛɛ Jesus, na wɔtoow hɔn ntar guu no do; na ɔtsenaa no do. 8Na dodowara dze hɔn ntar sesɛɛw kwan mu; na binom so dze ndubaa a woetwitwa wɔ efuw mu. 9#Dwom 118.25, 26 Na hɔn a wodzii enyim no, na hɔn so a wodzii ekyir no tseaa mu dɛ,

Hosanna!

Nhyira nye nyia ɔnam Ewuradze dzin mu reba no!

10Nhyira nye hɛn egya David ahendzi a ɔreba no!

Hosanna wɔ sorsor!

11Na ɔkɛhɛɛn Jerusalɛm no, ɔkɔr asɔrfi no mu; na ɔahwɛ ndzɛmba nyina ewie, na adze resa no, ɔnye duebien no fii hɔ kɔr Bɛtani.

Jesus Dze Ndom Gu Adɔmbadua do

(Matthew 21.18, 19)

12Na adze kyee a wofi Bɛtani reba no, ɔkɔm dzee Jesus. 13Na ohun adɔmbadua bi wɔ ekyirekyir dɛ ahaban wɔ do no, ɔkɔr hɔ dɛ bi a nkyɛ obohu biribi wɔ do, naaso odur hɔ no oennhu biribiara dɛ ahaban nko: osiandɛ nna adɔmba ber nndurii. 14Na Jesus see adɔmbadua no dɛ, Mma obi nndzi wo do eduaba bio da. Na n’esuafo no tsee.

Jesus Tu Eguadzifo Fi Asɔrdan no mu

(Matthew 21.12-17; Luke 19.45-48; John 2.13-22)

15Na wodur Jerusalɛm; na ɔkɔr asɔrfi no mu, na ɔhyɛɛ ase paam hɔn a wɔtɔn nye hɔn a wɔtɔ wɔ asɔrfi no mu, na obutuuw sikasesafo hɔn apon nye hɔn a wɔtɔn mbubur no hɔn ngua; 16na ɔamma kwan amma obiara aannsoa adze ammfa asɔrfi no mu. 17#Isa 56.7; Jer 7.11 Na ɔkyerɛkyerɛe see hɔn dɛ, Ana wɔnnkyerɛw no dɛ,

Wɔbɛfrɛ me fi asɔryɛbea ama amanaman nyinara?

Naaso hom dze, hom ayɛ no edwotwafo tu.

18Na asɔfompanyin nye kyerɛwfo no tsee, na wɔhwehwɛɛ mbrɛ wɔbɛyɛ asɛɛ no: na wosuroo no, osiandɛ ne nkyerɛkyerɛ yɛɛ nyimpadodow nyina ahobow.

19Na adzesae no, Jesus nye n’esuafo no fii kurow no mu hɔ.

Adɔmbadua no ho Esuadze

(Matthew 21.20-22)

20Na anapa no a wɔresen no, wohun adɔmbadua no dɛ ofitsi no ndwow akyenkyen. 21Na Peter kaae na ɔsee no dɛ, Kyerɛkyerɛfo, hwɛ, adɔmbadua a edoom no no akyenkyen. 22Na Jesus buaa hɔn dɛ, Hom nya gyedzi wɔ Nyankopɔn mu. 23#Mat 17.20; 1 Kor 13.2 Na nokwar mese hom dɛ, Obiara a ɔbɛse kokwaa yi dɛ, Tutu na kɔhwe po mu, na ɔnnyɛ ekyingye wɔ n’akoma mu, na ɔbɛgye edzi dɛ dza ɔrese no ɔreyɛ hɔ no, ɔbɛyɛ hɔ ama no. 24Dɛm ntsi mese hom dɛ, Biribiara a hom sɔr bisa no, hom ngye ndzi dɛ hom enya na hom benya. 25#Mat 6.14, 15 Na sɛ hom gyina hɔ rosɔr, na sɛ hom nye obi wɔ asɛm bi a, hom mfa nkyɛ, ama hom Egya a ɔwɔ sor no so dze hom mfom aakyɛ hom. 26[Na sɛ hom ammfa annkyɛ a, hom egya a ɔwɔ sor no so nnkɛfa hom mfom akyɛ hom.]#11.26 Tsetse akyerɛw no bi mmfa nkyekyɛmu 26 yi mmba.

Jesus no Tum ho Asɛmbisa

(Matthew 21.23-27; Luke 20.1-8)

27Na wɔbaa Jerusalɛm bio; na ɔnenam asɔrfi no mu no, asɔfompanyin nye kyerɛwfo nye mpanyimfo no baa ne nkyɛn, 28na wobisaa no dɛ, Ebɛn tum na edze yɛ ndzɛmba yi, anaa woana na ɔmaa wo tum dɛ yɛ yinom? 29Na Jesus see hɔn dɛ, Mibebisa hom asɛm kor, na hom mbua me, na mebɛkyerɛ hom tum kor a medze yɛ yinom: 30John enuma no, ofir sor anaa ofir nyimpa? Hom mbua me. 31Na wɔdwendween ho wɔ hɔn ntamu dɛ, Sɛ yɛka dɛ, Ofir sor a, ɔbɛse dɛ, Ɔyɛ dɛn na hom anngye no enndzi? 32Anaa yɛnka dɛ, Ofir nyimpa? Nna wosuro nkorɔfo no, osiandɛ hɔn nyina buu John dɛ ɔyɛ nkɔnhyɛnyi ampa. 33Ntsi wobuaa Jesus see no dɛ, Yennyim. Na Jesus see hɔn dɛ, Mo so mennkɛkyerɛ hom tum kor a medze yɛ yinom.

Currently Selected:

Mark 11: MFANBRPC

Highlight

Copy