Luke 1
1
Nyienyim
1Ɔnam dɛ dodowara dze ato hɔn do dɛ wɔbɛkyerɛw ndzɛmba a aba mu wɔ hɛn mu no esiado esiado, 2dɛ mbrɛ hɔn a ahyɛse no wɔdze hɔn enyiwa hunii na wɔyɛɛ asɛm no ho asomfo no dze abrɛ hɛn no ntsi; 3Onyimnyamfo Kɛse Teofilus, mohwɛ a oye ma mo so dɛ mahwehwɛ ne nyina mu pɛpɛɛpɛ fitsi ahyɛse yi, mekyerɛw no esiado esiado brɛ wo, 4ama eehu nsɛm a wɔakyerɛkyerɛ wo no no mu nokwar.
John Onumanyi no N’awoo ho Nkɔnhyɛ
5 #
1 Mbe 24.10
Judea ɔhen Herod n’aber do no, nna ɔsɔfo bi wɔ hɔ a wɔfrɛ no Zekaria a ofi Abija no kuw mu; na ne yer nye Aaron ne mbabaa no mu bi a wɔfrɛ no Elizabet. 6Nna hɔn beenu nyina yɛ atseneneefo wɔ Nyankopɔn enyim, na wodzii Ewuradze ne mbransɛm ɔnye n’ahyɛdze no nyina do, dɛ asɛm biara ho nnyi, 7mbom nna wonnyi ba, osiandɛ nna Elizabet yɛ ɔbɔnyin, na afei hɔn beenu nyina so enyinyin papaapa.
8Da bi nna esi n’asɔfokuw do dɛ wɔyɛ edwuma wɔ Nyankopɔn enyim, 9na dɛ mbrɛ asɔfo dwuma no ne nhyehyɛɛ tse no, wɔtwee tonto yii no dɛ ɔnkɔ Ewuradze asɔrdan no mu nkɛhyew eduhuam. 10Na ber a ɔrehyew eduhuam no, nna ɔman no nyimpadodow nyina gyina abowano rosɔr. 11Na Ewuradze no bɔfoe begyinaa eduhuam afɔrmbukyia no nyimfa yii noho kyerɛɛ no. 12Na Zekaria hun no no, n’akoma tui, na hu kaa no. 13Na bɔfo no see no dɛ, Mma nnsuro, Zekaria, na wɔatse wo nkotoserɛ, na wo yer Elizabet bɔwo babanyin ama wo, na ato no dzin John. 14Na ibenya dɛw nye enyigye, na nyimpa dodowara bedzi n’awoo ho dɛw. 15#Nka 6.3 Na ɔbɛyɛ kɛse wɔ Ewuradze enyim, na ɔnnkɔnom wenyin anaaso nsa biara, na Sunsum Krɔnkrɔn bɛhyɛ no ma fi ne na ne yamu mpo. 16Na ɔbɛdan Israelmba dodowara aba Ewuradze hɔn Nyankopɔn hɔ. 17#Mal 4.5, 6 Na ɔnam Elija no sunsum nye no tum mu bedzi n’enyim akɛdan egyanom hɔn akoma aba hɔn mba ho, nye asoɔdzenfo aba tseneneefo hɔn nyimdzee mu, na oesiesie ɔman a wɔaboaboa hɔnho ama Ewuradze. 18Na Zekaria see bɔfo no dɛ, Mubodua dɛn mehu yi? Osiandɛ meyɛ akɔdaa na me yer so edzi mfe pii. 19#Dan 8.16; 9.21 Na bɔfo no buae see no dɛ, Emi nye Gabriel a migyina Nyankopɔn enyim, na wɔasoma me dɛ membɛkasa nkyerɛ wo, na menka wo nsɛmpa yi. 20Na hwɛ, ebɔtɔ mmum, na irunntum nnkasa dze akɛpem da a yinom bɛyɛ hɔ, osiandɛ anngye me nsɛm a ɔbɛba mu wɔ n’aber do no enndzi. 21Na ɔyɛɛ nkorɔfo a wɔrotweɔn Zekaria no nwanwa dɛ ɔakyɛr dɛm wɔ asɔrdan no mu. 22Na opuei no, oenntum annkasa annkyerɛ hɔn; na wohun dɛ oekenya enyido adzehu bi wɔ asɔrdan mu hɔ; na ɔnodze, ɔkɔr do araa dze ne nsa yɛɛ nsɛnkyerɛdze osiandɛ nna ɔda ho araa tɔ mmum. 23Na ɔbaa dɛ no som nda wiee du no, osii mu kɔr nankasa ne fie.
24Na nda no ekyir no ne yer Elizabet nyinsenii na osumaa noho abosoom enum see dɛ, 25Dza Ewuradze ayɛ me, wɔ nda a ɔabɔhwɛ me dɛ obeyi m’enyimguase wɔ nyimpa mu no, nye yi.
Jesus N’awoo ho Nkɔnhyɛ
26Na bosoom a otsia esia no mu no, Nyankopɔn somaa ɔbɔfo Gabriel wɔ Galilii kurow bi a wɔfrɛ no Nazarɛt, 27#Mat 1.18 wɔ ɔbaabun bi a wɔdze no ama ɔbanyin bi a wɔfrɛ no Josef a ofi David ebusua mu no awar no hɔ; na ɔbaabun no ne dzin dze Mary. 28Na ɔbaa no hɔ bɛsee no dɛ, Ei, ɔwo a wɔadom wo kɛse, dzi dɛw! Ewuradze dzi w’ekyir.#1.28 Tsetse akyerɛwfo binom dze “Ɔwo a woehyira wo mbasiafo mu” no ka ho. 29Na n’akoma tui wɔ kasa no ho, na ɔdwendween ne tsir mu dɛ ebɛn nkyia na iyi bɛyɛ. 30Na ɔbɔfo no see no dɛ, Mary, mma nnsuro, na enya Nyankopɔn enyim adom. 31#Mat 1.21 Na hwɛ, ibenyinsen, na awo babanyin na ato no dzin JESUS. 32#2 Sam 7.12, 13, 16; Isa 9.7 Ɔno na ɔbɛyɛ kɛse, na wɔbɛfrɛ no nyia ɔwɔ sorsor no ne Ba;
na Ewuradze Nyankopɔn dze n’egya David ahengua no bɛma no,
33na obedzi Jakob fi do hen daapem, na n’ahendzi nnkɔbɔ adze da.
34Na Mary see ɔbɔfo no dɛ, Minnyim banyin yi, yinom besi dɛn aba mu? 35Na bɔfo no buae see no dɛ,
Sunsum Krɔnkrɔn bɛba wo do,
na nyia ɔwɔ sorsor no n’ahoɔdzen bɛkata wo do;
dɛm ntsi so adze krɔnkrɔn a wɔbɔwo no no,
wɔbɛfrɛ no Nyankopɔn Ba.
36Na hwɛ, wo busuanyi Elizabet so enyinsen babanyin wɔ ne mberwaber mu, na nyia wɔfrɛ no ɔbɔnyin no, n’abosoom esia nye yi. 37#Gye 18.14 Na Nyankopɔn afamu dze, biribiara nnyi hɔ a onntum nnyɛ hɔ. 38Na Mary see dɛ, Hwɛ, Ewuradze afonabaa nye me: ɔnyɛ hɔ mma me dɛ mbrɛ w’asɛm se. Na bɔfo no fii ne nkyɛn kɔree.
Mary Kɛsera Elizabet
39Na nda no mu ara Mary soɛɛr ntsɛntsɛm kɔr Juda nkokodo nkurow no bi mu; 40na ɔkɛhɛɛn Zekaria fie kekyiaa Elizabet. 41Na ɔbaa dɛ Elizabet tsee Mary ne nkyia no, ɔba no huruuw ne yamu; na Sunsum Krɔnkrɔn hyɛɛ Elizabet ma, 42na ɔdze ndze kɛse kasae see dɛ, Nhyira aka wo wɔ mbasiafo mu, na nhyira aka wo yamu aba. 43Na iyi fi hen ba mo hɔ, dɛ m’Ewuradze ne na bɛba me nkyɛn? 44Na hwɛ, ntsɛmara a wo nkyia twaa m’asomu no, na abofra no dze dɛw huruhuruwii wɔ mo mu. 45Na nhyira aka nyia ɔagye edzi: na dza Ewuradze ama wɔabɛka akyerɛ no no bɛba mu.
Ayɛyindwom
46 #
1 Sam 2.1-10
Na Mary see dɛ:
Me kra tonton Ewuradze,
47Na mo sunsum dzi dɛw wɔ me Nyankopɔn m’Agyenkwa no mu.
48 #
1 Sam 1.11
Osiandɛ ɔabɔhwɛ n’afonabaa wɔ ne mbrɛadze asetsena mu:
Na hwɛ, ofitsi ndɛ ebusuasantsen nyina bɛfrɛ me osiarfo.
49Osiandɛ Otumfo ayɛ adze kɛse ama me;
na Ne dzin nye krɔnkrɔn.
50Na n’ehumbɔbɔr wɔ hɔn a wosuro no do
fi ebusuasantsen do kɛpem ebusuasantsen.
51Ɔdze ne basa akyerɛ ahoɔdzen,
Ɔapansam nkontompɔfo wɔ hɔn akoma adwen mu.
52 #
Job 5.11
Oetu etumfo efi hɔn nhengua do,
Na ɔama hɔn a wɔbrɛ adze no do.
53Ɔdze ndzepa amee hɔn a ɔkɔm dze hɔn,
na oegya ahonyafo kwan wɔ yafumpan mu.
54Oesuo n’akowaa Israel mu
dɛ ɔdze bɛkaa n’ehumbɔbɔr,
55 #
Gye 17.7
dɛ mbrɛ ɔkaa kyerɛɛ hɛn egyanom no,
ama Abraham nye n’asefo daa.
56Na Mary nye Elizabet tsenaa bɛyɛ abosoom ebiasa, na ɔsanee kɔr noara ne fie.
John Onumanyi no N’awoo
57Na Elizabet n’aber a ɔdze bɔwo durii, na ɔwoo babanyin. 58Na no sɔnmufo nye n’ebusuafo tsee ehumbɔbɔr kɛse a Ewuradze dze ehu no, na wɔnye no dzii dɛw. 59#Lev 12.3 Na ɔbaa dɛ ne ndaawɔtwe soe no, wɔbaa dɛ worubotwa abofra no twatsia, na wɔpɛɛ dɛ nkyɛ wɔbɛfrɛ no Zekaria, dɛ mbrɛ n’egya ne dzin tse, 60naaso ne na buae see dɛ, Oho, na wɔbɛfrɛ no John. 61Na wɔsee no dɛ, Obiara nnyi w’ebusua mu a ne dzin dze dɛm. 62Na wɔdze nsa bisaa n’egya dɛ mbrɛ ɔpɛ dɛ wɔfrɛ no. 63Na obisaa kyerɛwpon kyerɛɛw do dɛ, Ne dzin nye John. Na ɔyɛɛ hɔn nyina nwanwa. 64Na n’ano nye ne tɛkyerɛma buee amonmu hɔ ara, na ɔkasae yii Nyankopɔn ayɛw. 65Na hu kaa hɔn a wɔtsetse hɔn nkyɛn nyina, na nsɛm yi nyina wɔkekae wɔ Judea nkokodo nkurow nyina mu. 66Na hɔn a wɔtsee nyina dze too hɔn akoma mu dɛ, Abofra bɛn na oyi bɛyɛ? Osiandɛ Ewuradze ne nsa wɔ no do.
Zekaria no Nkɔnhyɛ
67Na n’egya Zekaria dze, Sunsum Krɔnkrɔn bɛhyɛɛ no ma na ɔhyɛɛ nkɔm dɛ,
68Nhyira nka Ewuradze, Israel Nyankopɔn;
Osiandɛ ɔabɔhwɛ no nkorɔfo na ɔapon hɔn,
69Na ɔama nkwagye ambɛn do ama hɛn
Wɔ n’akowaa David fie,
70dɛ mbrɛ ɔnam no nkɔnhyɛfo krɔnkrɔn a wɔwɔ hɔ fi tsetse no hɔn ano do kae no,
71dɛ wɔngye hɛn mfi hɛn atamfo nye hɔn a wokyir hɛn nyina nsamu;
72Dɛ ɔbɛyɛ ehumbɔbɔr ama hɛn egyanom,
na ɔakaa n’ahyɛmu krɔnkrɔn no;
73ntam a ɔkaa kyerɛɛ hɛn egya Abraham,
74dɛ ɔbɛma woeyi hɛn efi hɛn atamfo nsamu,
na yɛasom no dɛ hu nnyi mu,
75wɔ ahotsewee nye tsenenee mu
wɔ n’enyim hɛn nkwa nda nyina.
76 #
Mal 3.1
Na ɔwo abofra yi, wɔbɛfrɛ wo nyia ɔwɔ sorsor no nkɔnhyɛnyi:
Osiandɛ ibedzi Ewuradze n’enyim kan ekesiesie n’akwan mu,
77dze nkwagye ho nyimdzee akɛma no nkorɔfo
wɔ hɔn bɔnfakyɛ mu a
78ofi hɛn Nyankopɔn n’ayamuhyehye mbɔbɔrhu no mu,
a ɔnam do ma adzekyee a ofi sor abɔhwɛ hɛn no,
79 #
Isa 9.2
dɛ ɔbɛhyerɛn ama hɔn a wɔtsetse sum mu nye owu no sunsuma ase;
na wɔatsentsen hɛn anan akɔ asomdwee kwan no do.
80Na abofra no nyinii, na ɔyɛɛ dzen wɔ sunsum mu; na ɔtsenaa sar no do kodur da a ɔdze noho kɛkyerɛɛ Israel.
Currently Selected:
Luke 1: MFANBRPC
Highlight
Share
Copy
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.
